បញ្ឆោតស្នេហ៍សុភាពបុរសក្លែងក្លាយ(សេរីបញ្ឆោតស្នេហ៍វគ្គ២)ចប់

ភាគ៥៦

“ ការពិតនិងការកុហក ”

  គ្រឹប!
  ដេលលី ទាញទ្វាបន្ទប់បិទហើយក៏រហ័សដើរទៅទាញវ៉ាលីនៅជិតទូសម្លៀកបំពាក់មកបើករកខ្សែដៃមិត្តរបស់នាងម្តងទៀត។
   « ខ្ញុំត្រូវតែដឹងឲ្យបានថាតើមានរឿងអ្វីកើតឡើងឲ្យពិតប្រាកដ? » ដេលលី លើកខ្សែដៃឡើងសម្លឹងមើលដោយកែវភ្នែកសង្ស័យ ព្រោះអារម្មណ៍របស់នាងបានផ្តល់សញ្ញាឲ្យនាងច្រើនដងហើយថាច្បាស់ជាមានអាថ៌កំបាំងអ្វីលាក់បង្កប់នៅពីខាងក្រោយខ្សែដៃមិត្តភាពមួយគូនេះ។

   ថ្ងៃថ្មីឈានចូលមកដល់
  សកលវិទ្យាល័យសេអ៊ូល
  ង៉ក់!
  ដេលលី ចុះពីលើឡានរហ័សរត់ទៅរក ស៊ូជីន ដែលកំពុងដើរចូលសកលវិទ្យាល័យ។
  « ស៊ូជីន » ដេលលី លូកដៃឱបកមិត្តមានចេតនាចង់បង្ហាញខ្សែដៃមិត្តភាពដែលនាងពាក់នៅនឹងកដៃឲ្យ ស៊ូជីន បានឃើញ។
  « ដេលលី » ស៊ូជីន ចោលភ្នែកឃើញខ្សែដៃនៅលើកដៃរបស់ ដេលលី ហើយក៏ចាប់ផ្តើមភិតភ័យ ប៉ុន្តែក៏ប្រឹងសម្រួលអារម្មណ៍សួរទៅកាន់ ដេលលី ទាំងទឹកមុខស្លេកស្លាំង។
  « ហុឹម...ប៉ុន្តែថ្ងៃនេះខ្ញុំយកខ្សែដៃមិត្តភាពរបស់ពួកយើងមកពាក់ម្តងទៀត តើឯងមានបានយកខ្សែដៃមកតាមខ្លួនទេ? បើឯងបានយកវាមក ឯងយកមកពាក់ដែលមក ដើម្បីបានថតរូបគូផុសក្នុងអាយជីនោះអី ព្រោះខ្ញុំទើបបង្កើតអាខោនថ្មីអត់មានរូបល្អៗផុសទេ »
   « ខ្ញុំ...ខ្ញុំអត់បានយកមកទេ ចាំថ្ងៃក្រោយទៅ » ស៊ូជីន រដាក់រដុកហើយប្រញាប់ដោះស្រាយជាមួយនាងទាំងឫកពារភិតភ័យដូចជាបានធ្វើរឿងអ្វីខុស ទើប ដេលលី កាន់តែសង្ស័យខ្លាំងឡើង។
   « មិនអីទេ ថ្ងៃក្រោយក៏បានដែរ ប៉ុន្តែថ្ងៃនេះឯងមិនស្រួលខ្លួនមែនទេ? មើលទៅទឹកមុខមិនល្អសោះ »
   « ខ្ញុំមិនអីទេ មែនហើយខ្ញុំភ្លេចថាលោកសាស្ត្រាចារ្យហៅខ្ញុំឲ្យទៅជួបនៅបន្ទប់ការិយាល័យ ខ្ញុំសូមទៅសិនហើយ » ស៊ូជីន រកលេសគេចពី ដេលលី បានហើយក៏ប្រញាប់ដើរចេញទៅយ៉ាងលឿន។
   ដេលលី ឈរសម្លឹងមើល ស៊ូជីន ដើរចេញទៅដោយក្នុងចិត្តកាន់តែសង្ស័យខ្លាំងឡើង នាងចង់ដឹងណាស់ថា ស៊ូជីន កំពុងព្យាយាមលាក់បាំងអ្វីជាមួយនាងទៅ។
   « ហេតុអ្វី ស៊ូជីន មិនប្រាប់តាមត្រង់ថាខ្សែដៃរបស់នាងបានបាត់នៅពេលមានរឿងលើកមុននោះហើយ? ហេតុអ្វីក៏ចាំបាច់និយាយកុហកហើយធ្វើឫកពារភិតភ័យដូចបានធ្វើអ្វីខុសបែបនេះ? » ដេលលី ឈរគិតម្នាក់ឯងអស់មួយសន្ទុះ ប៉ុន្តែនាងនៅតែនឹកមិនឃើញរឿងដែល ស៊ូជីន ព្យាយាមលាក់បាំងនឹងនាងដដែល ទើបបានត្រឹមដកដង្ហើមធំហើយដើរទៅបន្ទប់រៀន។