🌸الميثاق_الجديد 🌸
🍂 حـب بـعـد الانـفـصـال🍂
🪔•وَ مِنْ رَمَٰادِ اُٰلْمَاضِي.....
إٰشْتَٰعَلَ لَهِٖيٰبُ اُلْحُبِ اُلْمَنْفِي•🪔
____part 8 _____:
هزات راسها فيها عاقدة حواجبها بإستغراب ونطقات بنبرة هادئة محاولة تهدنها
مريم: واش غايحير فيه اماما واش ماعرفاش فاش خدام ولا شنو؟ (بجدية) راك كتهضري على أحسن محامي فالمدينة ماغايحيرش فيا وفبنتي لي يقدر ياخدها ليا كاع لاعكست ليه
ضحكات بفقصة وضارت كاتقلب على تيليفونها معصبة وغير كتشالي بيديها لي كيتقرقبو فيهم البراصليات دالذهب لي دايرة
السعدية: يكون حتا وكيل الملك انا مالي!؟ عطيتو بنتي يتهلا فيها شكووون ييكون فملك الله لي يطلق و يزوج وقتما بغا
تكات بضهرها على المخدة كتنهد فاشلة غير متبعاها بعينيها
مريم(بانكسار): ماعطيتيهش اماما بابا لي لاحني ليه لابقيتي عاقلة
توقفات عن الحركة وضارت كتشوف فيها مخنزرة بحدة
السعدية: باك الله يرحمو كون بقا حي كون تفاهم معاه بيديه و لكن حتا دابا ماتخافيش كاينة انا
حركات راسها بلاحولة كضحك ضحكة تقيلة بالفقصة
مريم: إلا با عطاني ليه النهار لول مدلولة دابا نتي غاتعاودي تلوحيني عليه اماما كتر من مدلولة
هزات تيليفونها وجلسات كتقلب على النمرة مخنزرة
السعدية: أنا غانرجع لك كرامتك لي بهدل بيها يا المكلخة لي خارجة ليه من الدار باش يجيب ليها الخانزات
رمشات فيها بصدمة كتحس بقلبها كينزف من كمية السم لي تغرس فيه وناضت هازة بنتها بالكونة وخارجة لبيتها دوز فيه هاد الدقائق من الراحة لي تقدر تنعمهم دابا بينما رجعات لجحيمها لي متأكدة من أن مها ماغاترتاح حتى ترجعها ليه ضما منها أنها كتعاونها..
قبل ماتفوت باب الصالون نطقات السعدية لي غير مازادت ضغطات ليها الجرح وخلاتو يزيد ينزف أكتر
السعدية: بينما فكيت هاد الحريرة لي درتي لراسك سيري بدلي عليا ديك الحالة دوشي وضوري بالحالة راه بسييف ماتفقصيه ونتي هاكا... (ضارت كتشوف فيها مريم وهي مكملة نكيرها) أودي يا السعدية وياتاويلك فين ضاع لي ماورتي منو ياهاد البنت والو شابهة فطاسيلت بااك
تنهدات وزادت كملات طريقها هاربة من كلامها الجارح وهي ماحاساش بيه دخلات البيت وحطات بنتها فبلاصتها مغطياها جلسات حداها.. مددة وهي كتشوف غير فالمرايا لي فالبلاكار مقابلة معاها بلاما تحس بدات كتفكر معيورو ليها وهضرة مها وبدات تقارنهم مع حالتها وسهات كتذكر أيام عزوبيتها وشبابها لي تدفن من النهار عرفاتو
بلاما تحس لقات راسها واقفة قدام البلاكار كتشوف فالحوايج القلال لي بقاو فيه وواضح غايكونو صغارو عليها بحكم الوزن لي تزاد ليها بعد الولادة.. تنهدات بضيق وهزات البيجامة لي بانت ليها واسعة وتقدر تجيها عاد ناضت خارجة لدوش تجرب دير بكلام السعدية..
أنت تقرأ
🧡🍂 الــميــثـاق الـجـديـد 🍂🧡
Action🍂 #الــميــثـاق_الـجـديـد 🍂 🖇️ #حب_بعد_الإنفصال 🖇️ •وَ مِنْ رَمَٰادِ اُٰلْمَاضِي..... إٰشْتَٰعَلَ لَهِٖيٰبُ اَلْحُبِ اُلْمَنْفِي• بقلم✍️: 🦋 shahd bs and Riham dy and Mim ouna🦋 ✨🌼كما الورد الذي انفصل عن ساقه.. فُقدت ورحلت...
