🌸الميثاق_الجديد 🌸
🍂 حـب بـعـد الانـفـصـال🍂
🪔•وَ مِنْ رَمَٰادِ اُٰلْمَاضِي.....
إٰشْتَٰعَلَ لَهِٖيٰبُ اُلْحُبِ اُلْمَنْفِي•🪔
____part 35 _____:
قرب باش ينتر ليها شنو بقا فيديها وقبل ما يحط يديه عليها دفعات ليه يديه باليد التانية مخنزرة فيه بحدة لاحت الباكية خاوية والحبات الكارو كيفزكو بالما قدامو هز عينيه فيها فور ما نطقات والانفعال باين على فكلامها وحركاتها معصبة حتى من خصلات شعرها لي مطيرهم الريح
وفاء: فيق آززمر!! باركة من الحمااق راك وليتي كتخربق وتزيد.. تاحاجة ماكديرها مقادة بهاد العصبية الزايدة لي فيك!! فييق ايووسف..
دفع الكرسي لي واقف بيناتهم تاقفزات وقبل ماتبعد شدها من ذقنها مزير عليها وعينيه فعينيها كتطاير منهم شرارة الغضب لي ماقادش يكبحو..
يوسف: جيت نرتاح ماشي تفرعي ليا كر•ي داكشي دتأنيب الضمير خليتو ليك ولييها كسمعيني؟؟
زيرات على فكها كتغزز فسنانها وبنفس نظراتها الباردين مصوبين ناحيتو.. بحال النار والجليد مقابلين مع بعض..بحال السما والأرض عمرهم يتلاسقو.. ولكن غايبقاو ديما مع بعض فحميع حالاتهم.. ومهما مر عليهم..
تنهدات بقلة صبر وحطات يديها على يديه كتفك صباعو من ذقنها حتى رخف عليها ونطقات ببرود وهي كتبعد عليه راجعة بلور ناحية البوابة الكبيرة لي كدخل الفيلا الراقية لي وراهم
وفاء: ماغانفرعش ليك كر•ك كيفما طلبتي ولكن فكر كون كنتي فبلاصت روز واش غاتبغي يوقع ليك هاكا وتبعد على ماماك؟
هز عينيه فيها كيرمش بصدمة من كلماتها لي دخلو بحال الصاعقة مع أطرافو لأعماق روحو.. زعزع وهمو بالراحة لي طول الوقت كيحاول يزرعها فنفسو.. سرط الريق بعنــ ـف وعطاها بالظهر مزير على يديه كترعد ليه بطريقة مرعبة.. غمض عينيه كيزفر النفس بالجهد وضار كيتمشى فالرملة ويركلها برجلو تالف.. بكلمة منها قربلات ليه حساباتو لي بات ليالي كيفكر فيهم..
صوت التليفون لي تسمع كيفيبري فجيبو خرجو من سهوتو.. رخف صدرو بتنهيدة طوييلة ضاغط بجوج صباع على مدمع عينيه بتعب وجبد التليفون كيشوف فرقمها لي مامسجلوش بحتى اسم.. قطب حواجبو بتركيز حيت عارفها غاتكون هضرات مع باه.. دوز الخط مجاوبها وحطو على ودنيه كيحنحن موجد راسو لأسوء الاحتمالات
قبل ماينطق ويستفسر زاد عقد حواجبو من صوت البكا والتخنصيص ديالها وهي كتحاول تلتاقط أنفاسها وتهضر وهضرتها مامفسراش
مريم: باب..باباك ايوسف فالطبيب.. طاح بكريز (تسمع صوت سعال جاف من طرفها حبساتو بمشقة الانفس وكملات) لوكال غانسيفطها ليك فمسج
أنت تقرأ
🧡🍂 الــميــثـاق الـجـديـد 🍂🧡
Action🍂 #الــميــثـاق_الـجـديـد 🍂 🖇️ #حب_بعد_الإنفصال 🖇️ •وَ مِنْ رَمَٰادِ اُٰلْمَاضِي..... إٰشْتَٰعَلَ لَهِٖيٰبُ اَلْحُبِ اُلْمَنْفِي• بقلم✍️: 🦋 shahd bs and Riham dy and Mim ouna🦋 ✨🌼كما الورد الذي انفصل عن ساقه.. فُقدت ورحلت...
