🌸الميثاق_الجديد 🌸
🍂 حـب بـعـد الانـفـصـال🍂
🪔•وَ مِنْ رَمَٰادِ اُٰلْمَاضِي.....
إٰشْتَٰعَلَ لَهِٖيٰبُ اُلْحُبِ اُلْمَنْفِي•🪔
____part 84 _____:
كان راكن سيارتو قدام الباب وجالس لداخل شاد بين صباعو سجارتو كيمتص دخانها بنشوة … شعرو مرتب مرجعو لور وعينيه نايمين بالعيا لي كيمر بيه يوميا بسبب التزاماتو الكثيرة ...
كان بشوميز بيضة أنيقة وسروال توب فاللون الازرق غالق حال الباب ومنزل رجلو ... مع لمحها طفا الكارو و تقاد فبلاصتو مطلع رجلو وسد الباب ... عاد مال و تحنى حل الباب من جهتها كيشوف فيها عاقد حواجبو بإستغراب لحالها لي تغير فدقائق قلال ...
بصوت رخم هادئ بالدارجة غالبة عليها كلمات انجليزية بلكنة بريطانيا مثقنة النطق بحكم مدة تخالطو مع ناسها وعيشو معاهم فالغرب
ـــ ماري ... مالك! واقعة شي حاجة
قادات السمطة وتكات مغمضة عينيها كتحرك راسها بالسلب بشوية ونطقات بالدارجة
مريم : ماتشغلش بالك أصابر غير ياله بغيت غير نحط راسي و نغيب
حرك راسو بهدوء وديمارا ملبي طلبها باتجاه دارها ...
مريم مع حسات بيه تحرك عاد حلات عينيها كترمش بيهم ضارينها بالاضواء وميلات راسها كتشوف فيه مبتاسمة ...
مريم : فخبارك الحاجة الوحيدة لي خلاتني واقفة اليوم وفرحانة هي مجيتك نتا وفاء وزهير كنت خايفة ماتجيوش
شاف فيها صابر وحرك راسو بلا حولة حابس الضحكة
صابر : وعارفانا غانخليوك فنهار بحال هدا ؟ ياك انا مواعدك غانجي قبل كايتعلن عليه كاع كاين ...
مريم : شكرا حيت جيتي عندي وخليتي خدمتك
تبسم صابر كيحرك اسو بلا حولة وشاف قدامو ... كان داخل مع حي كلو إقامات راقية ... وقف قدام احداهن وضار عندها كيشوف كيفاش مغمضة عينيها ووجها عن قرب بداو كيبانو عليه علامات التعب ...
تمدات يدو مدوزها على خدها بحنان حتى حلات عينيها كتشوف قدامها فالحي وخطف يديه بسرعة عاد ضارت شافت فيه مبتاسمة ...
صابر : على سلامتك هانتي وصلتي
تقادات فجلستها كتقاد شعرها مور ودنيها مقنطها مطلوق بعدما تزاد فطولو و فكثافتو ...
مريم: غاترجع عاوتاني ديك الطريق كاملة ؟ (حرك راسو بالايجاب مبتاسم فوجها وهي عبسات) و مالك ما تبقاش هنا على الاقل غير هاد ليلة وغدا رجع
صابر : عندي غير هاد اليوماين أ ميمي ونرجع المغرب ماعنديش الوقت فين نحط راسي
قلبات شفايفها وضورات راسها مغوبشة وربعات يديها كتمتم بين شفايفها بغضب
مريم : نهار واحد لي غايكون ولد عمي و وفاء عاد بانت ليه الخدمة
حرك راسو بلاحولة ومد يديه ضور ليها وجهها من دقنها لعندو
صابر: بغيتيني نبقا ؟ (هزات كتافها مقلقة وهو ضحك ضحكة ثقيلة كتحرك من خلالها تفاحة آدم فعنقو) قولي بلي باغاني نبقا وغانبقى على ودك!!
أنت تقرأ
🧡🍂 الــميــثـاق الـجـديـد 🍂🧡
Action🍂 #الــميــثـاق_الـجـديـد 🍂 🖇️ #حب_بعد_الإنفصال 🖇️ •وَ مِنْ رَمَٰادِ اُٰلْمَاضِي..... إٰشْتَٰعَلَ لَهِٖيٰبُ اَلْحُبِ اُلْمَنْفِي• بقلم✍️: 🦋 shahd bs and Riham dy and Mim ouna🦋 ✨🌼كما الورد الذي انفصل عن ساقه.. فُقدت ورحلت...
