🌸الميثاق_الجديد 🌸
🍂 حـب بـعـد الانـفـصـال🍂
🪔•وَ مِنْ رَمَٰادِ اُٰلْمَاضِي.....
إٰشْتَٰعَلَ لَهِٖيٰبُ اُلْحُبِ اُلْمَنْفِي•🪔
____part 62 _____:
هزات عينيها فيه كترمش بسرعة معلية حواجبها واثار الصدمة من الجيست ديالو لي رغم أنه ماشي فوقتو ومع أنها ماكتشربش حتى القهوة فكرة أنه قاد ليه وتفكرها حركات فيها حاجات من شحال وهي كتقاوم باش تڨتلهم..
زفرات النفس بهدوء حاسة براسها رتاحت لهدوءو.. قربات هزات فنجانها شاداه كدفي بيه يديها وشافت فيه بابتسامة خفيفة هادئة تسللات بين شفايفها غصب على ملامحها المعتمة..
مريم: أولا انا ماخايفاش منك ولو تكون داير ليا السم وثانيا عارفاك مامكلخش لدرجة انك تڨتلني وسط دارك بالسم وثالثا شكرا على القهوة و واخا ماشي مهم دابا باش تعرف بغيت نقولك بلي راني ماكنشربهاش
حرك راسو بتفهم وهز يدو كيدوزها على رقبتو.. تبسم لجوابها وطريقة تحليلها للأمور ورد عليها بنفس هدوءها
يوسف: وشنو كتشربي؟
مريم: ماكاين لاش قول شنو عندك حيت خليت روز الفوق بوحدها تقدر تفيق وماتلقانيش حداها
رشف من كاسو مضيق عينيه من مرورة القهوة.. ومريم حاضياه بابتسامة صغيرة متبعة مع حركاتو لي كتشوفهم نسخة من باباه رغم خلافهم الكبير لي بعدو عليه مدة طويلة من حياتو، إلا أن نقط تشابههم عدييدة..
رجع يوسف حط الكاس على الطبلة وشاف فيها بجدية
يوسف: مانكدبش عليك اني فاش كنت جاي الطريق كلها وانا كنفكر فبنادم لي تجرأ وفوجودي معاك باش يخلص عليك.. (تنهد بخفوت) مانسيتهاش ومادازتش نلقاه نلقاه وكون كنت شاك فيك ولو واحد بالمئة مادوزش ليك، ولكن دازت و دابا ماجايش نتحاور معاك عليه
مريم(بعدم فهم): وعلى شنو جيتي تحاور معايا!
وقف هاز كاسو فيديه تاوصل حداها وجلس جنبها كيشوف فيها بنفس الجدية.. وهي بدورها تقادات فالجلسة جنبو مقابلة عينيها معاه بتركيز من شنو باقي جايها منو
يوسف: بما أننا دابا متافقين على الطلاق وخطواتو بغيت نقولك بلي وفاء.. (نطق اسمها وسكت ثواني مراقب نظرات مريم لي تلفو لثانية ورجعات ركزات فعينيه من ثاني عاد كمل) البنت لي كانت معايا اليوم هي لي غاتكلف بالملف ديالك وكاع المصاريف والحقوق ديالك نتي وروز غايوصلوك من طرفها باش نساليو هادشي فأقرب وقت وكل واحد فينا يكمل فطريقو كيما بغا
مريم نزلات عينيها للكاس لي شادة فيديها كدورو بين يديها مدفيا بيه وحركات راسها ببطئ
مريم: مايحتاجش قادة نجيب محامية راسي وحتى على ود الدار غدا إنشاء الله غانمشي باش تاخد راحتك
قرن حواجبو وشدها من يديها الخاوية كيقاد صباعها الرقاق وسط ضخامة يدو عاد هز فيها عينيه بنظرة زعزعات توازن دقات قلبها ونطق بنبرة خافتة عامرة حنان..
يوسف: وفاء هي لي غاتكلف امريم وعلى الدار انا عارف مشاكلك مع ماماك كيفاش دايرين وحتى علاقتك بيها مور المشكل لي بيناتنا يعني خاص نتحملو المسؤولية ديال هادشي لي بيناتنا بجوج، وكيما عاونتيني مع الوليد ماناوييش نخليك تخلصي مع مك بوحدك.. واخا؟؟
أنت تقرأ
🧡🍂 الــميــثـاق الـجـديـد 🍂🧡
Action🍂 #الــميــثـاق_الـجـديـد 🍂 🖇️ #حب_بعد_الإنفصال 🖇️ •وَ مِنْ رَمَٰادِ اُٰلْمَاضِي..... إٰشْتَٰعَلَ لَهِٖيٰبُ اَلْحُبِ اُلْمَنْفِي• بقلم✍️: 🦋 shahd bs and Riham dy and Mim ouna🦋 ✨🌼كما الورد الذي انفصل عن ساقه.. فُقدت ورحلت...
