🌸الميثاق_الجديد 🌸
🍂 حـب بـعـد الانـفـصـال🍂
🪔•وَ مِنْ رَمَٰادِ اُٰلْمَاضِي.....
إٰشْتَٰعَلَ لَهِٖيٰبُ اُلْحُبِ اُلْمَنْفِي•🪔
____part 59 _____:
تنهد بالجهد كيزيد يكبت عصبيتو وغضبو.. حرك راسو بهدوء ورجع شاف جهة ديك الطبلة لي كان باقي عليها الاطباق ودوسيات مرتبين وجنبهم بيسي محلول على الكرسي كانت معلقة فيست كلاص والكراسا التانية خاويين.. عض على لسانو كيضور عينيه بترقب فالمكان حتى حس بيها غاتبدا تبعد عليه عاد زير عليها وضار هز تليفونو وسوارت طموبيلتو من الطبلة وزاد دافع السيرفور تاكان غايطيحو وخرج بيها فجنبو خاشيها فيه.. وكون مادراعو لي محاوطينها كانت ممكن طيح فأي لحظة بسبب خطواتها الفاشلين..
خرجو نيشان لباركينغ ركبات وركب جنبها بلاما يتكلمو كل واحد وشنو شاغل تفكيرو.. كل واحد وأشمن موجة سافرات بيه لمحيط مختلف على الثاني.. رغم أن أساس المشكل واحد!
وصل قدام العمارة وشاف فيها بتردد واش يسول ولا يخليها براحتها خاصة وأنه ملاحظ عدم ارتياحها.. فلخر قرر يتبع قلبو ويستفسر منها بلاما يزيد يطول فهاد الوضع لي كل ما هو زايد و كيزيد يتعقد..
يوسف(نطق بارتباك ولهفة لجوابها): نتسناك هنا ولا ماباغاش ترجعي معايا؟
تنهدات مريم وميلات عينيها عندو كترمش فيه بعدم استعاب.. حتى فهم بلي ماسمعاتوش عاد عاود السؤال..
يوسف: واش نتسناك ولا باغا تبقاي فداركم ترتاحي؟
حركات راسها بالسلب وقلبات عينيها للزاج كتشوف ناحية الطابق فين كتواجد دارهم.. مامستاعداش تطلع تواجه مع السعدية لا فهضرة ولا فلقاء ماحاس براسها غاتمالك نفسها قدام إي استنقاص غاتعرض ليه من طرفها ولولا احتياجها ليها فاللحظة لي طاح مصطفى باش تقابل روز ماكانتش غاتقدر حتى تشوف فوجها..
يوسف(بعدم فهم): مافهمتش!!
مريم(بهدوء): انا لي غانتسناك هنا ونتا طلع جيب روز
حرك راسو بهدوء وضار حل الباب كيشوف فيها باستغراب.. و نزل من الطموبيل كيتمشى فاتجاه باب العمارة كيخربق فشعرو عيان وغافل على عيون مريم لي تعلقو فضهرو دامعين وغير كتنهد.. نهارها كان طويل وأحداتهم هوما بالذات عياوها نفسيا وجسديا...
زفرات النفس بعمق وغمضات عينيها مصطانعة النعاس حيت مافيها لي تجمع معاه حتى هو فشي حوار.. ماكاملاش دقائق وتحل لباب لور من طرف يوسف لي حط روز بكونتها ناعسة ورجع ركب بلاصتو مديماري بسرعة قليلة راد معاهم البال باش مايكسرش نعاسهم بجوج..
أنت تقرأ
🧡🍂 الــميــثـاق الـجـديـد 🍂🧡
Action🍂 #الــميــثـاق_الـجـديـد 🍂 🖇️ #حب_بعد_الإنفصال 🖇️ •وَ مِنْ رَمَٰادِ اُٰلْمَاضِي..... إٰشْتَٰعَلَ لَهِٖيٰبُ اَلْحُبِ اُلْمَنْفِي• بقلم✍️: 🦋 shahd bs and Riham dy and Mim ouna🦋 ✨🌼كما الورد الذي انفصل عن ساقه.. فُقدت ورحلت...
