🌸الميثاق_الجديد 🌸
🍂 حـب بـعـد الانـفـصـال🍂
🪔•وَ مِنْ رَمَٰادِ اُٰلْمَاضِي.....
إٰشْتَٰعَلَ لَهِٖيٰبُ اُلْحُبِ اُلْمَنْفِي•🪔
____part 64 _____:
ماتسناتش جواب منو وماحولاتش تشوف ردة فعلو و بالزربة زادت قاصدة الدروج كتمسح فدموعها لي عيات تقاومهم وماقدراتش.. كان السكات صعيب عليها ولكن البوح أصعب وملي باحت ورتاحت عااد استوعبت شحال كانت هازة! وباقا هازة وغاتبقى هازة طوول حياتها حيت رغم كاع شنو عاشت معاه هي فقدات عذريتها وعذرية مشاعرها معاه وسط كاع مشاكلهم
دخلات لبيتها عينيها كيقطرو بالدموع وقلبها كيتقطع كتر.. رغم كلشي كانت باغا يتصلح شنو بيناتهم.. مابقاتش كتحس براسها غاتقدر تعيش بعيدة عليه.. ولفاتو ولفات عيشتها معاه..
شمرات بنيفها كتحاول تنقص من صوت بكاها وقربات لروز طمنات عليها كانت باقا غارقة فنعاسها وجمعات ما تبقى من حوايجها بالبكى.. خلات شنو غاتحتاج فاليوم الموالي.. وتكمشات فبلاصتها كتشوف جهة ليفاليز ديالها ساهية كتفكر فشنو باقي تابعها وكيفاش غاتصرف مع حياتها المستقبلية ومن أي نقطة حبسات قبل زواجها باش ترجع تبدا منها وترسم ليها ولبنتها طريق جديدة..
التحت كان باقي يوسف جالس بنفس الطريقة لي مشات وخلاتو بيها.. عينيه على البلاصة فين كانت حاطة يديها ساهي وعينيه كتبان عليهم الصدمة.. هو بصح كان عارف بلي ظلمها معاه وبزااف وماعمرو تسوق للإحساس بالذنب حتى لهاد الساعة فين سامحاتو..
صوت تنهيداتو العالية كيتسمعو بين الحين والثاني حتى حس بالعيا عاد ناض طالع فالدروج بالهداوة فاااشل، دخل البيت وهز عينيه فيها كانت نعسات والدموع ناشفين على حناكها، تحت عينيها غارقين بالسهر والعيا وشحوب وجها واضح.. قرب جلس فوق الفوطوي لي من جهتها كيشوف فيها فيها شحال كتبان مهمومة.. تفكر هضرتها معاه "عمري ولا عرفت معنى هزان الهم والتخمام حتى عرفتك وعشت معاك" تنهد وناض تلاح فبلاصتو كيخربق فشعرو هز التيليكوموند طفا الضواو دالبيت وتقلب غمض عينيه غاينعس وهو يسمع الحس فبلاصت روز، مد يدو جر مخدة حطها على راسو كيصوط من هاد الموال لي ملو.. مزال ياله بدا يجيه النعاس وتسمع صوت روز عاد بدا يستوعب بلي هادي ممكن تكون آخر ليلة تباتها معاه!!
حل عينيه وناض بالثقالة كيرمش مع صوت بكاها وقف بسرعة وقرب لناموسيتها هزها بشوية ماعارفش كيفاش يدير ليها وهي مع شمات ريحتو وحسات براسها بين يد آمنة صوتها بدا كينقص بين يدين باها وكتكتاشف ريحتو وهو ساهي فملامحها البريئة لي كانو نسخة الطبق من مريم..
رجع جلس فبلاصتو شعل الفيوز حداه ناقص الضو على ود مريم لي ناعسة.. بقا كيشوف فروز لي كتحرك فحفضو وتنين بصوتها حالة عويناتها وكترمش بشفارها الطوال فباباها.. مد يدو بتردد ابهامو على خدها برقة وبدات كتميل راسها جهة صبعو وكتحل فمها فيها الجوع!
يوسف(بحنان): بنتي فيها الجوع؟! هاا فيك الجوع؟
ضحكات فور سماعها صوتو وبدات كتفركل وتجاوب معاه ضاحكة.. وقف شادها فيديه وزاد خرج من البيت نازل الكوزينة يشوف شنو يعطيها تاكل..
أنت تقرأ
🧡🍂 الــميــثـاق الـجـديـد 🍂🧡
Action🍂 #الــميــثـاق_الـجـديـد 🍂 🖇️ #حب_بعد_الإنفصال 🖇️ •وَ مِنْ رَمَٰادِ اُٰلْمَاضِي..... إٰشْتَٰعَلَ لَهِٖيٰبُ اَلْحُبِ اُلْمَنْفِي• بقلم✍️: 🦋 shahd bs and Riham dy and Mim ouna🦋 ✨🌼كما الورد الذي انفصل عن ساقه.. فُقدت ورحلت...
