သူ့ထံသို့အပ်နှံထားသော ငါ၏ချစ်ခြင်း ထာဝရရှင်သန်စေသတည်း...

PART 5

PART 5

သပိတ်‌ အထူးတို့အိမ်ကို ရောက်သည့်လေးနှစ်မြောက်နှစ်တွင် သပိတ်၏ဖွားဖွားဟုခေါ်သော ဖွားဖွားရယ်၊ တီလေးဟုခေါ်သော အရမ်းချောပြီး မြန်မာဆန်ဆန်နဲ့ကျက်သရေရှိသောအန်တီရယ်၊ သပိတ်လိုပဲ ခန့်ညားသောဦးဦးတစ်ယောက်ရယ် တို့သည် သပိတ်ကိုအိမ်ပြန်ရန် လာခေါ်နေကြသည်။

ဒီနှစ်ကျောင်းဖွင့်လျှင် ဆယ်တန်းတက်ရတော့မည်မို့ ဖွားဖွားကသူ့ကို မန္တလေးကိုပြန်လာနေစေရန် လာခေါ်နေသည်။

"မြေး‌လေးရဲ့ဆယ်တန်းကို ဒီဖွားဖွားက တက္ကသိုလ်ကအတော်ဆုံးပါ‌မောက္ခတွေကို အမြင့်ဆုံးလစာပေးပြီး အိမ်ခေါ်သင်ပေးမှာ ဘာမှစိတ်မပူနဲ့ ... မြေးက စာတော်နေပြီးသားဆိုတော့ ခြောက်ဘာသာဂုဏ်ထူးထွက်မယ်ဆိုတာကို ဒီဖွားဖွားကယုံပြီးသား... အိမ်ရောက်တာနဲ့ ငါ့မြေးကြိုက်တဲ့ ပါမောက္ခကိုလက်ညှိုးထိုးပစ်လိုက် ဒီဖွားဖွားက အကုန်ဖြည့်ဆည်းပေးမယ် ဟုတိပြီလားမြေးလေး"

ကိုယ်ဟန်အနေအထား၊ အသံနေအသံထားကအစ အထူးကိုကြက်သီးမွှေးညှင်းတို့ တဖြန်းဖြန်းထစေသည်။

သပိတ်တို့ကြွယ်ဝချမ်းသာတာကိုသိပေမဲ့ ထိုသို့အထိ ပါမောက္ခတစ်ယောက်ကိုလက်ညှိုးညွှန်ပြီး ခေါ်ခိုင်းလို့ရတဲ့အထိတော့ အထူးမသိခဲ့ပါ။

ဧည့်ခန်းမှာထိုင်နေကြတာက ဖေဖေရယ် သပိတ်ရယ်၊ သပိတ်ရဲ့ဦးငယ်၊ ကြောက်စရာကောင်းလောက်အောင်မာန်အပြည့်နဲ့စကားပြောနေသောဖွားဖွားရယ်နဲ့ အထူးက ဘယ်သူမှမမြင်အောင် တံခါးဝနားမှာပုန်းပြီး ခိုးနားထောင်နေ၏။

ပွင့်ပွင့်လင်းလင်းပြောရလျှင် ခိုးနားထောင်နေတယ်ဆိုပါစို့....

"ဖွားဖွားတို့အိမ်ကိုပြန်ရအောင် မြေးလေးရယ်နော်။ မြေးလေးပြန်မယ်ဆိုတာနဲ့ တီကြီးကိုဖွားဖွားက တခြားနေရာမှာ သွားနေခိုင်းမှာပေါ့ကွယ်...ပြီးတော့ ဒီနှစ်ဆို နေဓူဝံလေးလည်း ခြောက်ဘာသာဂုဏ်ထူးထွက်ထားတယ်၊ မြေးချင်းအတူတူဆိုပေမဲ့ ဖွားဖွားကတော့ ဒီမြေးလေးခြောက်ဘာသာဂုဏ်ထူးထွက်တဲ့နေ့ကိုပဲ ပိုမျှော်ချင်နေတာမြေးရယ်... ‌ဖွားဖွားက မြေးလေးကို သူတို့ထက်သာစေချင်တာ.... "