သူ့ထံသို့အပ်နှံထားသော ငါ၏ချစ်ခြင်း ထာဝရရှင်သန်စေသတည်း...

PART 55(Final 2)

 
PART 55(Final 2)

     ဆေးရုံတစ်ခု၏သားဖွားခန်းတွင် မိခင်ကသူ့ကလေး လူ့လောကထဲသို့ ရောက်ရှိလာရန်အတွက် အသက်နှင့်လောင်းကြေးထပ်၍ ရှိသမျှအားအင်တို့ အားသွန်ခွန်ဆိုက် ညှစ်ထုတ်ပြီးမကြာခင်တွင် အူဝဲဟူသော အသံရှင်က သားဖွားခန်းတွင် စူးနေလျက်...

အူဝဲ အူဝဲ...

    ရိုးရိုးမွေးထားသဖြင့် ရှိသမျှခွန်းအားတို့ကုန်ဆုံးသွားသည့်အတွက် တစ်ကိုယ်လုံးချွေးစေးတို့ အပြိုင်းပြိုင်း ဖြစ်နေသောအထူးသည် ပင်ပန်းနွမ်းနယ်နေ၍  သမီးလေးကိုတစ်ချက်သာ ငေးကြည့်လိုက်ရပြီး မျက်လုံးစုံကိုမှိတ်ထားကာ အနားယူနေသည်။ တော်ပါသေးသည် သမီးလေးက ကိုယ်လက်အင်္ဂါစုံစုံလင်လင်နှင့် အထူးတို့ဆီကို ကံထူးစွာရောက်ရှိလာပေလို့။

     သပိတ်သည်ခွဲခန်းထဲမှ  မျက်လုံးစုံမှိတ်ထားသောဇနီးလေး၏လက်ကလေးကို သူ့လက်ဖဝါးကြီးကြီးနှစ်ခုနှင့်ဆုပ်ကိုင်ထားပြီး နှုတ်ခမ်းနားတေ့ကာ မသိမသာ ကပ်နမ်းနေသည်။ သူ့မှာ အခုမှ မျက်ရည်ကျခွင့်ရတော့သည်။

     စောစောက အထူးဘယ်လိုတွေ အားထုတ်ညှစ်ခဲ့ရသလဲဆိုတာ လက်တွေ့မြင်ခဲ့ရသဖြင့် မိခင်တစ်ဦးဖြစ်လာလျှင် ပေးဆပ်ရသောအသက်ကို ပို၍တန်ဖိုးထားတတ်လာသည်။ တကယ့်ကိုမလွယ်သလို အသက်အန္တရာယ် မည်မျှကြီးမားသလဲဆိုတာ ကိုယ်ချင်းစာတတ်လာသလို  နားလည်လာရသည်။  သမီးလေး ကောင်းကောင်းမွန်မွန် ထွက်လာအောင် အထူး‌ နာကျင်မှုတို့ကိုဘယ်လောက်ထိ ပေးဆပ်ရသလဲဆိုတာ မျက်ဝါးထင်ထင် မြင်လိုက်ရသည့်မြင်ကွင်းက သူ့တစ်သက်မေ့နိုင်တော့မည်မထင်။

     သမီးလေးက ကျန်းကျန်းမားမားနှင့်‌မွေးဖွားလာပြီး ဆရာဝန်တို့လက်ထဲမှာရှိနေချိန် သပိတ်သည်အထူးအနားကနေ လုံးဝထွက်မသွားသေးဘဲ စောစောကမြင်ကွင်း၊ သူ အထူး အားကုန်သုံးအော်ဟစ်နေတုန်းက အထူးကိုဘယ်လောက်ထိစိုးရိမ်ခဲ့ရပြီး လက်တွေတုန် ခြေထောက်တွေလည်းတုန် တစ်ကိုယ်လုံးက တုန်နေပြီး တအားငိုချင်ခဲ့တာကို ပြန်သတိရသွားသည်။

    “ကိုကို မင်းကိုသိပ်ချစ်တယ်နော် အထူး”

     ပင်ပန်းလွန်း၍ အိပ်ပျော်သွားရှာနေပြီသော အထူးနဖူးလေးကို မြတ်နိုးစွာဖိကပ်နမ်းလိုက်ရင်း တိုးတိုးလေးပြောနေမိ၏။ အများကြီးနမ်းချင်သေးသည် ချစ်သည့်အကြောင်းတွေလည်း အများကြီးပြောချင်သေးည် ဒါပေမဲ့ အထူးကို သန့်ရှင်းရေး လုပ်ပေးရဦးမည်ဆို၍ သူသည် သမီးလေးကိုရင်ခွင်ထဲပွေ့ပိုက်ကာ ထွက်လာရသည်။