PART 28
သူအထူးကို ပိုတိုးဖက်လိုက်ပြီး...
"ကိုကိုတို့ ခိုးပြေးရအောင် နော်"
"အမ်"
ရုတ်တရက် ပြောလာသဖြင့် အထူး လန့်သွား၏။ ကိုကိုတစ်ယောက် ကြိမ်းသေတစ်ခုခုခံစားနေရပြီဆိုတာ သိလိုက်လျှင်...
"ငါတို့ ငါတို့က ဘာလို့ခိုးပြေးမှာလဲ... စာမေးပွဲလည်းရှိသေးတယ်၊ ဘွဲ့ရဖို့ကလည်း နောက်ဆုံးနှစ် တစ်နှစ်ကျန်သေးတယ်လေ... ကိုကို နင်ဘာဖြစ်နေလို့လဲဟင်"
"ကိုကို အထူးနဲ့မခွဲနိုင်ဘူး ခွဲရရင် ကိုကိုရူးသွားလိမ့်မယ်"
ဟင်။
သပိတ် ဘာအကြောင်းတွေ ပြောနေလဲဆိုတာ အထူး မစဉ်းစားတတ်တော့။ ဘယ်သူက လမ်းခွဲစကားပြောနေလို့လဲ။
အထူးသည် သပိတ်အား အံ့အားသင့်စွာနဲ့ မော့ကြည့်ပြီး စနောက်နေသောပုံ မပေါ်သည့်အပြင် သပိတ်၏မျက်ရည်စတို့ကို လက်တွေ့ကျစွာမြင်နေရသည်မို့ ဘာဖြစ်နေမှန်းကို နားမလည်နိုင်ရှာ။
"ဘယ်သူက ငါတို့ကိုခွဲမှာလဲ ကိုကိုရယ်... ဘာလဲ နင်အိပ်မက်ဆိုး မက်နေလို့လားဟင်"
သပိတ်၏မျက်နှာတစ်ခုလုံးကို အထူး လက်နှစ်ဖက်လုံးနှင့်အုပ်ကိုင်ပြီး အကြည့်မလွှဲစေဘဲ မေးကြည့်၏။
ဖေဖေသိသွားသည့်အပြင် သူတို့နှစ်ယောက်ကိုပါ သဘောမတူပါဘူးဟု အသိအလင်း ကြေညာထားသည့်အကြောင်းကိုလည်း ဒီအချိန်မှာ မဖွင့်ပြောနိုင်သလို ဖုံးကွယ်ထားခဲ့သည့်ကိစ္စအတွက်ကိုလည်း ဒီအချိန်မှာ ဝန်ခံရမယ့် အခြေအနေမဟုတ်နေသဖြင့် သူ့ခေါင်းတစ်ခုလုံးသည် ဘာလုပ်ရ ဘာကိုင်ရမှန်းမသိအောင် ရှုပ်ထွေးနေ၏။
"အင်း ဟုတ်တယ် ကိုကိုအိပ်မက်ဆိုးမက်နေတာ... ကိုကိုအထူးကို အရမ်းချစ်တယ်နော်"
ချစ်တယ်ဆိုတာကို အချိန်ခဏအတွင်းမှာတင် သူနှုတ်ကမရပ်မနားရွတ်ဆိုနေတာ လေးငါးခါမကတော့ပေ။
ထိုအခါ အထူးသည် အိပ်မက်ဆိုးကြောင့် ထိတ်လန့်နေရှာသည်ဟု ထင်မှတ်လိုက်မိသော ကိုကို့မျက်နှာလေးကို ပင့်မောထားစေပြီး မတ်တပ်ရပ်၍ ညီညာပြေပြစ်သော မျက်ခုံးထူထူပေါ်ကနဖူးကို ခပ်ဖွဖွလေး ဖိကပ်လိုက်ခွာလိုက်နဲ့ အားအင်ရလိုရငြာ နမ်းလိုက်သည်။ အထူးကို ပွေ့ဖက်ထားသောကိုကိုက အထူး အားပေးသောအနမ်းကြောင့် သူမကို တင်းတင်းလေး ဆွဲဖက်ထားပြန်လျှင် ကိုကို့ခေါင်းပေါ်မေးတင်၍ ဆံနွယ်တို့ကို ကြောင်ကလေးတစ်ကောင်ပမာ ပွတ်သပ်နေပေးမိပြန်သည်။ ပြီးလျှင် အထူး၏လက်သေးသေးတို့ဖြင့် သူ့ကျောပြင်ကျယ်ကြီးကို နှစ်သိမ့်ပုတ်ပေးနေလိုက်သည်။
YOU ARE READING
သူ့ထံသို့အပ်နှံထားသော ငါ၏ချစ်ခြင်း ထာဝရရှင်သန်စေသတည်း...
عاطفيةကိုကိုနဲ့ ညီမလေး ဇာတ်လမ်း
