سوق الأنام: لعنة النجوم السبعة

من منهم السابع؟ ١

٣٦

أحدث تطورات الأخبار في مصر الآن:

مدرس يفصل رأس طالب عن جسده امام كلية العلوم مُصرحًا انه لم يكن متعمداً.

جريمة بشعة حدثت في بولاق، والضحايا زوجان كبيران في السن تم قطعهم نصفين من قبل القاتل، الذي ما زالت هويته مجهولة حتى الآن.

تم احتلال أكثر من أربعمائة قرية حول مصر من قبل الميليشيات، وما زالوا مستمرين في احتلال قرى جديدة من يُباع فيها الناس أكثر ليستولوا على مصر تدريجياً، مع صمت تام وغريب من الحكومة.

*********

في صباح اليوم التالي، جاء عصام إلى السجن الذي به نوح، حيث أرسلوا له رساله مفادها أن نوح يطلب التحدث معه للضرورة القصوى.

هما الآن في ساحة المقابلة، وجلسا كلاهما، وعصام يقول:

_أتمنى الموضوع اللي جايبني فيه يستحق يا نوح، ياريت.

_أنا كنت عامل حسابي أقول لسليم، بس هما رفضوا اطلب حد غيرك.

_ليه يعني، عايز تقول إيه؟

_أنا عرفت أخونا الأخير.

ظل عصام يحدق فيه ثم مسح على وجهه حركة تدل على غضبه ونفاذ صبره، وقال بغضب:

_انت جايبني عشان الحوار التعبان بتاعكم دا؟ انت متهم بجريمة قتل يا عبيط، وبتقولي عارف أخويا الأخير؟ ما تعرفه ولا تتنيل. أنا مالي، أنا مسحول في قضية دلوقتي أوسخ من قضيتك.

_يا عصام اسمعني بس، وادي الكلام ده لسليم أو لعلا وكمل شغلك. في مدرس كيميا جديد جه في مدرستي، شبه أدهم بالظبط، وتصرفاته غريبة زيه برضو. واتقال انه كان بيدرس كيميا في ألمانيا، فواضح إن أمه ألمانية. اسمه نور الصاوي، قول لعلا وخليها تحقق عنه وتشوفه، لأنه أكيد هو أخونا."

_مدرس كيميا؟

_أيوة.

صمت عصام لحظة في شك، ثم قال:

_طيب، عايز تقول حاجة تانية؟

_شوفتولي محامي؟

_أيوة، مصطفى هيكون المحامي بتاعك متقلقش.

**********

في الوقت نفسه، نرى علا في غرفتها، وحقيبة ظهرها أمامها، تتنقل ذهابًا وإيابًا من خزانتها إلى الحقيبة وهي تحزم بعض متعلقاتها.

طُرِق الباب ثم سمحت بالدخول وكان هيثم.

_صباح الخير.

_صباح النور يا هيثم.

_هتسافري خلاص للتحقيق الغريب دا؟

_أه، معرفش ليه مدير الجريدة أصر إنه يخلينا نروح نحقق في حوار الميلشيات دا بنفسنا مع إنه خطير، بيقول إن نقابة الصحفيين طلبتنا بالاسم.