سوق الأنام: لعنة النجوم السبعة

محاولة لم الشمل ٢

٢٤

ظل مصطفى يحدق في نوح بملامح جامدة صادمة وبأعين محدقة لا ترمش، كذلك نجلاء.

_يعني أنا ابن السفاح الكافر ده؟ يعني أنا لقيط؟؟؟؟

_كلنا نتائج اغتصاب... ودي خطة منه... عايز يكون له نسل، بس أمهاتنا من أجناس مختلفة... يعني والدتك إيطالية ووالدة عصام روسية... وكده.

_إنت عارف إنت بتقولي إيه يا نوح؟ إنت بتقولي إنه بعد أكثر من ثلاثين سنة من عمري، أبويا وأمي دول مش أبويا وأمي؟ وأبويا وأمي الحقيقيين كفره وواحد منهم سفاح عالمي؟ إنت مستوعب المصيبة اللي بتقولهالي؟

ظل نوح صامتًا ثم قال:

_أنا واجهت الصدمة دي لوحدي يا مصطفى... وأنا والله الخطوة اللي عملتها دي عشان أقولك عملتها بطلوح الروح... أنا أول ما عرفت كنت عايز الأرض تتشق وتبلعني.

ظل مصطفى صامتًا ونظر إلى نجلاء وقال لها:

_نجلاء، إنتِ متأكدة إن التحاليل دي صحيحة؟

_آه، للأسف صحيحة... مستحيل تتزور بالشكل ده.

أسنَد مصطفى ظهره على كرسيه وهو يأخذ نفسًا عميقًا ليحاول تهدئة نفسه وتقبل الصدمة، هامسًا:

_إنا لله وإنا إليه راجعون، إنا لله وإنا إليه راجعون.

أمسكت نجلاء بيده لطمأنته ومواساته، ونوح يشعر بضيق وإحراج القاتل. نظر مصطفى إلى نوح وحين لاحظ أنه محرج ومنزعج، ابتسم ليطمئنه قائلاً:

_عشان كده أنا ارتاحتلك، مش كده؟

نظر نوح لمصطفى وحاول أن يبتسم بصعوبة ولم يرد، فقالت نجلاء:

_طب... هو أنت عرفت إزاي بكل ده يا نوح؟

_عرفت من غادة مراتي، قبل ما أتعرف عليها شافت واحدة مشردة هي اللي قالتلها عليا... وقالتلها إني أخوها ولما قابلتها كذا مرة عرفت إنها بتدور على بقية إخواتها. جيناتها مش موجودة في بنك الجينات بس... هي موجودة في مصر دلوقتي وبتلف الشوارع تقريبًا.

قال مصطفى قلقًا على اخته:

_إنت شوفتها؟؟

_للأسف لا... نفسي أشوفها بس مش عارف.

قلق مصطفى بشدة، والفكرة وحدها جعلته ينزعج ويخاف...أمعقول له أخت كل تلك المدة ومشردة في الشوارع وهو يجهل عنها؟

قال نوح:

_أنا عازم كل إخواتنا في فرحي... وواحدة واحدة هنعرفهم عن نفسنا، بس أنا سايبلك مهمة إنك تعرف عصام يا مصطفى عشان... أنا مش عايز أتكلم مع الراجل ده.

نظر نوح إلى ساعته ثم قال:

_طب... أنا محتاج أمشي بقى الوقت اتأخر.

وقف نوح ووقفا كلاهما، وقال نوح لمصطفى:

_أنا آسف إني دمرت حياتك كلها بكلامي المفاجئ ده... بس أنا كنت مضطر.