"ငြိမ်"

Ep 46

Unicode
------------

"ဦးအောင်ဇေယျအမှူးမြောက်၊ ထူးတစ်ယောက်တင်မူ

(ဦးလောက်) ပဘုရင်တစ်ဆူ

ဆင်ဖြူရှင်စခန်း

စဉ့်ကူးမင်းကောင်းစားမီ

ဖောင်းကားညီလုတဲ့ရွှေနန်း

ဦးဝိုင်းပ၊ ပထမခေါင်ပျော်

မြနောင်တော်ရေဖျန်း အမရဆောင်ပေါ် ဗွေကြငှန်းမှာလ ရွှေစာတမ်းဖွဲ့ပြန်

ကုန်းဘောင်ပျော်နေလိုဝင်း

ရွှေဘိုမင်းသားမြတ်ပုဂံ ချမ်းအေးဖို့ပန်းမွှေးပန် မန္တလေးတောင်လက်ရုံးရယ်နှင့်

မင်းတုန်းမင်း

သီပေါအရှင် ထီးနဲ့ပလ္လင် 

ဆယ့်တစ်ဆက်အုပ်စိုးတင် မုဆိုးဘုရင်စခန်းမို့လေး။ "

အသံနေအသံထားမှန်မှန်ဖြင့် ကုန်းဘောင်မင်းဆက်တေးထပ်ကို ရွတ်ပြပြီးသည့်နောက်တွင်တော့ ကလေးများက သူ့ကိုအရောင်တဖိတ်ဖိတ်တောက်သော စူးစမ်းလိုသည့်အကြည့်များဖြင့်မော့ကြည့်လာကြသည်။စတုတ္တတန်းလူမှုရေးဖတ်စာတွင်ပါဝင်သော တတိယမြန်မာနိုင်ငံတော်ကိုတည်ထောင်ခဲ့သည့် အလောင်းမင်းတရားကြီးဦးအောင်ဇေယျအကြောင်းကို မသင်ခင်မှာ ဖတ်စာအုပ်၌မပါဝင်သည့်ထိုတေးထပ်ကိုရွတ်ဆိုပြလိုက်တာမို့ ကလေးတွေကသိလိုစိတ်ပြင်းပြသွားပုံလည်းရသည်။

"အဲ့ဒါ ကဗျာလား ဆရာလေး"

အတန်းထဲကအနည်းငယ်သွက်သော လှရီက လက်ညှိုးလေးထောင်ကာ သူ့ကိုမေးခွန်းထုတ်လာ၏။စာသင်ချိန်၌ ဆရာနှင့်တပည့်ဆွေးနွေးခန်းကို အလေ့အကျင့်လုပ်ထားပေးတာမို့ ကလေးတွေက သူ့စာသင်ချိန်ဆိုလျှင် မေးခွန်းတွေ ပလုံစီအောင်မေးတတ်ကြသည်။သို့သော် သူတို့ကြောက်ရသော ဆရာမ ဒေါ်မြမြသွယ်အချိန်ဆိုလျှင်တော့ အခန်းတစ်ခုလုံးအပ်ကျသံပင်မကြားရလောက်အောင်တိတ်ဆိတ်လွန်းလှသည်။

"တေးထပ်လို့ခေါ်တယ် လှရီရဲ့ ကဗျာအမျိုးအစားတစ်ခုလို့ပဲ ဆိုကြပါစို့ တေးထပ်ကိုတူရိယာတွေနဲ့တွဲဖက်ပြီး နန်းတွင်းပြဇာတ်တွေမှာသီချင်းအနေနဲ့ ကပြ​ေဖျော်ဖြေခဲ့ကြတယ် မေတ္တာဖွဲ့တွေ သက်ဝင်ယုံကြည်မှုတွေ ဘဝရဲ့အဖြစ်အပျက်တွေကို တေးထပ်နဲ့ ဖော်ပြလေ့ရှိကြတယ် အခုလည်းကုန်းဘောင်နန်းဆက်ရဲ့ မင်းတွေအကြောင်းကို တေးထပ်လေးနဲ့ရေးဖွဲ့ထားတာကွ"