Unicode
"ကလင် ... ကလင် ... ကလင်"
လက်ထဲမှာ စုံပလုံစီအောင်ပွေ့ထားသော အထုပ်အပိုးတွေကိုမပြုတ်ကျအောင် အသာထိန်းထားရင်း အိမ်တံခါးမကြီးကိုသော့ခတ်ဖို့လုပ်နေစဉ် ဧည့်ခန်းထဲကကြိုးဖုန်းသံက စူးစူးဝါးဝါးထွက်ပေါ်လာလေသည်။ ဆွမ်ပရာဘွမ်ကပြန်ရောက်ရောက်ချင်း မဟော်ဦးနှင့် သမီးလေးကို အိမ်ကလေး၌ခဏထားခဲ့ပြီး သူကတော့ သမီးလေးအတွက်လိုအပ်တာတွေထွက်ဝယ်ရင်းတစ်ကိုယ်ရေတစ်ကာယပစ္စည်းတွေယူဖို့ ရွှေတောင်ကြားကအိမ်ဆီကို ခဏပြန်လာခြင်းဖြစ်သည်။ အဆက်မပြတ်အော်မြည်နေသောဖုန်းကို စိတ်မရျည်စွာနဲ့ကောက်ကိုင်လိုက်တော့ တစ်ဖက်ကထွက်ပေါ်လာသည်က အဖေဖြစ်သူရဲ့ ထောပနာပြုသံ။
"မင်းကြည်ညို မင်းဘာတွေလုပ်နေတာလဲ"
"ကျွန်တော်အလုပ်ကိစ္စတစ်ခုနဲ့ခရီးထွက်သွားတာပါ ဂျက်စမင့်ကိုဖုန်းဆက်ပြီးအကျိိုးအကြောင်းပြောထားခဲ့ပါတယ် သူမပြောပြဘူးလား"
"အေး... ပြောတယ် မင်းကတော့ အေးရာအေးကြောင်းခြေဆန့်ပြီးခရီးတွေထွက်နေတာ အခုအိမ်မှာဘာတွေဖြစ်နေလဲမင်းသိလား မင်းအမေမှာ မအိပ်နိုင်မစားနိုင် တငိုငိုတရီရီနဲ့ "
"အမေ ဘာဖြစ်လို့လဲ နေမကောင်းဘူးလား"
"စိတ်ထောင်းကိုယ်ကြေဖြစ်နေတာ ငါကိုယ်တိုင်လည်း ငါ့မျက်နှာကို ဘယ်နားသွားထားရမလဲမသိဘူး ရှက်ဖို့ကောင်းလိုက်တာကွာ ငါသိပ်ရှက်တယ်"
"အိမ်မှာ ဘာတွေဖြစ်ကြလို့လဲ ဂျက်စမင်ရှိလား သူနဲ့ဖုန်းပြောရအောင် ဖုန်းပေးလိုက်ပါလား"
"အေး... မင်းညီမက အခန်းထဲကအခန်းပြင်လည်းမထွက်ဘူး ထမင်းလည်းမစားဘူး ဘာစကားမေးမှလည်းမရဘူး တောက်.... ရှက်ဖို့ကောင်းချက်ကွာ "
"ကျွန်တော့်ကိုရှင်းအောင်ပြောပြပါဦး ဘာဖြစ်ကြတာလဲဆိုတာ"
"အေး... ပြောမယ် မင်းညီမ စံပယ်ညိုနဲ့ ဟိုအကောင် ငြိမ်ပြေအေးနဲ့ကွာရှင်းလိုက်ကြပြီ အဲဒီကိစ္စကိုလည်း ဒီကနေ့ ဂျက်စမင်အိမ်ကိုပြန်လာမှသိရတာပဲ သတင်းစာထဲမှာတောင်ပါလာပြီတဲ့ အဲဒီကောင် ငါတို့မိသားစုကိုအရှက်ခွဲတာ ဒါနဲ့ပါဆိုနှစ်ကြိမ်ရှိပြီ အခုလည်း သူတို့သဘောနဲ့သူတို့ကွာရှင်းလိုက်ကြကပြီး ငြိမ်ပြေအေးက ရန်ကုန်ကိုပြန်သွားပြီ ဒီမှာ မင်းကြည်ညို အဖေပြောမယ်.. အဲဒီကောင်အိမ်ပြန်ရောက်နေလောက်ပြီ မင်းသွားပြီး အကျိုးအကြောင်းရအောင်စုံစမ်းခဲ့ မင်းညီမကိုခေါ်ပြီး နောက်အပတ်ထဲ ရန်ကုန်လိုက်တက်လာမယ် ဒီကိစ္စကို ခင်ခင်ထိပ်ထားနဲ့တည့်ရှင်းမယ် ဘာပဲသိရသိရ ပြီးရင်ဖုန်းပြန်ဆက်ဦး"
YOU ARE READING
"ငြိမ်"
Romanceဖြူစင်တဲ့ကလေးဘဝငယ်စဉ်ကတည်းက သန့်ရှင်းတဲ့စိတ်လိပ်ပြာဝိဉာဉ်တွေဟာ မသိစိတ်မှာချည်နှောင်မိခဲ့ကြပြီး ကံ့ကော်ခင်းသည့်မြေဝယ် အရောင်တွေပြောင်းသွားကြတဲ့အခါ... ငြိမ်သက်ခြင်းဆိုတာ ထာဝရမရှိတဲ့ လူ့ဘဝကြီးက အဲ့ဒီစိတ်လိပ်ပြာလေးတွေကို ကြမ္မာငင်စေဖို့အကြောင်းဖန်လာတဲ့...
