WANTED PROTECTOR

CHAPTER 10 The Site

TINAWAGAN niya ang kaibigan.

"Pare may ipapagawa ako sa'yo."

"Ano 'yon?"

"Maghanap ka ng kahit anong ebidensiyang magpapatunay na sangkot si congressman Dela vega sa mga anumalya dito."

"Para ano naman 'yan?"

"Gusto kong makaganti kahit sa simpleng paraan lang."

"Utos ba 'yan ni don Jaime?"

Huminga siya ng malalim. Wala talaga siyang maililihim sa kaibigan.

"Tama ka, gusto niyang makahawak ng matibay na alas kung sakaling baliktarin siya ni congressman."

"Madali lang 'yan 'yong pamamaril ng anak niya ang isa na roon. Naunang nagpaputok ang anak niya kaya kung lumaban man kayo defense lang 'yon. Isa pa sa dami ng kalokohan ng congressman na 'yan sigurado akong hindi tayo mabibigo."

"Salamat pare"

"Basta ikaw sir."

Muli siyang huminga ng malalim.

"Naalala ko pare noong malasing ako at dinala mo sa ospital, ayoko na sanang banggitin ito pero galit na galit ako sa'yo noon!"

"Bakit naman?"

"Tang ina pare! Akalain mo bang hindi ikaw ang kausap ko ng gabing 'yon."

"Kung gano'n sino 'yon?"

"Sino pa kundi si Ellah!"

"Gago! Eh di para ka na ring ginisa sa sarili mong mantika!"

"Iyon ay dahil hindi ikaw ang dumating sa bar at sinundo ako, ang mga lintek na staff ng bar hindi naman sinabi kung sino ang sumundo sa akin. Ang mga gago, dahil daw Boss ang nakapangalan kaya 'yon ang kanilang tinawagan!"

Humalakhak ng husto ang kaibigan.

"Anong pakiramdam noong malaman mong ang boss mo ang kinakausap mo?"

"Para akong natuklaw ng ahas pare, sa sobrang hiya ko tinawagan kita ng 'di oras. Parang gusto kitang sakalin nang makita kita."

Panay na naman ang halakhak nito.

"Sayang hindi ko nakita! Eh 'di para kang basang sisiw sa tuwing haharap ka sa kanya? Akalain mo bang wala ka ng itatago sa boss mo?"

"Sinabi mo pa! Pero idinaan ko na lang sa biro para hindi halata."

"Diyan ako bilib sa'yo eh, kahit napahiya ka na, kayang-kaya mo pa ring makabawi."

"Gago! Hindi mangyayari 'yon kung dumating ka."

" Bakit kasi boss ang nasa contact mo?"

"Siyempre, amo ko 'yon eh."

"Kasalanan mo talaga pare, kung darling sana 'yon eh tiyak ako ang tinawagan dahil pare ang pangalan ko sa contact mo."

"Darling? Eh 'di nasakal ako ni don Jaime kapag nalaman 'yon gago!"

"Naks! Takot siya kay lolo!"

"Sira!"

"Sige nga pare sabihin mo nga lolo Jaime!"

" Gago!"

---
TAHIMIK na nagmamaneho ang kanyang bodyguard habang nasa biyahe sila papunta sa site.

Naidlip muna siya habang nakaupo sa tabi nito.

Limang oras din 'yon buhat sa siyudad patungong probinsiya kung saan naroon ang tunnel na pupuntahan nila.