مذكراتي العزيزة (كاملة)

الجزء الثاني والستون: تعقيدات

أستكمل أر كيه ونور حديثهما

"بجد انت عاوز تبقى اب عاوز تخلف أولاد؟"

"ايوة"

"شكرا انا بحبك قوي"

"انا كمان بحبك"

قبل أر كيه جبينها وظلا لدقائق في صمت حتى سألته نور

"لكن انت تأخرت ليه؟"

"قصدك ايه؟"

"انت قولت انك فضلت معهم ساعة ونص ايه اللي خلاك تتأخر جامد في الطريق تقريبا يوم بحاله"

"خلي بالك اني رجعت سايق مش طيران"

"ايوة عارفة لكن الطريق بياخد 6 ساعات انت اتاخرت 14 ساعة كنت فين؟"

نظر أر كيه للأسفل بإحراج

"انا تهت"

"نعم؟ ازاي؟"

"لما وصلت المطار سألت على رحلة تاني توصلني هنا لكن قالوا لي ان بسبب الأحوال الجوية كل الرحلات اتلغت واخر رحلة كانت طائرتي. فسألتهم على طريقة تاني ارجع بها واحد اقترح علي اني اخد عربية وارجع البيت وده اللي عملته"

"ليه ما قولتليش انك فوتت طائرتك؟"

"الساعة كانت 3 الفجر وما حبيتش اصحيك قولت اكلمك في الطريق لما اتاكد انك صحيت"

"طيب توهت ازاي ورجعت تاني ازاي؟"

"ده قصة طويلة خليها في وقت تاني النهاردة كان يوم طويل عليك وعلي ومحتاجين نرتاح"

"ماشي هننام لكن هتحكي لي كل حاجة بعدين"

"انت جعانة؟"

"اه لكن عاوزة انام اكتر. ننام وبعدين بكرة ناكل"

"لا انا هاقوم احضر لك العشاء"

"مش لازم"

أجابها أر كيه بحزم

"لا لازم. من النهاردة انت مش هتتحركي من على السرير فهماني؟"

"حاضر يا افندم"

ضحكا الإثنان معا

***************

اليوم التالي

كانا أر كيه ونور في المستشفى ليطمئنا على حمل نور مع دكتورة علياء

"بصي يا نور كل حاجة طبيعية وكويسة وتحاليل الدم ممتازة المشكلة الوحيدة اللي عندنا هي ضغطك العالي"

سألها أر كيه

"لكنها عمرها ما اشتكت من الضغط قبل كدة"

"أوقات ضغط الدم يرتفع مع الحمل ويروح بعدين زي أوقات ناس يجي لها السكر مع الحمل ويروح بعده عادي. وكمان وزنها الزيادة يعلي الضغط اكتر"

غضبت نور مما سمعت وعلقت

"الوزن الزيادة ده بسبب الهرمونات اللي اخدتها علشان احمل دلوقت جاية تقولي لي ان وزني خطر على الحمل؟"