لا تترك يدي (كاملة)

الموسم الثاني - الفصل الثالث

"السلام عليكم ورحمة الله وبركاته."

"وعليكم السلام ورحمة الله وبركاته. أزيك يا حبيبتي عاملة أيه؟ والأولاد عاملين أيه؟"

أبتسمت مريم وأجابت زوجها.

"الحمد لله. كله كويس. عيالك بس مغلبيني. أنت عامل أيه؟"

"الحمد لله أنا كويس."

"أخبار الفندق أيه؟"

"الفندق هو اللي قالقني."

"ليه مش مستعدين للإفتتاح يوم الخميس الجاي؟"

"لا مش حكاية الإفتتاح."

"امال أيه؟ صوتك قالقني. شكلك مرهق. في أيه يا خالد؟"

"مش عارف. مش مرتاح للمدير اللي عينته للفندق."

سندت مريم ظهرها على ظهر الكنبة الجالسة عليها وهي تراقب أولادها يرسمون معا وسألت زوجها عبر الهاتف.

"ليه؟ حصل منه حاجة؟ أنت كنت بتقول أنه أكتر واحد عنده خبرة من اللي اتقدموا للوظيفة."

"فعلا هو عنده خبرة كويسة قوي. المشكلة بس أنه تفكيره غير تفكيري خالص. مش مطمن أسيب له الفندق وأمشي."

"يعني أيه تفكيره غير تفكيرك فهمني."

سند خالد رأسه على سور السرير في غرفته في الفندق ورفع قدميه من على الأرض ومددهما أمامه وأجاب زوجته.

"يعني مثلا يا ستي عاوز يعمل بار في الفندق. أنا رافض الفكرة تماما. ورفضت بيع أي خمور في الفندق. هو معتبر ان ده تخلف ورجعية. بيقول ان لازم نعمل حساب السياح في الفندق. ومن غير السياح الفندق هيخسر. وعلشان نرضي السياح لازم نوفر لهم إحتياجاتهم من رقص وخمور. وطبعا أنا رافض تماما الكلام ده."

"لا يا خالد الله يكرمك. مش عاوزين قرش حرام يدخل بيتنا. خمور أيه ورقص أيه. الكلام ده مش بتاعنا خالص. ده فندق الناس تقعد فيه وتاكل وتشرب وتنام. مش لازم يرقصوا ويسكروا. الدنيا مليانة برا الفندق الحاجات ده. مش لازم يجيبوها من عندنا."

"ده كلامي. لكن هو كل خبرته في فنادق خمس نجوم وسياحية علشان كدة مستغرب تفكيري."

"بس أنت صاحب المكان. وكلمتك لازم هي اللي تتنفذ مش كلمته."

"طبعا أنا وضحت له الكلام ده كتير. لكن هو معتبر أن كلامي ده كله مالهوش لازمة لأنه شايفني شاب صغير وما أعرفش أدير فندق."

"بس أنت يا خالد عمر ما سنك منعك من أنك تتحمل مسئوليتك. أنت الحمد لله دارس وعندك خبرة كمان. الشغل اللي عملته في الفندق هنا وفي أسيوط والنقلة اللي نقلت بها الفنادق الكل يشهد لها. أنت كمان ما أعتمدتش على شغلك وخبرتك بس أنت كمان عملت دراسات عليا وأخذت دكتوراة في مجالك. يعني مفيش حد يقدر يشكك في قدراتك. مش عاوزاك يا خالد تحس ولو للحظة أنك مش قد المسئولية ده. أنت قدها جدا."