لا تترك يدي (كاملة)

الموسم الثاني - الفصل الخامس

"السلام عليكم ورحمة الله وبركاته."

"وعليكم السلام ورحمة الله وبركاته. عاملة أيه والأولاد عاملين أيه؟"

"الحمد لله. أنت عامل أيه؟ صوتك تعبان."

"أنا مش تعبان. أنا هلكـــــــان يا مريم."

"ليه بس يا حبيبي؟ خد بالك من نفسك. لازم تريح شوية."

"يا ريت لو ينفع. أنت عارفة ورايا مليون حاجة وحاجة."

"ما هو ما ينفعش يا خالد كل حاجة تعملها بنفسك. أمال أنت مشغل الناس اللي عندك ده ليه؟ إذا كنت هتعمل كل حاجة بنفسك."

"يا حبيبتي أنا مش بعمل حاجة بأيدي. لكن لازم أقف على دماغهم وأشرف عليهم كويس علشان أتأكد أن الدنيا ماشية زي ما أنا عاوز."

"أنا بس خايفة عليك يا حبيبي."

"عارف يا حبيبتي. معلش هي فترة تعب وأول لما الدنيا تتظبط هنرجع لحياتنا العادية تاني."

"ترجع لي بالسلامة يا رب. صح أنت هترجع أمتى؟ الأولاد نفسهم يشوفوك. أسيل كان نفسها قوي تحضر البطولة معها. نايمة وهي حاضنة الميدالية مستنياك ترجع علشان توريها لك."

أبتسم خالد لذكر قرة عينه وقال.

"وحشتني بنت الأيه. إن شاء الله هنزل مصر يوم أو أتنين على أخر الأسبوع ده أشوفكم وأرجع تاني."

قضبت مريم جبينها وقالت.

"هتيجي يوم أو أتنين بس يا خالد؟ ليه كدة؟"

"أنا أصلا أتصلت بك علشان أقول لك. في صحفي عاوز يسالك كام سؤال وطبعا ما ينفعش تقابليه لوحدك علشان كدة أنا هنزل القاهرة أخر الأسبوع نخلص من الموضوع ده وأرجع أشوف اللي ورايا."

شحب وجه مريم وهربت منه الدماء أبتلعت ريقها بصعوبة ورف قلبها من الخوف عند سماع زوجها يخبرها بلقاءها مع صحفي. سألت زوجها وتلعثمت في السؤال.

"ص.. صحف.. صحفي أيه؟ عاوز يسألني ليه؟ وهيسألني عن أيه؟"

أعتدل خالد في جلسته وشعر بالخوف في نبرة زوجته فقال.

"أيه يا مريم أهدي شوية يا حبيبتي. ده صحفي جبته إلهام بنت عاطف. هيعمل دعايا للفندق. فعمل لقاء صحفي معي الصبح وطلب يقابلك يسألك شوية أسئلة بس بكل بساطة."

"أسئلة؟ أسئلة أيه؟ ويسألني أنا ليه؟ أنت صاحب الفندق أنا مالي يسألني ليه؟"

"مالك يا حبيبتي قلقانة كدة ليه؟ هيسألك سؤالين عني وعن الأولاد وجوازنا. وبعدين ما أنا هكون معك خايفة من أيه؟"

هزت مريم رأسها بالنفي كأن زوجها يراها وقالت.

"أنا ماليش دعوة. مش عاوزة أقابل حد ولا أكلم حد ولا حد يسألني. أنا ماليش دعوة بالفندق ولا أعرف أتكلم عنه. أنا مش هقابل حد."