ماضي لا ينتهي

الحلقة ٢٧

#ماضي_لا_ينتهي
#بوسي_مصطفى

_____الحلقة ٢٧______

انشراح :  طيب يعني مش هتنزل تشتغل مع العيال
برعي : تشتغل ايه بس يا وليه
انتي عايزة الناس تشوفها وتروح تبلغ البوليس
احنا لازم نسلمها بنفسنا علشان نقبض المكافأة
انشراح : طب اقرا كده واشجيني يا برعي.
______________

في الجورنال
كارما : وقد رصد رجل الأعمال والعضو السابق لمجلس الشعب
مكافأة ماليه تقدر بمليون ونصف المليون لمن يدلي بمعلومات عن المكان المتواجد فيه ابنته ليان شوقي.... (باقي الاسم).
مدحت : مش تلاقيها انتي يا أستاذة كارما
كارما : ياريت بس انا عايزة استقيل علشان الاقي وقت
ادور براحتي
مدحت : ادعي إنها ترجع ل أهلها بالسلامة
انتي عارفه مافيا تجارة الأعضاء
شغاله مبترحمش
وكل يوم نسمع عن اخبار تشيب
كارما : عندك حق بس دول مليون ونص يزغللوا العين
ليلى داخله المكتب بسرعة
ليلى : كارما معلش ممكن تطبيعلي الورق دا بسرعه
عقبال م اوصل لمكتب رئيس التحرير
كارما : طب اقعدي كده وخدي نفسك
ليلى : مش وقته علشان مستعجله
كارما بهمس : اه طبعاً لازم تستعجلي مش الاستاذ راجع
الليلة برضو
ليلى : م انتي فاهمه كل حاجه اهو.
امسكي بقى
كارما : عدي الجمايل بقى يا أستاذة
ليلى :"هاتي يا كارما وانا اطبعهم
كارما : هههههههه
بهزر معاكي ولا مش عايزة تعزميني على فرح البشمهندس
ولا ايه
ليلى : انتي اول المعازيم
كارما ببتسامة : ميرسي ميرسي
ليلى : وطبعاً زمايلي كلهم معزومين.
مدحت : ألف مبروك يا أستاذة عقبال أولادك
ليلى : متشكره يااستاذ مدحت
وبتتلفت ليلى وخارجه من المكتب
تلمح صورة في الجورنال اللي قدام مدحت.
ليلى تتحقق من الصورة وتاخد الجورنال تقرأه.
كارما : ايه يا أستاذة مش كنتي خارجه ولا ايه؟؟!
ليلى : ثواني بس يا كارما.
مدحت : شوفتي البنوته دي يااستاذة ليلى؟؟
كارما : عارفه قعدت اتحقق من الصورة لاقيت فيها شبه
كتير من مريوم
بعيد الشر عنها طبعا
دي بنت تايهه من أهلها.
ليلى : انا شوفت البنت دي قبل كده.
كارما : معقوله؟؟!
ليلى : ايوه انا متأكدة بس مش فاكره فين بالظبط
كارما : لو متأكدة يبقى لازم تفتكري
دول مليون ونص يااستاذة
ليلى بتفكر : فين فين... مش فاكرة.
انا ماشيه
كارما : هتيجي تاخدي الورق
ليلى :"اه جايه معلش بقى جهزيه عقبال م اجي أخده
علشان مش هينفع اتأخر اكتر من كده.
كارما : حاضر حاضر.. طبعاً عارفه الحكاية.
ليلى تخطبها بالورق على دماغها
متبطلي بقى
كارما بتضحك
ليلى : متتلخميش في اللي في ايدك وتنسي تطبعي الورق.
كارما : حاضر هتلاقيه جاهز بس انتي متتأخريش.
_____________

انشراح : مليون ونص يا برعي
يلهوي دول يعيشونا ملوك.
برعي : مش اوي يعني
بس اهو حاجه نتسند عليها
واعمل المشروع بتاعي واكبر نشاطي
انشراح : لأ اسمع يا برعي الفلوس دي هنقسمها بالنص
بيني وبينك
واهو حق تربيتي للبت الكام يوم اللي قعداهم هنا
برعي :"تربية ايه يا وليه
دي البت لو راحت ل أهلها دلوقت وقالت على اللي حصلها منك
مش هنطول من المكافأة دي جنيه واحد
دا ممكن ابوها يحبسنا كمان
انشراح : يلهوي.
برعي : علشان كده عايزك تراعيها وتهتمي بيها
وتلبسبيها كويس وتعمللها أكل كده يروم عضمها علشان
تبقى فايقه كده وصحتها كويسه
وابوها يعرف اننا كنا مراعينها وواخدين بالنا منها
ويمكن يزود الفلوس شوية
اهو كده يبقى احلوت يا انشراح
انشراح : حقه لو اللي في دماغك حصل يا برعي هنتنغنغ والدنيا هتبقى فل يا راجل
برعي : ااااخ لما تبقى رايقه يا شوشو
انشراح : هههههههه اااخ منك انت
برعي بيقرب منها
يدخل مفك : معلم برعي... يا معلم..
برعي : ايه قلة المزاج دي؟؟!
انشراح : عايز ايه يا واد انت
مفك : البت طماطم واقعه على الأرض ومغمي عليها
انشراح تصرخ : يالهوووووووي
وتجري هي وبرعي يحملوا ليان على السرير
انشراح : شوية مياة يا واد يا عسليه
يجري عسليه ومعاه الكوباية
عسليه : اتفضلي يا ست شوشو
انشراح بتفوق ليان واخدها في حضنها
انشراح : قومي يا لولو قومي ياروحي...قومي يا نور عين شوشو
قومي يا قلبي من جوه
الولاد ينظروا لبعض بدهشه
مانجا : هي الوليه دي مالها اتجننت ولا ايه
عسليه : الظاهر كده
مفك : الموضوع في إنه يا غبي منك ليها
مانجا : وليه الغلط دا بقى يا ناصح انت
عسليه : عاملنا فيها المفتش كرومبو
مفك : علشان انتوا مش فاهمين حاجه
مانجا : فهمنا يا ناصح
مفك : لما افهم انا ايه الحكاية هقولكوا
عسليه بسخريه : هاهاها ولما انت غبي زينا ايه لزومها
فتحة الصدر دي يا شبح
مفك : بس يله منك ليها البت فاقت اسكتوا بقى.
ليان بتفتح عينها لاقيت انشراح قريبه منها
ليان وهي خايفه وبتبكي
خلاص حرمت يا ست شوشو مش هعمل كده
خلاص علشان خاطري متضربنيش انا هسمع كلامك
بس بلاش العصابه.
انشراح : عصاية ايه بس يا ليان يا حبيبتي اللي اضربك بيها؟؟!
معلش سامحيني انا غلطانه
ليان نظرت ل برعي والولاد ومش مصدقه ان انشراح تقول الكلام دا
قامت انشراح دخلت المطبخ وخرجت ب صنية أكل
انشراح : شوفي بقى انا عملتلك أكل يروم عضمك انتي
خاسه اوي ودبلانه عايزاكي تفوقي وتربربي كده
ليان : كل الاكل دا ليه
برعي : كلي يا بنتي واشبعي
ليان : بنتك؟؟!
مفك : هي ايه العباره ولامؤاخذة
يعني؟؟!
برعي : اسكت انت خليك في حالك
مانجا : واحنا مش هينوبنا من ورك الفرخة دي حاجه
ولا ايه النظام
انشراح : متبطلي بحلقه في أكل البنت يا بت انتي
خليها تعرف تاكل بنفس
ليان بفرحه : تعالوا كلوا معايا
انشراح : ياكلوا ايه هما أكلوا وشبعوا خلاص
اطلعوا يا عيال بره
ليان : خليهم يجوا ياكلوا معايا
انشراح بضيق : قربوا يا عيال
جريوا الولاد وقعدوا جنب ليان
وقعدت تقطع في الفرخه وتقسمها عليهم.
ليان : اتفضل يا عمو
برعي : لا يا بنتي انا أكلت
ليان في ايدها ورك فرخه : اتفضلي يا ست شوشو
انشراح وبتحاول تداري ضيقها وغيظها من ليان والولاد
اللي معاها : لا يا قلبي انا أكلت مع عمك برعي
مش كده يا برعي
برعي : ها..!
اه اه احنا أكلنا كلي انتي يا ليان.
تعالي معايا يا انشراح