ماضي لا ينتهي

الحلقة ٤٦

#ماضي_لا_ينتهي
#بوسي_مصطفى
_______________
الحلقة ٤٦

في شقة نوران
جلال : في ايه بس بتعيطي ليه دلوقت؟؟
نوران : مفيش يا جلال.
جلال : مفيش يعني ايه
اما عامله في نفسك كل دا ليه؟؟!
هروح اشوف مين على الباب وبعدين ابقى اشوف
حكايتك ايه
قام جلال يفتح باب الشقة.
جلال : راوية !!
راوية : معلش يا اخويا عارف إن الوقت متأخر
بس بصراحه مقدرتش استنى للصبح.
جلال : خير يا راوية
ادخلي نتكلم جوه.
دخلت راوية وقعدت في الصاله
بينادي جلال على نوران.
راوية : خليها مستريحه أنا جايلك في كلمتين ونازله
على طول
جلال : تنزلي ايه بس يا راوية
نوران...
خرجت نوران بعد ما مسحت دموعها
نوران : ازيك يا أم فادي
راوية : الحمد لله..
يا أم منه.
جلال : هاتي حاجه ساقعه يا نور
ولا اقولك جهزي العشا
راوية : عشا ايه بس بقولك جايه في كلمتين ونازله
على طول
دخلت نوران المطبخ وتركتهم مع بعض.
جلال : خير يا راوية
في حاجه حصلت؟؟
راوية : فادي طلق بنت خاله.
جلال ' ايه... بتقولي ايه؟؟!
راوية : هو دا اللي حصل.
جلال : اتجنن ولا ايه
هو مش عارف إن دي اخر فرصه
يعني خلاص بعدها العيش اتقطع بينهم.
راوية : عارف يا اخويا.. امال ناسي.
قولي اعمل ايه انا دلوقت.
جلال : هتعملي ايه في ايه يا راوية؟؟
هي دي حاجه ب ايدك
معروفه يعني الطلقه التالته مفيهاش رجوع.
راوية : نسأل شيخ يمكن كان مضايق ولا متعصب
انا بسمع من الشيوخ.
يقاطعها جلال : اسمعي يا راوية
انا لا شيخ ولا هفتي في حاجه زي دي
كل اللي اعرفه في النقطة دي
إن هما تلات طلقات وبعد كده كل واحد بيروح لحاله
متعصب مضايق زهقان دا بقى مش هفتي فيه.
راوية : انا مش عاوزه البيت يتهد يا جلال.
جلال : يعني يعيشوا مع بعض في الحرام يا راوية؟؟!
راوية : انا مقولتش كده
بس الشيخ يسمع منه الأول ويشوف دا حكمه ايه.
جلال : وهو صغير ما يروح لوحده وياخدها معاه.
وانا اصلا شايف من الأول إن ابنك مش راسي على بر
ولا عارف هو عاوز ايه.
راوية : معاك حق بس انا كنت بعمل لمصلحته
بس هو زي ما قولت مش عارف هو عاوز ايه.
نوران : الشاي يا جلال.
راوية : لا معلش يا أم منه انا هنزل.. تصبحوا على خير
جلال : تنزلي فين بس يا راوية
انتي لسه قعدتي.
راوية : معلش انا عارفه انك بتحب تنام بدري وانا شكلي جيت قومتكوا من النوم
جلال : لا ابدا انا مكونتش نايم.
راوية : طيب تتمسوا بخير.
وخرجت راوية.. ولسه نوران داخله جوه.
جلال : اقعدي يا نوران اشوف حكايتك ايه؟؟
نوران : مفيش حاجه يا جلال قولتلك تصبح على خير.
جلال : ما هو انا عاوز افهم مالك بقى ولا انزل ابات تحت
مبحبش انا النكد ده.
نوران : براحتك عاوز تنزل انزل.
جلال : قد كلامك ده؟؟
نوران : ما أنا قولت براحتك .
جلال : مديحة كلمتك في حاجه؟؟
نوران : مديحة شايفه انك ظلمتها واننا السبب
جلال : السبب في ايه؟؟
نوران : يمكن علشان الحمل
بس انت عارف أنا كنت عامله حسابي ومبقاش الواحد
اصلا فيه صحه لمناهدة العيال.
بس هي زعلانه.
جلال : معلش يا نور اعذريها.
نوران : انا حاسه بيها
ولو كان اللي يريحها تطلقني انا معنديش مانع.
جلال : ايه اللي بتقوليه ده.
نوران : ما هو انا كمان مش عارفه استريح وغيري تعبان
واحساسي إنها تعبانه بسببي دا
مخليني حاسه انس شايله ذنبها.
انا عايزة اعيش وبس يا جلال.
جلال : خلاص بس اهدي
هي شوية كده وهتروق ما انتي عارفه مديحه قلبها
ابيض ومبتشلش من حد.
نوران : ولا انا عمري ازعل منها ابدا
انا بعتبرها اختي بالظبط.
بس هي اكيد عمرها ما هتنسى
إن مراتك التانية اللي اتجوزتها
عليها.
وانا مش بلومها بالعكس
انا حاسه بيها
ولو رجع الزمن مكونتش هوافق على الوضع دا لا ليه
ولا ليها
جلال : ايه اللي بتقوليه دا يا نور.
نوران : معلش يا جلال متزعلش مني
انت راجل طيب وعاوز ترضينا
بس الحقيقة لا هي هترضي ولا انا راضيه كمان.
جلال بغضب : امال عاوزين ايه؟؟
نوران : تصبح على خير.
ودخلت نوران جوه وقعد جلال يفكر في كلامها لحد
م النوم غلبه
قام بفزع ودخل اوضته ينام.
___________