ماضي لا ينتهي

الحلقة ٥٤

#ماضي_لا_ينتهي
#بوسي_مصطفى
_______________
الحلقة ٥٤

مروان اخد التليفون وبيتصل بالشرطة.
الست : ابوس ايدك يا بشمهندس
أنا هسدد الفلوس كلها
الدهب اهو يا أستاذة حياة
والعشر تلاف جنيه أنا هبيع حاجه من البيت واسدد
لحضرتك الفلوس كلها
أنا عمري ما مديت ايدي على حاجة من بيتك..
الشيطان بس وسوسلي اسرقك علشان اسدد الديون
اللي ابني ورطني فيها..
بس انا هبيع أي حاجه هبعتلك فلوسك كلها.
ابوس ايدك يا أستاذة حياة قولي ل البشمهندس
ميتصلش ب البوليس
انا لو اتحبست هتبقى فضيحه لعيالي..
وهسيبهم لمين..
ونزلت في الأرض تبوس قدم حياة..
اللي بعدت عنها....
حياة : خلاص يا مروان بلاش تكلم البوليس هي هتسدد الفلوس زي ما قالت.
مروان : ايه اللي بتقوليه دا يا حياة؟!
حياة : علشان خاطري..
نظر مروان ل الست وبعدها نظر ل حياة.. اللي
كانت مدمعه من كلام الست.
______________

في شقة راوية...
قامت أميرة بفزع على صريخ ابنها الصغير...
اللي كانت راوية بتحاول تسكته.
مروان : ماله زياد يا ماما؟؟
راوية : معرفش يا بنتي.. الواد على صرخه واحدة
بقالها حوالي ساعة على النظام ده..
خديه كده يمكن يسكت معاكي..
أخدته أميرة.. الولد رافض الرضاعه وعمال يصرخ..
أميرة : اعمله ايه يا ماما؟
ماجدة : يمكن فيه حاجه بتوجعه.
راوية : هاتيه كده يا بنتي.
اخدت راوية الولد وخلعت اللبس بتاعه وبتدور
تشوف ايه اللي بيوجعه..
راوية : اتصلي ب اخوكي يجي معايا نروح نكشف عليه.
أميرة : انا اكلمه؟!
راوية : خلاص يا أميرة خدي ابنك وانا هكلمه..

بعد شوية في المستشفى لانهم ملقوش عيادة شغاله
في الوقت ده..
أميرة : اشعه ليه يا خالي دا غير التحاليل كمان؟؟
جلال : عادي يااميرة دي حاجه لازم تتعمل
متقلقيش بس.
راوية تعالي اقعدي مع أميرة
وانا داخل جوه...
أميرة بتبكي..
راوية : مش خالك طمنك يا بنتي ايه لازمة العياط
دا دلوقت؟
أميرة : خايفه على ابني يا ماما.
راوية : لا متخافيش هيبقى كويس
استنى اما ارد على ماجدة
تلاقيها بتتصل علشان تطمن.
___________

في شقة هيثم...
هيثم : يا رانيا يا حبيبتي
انتي شاغله نفسك بيها ليه
تقعد ولا تمشي مش فارقه معايا في حاجه..
وانتي بطلي تفكري فيها.
خلي بالك من بيتك وولادك هما أولى إنهم يشغلوا
تفكيرك اهتمي بيهم يا حبيبتي.
رانيا : ومين قالك إني مش مهتميه بيهم بقى؟!
بس دي قصادي على طول وانا طالعه وأنا نازله
وبتقعد تلقح بالكلام..
غصب عني بستفز وممكن ارد
اعمل ايه؟؟
اتمالك اعصابي ازاي وقتها؟!
هيثم : اشغلي نفسك وانتي طالعه وانتي نازله
ولا كأنك شايفاها..
صدقيني دا افضل..
وهي مع الوقت هتزهق اصلا..
ما هو أنا مش هقف قصاد ماما
واقولها لا أنا لا هي يا رانيا..
دا حتى يبقى عيب في حقي.
رانيا : انت شايف كده؟؟
هيثم : ايوه يا حبيبتي.
رانيا : مروة هتسافر قريب.
هيثم : لسه يحي هيسافر الأول يخلص الورق
بتاعهم وبعدين ييعتلها..
وبعدين انتي زعلانه ليه؟
ما تسبيها تسافر ويعيشوا مع بعض.
دا الوضع الطبيعي يا حبيبتي.
رانيا : ايوه بس كانت مونساني يا هيثم.
دلوقت بقى بعد ما تسافر هقعد لوحدي؟!
هيثم : بقولك ايه..
رانيا : قول يا حبيبي.
هيثم : اعملك مشروع كده على قدك واهو تقضي
فيه وقت فراغك
وهيكون في الوقت اللي الولاد فيه في المدرسة.
رانيا : مشروع ايه ده؟؟
هيثم : افتحلك حضانه صغيرة كده على قدك..
في جزء من الأرض اللي اشترتها.
اعمل صغير كده في حوالي مية وخمسين متر
نعمل تلات فصول ومكان فيه لعب للأطفال
وكام مدرسة معاكي واهو هتسلي وقتك وتعملي
حاجه مفيدة
و دا تخصصك أصلا..
يعني عندك خبره في الموضوع دا.
رانيا : اوك... هفكر
اصل الموضوع بالنسبالي مفاجأة
وخايفه يعني معرفش أنظم وقتي..
انت عارف اني قاعدة في البيت من زمان ونسيت
اصلا الشغل والكلام ده.
هيثم : خدي وقتك.. يا حبيبتي
وانا معاكي في أي قرار هتاخديه
المهم راحتك وإنك تبقى مبسوطه وسعيدة.
ومتفكريش في حاجه تعكنن علينا حياتنا.
رانيا ببتسامة : حاضر يا حبيبي.
____________