ماضي لا ينتهي

الحلقة ٦٤

#ماضي_لا_ينتهي
#بوسي_مصطفى
______________
الحلقة ٦٤

فادي : نعم يا أميرة هانم
كنتي عايزانى اعمله ايه يعني؟؟
اضربله تعظيم سلام..
ولا اضربله طلقتين في الهوا
بمناسبة إنه اتكرم واتعطف وجه عندنا!!
أميرة : على فكرة اسلوبك وحش اوي..
وطريقتك كمان.
سيف عملك ايه علشان كل دا؟؟!
انت اللي غلطت فيه ومفروض كنت تعتذر
وكويس اوي انه دخل
البيت اللي تهان فيه..
علشان خاطري انا...
انت متعرفش حاجه في جبر الخواطر..
ولا حتى في كرم الضيافه..
واحد دخل بيتك يبقى لازم تحترمه..
فادي : احترم مين يا أميرة؟؟
واحد طردنا من بيته وامي كتر خيرها إنها فتحتله
الباب اصلا.
يبقى عايزاني اعمله ايه اكتر من اللي اتعمل
وخيلاني واضح إنهم استقبلوا احسن استقبال.
ولا انتي مش لاقيه حاجه
تتخانقي عليها؟؟!
راوية خارجه من المطبخ..
راوية : جرا ايه مالكم؟؟
ايه مش هتبطلوا بقى خناق
مع بعض؟؟!
أميرة : يعني عاجبك يا ماما
اللي عملوا فادي ده؟؟
راوية : عمل ايه يااميرة؟؟
علشان مش واخده بالي.
أميرة : واضح يا ماما إن حضرتك موافقه
على اللي حصل من فادي في حق سيف.
راوية : اللي هو ايه بقى
فكريني.. معلش يا بنتي
كبرت في السن والذاكرة بقيت
بعافيه شوية..
أميرة : الموقف كان قدام حضرتك يا ماما..
بعد اذنك هدخل أنام.
ودخلت أميرة اوضتها..

فادي : هتزهقنا بقى اليومين
اللي قعادهم هنا..
ماله سي سيف يااميرة؟؟
زعلان.. روحي خففي عنه يااختي.
راوية : اهدا عليها شوية
هي واخده على خاطرها
علشان يعني مقعدتش مع جوزها.
فادي : واقعد معاه بتاع ايه يا ماما؟؟!
واحد طردني من بيته..
ايه اقوله يا مرحب بيك في بيتنا..؟؟!
راوية : ايوه خليك أنت أكرم منه..
فادي : ماما انا اصلا مش رايق
لا ل أميرة ولا جوزها..
راوية : ليه مالك؟؟
فادي : الست يسرا جاتني الشغل النهاردة
واتخانقت معايا
ليه وليه بقى ما اخدتش فلوسها لحد دلوقت..
والمشروع اللي كنت داخله خسر وطبعاً لو قولتلها الكلام
دا هتفرج عليها الدنيا..
راوية : بيع أي حاجه عندك و اديها فلوسها.
فادي : ابيع الشقة ولا العربية
ولا اروح استلف علشان خاطر حضرتها تستريح..
ما هو لما استلف لازم اسدد
ولما هاجي اسدد لازم اقلل المصروف اللي بتاخده
هي وماجدة..
و دا لو حصل هتقولي مليش فيه
وعايزة المصروف بالكامل مينقصش جنيه..
وهي صاحبة الاقتراح المنيل دا
انا كنت هدخل في المشروع دا لوحدي
ومش عايز شركا خالص
معايا علشان عارف إن النهاية
بتكون بالشكل ده..
راوية : متستلفش انا هتصرف.
فادي : منين يا ماما؟؟
راوية : إيراد الأرض هيجيني اخر الشهر..
ابقى خده كله بس لازم اعرف أميرة علشان
تبقى مسامحه
وابقى اعوضها في إيجار السنه
الجايه.
فادي : وهي هتوافق؟؟
راوية : متوافقش ليه؟
اختك بتحبك وإن كان
على العتاب يعني ف دا
من عشمها فيك..
أنا صحيح واخده على خاطري منه..
بس الحق يتقال إنه بيتعامل معايا ب إحترام..
فادي : هو كان اعتذر عن طرده
لينا من بيته يا ماما؟؟!
راوية : وانت كمان معتذرتش
على اللي قولته ليه يا فادي.
فادي : مش هو اللي استفزني
واللي جوه دي مش كان ممكن تتقتل من تحت راسه..
وقتها كنتي هتعملي ايه
ياماما؟؟
هتدخليه بيتك برضه؟؟
راوية : خلاص واهي اختك رجعت بالسلامة..
ننسى بقى
علشان الموضوع دا بيتعب اعصابي كل اما افتكره..
فادي بتنهيده : أنا قايم أنام
تصبحي على خير.
راوية : وانت من أهل الخير..
-___-_______