ماضي لا ينتهي

الحلقة ٤٣

#ماضي_لا_ينتهي
#بوسي_مصطفى
__________________
الحلقة ٤٣

قربوا ولاد شوقي من الشقة
كانوا الجيران نصهم متجمعين حوالين
شوقي والباقي محاوط سليم علشان ميهربش
وليان واقفه بعيد بتبكي وخايفه
جات عربية الإسعاف
وعادل وتامر بيحاولوا بينقلوا باباهم ويساعدوا المسعفين
شوية وجات الشرطة اللي حققت واخدت أقوال الجيران
اللي أكدوا إنهم جم على صوت الدوشة اللي كانت في شقة شوقي ووجدوا الشاب ده (سليم)
اخدوا أقوال ليان اللي أكدت نفس  الكلام اللي قالوا الجيران.
وواحده من الجيران كانت بتعمل كمادات ل ليان.
اخدوا أقوال سليم ولسه متوجهتش تهمه ليه.
لكن اخدوا على القسم علشان يكملوا التحقيق.
هناك عادل وتامر : اتهموا سليم.
_____________

في شقة دكتور مروان
جه تليفون ليه ب إن ابنه سليم في القسم..
قام مروان بسرعة غير هدومه وراح ل سليم على القسم وفي الطريق أتصل ب ريان اللي جالهم بسرعة على هناك.
سليم : معملتش حاجه يا بابا
انا روحت لاقيته واقع على الأرض حاولت اسعفه اعمله
أي حاجه.. معرفتش
إتصلت ب الإسعاف
ومندهش من كلام الجيران
اللي اصلا مشفونيش وانا داخل الشقة
واللي مندهش منه اكتر ولاده اللي ميعرفنيش اتهموني
اني دخلت اسرق واقتل والدهم
مع إني لسه من شوية واخد عنوان الشقة منه
هل يعقل إني خططت لكل دا في النص ساعة اللي مشيتهم في الطريق ل شقته.
ريان : تقصد ان في حد له غرض يوقعك في المصيبه دي
يا سليم
سليم : لا يا ريان مقصدش كده
مين دا اللي هيخطط يوقعني
بس مندهش إن ولاده قالوا نفس كلام الجيران مع إنهم مشوفنيش اصلا دول جم متأخر
مروان : تقصد إنهم عايزين تهموك وخلاص.. وليه هيعملوا كده.
ريان : كل حاجه هتبان بس انت متقلقش
المحامي طمني مفيش اصلا بصمات ليك جوه الشقة
وكمان الكاميرات هتظهر كل حاجه
ثم البنت مشافتكش انت بالتحديد بتعدي على باباها
سليم : معرفش يا ريان
بس انا مش هقدر اقعد جوه الحجر دا ولا ليلة واحدة
كلم المحامي انا لازم اطلع من هنا.
مروان : اهدا دا قرار الظابط اللي جوه استحمل
بقى الليلة لما نشوف هنعمل ايه
سليم : ليلى فين يا بابا
مروان : ودا وقته
سليم : مش بسأل عن مراتي
مروان : مامتك قالت إنها طلعت عند باباها بس انا مشوفتهاش
سليم : علشان خاطري يا بابا
خلي بالك من ليلى والولاد
مروان : بتوصيني عليهم كأني غريب عنهم يا سليم؟؟!
خلي بالك من نفسك
الحقيقة هتبان متقلقش يا ابني
ريان : كان نفسي اعملك حاجه يا سليم بس انت عارف مفيش في أيدي حاجه اعملها
ادعي إن الراجل ميموتش
العسكري : اتفضل يلا معايا
سليم : طمن ماما وليلى عليه قولهم إني كويس
وهخرج ميقلقوش انا معملتش حاجه اصلا
كان العسكري بيشده من ايده ويبعده عنهم.
لحد ما اختفي
مروان بحزن : يلا يا ابني
ريان : ماما عرفت حاجه يا بابا
مروان : سيبتها نايمه ونزلت على طول أول ما جالي
الإتصال من القسم.
_____________
في التليفون 📞
سيف : طيب يا ليان انتي فين
ليان بتبكي : أنا في شقة هنا جانبينا
سيف : يعني عند حد من الجيران
ليان : اه
سيف : فين اخوتك
ليان : مع بابا في المستشفى
سيف : طيب انا جيلك خليكي عندك اوعي تنزلي
ليان : حاضر
بس انا خايفه اوي يا سيف
اوعي تتأخر.
سيف : حاضر يا حبيبتي مسافة السكه.
ليان : طيب انا مستنيه.. مع السلامة.
قفل سيف مع ليان أميرة كانت بتتصل.
أميرة : حبيبي بقى ايه اللي مصحيه لحد دلوقت
سيف : اخبارك ايه يا أميرة.
أميرة : الحمد لله
كنت مشغول مع مين بقى؟؟
سيف : دي ليان إتصلت بيه
أميرة : بجد... هتيجي امتى
اوعي تقولي جايه بكره.
سيف : لا انا اللي هروح اجيبها بس افهم الموضوع
ايه الأول
أميرة : موضوع ايه يا سيف
قلقتني.
سيف : شوقي في حد دخل هجم عليه في الشقة ووقع
وهو في المستشفى دلوقت
هلبس واروحلها
أميرة : يا خبر امتى حصل الكلام دا؟؟
سيف : لسه حاصل من شوية
حد من الجيران اخدها عنده
أميرة : طيب روح هاتها لحد ما تطمن على باباها
سيف : ما دا اللي هيحصل
أميرة : طيب لما توصل هناك ابقى كلمني علشان اطمن
سيف : حاضر يا حبيبتي سلام
أميرة : مع السلامة.
____________