တိမ်စိုင်ငယ်လို

Ep_3

Unicode

ယနေ့မှာ စနေနေ့ဖြစ်သည့်အတွက် ဆိုက်ထဲကအလုပ်နားရက်ဖြစ်သည်။တိမ်စိုင်လည်း တစ်နေ့တစ်နေ့ငွေပဲအပတ်တကုတ်နဲ့ရှာနေရတာမို့ ဒီနေ့တစ်ရက်တော့သူနားဖို့လိုအပ်တဲ့အတွက် အိမ်မှာပဲအနားယူလိုက်သည်။

အနားယူတယ်သာပြောရတာ အိမ်အလုပ်ကတော့လုပ်ရသေးသည်။မနက်နိုးလာလာချင်း တစ်ပတ်တာလုံး ဝတ်ထားတဲ့အဝတ်တွေ၊အမေဝတ်ထားတဲ့ထဘီတွေကို ပုံးတစ်ခုစီသက်သက်ခွဲကာရေစိမ်ထားရသည်။လျှော်ဖွတ်၊တိုက်ချွတ် လုပ်ရပေအုံးမည်။

"အမေ ဒီနေ့ဆေးရုံသွားပြီးဆေးသွင်းရမှာဆိုတော့ သားပြုတ်ထားတဲ့ကြက်ဥလေးစားလိုက်ပါလား"

"အင်း စားမယ်သား"

တိမ်စိုင်နောက်ဖေးကနေ အိုးထဲမှာပြုတ်ထားတဲ့ကြက်ဥနှစ်လုံးကိုယူကာ ‌အခွံသေချာခွာ၍ ဓားနှင့်လေးစိတ်စိတ်လိုက်သည်။အလုံးလိုက်ကျွေးလျှင် အမေ မစားနိုင်မည်ကိုစိုးရိမ်တာကြောင့် သေချာလှီးပြီး ပန်းကန်လုံးတစ်ခုထဲထည့်ကာ အိမ်ရှေ့သို့ယူလာခဲ့သည်။

အမေကတော့ အရင်နေ့တွေလိုပဲ ဘုရားစင်နားမှာချိတ်ထားတဲ့ အဖေ့ရဲ့ပုံလေးကိုသာငေးငိုင်ကြည့်နေသည်။အမေပြောဖူးတယ် အဖေ့ကိုအသက်ထက်ဆုံးချစ်ခဲ့သည်တဲ့ေလ။ကျွန်တော်ကအဖေနဲ့တူပြီး ရိုးရိုးသားသားနဲ့စိတ်ထားကောင်းကြောင်း အမြဲအမွှန်းတင်လေ့ရှိသည်။

ကြက်ဥထည့်ထားသည့်ပန်းကန်လုံးကို ခုံပေါ်တွင်ထိုင်နေသည့်အမေ့လက်ထဲထည့်ပေးလိုက်သည်။အမေကအရင်တုန်းက အငံတွေအရမ်းစားသည်။ထို့ကြောင့် အစာအိမ်ကင်ဆာဖြစ်သွားရသည်ဟု ဆရာဝန်ပြောပြသည်။

အစတုန်းက အစာစားပြီးတိုင်း လည်ပင်းမှာစို့နေသလိုဖြစ်ပြီး ရင်ခေါင်းတောင့်ကြောင်း ပြောဖူးသော်လည်း အစာမကြေဖြစ်‌ေနသည်ဟုသာထင်ခဲ့သည်။

နောက်ပိုင်းကျတော့ အစာစားပြီးတိုင်းအန်၊ကိုယ်အလေးချိန်တွေလည်း သိသိသာသာကျလာတာကိုတွေ့ရသည်။ဝမ်းသွားလျှင်သွေးပါပြီး အစာအိမ်‌နာလာသဖြင့် ဆေးရုံသွားကာပြကြည့်တော့မှ အခြေအနေတွေကဆိုးနေပြီဖြစ်သည်။