🌙رمضان_يجمعنا 🌙
🍁🌾حبہــــــر _العہــــــــون🌾🍁
🤍نہـــــــــوا يہــــــــــآ🤍
❌⛔ ممنوع النقل ⛔❌
بقلمي: zaineb_mer
#حبہــــــر_العہــــــــون:
الحہلقہة 04:
#رحمة_تحكي...
ماكلملت td نحس في راسي راح يطرشق بسطر... مافطرتش وزيد كرشي قاتلتني بسطر ماكلة نتع ريسطو ماعدتش نحملها... خرجت من المدرج بعدما كملت هزيت درسي كامل... وقفت نلم في كراسي والاقلام... حتى نحس في وحدة واقفة عندراسي خلاتني نرفع عيني نشوف معاها...
سارة: مساء الخير...
رحمة: مساء النور...
سارة: انا سارة نقرا معاك دايما نشوفك تقعدي وحدك قلت نجي نتعرف عليك...
رحمة: يعيشك وانا رحمة...
سارة: متشرفين حبيبتي تحبي نخرجو ناكلو حاجة مع بعض ونتعرفو....
كمشت عينيا نشوف معاها حايرة في تصرفها صراحة ماريحتنيش..
سارة: هههه ماتشوفيش فيا هك راني نسمع في صوت كرشك. عندي... وصراحة جتى انا جعت...
رحمة: هههه هي صح جيعانة اما لازم نروح عندي projet نوجدو...
سارة: لا مانتعطلوش غير نتعرفو برك...
هزيت عيني وقت تدخلت ايمان تحكي مع طفلة وعينيها تقدح نار...
إيمان: سمعتي طفلة وش قالت لا...
رحمة: يااا إيمان جيتي
نضت نجري حضنتها نسلم عليها... توحشتها عندها اكثر من 20 يوم ماجاتش لاللفاك ولا للإقامة...
إيمان: اهلا حبي توحشتك اوحيدة راك لباس؟
رحمة: لباس لباس وش حوالهم نتع دار امك رتاحت شوي راهي احسن...
سارة: ههه ظهرتي معريفة إيمان... مليح والله فرحت راح نتفاهمو باين...
رحمة: إن شاءلله معريفة خير...
حرت في ايمان وقت شافت معايا ومعاها ومن بعد حكمتها من زندتها
إيمان: حبي دقيقة عندي هدرة مع سارة... اسبقيني la cité...
حركتلها راسي وهزيت صاك وخرجت... عديت على لفواي شريت بيض وفرماج وطلعت... حليت الباب ودخلت حطيت حوايج فوق طاولة وبدلت قشي نحيت حجابي ونحيت المكياج ... رفعت شعري لفوق فتحت طاقة باه تتهوى البيت... وستفت حوايجي في لخزانة... قربت حطيت جنابي على سرير لعلى يخف سطر شوي... مافقتش كيفاه غفلت... فتحت عيوني هزيت تلفون لقيت روحي راقدة اكثر من ساعة... حطيت على رقمها طول من غير مانستنى...
رحمة: توأمي روحي وش حوالك...
توبة: لباس ياروحي وانت وش حوالك كيفاه فات نهار اليوم...
رحمة: كما تعرفي قراية وراء بعضاها... راسي نحس في وسطو مصنع نتع الحجار...
توبة: ههههههه هذي هي شاقيا 250 كلم باه تقراي استحملي...
رحمة: حتى انا مستحملة تمرميد ماعندي مانعمل...
توبة: صحيتي فحلة مابقاش قد الي فات...
رحمة: قوليلي وش راهي ماما والاولاد...
توبة: لباس الحمدلله صباح كامل تسقسي عليك... حبت تحكي معاك طلبناك لقينا تلفون مبلع
رحمة: ايه كنت نقرا على هذي بلعتو... وش حوالها سوسن ماقريبش تولد؟
توبة: راهي في سابع مابقاش بزااف...
رحمة: وش عاملة معاك...
توبة: عادي وش عاملة...
رحمة: اني نعرفك بهلولة القط ياكلك عشاك...
توبة: رحمة مانحبش لهدرة هذي تبقى مرت خونا وعادي نخدمها ولا نعاونها...
رحمة: اقعدي هكاك كما لخديمة بونيشة على ناس الكل...
توبة: مارانيش بونيشة رحمة انا نحب هك... مش مقلقني شيء هذا بلعكس نلقى فيه راحتي وزيد وش عندي ندير لقرايا وحبست وصنعة في يدي مكانش لازم نلهي روحي... مش يعني ضحيت انا بقرايتي باه انت تقراي... تقعدي كل مرة تقوليلي بونيشة... لكان هك فانا بونيشة اختي لاولى ولا انا غالطة...
رحمة: وشبيك تفحالي غير فيا روحي احكي هك مع الي عندك...
توبة: رحمة من بعد نعاودلك...
بعدت تلفون على وذني نشوف معاه قطعت في وجهي... اووووف قصتها بهدرتي كما كل مرة... أكيد تكون تبكي...
إيمان: شكون هذي الي تبكي
رحمة: توبة تزايدت في لهدرة معاها...
إيمان: عادي كل مرة تخربيها معاها...اصلا ماعدتش نشوف فيك هذيك طفلة لعاقلة ورزينة... راكي كل مرة تحيريني فيك... وينو جلبابك وصلاتك الي كما جيتي كنت نتسخف عليهم...
رحمة: اووووه راحي تبداي من درك...ربي يسترك فكيني من الهدرة هذي.... احسن حاجة نوضي خلينا نديرو حاجة نكلوها عندي projet نخدمو... مانيش قادرة نسمع نفس لأغناية...
إيمان: ايه كما تحبي ياخوفي يجيك يوم وتندمي... على العموم انا وش دخلني...ايه واختك مش راح تعيطيلها تطلبي منها سماح؟
رحمة: خليها تهدن ومن بعدن نرضيها زوج كلمات حلوين خلاص ترضى...
إيمان: يا سبحان الله هذي انت الي كنت ماترقديش حتى تحكي معاها بسوايع باه يجيك نوم...
رحمة: ايه الله غالب تمرميد يعلمك حوايج بزاف...
إيمان: نشوف فيك رجعتي جافية رحمة... ايه مدامني متفكرة... شفتي هذيك سارة ابعدي عليها بعد سماء على الارض...
قعدت ندور في هدرتها في راسي... عقدت حواجبي سقسيتها
رحمة: علاه؟
#يتبع...
