📿🌙رمضان_يجمعنا 🌙📿
🍁🌾حبہــــــر _العہــــــــون🌾🍁 📿🤍نہـــــــــوا يہــــــــــآ🤍📿
❌⛔ ممنوع النقل ⛔❌
#بقلمي: zaineb_mer
#حبہــــــر _العہــــــــون:
الحہلقہة 21:
#عند_رحمة
حاطة يديها على خدها متركزة عليها... تشوف معاه وهو يفسر في درس... تايه في تفاصيلو وقفت هدرتو... فاقت على إيمان وقت حركتها تهمس في وذنها...
إيمان: احشمي راك قريب تاكليه...
رحمة: يابنت شبيك مانيش معاه خلاص...
إيمان: ايه آمنتك... اسمعي جعت ربي والكور ماحبش يخلاص...
رحمة: مزالت ربع ساعة ونخرجو... انا راني مافهمت حتى شيء اليوم...
إيمان: ساهلة يخلاص الكور واعملي سبة وروحي شوفي نقاط معينة قلو مافهمتهمش..
رحمة: زعمة هك...
ايمان: جربي ماخاسرة شيء...
رحمة: وانت قلتيها... اسمعي اسكتي راه يشوف معانا...
فات الوقت وخلاص الكور طلبة الكل خرجت ورحمة قاعدة تبسل حتى تقدر تحكي معاه... شافتو هز كرطابل تيعو وهبطت تجري عيطتلو...
رحمة: استاذ أكرم...
دار شاف معاه وتبسم...
أكرم: تفضلي...
رحمة: استاذ كاين chapitre في الكور تع اليوم مافهمتوش لكان تقدر تعطيني ملخص...
حط لحيتو تحت شفافو تبسم وهبط راسو... من بعد هزو يشوف معاها...
أكرم: وقت مش فاهمة درس علاه كنت تحكي انت وصاحبتك نمش عاملين حساب درس ولا المدرس...
حشمت فوتت يديها على رقبتها فوق الخيمار...
رحمة: غير كنت نقلها على درس مافهمتش...
اكرم: معليه هات نشوف وين حصلتي...
جبدت كراسها وقربت جيهتو شاورتلو بصبعها عليه...
شاف مع ساعة ومن بعد معاها...
اكرم: شوفي هذا لازملو شويا وقت... وانا درك لازم نروح عندي شغل مهم... غدوة جيبي صحبتك الي مافهمتش ورواحي للمكتب نتاعي...
رحمة: سامحني عطلتك استاذ...
اكرم: مكان حتى مشكل غدوة مع 10 ماعنديش كور تقدري تجي مرحبا بيك...
رحمة: شكرا وسامحني مرة اخرى...
تبسم معاه مرة اخرى وفاتها وراح وخلاها واقفة تشوف معاه... من بعد كملت طريقها... لقات ايمان واقفة تستنى فيها...
إيمان: هااا سبع ولاضبع؟
رحمة: لا سبع ولاضبع... ماعندوش الوقت قالي غدوة نروحلو للمكتب نتاعو انا وانت ويفهمنا...
ايمان: yes يابنت راك جبتيها في الشبكة...
رحمة: مافهمتش وش قصدك...
ايمان: وشبيك بغلة قالك ارواحي للبيرو... افهمي للبيرو...
رحمة: ايه ومن بعد وهذي حاجة تفرح؟
ايمان: امشي قدامي لا نقطع شعري منك ياهم انت...
رحمة: هههههه لا والله غير فهميني...
ايمان: اخطايني يرحم باباك...
راحت تمشي بزربة ورحمة لحقتها... تعيط عليها باه تحبس اما والو كملت وخلاتها هكاك... حتى جات سارة في طريقها ...
سارة: ههههه هي دايما هك ماتقلقيش روحك...
رحمة: ايه بالخف تقلق...
سارة: ايه وانت وش حوالك لباس؟
رحمة: الحمد لله...(صونا تلفونها ) سامحيني...
سارة: براحتك مرة خلاف إن شاءلله...
تمشات خطوتين وهزت عليه...
رحمة: لعزيز وش الاحوال...
فؤاد: لباس اقطة وينك؟
رحمة: خارجة من جامعة طالعة للاقامة...
فؤاد: ايا مليح استنيني قريب نوصل...
رحمة: ااا كيفاه قريب توصل؟ علاه جيت...
فؤاد: وشبيك اطفلة جيت نشوف اختي ونعطيك حوايج بعتتهم امي وتوبة...
رحمة: اوكي انا وصلت خلاص للاقامة نحط حوايجي ونجيك...
فؤاد: هيا ماتطوليش...
قطعت عليه ورجعت تجري طلعت للشمبر لبست جلباباها بسرعة... خلات ايمان تشوف فيها...
ايمان: سس شبيك هبلتي ولا...
رحمة: جاء فؤاد ايماجيني كون شافني بدجين... والله يقطع عليا لقرايا...
ايمان: اووو سترك ربي ياطفلة...
حلت الباب وهي تحكي...
رحمة: نهبطلو باه مايتحلبش...
ايمان: طيري وسلمي عليه...
#يتبع
