For Unicode
မြဲတည် သည် ပျင်းပျင်းရှိသည်နှင့် ပြတင်းပေါက်အနီးထိုင်ကာ တစ်ဖက်ခြံ၀န်းထဲမှ ဘောလုံးကန်နေသော တူးတူး တို့ ညီအစ်ကို နှစ်ယောက်ကို မေးထောက်ကာ ကြည့်လျှက် ရှိသည်။
ပုံမှန်ဆို သူပါ ၀င်ကန် လို့ရပေမယ့် မေမေက အခုတလော သူ့ကိုလူကြီးတန်း သွင်းကာ ကလေးများနှင့်မပေါင်းခိုင်းတာကြောင့် အရင်လိုခွင့်မတောင်းပဲ မသွားရဲ။
ထိုစဉ် အပြင်ဘက်မှ ထီးအနီရောင်ရဲရဲတစ်ချောင်းကိုဆောင်းကာ ခပ်ကြွကြွ လျှောက်လာသော အစ်မဖြစ်သူကို မြင်တာကြောင့် ဟွန့်ခနဲ နှာမှူတ်ကာ ပြတင်းနှစ်ချပ်ကိုပိတ်လိုက်ပြီး စားပွဲပေါ်က မြန်မာစကားပြေ စာအုပ်ကိုမလှန်ချင့် မလှန်ချင် ဖွင့်လိုက်ရသည်။
မမခိုင် ရောက်လာရင် အားကြီးစကားများပြီး ဆရာကြီးလုပ်တော့မှာကို ကြိုသိနေတာမို့ မြဲတည်က ရိုး၍နေပြီ ဖြစ်သည်။
" ခိုင်....သမီး ပြန်လာပြီလား ရေတန်းမသောက်နဲ့ဦး "
အောက်မှ မေမေ့အသံက ကြည်လင်စွာထွက်လာပြီး မမခိုင်၏ သင်တန်းမှ နာရီပိုင်းစာ ဘ၀ကို အစီရင်ခံနေတာကို တရစပ်တည်း ကြားလိုက်ရသည်။
မေမေနဲ့ မမခိုင်က မိန်းကလေးချင်းပဲ ဖြစ်လို့လားမသိ ပြောစရာစကားတွေအများကြီးရှိနေတတ်သည်။
မေမေက မမခိုင်ကို သိမ်မွေ့ပြီး ထက်မြတ်စေချင်ကာ သူမလိုပဲ အေးချမ်းသောဘ၀ကို ရစေချင်သည်။
ထို့အပြင် မျှော်မှန်းချက်တွေအကုန်လုံးကလည်း မမခိုင်ဆီကို အကုန်ပုံအပ်ထားသည်။
စိတ်မပါလက်မပါဖြင့် အောက်ကအသံတွေနားစွင့်နေတုန်း ကားစက်သံညက်ညက်ကို ကြားလိုက်ရတာမို့ မြဲတည်လည်းခေါင်းထောင်သွားသလို အိမ်အောက်မှ မေမေတို့အသံကလည်းတိတ်ဆိတ်သွားသည်။
ထို့နောက် လှေကားပေါ်သို့ ဖော့ကာပြေးတတ်လာသော ခြေသံတစ်စုံ....
" ဟဲ့ မြဲတည် လာခဲ့ လာခဲ့ဦး"
မမခိုင်က သူခုနကဆောင်းလာသော ခေါက်ထီးကို ကိုင်လျှက် ရှိကာ အမောတကော မြဲတည်ရဲ့အခန်းရှေ့ကနေ ခေါ်နေတာ ဖြစ်သည်။
