For Unicode
Mandalay FMမှ ထုတ်လွှင့်နေသော သီချင်းတောင်းသည့် အစီအစဉ်ကို အဓိပ္ပါယ်မဲ့ မြဲတည် နားစိုက်ထောင်နေကာ မျက်ခွံလေးများလေးလံလာသည်။
" မြဲတည် "
မေမေက လျှော်ထားသော လက်သုတ်၀တ်များကို စားပွဲပေါ် တင်ကာ ခေါက်နေရာကနေ ခပ်လှမ်းလှမ်းတွင် စာထိုင်ကြည့်ရင်း ခေါင်းလေးငိုက်နေသည့် မြဲတည်ကို လှမ်းဟန့်၏။
" စာမေးပွဲကနီးလာပြီနော်။ ကိုယ့်အစ်မလို ဂုဏ်ထူးတွေ မပါနိုင်ရင်တောင် နှစ်ချင်းပေါက်အောင်အောင်တော့ဖြေ "
မြဲတည် ကျိန်းစက်နေသော မျက်လုံးကို လက်ဖြင့်ပွတ်ကာ ဓာတုဗေဒ ထုတ်ဖော်ပုံ တစ်ချို့ကို ခပ်တိုးတိုး ရေရွတ်လိုက် ချရေးလိုက် ပြန်လုပ်ရသည်။
အချိန်ဆိုတာ ဖြတ်သန်းလာရတော့သာ ကြာသည်ထင်ရသလို ရှိသော်လည်း အခုကားမူ ခနလေးဟုသာထင်ရသည်။
မမခိုင် မစားနိုင်၊ မအိပ်နိုင် စာလုပ်တာကို ကြည့်ပြီး ကြောက်ခဲ့ရသော ဆယ်တန်းစာမေးပွဲကိုပင် မြဲတည်ဖြေရတော့မည်ဖြစ်ကာ ဖိအားတွေလဲများလာသည်။
ကိုကြီး မိုးရိပ်ဆီမှ စာများ အလာကျဲ သွားသော်လည်း စာမေးပွဲအတွက်တော့ အကြံပေးသည့် မှတ်ချက်လေးများ ကို ရေးရေးပို့တတ်သေးသည်။
မမခိုင်ကတော့ အိမ်ပြန်လာတိုင်း သူ့ကို အရှက်မခွဲပဲ အောင်အောင်ဖြေ ရမည်ဟုပဲ ရာဇသံပေးနေသည်။
ဘယ်သူကရော မအောင်ချင်ပဲ ရှိပါ့မလဲ။
ခေါင်းထဲ တင်းကြပ်နေကာ တစ်ခါတစ်လေ မြဲတည် ဒေါသတွေထွက်ပြီး မျက်ရည်ကျသည်အထိ စာလုပ်ရသည်။
သူက အတွက်အချက်မှာ မတော်တာကြောင့် တွက်ပုစ္ဆာတွေကို ပိုကြောက်သည်။
ကျူရှင်ယူသော်လည်း စာတွေကများလာလေလေ သူက ပျာ လာလေလေ ဖြစ်ရသည်။
နီးကပ်လာသော စာမေးပွဲ အကြောင်းကို တွေးကာ ထိုအောင်မြင်သွားလျှင် ဟူသော ကာလတစ်ခုဆီ စိတ်ကူးယဉ်ကြည့်ခြင်းကပင် သူ့စိတ်ကိုသက်သာစေသည်။
အဲ့ကျရင် သူဖတ်ချင်တဲ့ ၀တ္တုတွေကို လွတ်လွတ်လပ်လပ်ဖတ်လို့ရတော့မည်။
မုန့်ဖိုးလဲ ပိုရကာ လူကြီးအသွင်ဘက်ကူးပြောင်းရတော့မည်မို့ ရင်လဲခုန်ရ၏။
