For Unicode
သည်နှစ်ဆောင်းသည် ခါတိုင်း နှစ်များထက် ပင်
စော၍ ၀င်ရောက်လာကာ အအေးဒဏ်ခံရသည်မှာလဲ အလူးအလိမ့်ပင်။
စာတိုက်ရုံးထဲ သို့ ၀င်လိုက် ထွက်လိုက် လုပ်နေကြသော လူများမှာလည်း အရောင်စုံ ၊အလွှာစုံ ကိုယ်စီနှင့် အအေးဒဏ်ကို အံတု ကာ သွားလာနေကြ၏။
မြဲတည်နွေးထွေးသော ကားထဲ တွင် ထိုင်နေရင်း မျက်မှောင်ကျုံ့ကာ သူ့အား ဥပေက္ခာပြုနေသော ဆက်သ၀ဏ်ကို ဒုတိယ အကြိမ်မြောက် သက်ပြင်းချပြီး ကြည့်လိုက်မိတယ်။
သူ့သက်ပြင်းချသံကြားတော့ ဆက်သ၀ဏ်က ချက်ချင်းပင်လှည့်ကြည့်ကာ ပို၍ပင်မျက်နှာချောချော က တင်းမာသွား၏။
" သွားလိုက်ဦးမယ်လို့ "
"..... "
" အစ်ကို "
" ဘာဖြစ်နေသလဲ ခိုင်မြဲတည်။ အဲ့သည်လောက်တောင် ဟိုကောင် ပို့တဲ့ ပစ္စည်းက အရေးကြီးနေလား "
" မဟုတ်တာတွေ လိုက်စိတ်ဆိုးနေတာပဲ အစ်ကိုက "
အစက ပုခုံးကို ကိုင်မည်ပြင်ထားသည့်လက်တွေကို မြဲတည်ပြန်ရုတ်လိုက်ပြီး လက်ပိုက်ကာ ပြတင်းအပြင်ဘက်ကို အကြည့်လွှဲပစ်လိုက်၏။ သူ၏မကျေနပ်မှုလေးတွေက နှုတ်ခမ်းမှာ စုပုံနေကာ ခပ်ဖူးဖူးလေးဖြစ်နေသည်။
သူ့ဘာသာ စာတိုက်မှာ ကိုကြီးမိုးရိပ်ပို့ထားတဲ့ ပစ္စည်းနဲ့စာ ရောက်လို့ သွားယူမယ် ပြင်နေတာကို လိုက်ပို့ပေးမည် ဆိုပြီး အတင်းခေါ်လာပြီးတော့....။
" အစ်ကို့ဘာသာ ပြန်တော့။ ကျွန်တော် နေခဲ့တော့မယ် "
ကားတံခါးကို ဖွင့်မည်ပြုတော့ ချက်ချင်းပင် လော့ခ်ချပစ်ပြီး ဆက်သ၀ဏ်က ညစ်သည်။
ရည်းစားသက်တမ်း သုံးလ ကျော်ကျော် လောက်မှာပဲ မြဲတည်ဟာ တုန်နေအောင် အချစ်ခံရသလို သ၀န်တို တာကိုလည်း နင့်နေအောင် ခံရပြန်သည်။
" မဂျစ်နဲ့ "
" စောစောစီးစီး အစ်ကို ရန်စနေတာ "
စိတ်ဆိုးနေသော ခိုင်မြဲတည် လေး၏ ပါးလေးတွေက ဖောင်းနေကာ ဆောင်း၏ရိုက်ခတ်မှုကြောင့် အနီရိပ်လေးပြေးနေသည်။
