For Unicode
ရွှေအိုရောင်ပေါ်တွင် စိန်ပွင့်လေးများစီကပ်ထားသော မြန်မာ၀တ်စုံလေးဖြင့် မမခိုင်အလှက မျက်စိလွှဲဖယ်၍ မနေနိုင်အောင်ရှိလှသည်။
ခပ်မြင့်မြင့်ထုံးထားသော ဆံထုံးတွင် သဇင်ပန်းလေးများဝေနေအောင်ပန်ထားပြီး ကျော့ရှင်းသော လည်တိုင်၏အလှမှာ စိန်လည်တုံလေးတစ်ခုဖြင့် အနားကွပ်ထားလျှက် မမခိုင်အလှမှာ မြင်လိုက်သူတိုင်း မချီးမွန်းပဲ မနေနိုင်၊ ထပ်မကြည့်ပဲ မနေနိုင်လောက်အောင်ကို လှပတင့်တယ်နေ၏။
မေမေတို့ ကိုးကွယ်သည့် ဘုန်းဘုန်းကျောင်းမှာပဲ မင်္ဂလာဆွမ်းေကျွးပြုသည်မို့ ရင်းနှီးသည့်လူတစ်ချို့ကိုသာ ဖိတ်ကြားထားပြီး ကျန်တာကတော့ ရပ်ဆွေရပ်မျိုးတစ်ချို့ပင် ။
ကိုလင်းမောင်၏ ဇာတိ မှာ နောက်ထပ် မင်္ဂလာဆွမ်းကျွေး လုပ်ဦးမည်မို့ သတို့သားဘက်မှာ မိဘနှစ်ပါးနှင့် ဆွေမျိုးရင်းတစ်ချို့ကလွဲရင် မလာကြသဖြင့် ပို၍ တာ၀န်ကျေအောင် အားစိုက်ကြရ၏။
" ကိုခိုင်မြဲ သမီးကြီး ချောလိုက်တာမှ ရက်စက်ချက်ပါပဲအေ "
ကြက်သားချက်အိုးကြီးကို မွှေနေရင်း အရပ်ထဲက အိုးသူကြီး ဖြစ်သည့် ဒေါ်ကြီးဌေးက ပြောတော့ ဘေးနားဝိုင်း၀န်းလုပ်ကိုင်နေသည့်သူတွေကပါ အသီးသီး ပြောကြဆိုကြတော့သည်။
" ဒီကောင်မလေးက ချောတာဆိုတာ ငယ်ငယ်ကတည်းကမို့ သိပါ့။ ပြောဆို တို့ မြဲတည်လေး လဲ ချောတာပဲ "
သရက်ချဉ်သုပ်ဖို့ပြင်နေတဲ့ ဝိုင်းက ကြီးတင့်အပြောကြောင့် မမခိုင် ခေါင်းစဉ်ကနေ မြဲတည်ဖက်ပြောင်းသွားသည်။
" မြဲတည်ကကျ တစ်မျိုးလေး အကြီးရဲ့။ သူကချစ်မွှေးကိုပါတာ...သူ့အချောက မြင်လိုက်တာနဲ့ သူတစ်ပါး ရင်ကိုအေးသွားစေတာမျိုး "
မြဲတည်က ချက်သည့်သူတွေ အမောပြေသောက်ဖို့ အအေးဗူးများ လာပို့ပေးရင်း သူ့ကို ချီးမွမ်းခန်းဖွင့်နေတဲ့ စကားတွေကြောင့် မလာရဲတော့ပဲ တွန့်ဆုတ်နေသည်။
" ဟေ့ မြဲတည် လာလေကွာ "
ချဉ်ရည်ဟင်းအိုးကြီးတည်နေသည့် ဦးဘမောင်က လက်ခုပ်တီးကာ ထခေါ်တော့မှ မြဲတည် လည်ပင်းလေးကိုပွတ်သပ်ကာ ထိုအနားရောက်လာရသည်။
