For Unicode
အချိန်ဟူသည် စောင့်ဆိုင်းပါက နှေးလွန်းသော ၊ သတိမမူမိပါက မြန်လွန်းသော သဘောရှိရာ မြဲတည်ပင်လျှင် ဆယ်တန်းစာမေးပွဲပြီး၍ အောင်စာရင်းစောင့်နေသော ကာလဆီရောက်ခဲ့ပြီ။
စိတ်ညစ်ညူးစရာနှင့် လွမ်းမောပျော်ရွှင်ဖွယ်တွေ ရောနှောနေသော အချိန်ကို ဖြတ်သန်းခဲ့ပြီ ဖြစ်ပြီး အခုမူတော့ သူ့တွင်လွတ်လပ်ရေးတွေရနေလေသည်။
စာအုပ်ဖတ်ခြင်းတစ်ခုကပဲ သူ့အတွက်အပန်းဖြေစရာရှိ၍ နေ့တိုင်းလိုလို စာအုပ်ဆိုင်မှာပဲ အချိန်ကုန်ဖြစ်နေကာ သူအရင်ကမဖတ်ဖူးခဲ့သော ကလောင် တစ်ချို့ကိုပင် စမ်းဖတ်ကြည့်နေပြီ ဖြစ်သည်။
" မြဲတည် "
သူ၏စက်ဘီးနောက်က ခေါ်သံကြောင့် လှည့်ကြည့်လိုက်တော့ မိန်းကလေးစီး ဖီးဆင့် စက်ဘီး ပြာလေးနှင့် မမရင်နုငယ်အားတွေ့လိုက်ရသည်။
မမက စာပေးစာယူပဲ တတ်ကာ သူမအမေ၏ စတိုးလ်ဆိုင်မှာပဲ အလုပ်လုပ်နေတာဖြစ်၏။
" မမနုငယ် ဘယ်လဲ "
" မုန့်ဟင်းခါးလာ၀ယ်တာ ။ စာအုပ်ငှားလာတာလား "
ကတ္တရာလမ်းလေးပေါ် စက်ဘီးနှစ်စီးယှဉ် နင်းကြရင်း စကားလေးတစ်ပြောပြောနှင့် အချိန်က ကုန်မှန်းပင်မသိ။ မမနုငယ်မျက်နှာလေးကအမြဲတစေပြုံးချိုနေကာ မြဲတည်ကို ဂရုစိုက်သည်။
" ကဲ သွားတော့မယ်။ အောင်စာရင်းထွက်တော့မှာနော် ကောင်လေး "
မမနုငယ်က သူမတို့အိမ်လမ်းကြားလေးကိုမကွေ့မှီ မြဲတည်ကို စဖြစ်အောင် စသွားသေးသည်။
တကယ်လဲ အောင်စာရင်းထွက်မည့်နေ့နားနီးေတာ့ တော့ မြဲတည်စိတ်ထဲ ယောက်ယက်ခတ်နေကာ နေ၍မရပါ။
ရေထသောက်လိုက်၊ သိန်းတန်အိမ်ဘက် သွားလိုက်နှင့် တစ်နေ့လုံးအချိန်ကုန်ပြီး မနက်လင်းပိုင်းထွက်မည့် အောင်စာရင်းအတွက် ကြိုတင်ရင်ခုန်နေရ၏။
မေမေကတော့ ဘုရားတစ်ခါရှိခိုးကာ မြဲတည်အား ငြိမ်ငြိမ်ထိုင်နေရန် ပြောသည်။ ဖေဖေကတော့ သတင်းတစ်ခုကို ကြည့်နေကာ ခနနားဦးမည်ဆိုပြီး အခန်းထဲ ၀င်သွား၏။
