For Unicode
နွေဦးရနံ့တွေ သင်းကြိုင်နေသည့် ကာလ၏ မနက်ခင်းသည် မသဲကွဲသေးသော မြူတစ်ချို့ကြောင့် ပိုမိုလွမ်းဆွတ်ဖွယ်ရာကောင်းနေပါ၏။
မြဲတည် တစ်ယောက် နှစ်ခြိုက်စွာအိပ်မောကျနေရာကနေ အေးခနဲ အထိအတွေ့ကြောင့် မျက်မှောင်လေးကြုံ့ကာ စောင်ထဲ ပြန်တိုး၀င်လိုက်သည်။
ရယ်သံသဲ့သဲ့နဲ့အတူ ညင်သာစွာလှုပ်ရှားသံတစ်ချို့က သူ၏ဘေးပတ်လည်မှာ ကြားနေရပြီး ခနအကြာ အခန်းတံခါးဖွင့်သံနဲ့အတူ ကိုကို ဆင်းသွားပြီ ဆိုတာသိလိုက်ရ၏။
မြဲတည် စာမေးပွဲပြီးကတည်းက သူတို့နှစ်ဦးစလုံး မန္တလေးရှိ စီစဉ်ထားသော အိမ်ကို ပြောင်းလာကာ အတူတူ နေကြတာဖြစ်သည်။
ဖေဖေကအခုထိ လက်မခံသေးသော်ငြား မေမေနှင့် မမခိုင်နဲ့ကတော့ အဆက်အသွယ်ပြန်ရှိလာသည်။
ရှေ့ဆက် ၍ လူ့အသိုင်းအ၀န်းထဲ တိုး၀င်ရန် အလုပ်တစ်ခုရွေးချယ်ရမည်ဆိုတော့ ဘာလုပ်ရမှန်းမြဲတည်မသိသေး။
ကိုကိုကတော့ အချိန်ယူကာ စဉ်းစားဟုပဲ အကြံပေး၏။
အိပ်ယာထဲ ဇိမ်ယစ်နေရာကနေ ထလာလိုက်ပြီး အောက်ထပ်မှာ သွားဖို့အဆင်သင့်ပြင်နေတဲ့ ကိုကို့ ကိုအမှီနှုတ်ဆက်ဖို့ လုပ်ရတယ်။
" ကိုကို ပြန်လာရင် လိမ္မော်သီး၀ယ်ခဲ့ပေးဦး "
ဖြူကာရှင်းသန့်နေသော ဂျူတီကုတ်လေးကို ကမ်းပေးရင်း ဆိုတော့ကိုကိုက အပြုံးလေးဖြင့်လှမ်းယူရင်း မြဲတည် နှုတ်ခမ်းလေးကို ခပ်ဖွဖွနမ်းလိုက်သည်။
" ဟုတ်ကဲ့ပါဗျ ။ အစားနောက်မကျနဲ့နော် "
" ဟုတ်...တာ့တာ "
လက်ကို ယမ်းပြကာ နှုတ်ဆက်တော့ လည်း ဆက်သ၀ဏ်မှာ အသည်းယားရပြန်သည်။ သည်ချစ်စရာလေးကို မပိုင်ခဲ့ရရင် သူဘယ်တော့မှ ဒီလိုခံစားမှုမျိုး ရနိုင်တော့မည်မဟုတ်။
။
ခိုင်မြဲတည် ဟာ သူ့အတွက် သီးသန့်ဖန်ဆင်းပေးထားတဲ့ လက်ဆောင်လေးပဲ......။
.
.
.
" အာ့ "
ပုခုံးကို တိုက်ခံလိုက်ရတာကြောင့် ခိုင့်လက်ထဲက အဝါရောင်ဘဲ ရုပ်ကီးချိန်းလေး ချိတ်ထားသည့်အခန်းသော့က အောက်ပြုတ်ကျသွားတယ်။
