Unicode
နောက်ကနေကြည့်ရတာတောင် မျက်စိပသာဒ ဖြစ်လွန်းရတဲ့ ကျောပြင်ကျယ်ကျယ်ကို ကြည့်ရင်း ခိုင် ရင်ခုန်စွာပြုံးလိုက်တယ်။
အသည်းပုံလေးတွေဖော်ထားတဲ့ စက္ကူအိတ်ထဲမှာ ငြိမ်သက်စွာတည်ရှိနေတဲ့ ထီးတစ်ချောင်းဟာလည်း ပိုင်ရှင်လိုပဲ အေးစက်စက်....
" ခိုင် သွားတော့လေ "
ဘေးနားကသူငယ်ချင်းမတွေကလည်း သူမနည်းတူစိတ်လှုပ်ရှားနေကာ အတင်းတွန်းပို့နေတာကြောင့် ခိုင် အိတ်ကို ဆွဲကာ အရှေ့ခုံက သူမ၏မင်းသားလေးကို လျှောက်လာခဲ့လိုက်တယ်။
" သ၀ဏ် "
သ၀ဏ်ဆိုတဲ့ သူမရဲ့ မင်းသားလေးဟာ နားကြပ်တစ်ဖက်ကို ဖြုတ်လိုက်ကာ သူမဆီမော့ကြည့်လာတယ်။
ဖြူ၀င်းနေတဲ့ လည်တိုင်တွေဟာ သွေးကြောစိမ်းတွေပင် ယှက်သမ်းကူးလူးနေတာကို မြင်နေရသလို ကြည်စင်နေတဲ့ မျက်နှာချောချောဟာ မပြုံးမရယ်မာန်တင်းနေတာတောင်မှ ရှုချင်စဖွယ်ကောင်းရတယ်။
" ထီး ငှားပေးတာ ကျေးဇူးပဲနော် "
သူမကမ်းပေးတဲ့ အိတ်ကိုမယူပဲ သ၀ဏ်ဟာ နားကြပ်ကိုပြန်တပ်လိုက်ကာ
" ယူလိုက်တော့ "
ဟု စကားကိုခပ်ပြတ်ပြတ်ဆိုလာ၏။
ရင်ထဲမှာ ကြယ်တံခွန်တွေ ကြွေကျလာသလိုပဲ ခိုင်၏ ဖူးသစ်စရင်ခွင်လေးဟာ တဒုတ်ဒုတ်ခုန်မြည်လာရတယ်။
" ခိုင့် ကိုပေးတာလား... "
နောက်ထပ်ဘာစကားမှဆက်မပြောတော့တဲ့ သ၀ဏ့်ကြောင့် သူမအပြုံးတွေကို အရှိန်သပ်ကာ စောင့်ကြည့်နေတဲ့ သူငယ်ချင်းမများဆီ အပြေးလေးပြန်လာခဲ့လိုက်သည်။
" ဘာတဲ့လဲ...ဘာတဲ့လဲ "
" ခိုင် ယူလိုက်တော့ တဲ့ "
" ဟယ်!!!!!! "
အသံကျယ်ကြီးတွေဖြင့် ထအော်တာကြောင့် အတန်းထဲက စာဂျပိုးမိန်းကလေးအုပ်စုကတော့ မကျေမလည်မျက်စောင်းထထိုးသည်။
အလကားပါ...သူတို့မရနိုင်တာကို မနာလိုနေကြတာ...။
ခိုင် ၏ မျက်နှာ ဖူးဖူးလေးဟာ ပန်းသွေးရောင်ယှက်ပြီး နဂိုကထက်ပို ချစ်စဖွယ်ကောင်းနေတော့တယ်။
