💞 قلوب أرهقها العشق 💞 بالدارجة المغربية

💛الفصل الأول 💛

بارت 1 قلوب أرهقها العشق تمنيت شي ولد ناس قاري زين و داير لابسالطوموبيل و دار بالعساس ما فيه لا صداع لا نكَيريتهلا فيا يحنا عليا نقرة يغبر فيها نحاسي ...فيقي يا بنت ناس باركة من الاحلام و كثرة الكلام لا تفوتك الايامفينا هو ولد ناس اللي نلقا فيه كل ما بغيت فينا هو نغني عليه ديتو ديتو و الله ما خليتو ....حاطة راسها على زاجة ديال الطوبيس و كتسمع لكلمات الاغنية عن طريق ليزيكوطور اللي حاطة فودنيها و كتبتاسم و كتدندن مع كلمات الأغنية اللي كتعجبها و ساهية فطريق و كتشوف فطوموبيلات الغاديين و الجاايين كتشوف طوموبيلات فالأشكال و الألوان و الانواع من المخرششة للمجهدة و لكن اللي كيلفت إنتبهاها أكثر هو نوع سيارات الفاخرة من رانج روفر و بورش و كاط كاط الخ..طوموبيلات فاخرة تمنات شي نهار تركب فيهم كيبقى حلم عندها و ممكن شي نهار يتحقق على الأقل عندها أحلام و عندها أهداف باغا توصل ليهم ما كرهاتش حتى هي تمتالك مثل هاد السيارات اللي كتشوف و تكون حتى هي عندها فيلا و حياة رفاهية و تسافر و تمشي فينما بغات و تاكل فأفضل المطاعم و تلبس الماركات الغاليين و تعتامد على راسها و لكن هادشي باش غايتحقق ؟؟ هذا هو السؤال اللي كيطرح نفسو ..واش الا بقات كتحلم و جالسة فبلاصتها واش غاتقدر توصل لشي حاجة ؟؟ ياك كيقولك اول خطوة باش تحقق احلامك هو تستيقظ من الحلم و تبدا تخدم عليه و توضع الخطط و الاهداف الصغيرة البسيطة باش توصل للحلم الكبير اللي بين عينيك و كيبقا المثل الشهير اللي كنقولو حنا المغاربة هو قطرة قطرة كيحمل الواد ما كايناش شي حاجة كتجي دقة وحدة من غير الموت طبعا ...اي حاجة بغيتي توصل ليها خاصك تجزأها و تفكر فأسهل الطرق اللي تقدر توصلك ليها و كتبقى احسن حاجة باش تدير الفلوس و تحقق داكشي اللي كتطمح ليه هو تخدم فهاد البلاد السعيدة ..كلمة خدمة او شغل هدا الكلمة اللي ممكن تنقدك من شحال من حاجة كتعيشها هاد الكلمة اللي ولات بمثابة وحش بالنسبة لكثير من الشباب شحال من واحد ما كيلقاش الخدمة كيكتآب و كيدخل فواحد القوقعة منعزلة عن العالم و كيبداو الأقوال الشهيرة المعروفة {هاد البلاد ما عطاتنا والو } { هاد البلاد واخا تعيا تقرا وتحفي دماغك والله لا لقيتي شي حاجة } {هاد البلاد كيخدمو فيها غير بباك صاحبي } و زيد و وزيد من الاقوال اللي كيرسمو من خلالها لجيل الصاعد بلي المغرب مفقودة فيها الخدمة و كيطيحو ليك اليد مع رجل و كتولي تكره البلاد و كتولي تكره راسك و تكره دوك السنين د القراية اللي ضيعتي فالقراية اللي ما دارت ليك والو ... ولكن بلاتي واش فنظركم الله غايضيع دوك السنين ديال التعب ديالك ؟؟ أكيد ما حدك كتاخد بالأسباب عمر ربي الحبيب يخيب العبد ديالو ياك كيقولك سبب يا عبدي وانا نعينك حتى واحد ما عارف شنو مخبي ليه القدر ...تنهدات و طفات التيليفون اللي كتسمع من خلالو الموسيقى ...وحيدات ليزيكوطور من ودنيها و دارتهم فحقيبة اليد اللي حاطة حدا رجليها فالارض ...حولات نظراتها ل cv اللي هازة فيديها فيه الاسم و النسب و المهارات و القدرات ديالها مرفوق بصورتها فجنب كان آخر cv بقا ليها فيديها ...حولات نظراتها لصباط الاسود اللي تقطع بقوة الدوران على الشركات اللي كتقيل تحط فيهم cv ديالها لعل و عسى تلقا شي خدمة رجليها طابو ولا هاد الخدمة بغات تبان...عندها إجازة فعلم النفس و ما قضات ليها والو كتقيل تدور ما خلات شركات د الخياطة ما خلات شركات د الكابلاج ما خلات اطباء نفسانيين ما خلات بانكات ما خلات محلات د الحوايج ما خلات فين قلبات ولكن واااالو الخدمة الوحيدة اللي قبلات عليها هي فام دوميناج فواحد المحلبة و مارضاتش تخدم فيها و حتى عائلتها ماخلاتهاش مايمكنش سنين د القراية و تخدم فام دوميناج واخا هو مافيها حتى عيب مادامها كتخدم بعرق جبينها و خدمة شريفة راه ناس معيشين عائلات من هاد الخدمة و تحية ليهم و لكن فالاخير فاش ما لقاتش قررات تخدم فيها قالت غير تبريكولي على ما يسهل الله و لكن ما تفاهماتش مع دوك ناس و خرجات من عندهم و هاهي رجعات لنقطة صفر من جديد رجعات تقلب كيفما العادة ...بل الأكثر من هذا عقدة مظهرها الخارجي اللي مخلي معظم المحلات مايقبلوهاش تخدم معاهم حيت بطبيعة الحال معروف على البنات اللي كيخدمو فالمحلات خاصهم يكون فمعايير معينة ولكن مع الاسف "خنساء" ما كانتش كتميز بمظهر خارجي اللي غايقدر يساعدها بل الأكثر من هذا ناس كيتعجبو من شكلها و اللي شافها كيطول شوفة فيها مثل ناس اللي واقفين دابا فطوبيس كيشوفو فيها كأنها مخلوق فضائي ...حولات نظراتها لجيهة لوخرى بانو ليها ناس كيشوفو فوجهها ولكن غير كتشوف فيهم كيحولو عينيهم لجيهة الاخرى كأنهم ماشي هوما اللي كانو حاضيينها من دابا شوية ضهرات ابتسامة على محياها كأنها موالفة بدوك نظرات و ماشي شي حاجة جديدة عليها...بارت 2 قلوب أرهقها العشق البهاق أو البرص مرض جلدي كيوقع فاش الجلد كيفقد لونو الأصلي و كيولي فذات نقط فاتحة بزاف على لون الأصلي للجلد وعلميا البهاق كيحدث فاش كتموت الخلايا المسؤولة عن إنتاج الميلانين او لا كتوقف على أداء وظيفتها و كتعتبر نسبة إنتشار المرض 1% بين سكان العالم يعني ناذرا ما يقدر يوقع و لكن كيبقى كيأثر بشكل كبير على شكل الشخص بحيث ممكن يشكل ليه إنزعاج بينو و بين نفسو و كيفما قلت هو نادرا ما كيقدر يوقع لذلك فاش ناس كتشوف شي شخص مصاب بهاذ المرض الجلدي كتبقى تشوف فيه و تطول شوفة لأن شي حاجة جديدة اللي ما موالفينش كنشوفوها بزاف خصوصا الا كان لونك أسمر كيزيد يبان بشكل اوضح و هادشي اللي واقع لخنساء الفتاة اللي من صغرها و هي كتشوف نظرات الاستغراب على وجوه ناس من شكلها و خصوصا انه باين فوجهها بشكل كبيير بحيث ان وجها نص فيه أسمر و نص الاخر مزين بنقط بيضاء نتيجة البرص اللي تسلط على ذاتها وجهها و يديها كلهم مطلسين بيه ربما كان هادشي كيعقدها فواحد الفترة و ما كتبغيش تخرج و لكن دابا نقدرو نقولو ولفات و حامدة الله على شكلها و متأكدة بلي مادام ربي دار فيها هادشي الا و انه هادشي فيه حكمة على الاقل هادشي اللي كتقدر تصبر بيه راسها باش تبغي ذاتها و ما يأثرش فيها كلام ناس و نظراتهم الغريبة اللي كتبين بحال هي ماشي من جنس بشري كأنها كائن فضائي جا ونزل فالأرض....رجعات دورات وجهها لطريق تكمل تأملاتها فسيارات و فناس اللي غاديين و اللي جايين حسات بشي واحد جلس فالكرسي اللي حداها و لكن ما عارتش الامر اهمية حتى حسات بشي حاجة كتجر فشعرها الحريري الأسود كردة فعل منها دورات وجهها تشوف شنو هادشي ...شافت بنيتة صغيرة ريوكها هابطين و دايرة غرينات لشعرها شكلها كيف شي ملاك و سبحان الله دراري صغار كتبتاسم ليهم بلا ما تشعر و هادشي اللي خلا "خنساء " تظهر على شفايفها ابتسامة عريضة و هي كتأمل فملامح هاد الطفلة و هي كتجر فشعرها ...بل تعدات مسألة جران شعر وولات كتجبد لعندها كأنها كتطلب خنساء باش تهزها لحضنها ...حسات المراة اللي كانت هازة ديك البنوتة بلي بنتها كترطا باغا تمشي لبين احضان الشخص اللي جالس فالكرسي اللي حداها الشيئ اللي خلا المراة تلتافت و تشوف طفلتها عندمن باغا تمشي ...بمجرد ما جات عينيها فعيون خنساء و هي تنتافض من مكانها بسرعة وقفات و بقات كتشوف فخنساء كأنها شخص غريب ...تصرف لا منطقي من هاد السيدة خلا خنساء تظهر على وجهها علامات الإستغراب و هي كتشوف فأم هاد البنت و هي كتحقق فوجهها كأنها شبح ..خنساء: واش كاين شي مشكل ؟؟جاوباتها المرأة بصوت غاضب-شوفي نتي أ ختيخنساء جاوباتها بإستغرابخنساء: مافهمتش ؟؟؟-كتشوفي البنت كترطا ما بين يدي باغا تجي لعندك و نتي مادة ليها يديك و كن غير ما كانش ديك المصيبة فوجهك غاتمشي تعاديها ليا و هي ما زال صغيرةخنساء تنهدات و حاولات تهدن فنفس الوقت حيت هاذي ماشي أول مرة كتعرض لمثل هاذ الإهانات ...وقف الطوبيس و دورات عينيها لسرجم بان ليها بلي وصلات لمكان اللي خاصها تنزل فيه هزات صاكها و دارتو فكتفها و شافت فيها و ابتاسمت من فوق خاطرها و وقفات حدا المرأة و جاوباتها بصوت هادئ ...خنساء: البرص ما كيعاديش أ شريفةخطات خطوات لامام و هبطات من طوبيس و زيرات على صاكها و حاسة بروحها مخنوقة و الدمعة واقفة على طرف جفونها ...عيات من هاد نظرات و من هاد الاهانات اللي طول حياتها و هي كتسمع ليهم ...من ديما العديد من ناس ما كيبغيوش يسلمو عليها خوفا من العدوى كيخافو ينتاقل ليهم هاد المرض الجلدي و من حقهم حتى واحد ما غايبغي يكون عندو وجه مشوه كيفما كيقولو هما كلشي كيبحث على الكمال و كلشي كيبحث يكون بيرفكيت و يمتاز بمظهر مثالي راائع و نساو بلي بتصرفاتهم كيجرحو واحد الإنسانة اللي حتى هي تمنات وجهها يكون عادي مثلها مثل كافة ناس و لكن حتى هي شنو ذنبها الا كان ربي ابتلاها بهاذ المرض علاش حنا عزيز علينا نجرحو البشر سواء بالكلام او بنظراتنا ليه او بإهانتنا ليه كأن روح إبليس متلبسانا ضروري خاصنا نكدوها علىشخص عاد نرتاحو مشكل كيعاني منو العالم الا وهو تنمر و ما أحوجنا لناس واعية تقبل الآخر كيفما كان شكلو او لونو او مرضو ...قطعات الشانطي و بقات غادة نيشان و كتسمع صوت البياعة و الشراية اللي حاطين ها ديسير ها الخضرة ها مالين الخبز حتى وصلات لواحد الدرب و دخلات لواحد العمارة كبيرة و زوينة طلعات فدروج حتى وصلات لواحد الدار و دقات دقات متابعين و ربعات يديها كتنتاظر الباب يتفتح و داكشي اللي كان تحل الباب و هي تسمع صوت دافي حنون ...-مرحبااااا بزينة البنات لالة خنساءبارت 3 قلوب أرهقها العشق ابتاسمت خنساء لختها اللي حلات ليها الباب فوقتما كتجي لعندها كتحس بواحد راحة نفسية رهيبة لداخل ديالها كأنها كترتاح بشوفة ختها الياقوت اللي كانت بنت فاواخر العشرينات وكتميز ببشرة سمراء وحروفها رقيوقين ميلحة ومسرارة ...ياقوت كتعتابر الأخت الكبرى لخنساء وبقوة ماالعلاقة بينهم متينة كتحس بيها ماماها ماشي ختها هي الحضن الدافيئ اللي كيحتضانها ومخبئ أسرارها دفينة من صغرها وهي قريبة ليها وحتى الياقوت كتعتبرها بنتها ماشي ختها صغيرة ...قربات ليها وتسالمو بالوجه وحطات خنساء يديها على كرش ياقوت اللي كانت حاملة بشهرها ثامن علاين دخل فالتاسع وقالت بفرحة ...خنساء: كي بقا البطل دياالي [حنات لمستوى د بطن الياقوت وقربات وباست كرشها وكملات كلامها ] فوقاش غادي تخرج نشوفك أالسبع د خالتو فوقاش خرج باش نساريك ونشريلك بيمو ونلعبو انا وياك ياك أ زين ديال طاتي ياك ..هزات راسها وابتاسمت لياقوت اللي كانت كتشوف فيها بحب ..ياقوت : البطل ديالك ماغايخرج حتى غايحمقنيخنساء: ياك بعدا فين هي واحد البخوشة ديال ياراياقوت : يارا ضارباها بنعسة البارح بليل حراام واش خلاتني نعس راها دابا خامرة وانا فايقة كنوجد ليها لعيد ميلاد على سعدي ووعدي دخلي بعدا ماتبقايش واقفة فالبابدخلات خنساء وياقوت سدات البابحيدات صباطها اللي تقطع ولبسات صندالة دميكة انتابهت ياقوت لصباط ديال ختها وقالت...ياقوت: أالله يا ختي مالك على ذاك السباط كولو مقطع ومقشر تقوليك كنتي كتحاربيخنساء : فعلا راني كنقيل نتحارب باش نلقا خدمة وحرااام واش بانت واش اختي ماعندي زهر حتى لهاد الدرجة رجلي حفاو وصبري تقادا وليت حافظة شركات دار دار زنقة زنقة خلاها القدافيياقوت حطات يديها على كتف خنساء وحاولات تهدئها حيت باينة فيها معصبة وعلاين دمعة تسيل من عينيها غير حابساها بزز ...ياقوت : ربي عمرو يضيعك غير رتاحي نتي تبارك الله عليك قريتي وصبرتي هاد المدة كاملة غير عضي فصبر وزيد صبريخنساء مررات يديها على وجهها وجاوبات بنفاذ صبر وبعصبية واضحة من نبرة صوتها ...خنساء: صبر كيضبر أختي والله حتى كيضبرياقوت : الصبر مفتاح الفرج ماعرفتي ربي كيوجد ليك شي حاجة احسن من هاد الخدامي اللي جالسة تضوري عليهم صبري على رزقك حتى يبان وما تقنطيش من رحمة ديال الله ربما الله باغي يسمع صوتك ونتي كتدعيه وتلحي عليه فدعاء ومنها نيت كيوجد ليك شي حاجة ماضايراش وزعما نتي معروف عليك صبارةكلام ختها هدنها نوعا ما وجاوباتها بنبرة هادئة على قبل ...خنساء: ونعمة بالله دابا المشكل ديالنا حنا عارفين هادشي ولكن شيطان كيبقا يطيح عليك شي افكار سوداوية حتى كيكرهك فالعالم وفراسك و تقولي مالي غير انا اللي من دون ناس وزيد عليها شكلي حتى هو مامعاونيشياقوت: الله ينعلو ويخزيه حيدي من بالك هاد الافكار أ والله وكانت الحاجة مكتبة ليك ماكاينش اللي يزولها ليك واخا يتجمعو الانس والجنخنساء ابتاسمت بإستهزاءخنساء: اودي مايحتاجش يتجمعو الانس والجن زهري وانا عارفاه داير خدمتو على احسن وجهياقوت ضحكات على كلام ختها وقالتياقوت: هههه لاماشي حتى لديك درجةخنساء :المهم خليك مني انا ونتي كيف غادة مع التحضيرات ديال عيد ميلاد ياراياقوت : اوا راني من صباح وانا واقفة كنصوب فمادلينات والغاطو و البيتزات ضهري تقسم وهادشي بلا الغدا اللي وجدتو لبلال حيت راك عارفة كيجي من الخدمة خاصو يلقا الغدا واجدخنساء : [جبدات لختها حنيكاتها ] ياختي يخليلي الحادكَة ديال العائلةياقوت : اودي اشمن حداكَة الواحد كيبقا من هادي لهادي حتى كيجيبها فعضاموخنساء: اوا شفتي هاباش مزيان تكوني معكااازة بحاااليياقوت ابتاسمت على كلام ختها وقالتياقوت:نتي خلاص اكبر معكاازة دازت فتاريخ العائلةخنساء: ماكاين لاش نتعلم لشقا دارياقوت: اشمن الواحد مزيان يتعلم مايدي فدراعو تبغي تضحكي فيك العكوزة ولوسات وعائلة راجلك ونتي ترضاي لنفسك راجلك يتشهى تصوبيلو شي حاجة من يديداتك وتقوليلو ماعرفتش دوي أكبيرة المعاكييزخنساء طولات فيها شوفة وجاوباتها بإستهزاء ..خنساء: هاد ديسك حافضينو كلكم لانتي لاماما لاخوالاتي لا عماماتي طيبتو ليا بيه مخيياقوت: بغيتي ولا كرهتي غايجي واحد الوقت غاتزوجي وغادخلي لكوزينة وخنافرك فالارض بسيف على والديك اللهم تبداي تعلمي من دابا تبارك الله راك ماشي شي وحدة صغيرة راك كبيرة وفعمرك ثلاثة وعشرين عام ماشي حنا لي غانوريوك شنو ديريخنساء : كاتهضري على اساس شفتي راجل غير واقف فالبابياقوت: اوا ماعرفتي غدا ولا بعدو يدق شي ولد ناس بابك