مراهقة والاربعيني بلهجة جزائرية

جزء العاشر 🌑

#المراهقة و الأربعيني:

#الجزء العاشر:

كي بديت نوجد فالماعن تع لاتاي قالتلي هيام شوفي ليليان نزيدلك حاجة صراع بزاااف معياف هاوليك كاسو ما يحبش يخلط دوزانو مع لوخرين اغسليه مليح.
رفدتو و كي وقفت مع البوطاجي باش نغسلو إخلاص بدات طبع فيا و تقولي ادناي شويا زلقلي الكاس من يدي فوسط الما في الحوض شللتو و كي سربيت فيه لاتاي سخون طرطق جبت وحدوخر غسلتو مليح و حطيتو.
رفدت السنيوة و يدي ترعش نمشي و خايفة طيحلي، صبت الحاجة مقابلتني جيت نبدا بيها نطق نائل قالي اختي ابدي بالحاج و عمي و كملي باقي الرجال منبعد سربي للنسا.
تفرفشت من الحشمة سربيتلهم و كي وصلت لصراع جا يمد يدو باش يرفد كي ما شافش كاسو رجع يدو و قالي قولي لأم علي تسربيلي قتلو اسمحلي كاسك تكسرلي، نطقت أم سعد قاتلي بديتيه ديجا بالتكسار ليوم كاسو و غدوا ما نعرف وشنو قالي ما صرا والو قولي برك لأم علي هي لي تسربيلي، رحت ليها و قلتلها عاودت سرباتلو واحد جديد و عطاتهولي باش نديهولو قلتلها بصح هو قال عليك قالتلي ولفيه ياكل غير من يدك، قالتلي اخلاص مازالكي واقفة و الراجل يستنى جيبي جيبي أنا نديهولو حطتهولي هيام في يدي و قالتلي قلتلك روحي انت اديهولو خفي.
رحت ليه و كي جيت نطابس باش نعطيهولو زلقت نص طرشني فوجهي و نص دفق على حوايجو ناض يجري قالي خلاص بطلت ما نشربش حرقتيني و أنا قعدت في بلاصتي و نبكي و هوما يضحكو و هو يقولي درڨي وجهك عليا بهدلتيني درتيني مضحكة الله لا تربحك و بدا يعيط أم علييييي جات تجري قالها اديها عليا منا و طلع يبدل حوايجو قلتلها ياك قتلك اديلو انت حرقتو و حرقت وجهي ناضت تضحك قاتلي نوضي نوضي تغسلي ما تصلحي لوالو ههههه

رحت غسلت وجهي و دخلت للكوزينة و هو كمل و حبط و عيطلها يا أم علي جيبيلي الما نشرب، دارت ليا قالتلي روحي اديلو الما و صلحي غلطتك قلتلها و هو علاش ما يجيش يشرب وحدو قالتلي أيا تحركي راجلك طلب الما روحي اديلو هيا، رفدت كاس الما و جيت نديلو قالتلي لالا ماشي هداك كاسو لوخر قلتلها ياك كيف كيف وين راهو الفرق قالتلي كل مرة نعاودك؟ قلتلها اسمحيلي مي هدا مهووس و علميا يتسمى مرض نفسي، نطقت اخلاص قالتلي شوف اسيدي وحدة كيما انت دوك جي تقول على أبو حرب مريض نفسي حاشاك قالتلها هيام اخلاص بركاينا الطفلة صغيرة و ما زالها ما تعرفش توزن كلامها هدرت بنيتها ماشي قصدها دوك تتعلم بلعقل ماتبقايش تبعي فيها على الكلمة قالتلها و أنت كي قاعدة تبعي فيا على الكلمة هديك ما شفتيهاش و هادي كي تهدر برك تقولي عليها صغيرة، قالتلها ما جيبيش روحك ليها انت كبيرة و هي صغيرة.
كي شاف صراع بطينا بالما جا وحدو للكوزينة يشرب صابهم يهدرو قالهم وش كاين و فتح الفريجيدار جبد الما، جات هيام تهدر سبقتها إخلاص قالتلو والله ما هدرت والو قلنا لهادي أبو حرب ما يشربش في غير كاسو قالت عليك مريض نفسي، قالتلها هيام خافي ربي الطفلة ما قالتش هكدا علاش تزوقي فالكلام.
هو كان عاطيهم بظهرو شرب الما و انا كنت واقفة قدامو خزر فيا كي قالت هكداك و حط الما و خرج بيبسي، قلتلو عمو انا ما قلتش هكدت بصح....... قاطعني قال أم علي إدا تروحي نوصلك في طريقي راني خارج قالتلو و الله تعمل فيا مزيا شكون رايح يديني فهد الليل انا و ولادي قالها يمال خفي وجدوا رواحتيكم نديكم و فتح الكانيطا تع البيبسي و شربها، قالتلو حقا كيفاش راك ياك ما تحرقتش من لاتاي قالها لالا ما صرالي والو برك خفي شويا راني برا نستنى فيكم و خزر فيا و راح و هيام طمت دوزانها و عيطت لبناتها مشيت موراها دارت ليا قالتلي ردي بالك على وش تهدري هد المرة ما قال والو بصح مرة أخرى ما نضمنلكش قلتلها و الله ما كان قصدي قاتلي معليه راني نوصي فيك ديري في بالك راكي عايشة مع لفعات و يستناو فيك على الغلطة درتلها براسي ايه. جا وليدها علي قاللها هيا ماما خالو راهو يعيط برا، قالتلو خلاص كملت راني نستنى في خياتك يحبطو
هي دات ولادها و راحت و انا دخلت لشومبرة الحاجة جبدت الفراشات باش نفرش جات حلا خطفتلي فراشها من يدي قلتلها وش بيك قالتلي بلعي فمك صوتك ما نسمعوش قلتلها شدي قدرك قالتلي و تزيدي ترديلي ملفوق و شدتني من شعري حبت طيحني كروشيت في شعرها ناضت تصوغ و تقابضت أنا و ياها دخلت الحاجة و ام سعد عيطت علينا قالتنا وش خداكم هبلتو؟ زادت دخلت اخلاص قالتلي جبتيها لعمرك ليوم واحد ما يسلكك مني و ضربتني بدبزة لوجهي دوختني رحت نجري للصالدوبا غسلت و قعدت لتم نبكي سمعت الدقديق فالباب قلت وين نروح ياربي خرجت دخل الحاج، صبتهم خارجين و حلا رايحة مع خالتها و فهمتهم بلي أنا لي ضربتها بقات الحاجة تهدر معايا قالتلي ما تهدريش معاها و ما علبالك بحتى واحد و انا نبكي منبعد قالتلي فرشي لحرب يرقد قدامك، فرشتلو و قعدت نبكي في فراشي حتى دخل صراع قالها وش راكي يما قالتلو لاباس الحمد لله  قالها وين راهي حلا قالو حرب راحت لعند خوالي قالو علاش راحت ياك قلت حتى للسمانة الجاية و ما عندهاش حتى 3 ايام ملي جات قاتلو يماه خليها تروح نرتاحو شويا من مشاكلها هي و هادي قالها هي وهادي؟ علاش ليليان وشبيها مع حلا، انا خفت تكروشيت في فراشي كنت دايرة و نبكي قتلو و الله يا عمو والله ما قلتلها والو جيت نفرش جبدت الفراش مني و طبعتني كي قلتلها وش بيك بدات تزيد فالكلام و تعيط و جات خالتها ضربتني قالي شكون خالتها؟ قتلو هديك لي وسمها خليصان و لا اخلاص، ناض يضحك قالي خليصان؟!! وري نشوف وجهك قربت ليه حكم وجهي بيدو و يقلب فيه منبعد خلاني و قالي يعملها ربي تاويل و دار ليماه قالها راني رايح نجيب حلا و نولي قالتلو خليها ما خصناش زڨا قالها وين نخليها إدا بنتي ما قدرتش عليها و خليتها لخوالها قولي تربيتها راحت خلاص.
راح جابها و جا و كان باين عليه الزعاف قالي ليليان نوضي قعدت و بقيت نخزر فيه و خايفة قالنا نوضو قدامي دوك تتصالحو و يا ربي و نزيد نسمع بيكم ضاربتو.
وقفت في بلاصتي و ما عرفتش وش ندير قاللها حلا سلمي عليها نشوف قاتلو بصح يا بابا.... قالها حلا ما تخلينيش نخرج على طوعي نوضي، ناضت انا رحت سلمت عليها و هي تان و رجعنا لبلايصنا
منبعد قالنا قسمنا بالله العلي العظيم و نزيد نسمع بيكم غير تخلصوها في زوج هكدا حلا قالتلو ان شاء الله بابا.
وقفت قدامي باسها و قالها يا بنتي علبالك بلي راني عيان ما كفاتنيش مشاكل الخدمة تزوني نتوما ما تحبيليش الراحة؟ قالتلو اسمحلي بابا و الله ما نزيد نعاود، قالها صحيتي بنتي أيا دوك اقعدو راني جبتلكم شويا سقايط تصيبوها قدام الحاجة كولوها و اطلعوا ترقدو، قالتلو لالا بابا نرقد هنا ياك خلاص تصالحت أنا و ليليان، قالها انت ما بيكش ليليان غير باش تسهري مع التلفون.
حرب و حلا رفدوا وش ياكلو و أنا حشمت ندنى حتى قالتلي الحاجة ارواحي ارفدي وش تاكلي با بنتي ديت كي كملت كليت قالتلي تزيدي؟ قلتلها لالا بصح و الله غير فرحت بهد العفسة.
حلا برونشات مع تلفونها و التفزيون طافي قلتلها الحاجة نشعل التلفزيون، قالتلي بصح ما طوليش يا بنتي حبيت نرقد باش نفطن نصلي الفجر. قعدت نتفرج حتى نعست. #تصبحون بخير