مراهقة والاربعيني بلهجة جزائرية

#حقيقة الرواية بعد تصريح البطلة

صرحت شخصية ليليان (اسمها الحقيقي مريم) بهاد الحقائق في القروب ديالها حول رواية المراهقة و الأربعيني قالت:

كي تنشرت قصتي كنت في أربيل في دار خالي كيما رفضت نرجع لصراع.. كانت عندي جلسة طلاق في 2017  و كنت في هديك الفترة نتراسل مع الكاتبة زينب ماجد و بعثتلها محادثات ما بيني و بين صراع و تسجيلات صوتية خصوصية كان يحللني فيهم باش نرجعلو.. أنا درت فيها ثقة و هي راحت نشرتها.. و كي تصلح كلشي و رجعت لصراع حبيت نوقف القصة قلتلها اختميها دوك يفيقولي قالتلي واحد مارايح يفيق خوك درتو ارهابي و بدلت المناطق شكون راح يعرف.. موراها بفترة زاد صرا خلاف وصل لحدو و رجعت لأربيل.. كنت في هديك المشكلة أنا لي عندي الحق و ناس داري لي غلطو معايا بصح كي تكشفت الرواية وليت أنا الغالطة، الرواية وصلت ليهم و أول واحد وصلت ليه هو شخصية (علي)
نكرت و قلت ماشي قصتي و صراع قالي ما نظلمكش نتأكد منبعد ربي يعملها تاويل..
القصة كانت سر و انفضح.. لجأت ليها توسلت حللت ما حبتش تحبسها كانت انتشرت الكترونيا و حصدت ملايين المشاهدات بصح مازال ما طبعتها على الكتاب، قالتلي بعثوك ليا باش تكسريني بعدما نجحت الرواية و زيد ماكاش كيفاش نسحبها خلاص..
كانت دايمن تقولي أنا لي رجعتهالك رواية و تعبت فيها.. إيه ماقلناش علابالنا بلي خدمت فيها واحد ما نكر هاد الشي بصح حتى الشي لي بعثتهولها ماشي سطر ولا زوج و هي بنفسها اعترفت بلي قصتي أكثر قصة توصلها بتفاصيلها لخطر كنت كاتبة كلشي في اجوندا..
كاين ناس بزاف قالولي علاش وافقتي على الحوايج لي زادتهم زينب ماجد من عندها و دوك مور ما تنشر الكتاب و نجح هدرتي يتسمى صح حبيتي طيحي بيها..
هي أنا أول مرة كي نقلت أحداث قصتي ماكانتش عنديش خبرة في مجال الكتابة باش نديرلها حبكة درامية و لازم لمسة من خيال الكاتب، قعدت مدة شحال من شهر و أنا ننقلها فالأحداث من لاجوندا ديالي.. قالتلي صحبتي سارة حبسي القصة راهي دنات للعرض و الشرف و الفتن الطائفية سورتو نهار صراع قال جملة يسب فيها شباب الموصل.. و قالتلي أكبر غلطة كي وافقتي باش دير خوك ارهابي.. في مدة شهر بانت القصة و ظهرت بلي ما بدلت والو و رحت كبش فداء.. عيطتلها قلتلها حبسي كلشي هكدا نبان بلي أنا، زعفت و قالتلي حبيتي تكسريني.. حاولت معاها بكامل الاساليب بصح رفضت وصلت حتى حلفتلها كدب بلي راجلي مات بالاك نغيضها و تتعاطف معايا، قالتلي ابعثيلي تصويرتو مكفن باش نآمنك.. تقلقت قلتلها قسما بالله و ما تحبسيش غير نحرق كامل الأحداث.. شويا و بعثتلي تصاور العائلة نسا و رجال و دراري لخطر كنت بعثتهملها من قبل وحدي ماشي هي لي طلبتهم مني، كانت عندي فيه ثقة عمياء حسبتها ختي، في هداك الوقت ماكانش لوبسيو تع نروتيري التصاور فالميسنجر يعني قعدو عندها و هي كانت تحلفلي بلي راهي تفاصي، كي بعثتهملي قالتلي تحرقي الأحداث ننشر الصور لتم باش فقت بلي طحت في يد وحدة ما ترحمش.. استمرت و زادت نشرت المحادثات لي بعثتهملها كي كان يحلل فيا باش نرجع و كتبت للمتابعين شوفو كيفاش يهدر معاها و شحال يحبها بصح هي حابسة و ما تستاهلوش.. يومين موراها بعثلي صراع لي كابتور تاعهم و قالي هدا لي قلتيلي ماشي حنا ياااااك؟ سكتت ما صبت ما نهدر منبعد قتلو اصبر نفهمك و نوضحلك قالي قبل ما توضحيلي راكي طالق...
رواية المراهقة و الاربعيني هي لي دمرتلي حياتي و أنا السبب لخطر خرجت سراري و فتحت باب المشاكل و فرقتني على صراع و بقى يربطنا غير وليدي وسيم.. سافرت لتركيا و ظهرت بلي كنت حامل، موراها بفترة تطلقنا رسميا و زينب ماجد أعلنت عن الكتاب تع المراهقة و الأربعيني بصح كانت مازال ماتعاقدت.. بعثت للأدمن تع الڨروب الفوكال تع صراع كان يهدد فيه إدا الكتاب تنشر يديلي الطفل.. قالي الأدمن بلي زينب ماجد راهي تقولك إدا حبيتيني ما ننشرش الكتاب نحتاج صراع هو لي يطلب مني هاد الشي.. كي سمعت الفوكال لي فيه تهديد صراع ليا و ليها خافت ما زادتش هدرت على الكتاب و حبس كلشي بصح فالنت كان انتشر.. موراها ولات دير منشورات تخص الرواية  تبروفوكي فيها المتابعين باش يطلبوا منها تنشرها و كي يقولها كاش واحد علاش آذيتي مريم (ليليان) تقولهم هي لي بعثتلي قصتها ماشي أنا لي رحت ليها جبتها من عندها دراع.. منبعد بلوكاتني من الكونت ديالها و الميسنجر و الڨروب..
رجعت للموصل (لعند خالتي) موراها بشهور بعثتلي ميساج تطلب مني نرجعو العلاقة و أنا كي الحابسة آمنتها عمبالي محبة و هي كامل على جال الكتاب باش نحاول ندي الموافقة تع صراع لخطر مام تطلقنا بصح بقينا على اتصال عادي..
قلتلها راني حايبا ندير منشور فالڨروب ديالك قالتلي مور ما ننشر الكتاب منبعد ساهل..
كي جيت داخلة للبلوك باش نزيد بوليدي لخطر جبتو سيزاريان قبل وقتو في شهرو السابع و كان عندو مشكل فالجهاز التنفسي.. قلتلها اسمحيلي إدا كاش ما غلطت و لا تجاوزت حدودي معاك مانيش معصومة من الخطأ..
بعدما هدرت مع صراع عطالها الموافقة على الإسم برك ماشي على الأحداث، نشرت الكتاب و كي تشهر دارت عليا دارت كابتور على وش كنت نهدر معاها فالبريفي و نشراتو في ڨروبها و تبرطاجا على نطاق واسع قالت بلي كنت نحلل فيها و نحب الذل و طلبت منها السماح و هي ما غلطت معايا بحتى كلمة كانت عاسة روحها مليح باش تحسن صورتها قدام المتابعين..
لحقت حتى وصفتني بالعشيقة تع صراع و قالت بلي ما حبيتش نكون ليه زوجة فالحلال و قاعدة نتمعشق معاه فالحرام باعتبارنا مطلقين لي يسمع يقول كل ليلة معريتلو و راميتلو روحي ما بين يديه..
في مكالمة ما بينها و بين صراع وصلت قالتلو بلي ليليان راهي تتهم فيا بعلاقة حب معاك.. هي استغلت عقليتي تع الغيرة عليه و كان عندها أمل باش تصدقها كي ما أمنهاش قالتلو زيرها شويا صح طليقتك بصح يمات وليدك و السمعة ديالو تهمك،، راهي تظل تهدر فالبريفي مع الرجال و دايرا معاهم علاقات لخطر دور فالڨروبات المختلطة و كي يسقسيوها عليك تقولهم بلي نق... و هي لي اعترفتلي، عيطلي صراع قالي اعطيني المودباص ديالك قتلو راك شاك فيا؟ قالي لالا بصح نخاف عليك
زادت لصقتلي تهمة بلي خويا ارهابي و قعدت دافع فالقصة على كل واحد آذاني.. وين شفتو مسيحي يبدل دينو على جال الدراري و لدوك ما حبتش تستعرف بحقيقة خويا لي تعديت عليه نهار قررت نحكي قصة حياتي و خليت كامل الناس تدي عليه نظرة عيانة.. الكلام لي تكتب كان مجرد تمويه لا أكثر و لا أقل بصح كان قاسي و الغلطة ديالي ملول.. هي صح الفكرة ماشي ديالي بصح أنا لي وافقت عليها بعدما قنعتني بلي حبكة درامية و قالتلي نخليوه في دور المجرم منبعد يظهر  بلي كان مع الجيش بصح للأسف خذلتني..
حقيقة قصتي كيفاش بدات هي أني أنا بنت نينوى تربيت في قرى القوش و الحمدانية و بالقوفا منبعد استقرينا في الموصل.. خويا تخرج من جامعة ادارة واقتصاد و خدم في أربيل (وين يسكن خالي) منبعد رجع للموصل (وين يسكنو اهلي) و خدم في نقل البضائع مابين المحافظات ( الولايات)  عند وحد التاجر وحد المرة في 2013 تضارب مع واحد (لي هو عابد) كان جاب سلعة و تزايدو بالكلام، السيد هداك جاب صاحبو و غدرو خويا و خويا جبد بيكي تع حديد ضربو لراسو قتلو.. خاف خلا كلشي و حكم طاكسي راح قبالة للموصل، أهلي هربوه لتركيا.. موراها بربعيام جاو أهل السيد لي مات حليناها بالتراضي و عمومهم قالو نتناسبو باش ما يبقاش الحقد لخطر ولاد عمومهم ما بردوش قلوبهم و كنت أنا في فم المدفع و زوجوني لصراع بلا عرس تصافاو مابيناتهم بصح ماشي باش يسترو على عرضي كيما قالت الكاتبة و إنما على جال القتيلة يمات موراها جاو داوني الرجال كيما حكات و بدات الأحداث لي ذكرتها مع بعض التفاصيل لي زادتهم من عندها..
راجلي من مواليد 1976 و أنا من مواليد 1994.. كي تزوجنا هو كان في عمرو 36 سنة و أنا 18سنة..
هو خريج كلية عسكرية و كلية قانون ماكاش منها حبس قرايتو فالابتدائي، و حاج بيت ربي شحال من مرة و ماشي بونسيوات كيما صوراتو الكاتبة (أم مصطفى و ميادة شخصيتين خياليتين) ..
إخلاص مازالها على ذمتو بصح غير بالاسم.. شخصية حرب خيالية هو عندو غير طفلة وحدة لي هي حلا و حكاية حففلها شعرها و حواجبها و حبت راجل عمتها زادتها من عندها..
صراع ماكاش منها تخطف فالحرب و كلاوني في حقي و تحرش بيا محمد وليد سعد و دخلت لمضافة الشيخ ريكان و كي رجع صراع رجع مريض و هبل هاد الأحداث زادتهم من عندها..
صراع هو شريك روحي و هدية ليا من عند ربي سبحانو بعثهولي و عوضني بيه على كلشي منبعد بابا ربي يرحمو.. يكفيني أنو يخاف الله فيا و يهبل كي يشوف دمعتي..
علاقتي بيه مع لول يعني قبل ما نتزوجو فعليا كانت علاقة أب و بنتو ماشي زوج و زوجة منبعد تطورت الأمور ما بيناتنا و تعلقنا ببعضانا و تزوجنا فعليا..
مرات كنت نخمم زعما لوكان بقيت مع أهلي وش كان رايح يصرالي؟ كلشي مقدر  و مكتوب بصح أكيد يا ننقتل يا نتسبى بصح ربي سبحانو عندو حكمة، صح جازت عليا فترات تمنيت الموت من فراقهم بصح ربي عوضني براجل كيما نوصفو ما نوفيهش حقو في شهامتو و رجولتو و خوفو عليا و حنانتو معايا.. ما يحقد ما يآذي ما يجرح.. ما راهوش انسان كامل صح مقلق و زعافو واعر بصح يحاسب روحو و يندم.. كريم لأبعد الحدود و الأهم يثيق فيا.. شحال حاولو أهلو باش يطيحوني من عينيه و أهلي باش نتخلى عليه بصح سبحان الله علاقتنا كلما تزيد تكبر.. هو يحترمني لدرجة كبيرة قدامهم كامل و يحسسني شحال مهمة في حياتو..  يخاف فيا ربي لدرجة كان كلما يكون خارج ميسيو يقولي السماح ما بيناتنا نخاف ما نرجعش و نكون مقصر في حقك و لا مزعفك و لا مخلي حاجة في خاطرك.. خلاني نشوفو أب و زوج و أخ و صديق.. سبحان الله كيفاش جمعنا و ما بين دار اهلي و دارو سفر تع 8 سوايع..
في 2019 جاز عليا عام فيه الحزن و الفرح، زاد وليدي وسيم في 2 جوان 2019 في أنقرة (تركيا) عند خالو، جبتو قبل وقتو فالشهر السابع .. لتم تلاقيت مع خويا بعد غياب 6 سنين.. هو بعدما هرب لتركيا كمل الماستر ديالو لتم في أنقرة و خدم في مكتبة حتى وفقوا ربي سبحانو و فتح مكتبة خاصة..
توفات مرت خالي و بناتها و ولادهم في حادثة العبارة لي صرات فالموصل ( غرق سفينة سياحية في 21 مارس 2019 و وفاة 120 شخص ) 
توفى الحاج لي كان في عوض بابا، عمري ما كرهتو مع العلم ماكانش يقدر يخزر فيا..
خسرت صحبتي و أختي سارة.. تفارقنا بسبة لي دخلوا ما بيناتنا و ما علاباليش وين راهي دوك..
و ختمتها بصراع.. خسرتو بعدما كان ساندني و معوضني على كلشي فقدتو كان هو أهلي..
كي كنا منفصلين تعذبت و هو بعيد عليا.. مشكلتنا انو كي نكونو كيف كيف نآذيو و نجرحو بعضانا..  كنا كل واحد منا في بلاصة بصح روحي عندو و قلبو دايمن عندي و يحس بيا لدرجة ماشي عادية.. أنا
حكمني السكر في 2019 و دوك عندي حتى دوا القلب ما فاد معايا لا ريجيم لا انسولين دايتها غير للرقاد.. كان دايمن يعيط لخالتي يقولها ردي بالك عليها كاش ما يصرالها.. أنا نحب الحلو بزاف بصح مع الريجيم ممنوع عليا.. مرة فالليل فطنت جوايه الزوج الكوابيس و السكر طالع عطشت نضت باش نشرب حتى نشوف فالضو تع التلفون شاعل لخطر كان سيلونسيو على جال وليدي باش ما يفطنش.. خزرت صبت صراع يعيطلي غير رفدت قالي جيتي في بالي كاش ما تحتاجي؟ غير سمعت صوتو وليت نشهق بالبكا، دايمن يحس بيا صراتلي شحال من مرة.. هو توام روحي و أحلى شي في دنيتي.. وليدي وسيم فيه ريحتو نحس روحي أنا وياه ولادو..
كل يوم كنا نفتحو لاكام و يشوف وليدو هو و يماه و ختو و كي طلبت الخلع عيطلي قالي ما تروحيش لدار الشرع.. ماراكيش حايبتني خلاص أنا نفريها ما بيناتنا و نحبس كلشي و حقك يوصلك كامل بصح ما تبهدليش روحك و تبهدليني معاك..
كي انفصلنا قعد يبعثلي مصروفي وحدي من غير مصروف وليدو و شرالي دار و أمنلي معيشة تع ملوك ما خلا حتى حاجة تخصني و قعد يعتبرني عرضو حتى آخر يوم من الانفصال و ما نمشيش بلا شورو كلمتو هي لي تجوز..
كان كل يوم يعيطلي فالتلفون و أول كلمة يقولهالي يا روحي يمات وليدي..
في ماي 2021 رجعنا لبعضانا و عاودنا تزوجنا.. حاليا راني عايشة فالأنبار مع صراع و نروح ضيفة لعند خالتي فالموصل باش نقرا فالجامعة و هي تحكملي وليدي و فالويكاند يجي يديني للدار و كي يكون ميسيو و يرجع يجي قبالة لعندنا..
مع اللول حب ينقلني لجامعة الأنبار باش نكون قريبة للدار منبعد كي شاف بلي جامعة الموصل أعلى مستوى خلاني نكمل فيها و رجع يشوفني غير فالويكاند و العطلة، كي شافني نتمرمد فالطرونسبور دخلني جوزت البرمي، علمني نسوق و شرالي طونوبيل وليت نروح و نجي وحدي..
كنت حايبة ندخل في كاش منظمة مع لول ما حبش و كان رافض فكرة أنو نخدم مع المنظمات الدولية بصح كي شاف فيها مصلحة ليا في دعم اللغة و بناء الشخصية خلاني نلتحق بأكبر منظمة دولية و كان عملي تطوعي و حاليا راني نخدم فيها كمترجمة
رفدت الحمل في رمضان لي فات و طرحتو و هكدا نقول طرحت سبعة كلشي