مراهقة والاربعيني بلهجة جزائرية

63

#المراهقة و الأربعيني:

#الجزء63:

إخلاص ناضت تندب في حناكها كلات روحها و تصوغ حكمت يدو تحلل فيه قاتلو ما تفضحنيش وليد عمي الله يسترك.. نحالها يدها و يعيط قالها إدا عندك ذرة كرامة ما تقعديش عندي مانيش حامل نشوفك في داري و عيط على أم وسام قالها إدي ختك و رووووحييي... و نائل حاكمو و يجبد فيه و الحاجة تقولو استغفر مولاك يا وليدي الطفلة ما عندهاش سمانة ملي جات..
خلاهم يتنادبو و عيط عليا قالي اطلعي لفوق.. طلعت نجري و هو نوض الطونوبيل و راح.. حلا تحلل في عجوزتها قالتلها خالتي ما تديهاش و الله دوك يتهدن و يرجعها بصح هوما راحو...
مالڨري كامل وش صرا بصح فرحت قلت راجلي رجعلي بعدما شاركتني فيه بالسيف.. رحت قعدت في شومبرتي و حطيت يدي على كرشي و تبسمت يا عمري ربي يخليك ليا أنت و باباك لي ضربها و طلقها على جالي...
شويا و دخل صراع مقلق و زعفان رمى المفتاح و التلفون فوق الطابل دونوي و حط سلاحو و قعد ينسف.. حط وجهو ما بين يديه، تسحبت فوق البونك حضنتو من ظهرو و حطيت راسي عليه.. هدر و هو محبط راسو قالي أنت لي حطيتي حمض الليمون فلاتاي للضياف؟ سكت.. دار ليا جبدت روحي قالي أنا وش قلت؟ قتلو آسفة.. قالي تان آسفة؟ وش مازالكي تزيدي ديري الديڨات و المصايب منبعد تقوليلي آسفة و لوكان غير على حاجة تسوى.. لعب دراري.. اكبري شويا رايحة تشليني.. قتلو ماشي قصدي ندير عفايس كيما هكدا بصح حبيت نبهدلها.. قالي التبهديلة ليا كي ديري هكدا لضياف جاو لداري.. قتلو و دوك أنت علاش راك مقلق؟ كي طلقتها؟ قالي بعدي عليا يرحم والديك وخري.. و ناض للخزانة يجبد حوايجو.. قتلو رايحة نسقيلك الغدا.. قالي مانيش حايب.. ريحي في بلاصتك و ما تحبطيش لتحت كامل.. قتلو علاش؟ قالي مرة في حياتك اسمعي الكلام بلاما تناقشي.. ريحت في بلاصتي بلاما نهدر و هو بدل حوايجو و جا باش يرقد، فتح الغطا تكسل و حط يدو على عينيه، بقيت نشوف فيه منبعد جبدت يدو بلعقل فتحلي حضنو و دار ليا دخلت مابين يديه و هو بقى مغمض عينيه ما دار حتى ردة فعل.. قتلو طلقتها و تهنينا منها ياك؟ قالي ما تتأمليش من هاد الطلاق بزاف.. قتلو علاش؟ قالي توقعي غدوا الصباح يرجعوها.. قتلو ما تقبلش.. فتح عينيه قالي قتلك ما تتأملش ما رايحاش تتطلق من السمانة لولانية تع زواجها ديرها مليح في بالك..قتلو لالا ما ترجعاش.. قالي أنا نرجعها؟ أنا نرجع ليا مرا تغضب؟! نزيد نرمي موراها ألف صباط.. قتلو ااااه.. يتسمى لوكان نغضب أنا ترمي مورايا ألف صباط؟ قالي علاش أنت راكي حاسبة روحك مرا.. قتلو علاش؟ وشبيني؟! قالي ارقدي ما دوخينيش يرحم والديك أخطيني..قتلو حتى تقولي مارايحش ترجعها.. قالي اوووو...  على هاد الحكاية لي ما حبتش تخلاص.. نحى يدو من تحت راسي و دار للجيهة لوخرا..
قتلو إي قول إيه صراع.. سكت.. قتلو إي قووووول... سكت.. قتلو معليش ما تواجبش بصح أنا نبقى نحبك و حضنتو من ظهرو حطيت راسي على راسو..تنهد قالي و الله غير راني عيان، نرجع من الخدمة مهلوك نصيبكم متضاربين خليني نرتاح شويا نرقد وحد السويعة برك.. قتلو و علاش أنا وش قلت دوك ياك قتلك برك نحبك.. قالي يا لالة مشكورة ربي يكثر من مثالك بصح بركاي ما تزغدي فالفراش و ارقدي راني عياااااان... عوجت فمي و بعدت عليه درت للجيهة لوخرا و قعدت نخمم شويا و دار ليا جبدني لحضنو و قالي ما تخميش خلاص ارقدي.. قتلو عقلي و أنا حرة فيه ولا تان تتحكم فيا إدا نخمم ولا لالا.. قالي يا لالة خمي على روحك بصح بركاي ما تزغدي فالفراش.. قتلو ياك قتلي وخري علاش درت لعندي دوك؟ قالياوووووووه .. رمى الغطا و ناض قالي أنا نروح نرقد في شومبرة إخلاص خيرلي.. تقعدت و قتلو وشنو وشنو؟! خص غير تزيد ترقد على ريحتها.. رجع للفراش حكمني تحت يدو و حط رجليا ما بين رجليه زيرني بيهم و غلقلي فمي بيدو لوخر و قالي نشوفوها دوك كيفاش رايحة تزيدي تهدري.. ضحكت و تهدنت في حضنو و رقدت ما فطنتش حتى حسيت بيه كي تحرك نضت معاه.. هو راح يدوش و أنا دخلت لشومبرة إخلاص فتحت خزانتها صبتها معمرتها حوايج تع الرقاد، رحت جبت مقص قطعتهم و رجعتهم لداخل، كان الباب مفتوح مع لي درت صبت صراع بالسوغتي دوبا مربع يديه و يشوف قالي وشنو هاد التصرف؟ قتلو ما عندها مادير بيهم ياك تفاهمت معاهم ما تقربلهاش يمال ليمن راهي مخليتهم ولا نستناها حتى تغريك بيهم؟ قالي منيتك هديك تغريني؟ أنا ليلة العرس و لحمي تشوك منها بسم الله الرحمن الرحيم نص دقيقة ما قدرتش نحملها.. هو يهدر و أنا طليت تحت البونك قتلو وشنو هدا؟ قرب يشوف معايا صبناها حاطا كثر من 4 كيسان تع لاتاي و هو يابس فيهم هكداك و راميا حوايجها تع لداخل لتم.. غير شافهم قالي خرجيهم لابوبال الله لا تربحها وشنو هاد العفانة قلبي خرج اععععع... قالو لتحت تلعبها الشطارة عندها حبست و شومبرتها ما قدرتش تنقيها.. قالي لوكان شفتي ختها قبلها تتقياي وليدك من كرشك.. ارميهم بجاه ربي.. رميت حوايجها تع لداخل في خزانتها و الكيسان جيت نحبهم نغسلهم عيط عليا قالي قتلك ارمييييهم.. قتلو بصح ما بيهم والو قالي نشريلك عشرة بناقص من هاد العفانة نصهم ميكروب.. قتلو هادي عندها ادمان على لاتاي كثر من نائل نهار كامل و هي مسامية بقراجها.. قالي ارميهم و اغلقي الشومبرة و اخرجي.. قتلو راني خارجة وش نقعد ندير فهاد الوسخ.. هدا و تزيد تعيطلي المعفونة كي ما نحبطش نعاونهم فالشغل.. أنا على الأقل منقية شومبرتي ماشي نلعبها قدام الناس ندور على الشعرة و شومبرتي مخليتها هكداك.. قالي كل واحد يعبر على روحو هادي هي حقيقتها في كلشي قدام الناس تلعبها ملايكة و هي دير غير الكحلة من التوت.. و انت تعرفي غير تنڨرشي و ما تشوفيش لبعيد على هديك نخاف عليك تحبطي لخطر علبالي لوكان يطبعوك غير شويا تطرحي البيبي لي في كرشك.. قتلو شكون لي رايح يضربني ماكان لا أم سعد لا إخلاص الدار راهي ليا وحدي.. قالي حلا راهي هنا ما تدنايش ليها.. قتلو و نقعد غير فالشومبرة؟ قالي صحا وش تحبطي ديري لتحت؟ وش عندك لتم؟ يما راهي معاها حلا.. بابا و أم سعد راحو.. نور قاعدة في شومبرتها مع ولادها.. و أنت ليمن تحبطي؟
استري على روحك و ريحي طرونكيل.. قتلو بصح معاك نحبط؟ قالي إيه تحبطي معايا و تطلعي معايا و ما تدنايش لحلا.. قتلو أوكي..
بدلنا حوايجنا و حبطنا صبنا حلا قاعدة مع الحاجة و تحكيلها بحرقة، كي شافتني تعنكرت فيا سبحان الله عندها خزرة باباها كي تزعف فولة و تقسمت على زوج..
قعد صراع قال اووو ماكاش الحس ديك الرحمة.. ماكاش كاس لاتاي نقعد بيه راسي؟ و شاف فيا.. قتلو أنت تأمر حبيبي.. قالتلو الحاجة وش حكايتك أنت؟ مطلق مرا ما عندهاش سمانة ملي تزوجت و حابط زهواني و مرتاح تقول ما صرا والو.. قالها يمال وش حبيتيني ندير؟ نندب و نوح على وحدة ما تسواش كيما إخلاص؟ قالتلو بصح فهمني وش دارت باش طلقتها؟ قالها أنا ملول قلتلكم مصيرها تتطلق ليوم ولا غدوا بسبة ولا بلاش.. قالتلو علاش وليت ظالم هكدا؟ الغلطة تع ليليان و إخلاص لي خلصتها.. كنت تعدل و تحاسبهم في زوج.. علاش هادي كي تغلط تضحكلها و لوخرا طلقها؟ قالها و كنتي متوقعة مني نحترمها و هي لي ذلت روحها؟ و زيد تجيبي ليليان لإخلاص؟
قالتلو ليليان رجعت ما تنحملش و طلعولها الڨرون دير وش تحب و أنت واقف تحامي عليها على المليحة و الدونية.. لالا ماشي هكدا يا وليدي.. قالها وش دارت ليليان وشنو غلطتها بالاك راني معمي.. قالتلو عايرتها و ضربتها بالبليغة و أنت ضربت إخلاص و هي ما هدرتش معاها.. قطعتلها تصاورها و كوفريت عليها و حصلتها في روحك.. و دوك حطت حمض الليمون فلاتاي تع ضيافك و تقولي وش دارت؟ قالها و تجيبي خدايمها لخدايمكم؟ ولا نسيتي يا يما كي ضربتيتي في ظهري و ساندتي الحاج و خليتي لي يسوا و لي ما يسواش يهدر عليا و يقول حاوز يماه.. هي حطت حمض الليمون فلاتاي بصح ما دخلتش عليا في وسط الجنازة و حبت تفضحني في داري و تحبطلي راسي باش نديها، و ما خطبتليش في وسط الرجال تع الديوان و خلاتني حاير  مع روحي في موقف ما عرفتش كيفاش نخرج منو.. قالتلو دوك زدت تأكدت بلي صح قلبتلك مخك و ماراهيش مخلياتك تشوف حتى واحد.. خاف ربي ياوليدي ما تكونش ظالم.. قالها أنا ملبكري ظالم علاش هدا وين فقتيلي؟ ظالم منهار كنت نضرب أم سعد و وجدان و نحاوزهم على جالك.. كنت ظالم بصح خو أختي و اليوم كي وليت نحامي على وحدة ما عندها حتى واحد من غيري فهاد الدنيا وليت ظالم و خو مرتي.. هكدا ياك؟ قالتلو ما تلعبش بالكلام باش تدي الحق، وشمن نهار أنت رضيت باش تضرب أم سعد و وجدان.. قالها يما مازال ما شفتي والو من ظلمي اصبرو عليا برك..
نطقت حلا قالتلو بصح بابا خالتي إخلاص ما عندو ما دخلها في جدو ياك هو لي خطبها فالديوان و هي حتى و غلطت بصح تحبك و منهار تزوجت تحوس غير ترضيك و أنت .... قاطعها قالها أسكتي بنتي أسكتي علبالي وش راهو ضارك.. راجلك إدا كان فيه الخير ما يسمحش فيك أنت و وليدو لي في كرشك سينو ما عندك ما ديري بيه..
حطيتلو لاتاي شدو عليا و قعدت قدامو..قالتلو الحاجة صراع أنا غدوا ان شاء الله نروح لدار عمك نرجعها حرام عليك طلقها في سمانتها لولانية.. قالها قسما بالله العلي العظيم و تروحي يا يما و لا ديري حاجة مور ظهري ما تلومو غير رواحتيكم.. أنا ما عندي ما نزيد نخسر منا لفوق..
كمل كاسو و ناض قال أنا راني رايح كاش ما تحتاجو؟ قتلو لالا حبيبي سلامتك.. هو مشى وأنا مشيت موراه خرجت لباب الهول دار ليا و قالي اقعدي لفوق و ما تحبطيش و ما تدنايش لحلا و لا تتداوسي معاها ادا كاش ما هدرت، احكمي شومبرتك و هاكي تلفوني جوزي بيه الوقت راكي اونسانت ما تتصادمي مع حتى واحد.. قتلو أوكي.. قالي شحال قعد للعيد؟ قتلو خمسيام.. قالي إن شاء الله نحاول ندي يمات من الخدمة و نطلعو لتركيا أنا وياك كيما المرة لي فاتت نريحو شويا و نستفرد بهاد العسل وحدي.. ضحكت قتلو ههههه بصح و الحمل زعما نقدرو؟ قالي جوستومو غدوا ان شاء الله نديك عند الطبيبة تشوفك و نشاوروها.. و ادا قالت لالا نرجعو شومبرتنا تركيا و نعيدو كيف كيف و غمزلي.. قتلو أهم حاجة عندك العيد.. رفع حواجبو و غمزلي قالي بركاينا من الطائفية ديالك أنا و ياك عندنا واحد.. ضحكت هههههه و بستو في خدو و هو باسني في جبهتي و قالي يلا ادخلي دوك و تهلاي في روحك فالليل ان شاء الله نجي.. 
غلقت الباب موراه و رجعت ديت سوندويش و كانيطا بيبسي و جيت طالعة بدا حلا تزيد فالكلام و تسب درتها فالثقيل و طلعت ما خزرتش منبا فيها، غلقت الباب تع شومبرتي و دخلت في فراشي تغطيت و حطيت الكايتمان في ودنيا و قعدت نتفرج فالمسلسل على اليوتيوب و ناكل..
أنا نتفرج و هوما كل شويا يعيطو في التلفون و يقطعو عليا المسلسل نقعد نستنى حتى تحبس لابال و نكمل نتفرج حتى دخلتلو آبال باسم (السحارة) قلتو اووو وشنو هدا صراع وش عندو مع السحارة مستحيل هو إنسان مؤمن وخاطيه هاد الشوفات.. داني الفضول قلت نواجب و نشوف شكون.. مع لي رفدت سمعت صوت إخلاص تقول تعيش ما تكوبيش عليا اسمعني... و أنا كلاطيت بالضحك قلتلها ههههه صار هدا أنت هي السحارة؟ قالتلي الله لا تربحك إن شاء الله عمرك ما تشوفي الفرح و الله غير ندمك يا ليليان اصبري عليا برك عمبالك بالصح خلاص خرجتيني.. و أنا نضحك قلتلها هههههههه لي تقدري عليها ديريها يا السحارة ههههههههه... قالتلي أنا ما كنتش دايراتك في راسي كان همي برك يرضى عليا بصح من ليوم ديري في بالك بلي بدا العد التنازلي لياماتك.. قلتلها يا الموسخة لوكان جا فيك الخير لوكان خليتي سحورك بجيه و نقيتي شومبرتك ولا فالحة برك تقفازي قدامو غير ما تشقايش عفانتك شافها... كوبات في وجهي..
كملت نتفرج المسلسل بصح قلقوني كل شويا يعيطو تقول طاكسيفون، رحت للاعدادات و ديزاكتيفيت لابوس..
لحقت العشرة قلت نحبط نشوف وش كاين وش ماكاش..
حبطت للكوزينة حس حلا ماكاش و طونوبيلة الحاج و نائل فالڨاراج.. دخلت نور قلتلها وين كنتي؟ قالتي كنت مع ولادي فالشومبرة ما عنديش خاطر نخرج من كثرة المشاكل.. قلتلها وش صرا؟ قالتلي جا وسام هو و وليدو داو حلا قالو ماشي حنا لي نمشيو بشور النسا، تطلق إخلاص ولا ما تطلقش حلا تبقى بنتنا و ما دخلناش فواش يصرا في دار صراع و صالح ربي يسهل ما بيناتهم.. قلتلها وهدا بوكرش تع الحاج علاش جا؟ ضحكت و قالتلي ههههه سور سعد قتلو بالجوع ولا جا يراضي صراع.. قلتلها و خشبة جهنم تع أم سعد جات معاه؟ قالتلي خسارة عليك هي راس المشاكل و شوفي ما جاتش هكداك برك سور عندها خطة في راسها على هديك جابتو و جات... قلتلها إن شاء الله يحكمها كاش مرض.. قالتلي ما تعطيلهمش فرصة هوما راهم مقنوطين كي شافوه يحبك و طلق إخلاص على جالك، انت اكسبي راجلك و ما علابالكش بيهم يندبو ريسانهم ، ناس زمان يقولو إدا حبك القمر بكمالو وش راحلك فالنجوم ادا مالو.. قلتلها ما تخافيش هو أصلا ما علابالوش بيهم... حنا نحكيو و باب الڨراج تفتح شفت صراع داخل، نور دات الما من الفريجيدار و راحت لشومبرتها و هو ڨارا الطونوبيل و دخل قال ربي يعاونكم.. قتلو أهلا عمري، قالي الحاج جا؟ قتلو إيه جا راك تشوف في طونوبيلتو.. قالي أنا راني نشوف كاش مصيبة جايبتها أم سعد في راسها يادرا وش راهي تخيط و جابتو..وين راهو تلفوني؟ كاش واحد عيطلي؟ قتلو اووووو.. ما حبسش كل خمس دقايق يصوني.. قالي ما تقوليليش رفدتي.. قتلو على السحارة برك.. كان يمشي و يهدر و أنا موراه كي قتلو هكدا حبس و دار ليا قالي علاااااش ترفدي، ما نبهتكش بلي كي نحط عندك التلفون ما ترفدي ما تكوبي؟ قتلو ما علاباليش بلي هي عمبالي متفاهم مع كاش سحارة.. قالي ليليان و علاش هكدا؟ أنا ماشي حايب نرفد التلفون على حتى واحد و نقولهم ما سمعتوش تروحي أنت ترفدي باش يقولو حتى تلفونو في يد مرتو ترفد و تكوبي على حساب لي تنفحلها عليه؟ قتلو أنا ما تخيلتش هكدا وين علابالي بتخمامهم و زيد رفدت غير على إخلاص.. قالي و هادي بالدات تكفي باش تشهر بيا.. قتلو قولهم نسيت تلفوني فالدار.. سكت و مشى.. قتلو حلا راحت.. حبس قالي وين راحت؟! قتلو جا شيخها داها قال حنا ما نمشيوش بشور النسا و ما دخلناش لا في صراع لا في دار صالح.. قالي أيا مليح ظهر فيهم الخير...
دخل لشومبرة الحاجة قالها وش راكي يما؟ نحى الكاسكيطا ديالو تكسل على رجلها و حكم يدها باسها قالها يما أنت شمعة داري ما تزعفيش تعيشي.. قالتلو يمال سڨم روحك.. قالها مانحتاجهاش يما علاش بالسيف؟ ياك قبل ما نتزوجها قلتلهم ما تتوقعوش نديرها زوجة مصيرها الطلاق ولا تسامي ختها..و هو رضاو و قالو معليه المهم يتكتب اسمها قدام اسمك.. قالتلو ياوليدي الرحمة مليحة و أنت ماراكش ترحم.. قالها بركاو ما تتدخلو أنت و بابا في حياتي يرحم والديكم.. هو يحاسبني عليهم و يخرج زعفان و يروح لعمومي يزوقلهم الكلام و يقولهم حاوزني على جال مرتو و أنت تدخلي روحك و تزعفي و نولي أنا لي مزعفك على جالهم.. خليوني نحل أموراتي وحدي مانيش صغير شعري شاب و نعرف شكون لي نخليها ليا و شكون لي نبعدها عليا.. قالتلو أنا حبيتلك الذرية هدا ما كان.. قالها الذرية راهي جاياتك من كرش هاد المخبوطة.. فرحت قالتلو قول و الله.. قالها و الله راهي حامل و أنا لي ما حبيتهاش تهدر خفت عليها منهم ما شفتينيش كيفاش وليت ما تضويش كي صبتها طبعتها فالقاعة و هي ضعيفة من طيحة قادرة تطرح ياك تعرفيها على هديك قلتلها احكمي شومبرتك و ما تحبطيش.. قالتلو إيه من لول قولي هكدا و فرح قلبي.. دار ليا فرحانة قالتلي صح راكي حامل؟ تبسمت معاها قلتلها إيه رحت معاه درت ليزاناليز و اكدولي.. قالتلي ربي يكملك بالخير يا بنتي، اطلعي تكسلي في فراشك ما تبقايش طالعة حابطة فالدروج.. و شافت فيه قالتلو و أنت ما تقربلهاش بزاف باش ما تطرحش ماشي حاكمها لفوق و مختلي بيها.. فتح عينيه و فمو منبعد عقد حواجبو و قالها يماااا... هادي تان دخلتي روحك فيها؟! قالتلو إيه ساعفها هي البيبي لي ترفدو ما تحكموش لازم نديها غدوا صباح لهاديك أم رحمن ديرلها حجاب تعلقو في رقبتها على التابعة و العين.. قالها اديها وين تحبي بصح ما تقولي لحتى واحد خليها بيناتنا.. قالتلو لالا يا وليدي ليمن نقول علاش هبلت أنا؟
ناض قتلو نوجدلك العشا؟ قالي لالا عمري راني متعشي ريحي.. راح للصالون ريح مع نائل و الحاج، سلم على راس باباه و قالو على سلامتك الحاج.. قالو أهلا بيك وليدي.. خليتهم و طلعت لشومبرتي وحد الربيع ساعة دخل مورايا صابتدني واقفة غلق عليا بيديه و حط راسو في رقبتي ملور و قعد يشم قتلو شحال راك متكيف؟ قالي دار قلبك؟ قتلو لالا حبيت نتكيف اعطيني ڨارو.. بعد عليا درت ليه صبتو عاقد حواجبو قالي خلاصولك كامل المشاكل وصلنا للدخان دوك ربحت عليا.. قتلو و الله غير تشهيتو.. قالي ياودي استري عليا خير ما تتشهاي غدوا بيرة..
قتلو علاش وشبيها البيرة عادي عصير كيما هي كيما الشاربات برك نتوما مكبرينها.. قالي أنت راكي حايبا نكسرلك راسك امشي قليلة الأدب.. ضحكت و قتلو ههههه لالا مانيش حايبا بيرة حايبا ڨارو دخان و الله.. قالي ماشي مليح ليك.. قتلو بصح لوكان يخرج فالبيبي.. قالي النيكوتين ماشي مليح للبيبي ريحي طرونكيل...
راح دوش و رجع و دا تلفونو من عندي و تكسل و أنا حطيت راسي على رجلو و قعدت نتفرج فالتلفزيون حتى نعسنا و رقدنا..
غدوا منداك كانت الجمعة نضنا فطرنا و أم سعد تبع فينا بعينيها لوكان صابت تشرب من دمنا.. و فالغدا وقفنا نشويو الحوت فالجنان قالي وجديلي كابتي غدوا ان شاء الله عندي ميسيو يومين و نرجع.. حنا نهدرو دقدقو فالباب و فتحوه، دخل عندهم صالح و إخلاص و يماها.. صراع حط راسو يقلب فالحوت ما قيمهمش كامل و أنا قتلو راهي جات لي ما تستحيش.. قالي اشششت أسكتي.. قتلو وش رايح دير؟ قالي ليليان ادخلي للدار.. جبدت النفس و دخلت للكوزينة.. خرج ليه الحاج قالو أبو حرب عمك راهو لداخل ارواح وليدي..
دخلت اخلاص من الباب الثانية قالتلي وش راكي ليليان؟ درت بلخف شفت فيها خليتها و جيت خارجة قالتلي راني رجعت وجدي روحك.. خرجت الحاجة راحت تجري رمات روحها على الحاجة تبكي و تحضن قالتلها عمتي تعيشي و الله ما درت والو باش يكسرني من سمانتي لولانية.. رحت قعدت فالدروج قلبي شعلت فيه النار.. سمعت صراع يعيط مع بابات إخلاص قالو إدا عندكم كرامة ما ترجعوهاليش، قالو عمو لوكان جا فيك الخير ما ترميش دمك و لحمك و تخلي عندك وحدة ماشي معروف أصلها منين، قالو هديك لي راك تهدر عليها أشرف من بنتك لي تتعرى باش ترمي روحها عليا كي الساقطة.. علات صواتهم واحد يرفد فالكلام و لوخر يحط.. دخلو كامل للصالون نائل الحاج الحاجة أم سعد و أم إخلاص و أنا واقفة نسمع.. مع لخر قالو عمو بنتي لليوم مازالها عويتقة ما دخلتش عليها لوكان جيت راجل لوكان قدرتلها... صراع كي سمعو قال هكدا هبل و بدا يسب و يطيح و قالو علامتها عطيتها لختها في يدها راكم حايبين تعايبو عليا يا وحد ××××× و بدا يعيط و يبهدل فيه و نائل و الحاجة و نور جبدوه دخلوه، و الحاج خرج بابات إخلاص و قالو بنتك راهي أمانة عندي ما تخافش خليها و روح..
صراع خبط الباب و خرج و صالح دا مرتو و راح و إخلاص جازت عليا غزلتني بحواجبها و خبرتني قالتلي شفتي بعينك بلي نقدر نقلب الدنيا و ساكتة بمزاجي و مازال الخير لقدام.. طبعتها و قلتلها امشي منا بااااايرة.. قالتلي الحاجة ليلياااان ماناش ناقصين مشاكل اطلعي لشومبرتك و ما راحلك.. تعنكرت فيهم و طلعت لشومبرتي نغلي و قعدت نستنى فيه ما دخلش للدار حتى الوحدة تع الليل سمعتو يعيط لفوق خبط الباب و طلع و دخل للشومبرة خبط تان الباب و بدا ينحي في حوايجو و يرمي فالقاعة بالزعاف.. قتلو وش معنتها دوك صراع؟ عيط عليا قالي مانيش نااااقصك بلعي فمك و اسكتي عليا.. قتلو إيه إيه خرج حرقتك فيا انا وش نلت، أنت تضارب معاهم و أنا لي طيح على راسي.. جا ليا قالي تسكتي عليا ولا لالاااااا... حطيت يديا فوق راسي.. راح رفد سربيتة و خرج للصالدوبا..
خرجت فراش و حطيتو فالقاعة رقدت عليه.. شويا هكدا و عاود دخل ما شاف لا فيا لا في فراشي لبس و هو يرمي في حوايجو من و من و راح للبونك غطا راسو ما هدر والو.. و أنا بقيت في بلاصتي عيني ما شافتش النوم حتى للصباح باش غفيت و نضت على الطناش تع النهار رحت لخزانتو صبت كابتو ماكاشها عرفتو راح ميسيو..
حبطت صبت هيام جات كان وصاها باش تدي إخلاص للطبيبة تشوفها باش يعرف ادا صح ولا حيوان يعايبوه..
هوما راحو و أنا قعدت على نار ندور فالدار رايحة جايا.. خرجت الحاجة قالتلي امشي معايا نديك لان رحمن تقطعلك.. شفت فيها قلتلها ما نيش قادرة يما خليني في حالي.. قالتلي ما تهمتميش بهاد الأمور ريحي في شومبرتك و ثبتي حملك.. قلتلها هدا وش راهو هامكم و أنا ما علابالكمش بيا وش يصرالي ولا وش نحس.. قالتلي رجعتي لهبالك؟ قلتلها غير قليلي وش استفدتي كي زوجتيه برك كرهتيلي معيشتي.. قالتلي ياودي روحي تكسلي و خليك من هاد الحكايات.. قلتلها مانيش حيط هنايا لي راكو تهدرو عليه راجلي و نتوما قاعدين تخدمو فالخيوط باش يعاود يدنى لمرتو مرة وحدوخرا..
قالتلي راكي قلتيها مرتو.. قلتلها غير أنا لي مرتو و لوكان جي وحدة في بلاصتي ما نقعدلوش.. قالتي استعقلي ليليان و اطلعي.. قلتلها نتوما ما خليتو عندي حتى عقل..هبلتوووووني الله لا تربحكم.. طلعت لفوق و النار شاعلة فيا دخلت ليتوالات تقييت فوادي من القهر..
كي سمعت صوت هيام لتحت حبطت بلخف قلتلها وش قالتلكم الطبيبة.. قالتلي صح مازال غشاءها في بلاصتو جرحها برك ليلة العرس، قلتلها وش حب يقول؟ قالتلي ليليان ما تتمهبليش ماراكيش تشوفي فيه ماشي حاملها يكون غير شاف الدم جبد روحو بلخف هو بالسيف راهو حامل روحو ما تخسريهش خليه يدخل عليها و يحبس كلام الناس عليه و يخليها... ضحكت و قلتلها ههههه راكم تتمسخرو بيا حبيتو تعفسوهالي بهاد الكلام.. قالتلي و الله ما راني نتمسخرو بيك بصح هدا لي لازم يصرا يلزم تقنعي بهاد الشي و تصبري روحك ليلة برك.. قلتلها لوكان نموت ما نقبلش حبيتوني نهبل مانقدرش.. قالتلي لازم يدخل عليها..يمال خليها برضايتك خير ما بالسيف و يصرا مشكل ما بيناتكم تحملي ليلة برك.. قلتلها ما نتحملشششش.. حبيتو تهبلونييي الله لا تربحكم.. خرجت إخلاص شافتني نبكي ضحكت و طلعت لفوق.. حكمتني هيام قالتلي اطلعي و استري على روحك.. طبعتها و قلتلها وخري علياااا... دخلت لشومبرة الحاجة رفدت تلفونهت و طلعت لشومبرتي عيطت لصراع غير رفد عليا و قال ألو.. بديت نعيط قتلو ما تدناش ليها نموووووت تعرف وش معنتها نموت.. قالي ليليان خليني طرونكيل راهي واصلتلي لفوق راسي.. قتلو توصل لفوق راسك، تموت ما يهمنيش، إخلاص ما تقربلهاش فهمتتتت.. قالي ليلياااان.. قتلو لا ليليان لا بطيخ قتلك ما تقربلهاش و لوكان تقربلها يحبلك باش نزيد نشوف في خليقتك.. قالي أنا ما تشوفيش في خليقتي يا وحد الرخيسة... قتلو ماكاش رخيس قدك أنت و أهلك الله يرفدكم علياااااا...
قالي ينعل باباك لبابات لي جابك.. ياك نرجع و نوريلك كيفاش تتجاوزي حدودك معايا يا ساقطة... قتلو ولي يحط ساقطة في دارو نق... ( طيحتهلو بمعنى خنثى/ مثلي جنسي/ و فالجزاير بكلمة الشارع يقولو نق....)  كيما راك حاط إخلاص في دارك لخطر توالمك... قالي أنا نق.... ياك نرجع و الله غير ************* و بدا يطيحلي بالعيب بكلام الشارع كوبيت في وجهو.. عاود عيط رفدتلو قالي و الله ما ننساهالك اشفاي عليها مليح، نرجع و نوريلك النق... شكون يا ××××× و كوبا في وجهي.. خبطت التلفون و قعدت نبكي و حابسة روحي في شومبرتي.. فالليل نضت غسلت وجهي من الدموع خرجت إخلاص في وجهي قالتلي قطعتي حوايجي تع الرقاد تصبري في روحك؟ هههه احرقي روحك و ديري في بالك كي يجي أول شومبرة يدخلها رايحة تكون شومبرتي و كي نرفد الحمل لوكان ما نخرجكش من هاد الدار و نخليه هو لي يخرجك مانيش أنا... قلتلها ما تفرحيش بروحك بزاف ماديتي غير الفضلة ديالي بصحتك أنت وياه تتوالمو تشبشاق و صاب غطاه .. طبعتها و مشيت قالتلي و الله غير نخبرو بهاد الكلام و كي يجي ابداي تتمسكني و صيبيلو تبرير..
سكتت عليها و دخلت لشومبرتي حطيت راسي في فراشي و نبكي حتى صونا التلفون صبتو هو يعيط رفدتلو غير قلت ألو ناض يعيط قالي أنا الفضلة ديالك؟ تقوليلها كبر و ما قدرش يدخل عليك؟ ياك نحكمك ليليااااان و الله غير نحرقك حيوااااانة.. قتلو بصح أنا ما...... قاطعني و هو يعيط و يسب و كوبا في وجهي.. جبدت النفس و قلت هداك وش كان خاصني هو كي يسمع كلام كيما هدا يهبل و هي عرفت تلعب على الوتر الحساس...
غدوا منداك ما خرجتش من شومبرتي و الحاجة بعثتلي الماكلة مع نور و ولادها..
طلع النهار كنت راقدة جوايه ال11 ما فقتش حتى حسيت بواحد ينغزني في راسي بالزور ينوض فيا نضت مخلوعة صبتو صراع قالي نوضي تشوفي.. شكون النق...؟ حكمني من ودني قتلو وخر عليا.. قالي أنا كبير و ما نقدرش؟ و جبد عليا بكف و حكمني من شعري و يعيط عليا ما نساش كي زدت معاه بهداك الكلام.. ضربني بشحال من كف و هو يرجف لوكان صاب ياكلني و أنا نبعد فيه.. جبد خماري حطو على راسي و قالي امشي قدامي بلا حتى حس.. لوكان نسمع النفس ديالك برك نذبحك.. خرجت قدامو أنا نمشي و هو مورايا.. خرجني للڨاراج و داني مور الدار حطني فالديبارا وين حاط الدوزان و قالي هنا تقعدي حتى لليل ما تخرجيش ولا نحرڨك، رحمي على لي راهو في كرشك ما نقدر نديرلك والو سينو نوريلك النق... وش يقدر يدير..
قعدت و هو غلق الباب عليا و راح.. السخانة تقتل لداخل تقول راني قاعدة فالحمام و زيد سخانة وقت الڨايلة و الدوزان لي محطوط فالديبارا كامل حديد وين ما نقعد نتشوى وليت نسيل بالعرق حتى تشمخو حوايجي و تقييت من الغمة، راسي قتلني وليت نبكي كيفاش رايحة نصبر هنا حتي لليل..
وحد الساعة رجع فتح الباب شافني نبكي و تقييت دارلي براسو تع اخرجي، خرجت و تعنكرت فيه قتلو نكرهك كثر ملي تيماجيني.. بعدني و غلق الباب و مشى و أنا موراه.. هو دخل للصالون و أنا طلعت للصالدوبا ندوش و نبكي..
دخلت للشومبرة صبتو مشعل الكليماتيزو و مغطي راسو و راقد.. جبدت فراش و فرشت فالقاعة و قعدت..
لحق المغرب صلى و حبطت و أنا شويا و لحقتو صبت إخلاص واقفة تهدر معاه و هو حاط يديه في جيابو و محبط راسو يسمعلها كي شافني بلخف نحا يديه من جيابو و قالها ما يكون غير لخير.. و مشى..
قعدت نعس فيه وين يروح و هو فاقلي بصح رد روحو ما علابالوش.. قعدو سهرانين و إخلاص جبدت روحها و طلعت.. قعدت عيني عليه و هو يتفرج فالتلفزيون تالمو كان عقلو مبحر ما فاقش بلي كان داير ميكي.. راحو بالواحد رقدو و قعد غير أنا معاه دار ليا قالي ما تطلعيش ترقدي؟ قتلو ما راحلك فيا مانيش نعسانة.. هز راسو و طلع، طلعت موراه دخل قبالة لشومبرة إخلاص قدام عيني و بصحانية وجه حسيت تقول واحد حكم موس و ذبحني من الوريد للوريد.. دخلت لشومبرتي النفس ضاقت فيا هبلت وليت نروح و نجي و حاكمة رقبتي حسيت روحي مخنوقة و الدمعة حاصلتلي.. ما علاباليش كيفاش طلع عليا النهار.. فطنت على ال9 هو ماكاشو و هي راقدة في شومبرتها حبطت مخلوعة ما صبتوش، عاودت طلعت شفت إخلاص خارجة من شومبرتها رافدة سلة تع حوايج بديت نعيط عليها قلتلها يا خطافة الرجال رخيسة الله يرفدك يا السحارة.. قالتلي بلعقل عليك حنونة هدا كامل كي قربلي ليلة وحدو يمال منا لفوق غير ديري حسابك يومين ليا و يوم ليك.. طبعتها و نضت نعيط و هي مشات و قالتلي ما نردش عليك نخليك هكداك تموتي بحرقتك و نتهنى منك.. باستني فالهوا و روشتلي بيها و غلقت الباب و أنا هبلت حبطت للحاجة لتحت ما خليتلهاش بالعياط عندي ما خلطت فالهدرة معاها قالتلي يا بنتي خافي ربي فلي في كرشك علاش راكي تاكلي في روحك هكدا اطلعي لشومبرتك ياك ليلة برك لي يسمعك يقول ما نعرف وش دار..
خليتهم و طلعت لشومبرتي بكيت مخ راسي و قطعت فراشي هبلت..
للظهر سمعت الباب تفتح خرجت من الشومبرة و قعدت نستنى فيه لفوق على نار.. غير دخل لتحت سلم عليهم و دار لنائل قالو نائل ادي إخلاص لدارهم.. قالتلو إخلاص علاش أنا وش درت؟ و الله ما درت والو.. قالها ادي العلامة ديالك لباباك يفرح بيها و ساميه لتم ما نحتاجكش يلا طبڨي منا تشوفي.. يلا ناااااائل اديهاااا...
رحت نجري للشومبرة غير دخل عندي لاقيتو نصوغ قتلو بوجهك و جاااااي لشومبرتيييي.. نكرهك يا وحد الرخييييس  حرقت قلبي الله يرفدك علياااااا الله لا تربحكككك... راح للخزانة و هو ساكت و أنا نصوغ قتلو ما تسوااااش عندي ذرة كرهتتتتتك... و هو واقف ينحي في حوايجو و يبدل و ما نطق بحتى حرف.. قتلو عمبالك الرجلة فالفراش و كثرة النسوان.. وعدتني ما تقربش ليها من ليلة عرسهاااا انطق ما ديرنيش فالثقييييل... شاف فيا قالي كملتي؟ قتلو واعدتني ما تقربش ليها و بصحانية وجه رحت ليها قداميييي.. جا لعندي جبدني لحضنو و غلق عليا بيديه قالي اسسس خلاص تهدني.. طبعتو و قتلو ترقد عندها فالليل و دوك جي تحضنيييي.. وخرررر علياااا... قالي و الله غير فوق يدي هي مابين يديا و أنا تخيلتها انت ما فقتش حتى شميت ريحتها.. و الله غير بالسيف عليا وش يقولو عليا و أنا ما دخلتش عليها خلاص تهنينا منها راحت لأهلها.. هبلت و بديت نضرب فيه و نرمي عليه فالدوزان و هو يباري و يكوفري على روحو و يقولي هدني روحك خلاص.. خبطتو بالتلفون جا في في صدرو و أنا نصوغ على آخر صوتي نكرهك وخر عليا.. طلع نائل و نور يجريو و هو يدقدقو فالباب و أنا دخلت في انهيار عصبي و هو يحاول يكالميني.. دخلت الحاجة قالتلي وش خداك يا بنتي منبعد صاغت قالتلو صراااع الدم راهو مابين رجليها و هو هبل حكمني و قالي هدني روووحك رايحة تطرحيييي.. حكمتو و صغت من السطر في كرشي ااااااااه...
و هو يعيط جيبولي حجابها و خماااااارهاااا.. ما فقتش كيفاش تغاشيت مابين يديه و كي فطنت صبت روحي فالسبيطار و هو و يماه واقفين.. غير شافني فتحت عينيا طابس باس راسي و قالي الحمد لله على سلامتك.. قتلو و البيبي ديالي؟ قالي المهم أنت راكي بخير..  نضت نبكي و نصوغ بحرقة و هوما يحاولو يكالميوني حتى جات الطبيبة دارتلي تشكة رقدت.. كي فطنت خرجوني من السبيطار و داوني للدار فالليل.. جا يرفدني ما خليتوش حكمت في يد نور و طلعت بالسيف لشومبرتي كسلتني.. دخل هو و أنا مغمضة عينيا قرب حط يدو على جبهتي و تنهد.. باس راسي و مشي خزرت موراه شفتو حط البورتفاي ديالو و تلفونو فوق الطابل دونوي و رفد السربيتة و راح يدوش.. نحيت الغطا و سندت روحي رفدت تلفونو عيطت لخالي غير رفدلي و قال ألو بكيت.. قالي و هو مخلوع وشبيك بنتي اهدري. قتلو خالو تزوج عليا و طيحلي البيبي و خيرت كلشي ما نقدرش نزيد نعيش معاه سلكني منو تعيش.. قالي تزوج عليك؟ وقتاش؟ وعلاش؟ قتلو ارواح خالو الله يخليك.. قالي راكي ناوية على الطلاق؟ قتلو إيه خلاص ما نحتاجوش ما نقدرش نزيد نحمل كثر.. قالي غدوا ان شاء الله مع الظهر نكون عندك.. قتلو ان شاء الله... كوبيت و قعدت نبكي حسيت خلاص هادي هي النهاية ما نقدرش نكمل.. شفتو دخل مسحت دموعي و درت باش نرقد جا قدامي و قالي علابالي آذيتك بزاف بصح و الله غير الدنيا راهي تمشي معايا بالعكس كلما نجي نفرحك و نمشي حياتنا للأفضل تزيد الحالة تسوء.. قتلو مارانيش حايبا نسمعك.. قالي و الله غير نعشقك و الله ما نقربلها.. قتلو وعدتني و خلفت.. قالي ما خلفش كملت وش بديت علبالك بلي ماكنتش حامل نقرب ليها.. تشفاي معاك من كثرة ما كنت ذايب فيك و ملهوف عليك ما شديتش روحي حتى سببتلك نزيف بصح هادي و الله ما حملت و كي دنيت ليها غمضت عينيا و تخايلتك في بلاصتها باش قدرت ندخل عليها..
قتلو صراع أنت من اللحظة لي دخلت فيها لشومبرتها قدامي نحيتك من قلبي.. قالي لالا حنا الزوج ما عندنا غير بعضانا و ما تتقنطيش على البيبي و الله ماراهم هاميني الدراري قد ما راكي هامتني انت تكفيني... قتلو إدا تحبني بعد عليا و ما تسمعنيش صوتك.. تنهد و سكت و تكسل في بلاصتو، ساعة و هو يتقلب فالفراش ما قدرش يرقد.. حسيتو غفى شفت فيه قلت صح صراع اسم على مسمى و خلقلي صراع ما بين عقلي و قلبي.. عقلي يقول خلاص ما نزيدش نتحمل كثر 4 سنين بزاف عليا خليني نجبد روحي و نعيش مارايحاش نموت من غيرو.. و قالي يقول و هو علاش مسكين ماشي في يدو، راهو يدير كامل وش يقدر و ما صدقتلوش مالازمش نخليه..
عقلي يقول أناني و يخمم غير فالرجولة ديالو و كرامتو و أهلو و ناسو على حساب مشاعرنا و أوجاعنا و عمرو ما خمم فينا... و قلبي يقول لالا ماشي أناني سينو ما يهتمش هو تان راهو يتعذب على حالنا و حبنا.. لي راني ندير فيه هو لي أنانية كيفاش نخليه و هو طلب مني برك نساندو و يحلل باش نرضى عليه..
قعدت نطلع و نحبط و مع لخر حكمت عقلي قلت نخرج منا و نبعد و ننسى بلي جيت لهنا أصلا.. 4 سنين نمحيهم من حياتي و نعتبر روحي يتيمة ماتو أهلي و تهجرت..
غدوا منداك كي راح للخدمة نضت طميت دوزاني و دراهمي و ذهبي و حوايجي في فاليزا كبيرة.. و كي لحقت الوحدة و نص سمعت صوت خالو لتحت، لبست حجابي و خماري كركت فاليزتي و حبطت غير شافتني الحاجة هبلت قالتلي وين تروحي  و تخليه؟ علاش تحرقي قلبو و انت علبالك بلي يحبك و حاوزها على جالك.. قلتلها ياك زوجتي وليدك خليه ليك هو و مرتو بصحتك، خليني نروح.. قالتلي نور ليليان ما تخسريش راجلك تعرفيه بلي يحبك انعلي ابليس و ريحي.. قلتلها أنا هنا   تحبس خلاص ما نقدرش نكمل و إدا عندكم ذرة تع رحمة ابعثولي ورقة طلاقي و خليوني نعيش.. قالتلي الحاجة ريحي ليليان اذكري الله بركاي من الهبال.. بعدت عليهم و رحت لخالي غير شفتو حضنتو و بكيت شميت فيه ريحة أهلي.. قالي يلا بنتي هادي مكاتيب الله و كل واحد يدي قسمتو.. قالو الحاج أبو حنا ليليان مرت راجل كي يجي و اديها من دارو بشورو ما نقبلش تخرج منا بلا علمو..قالو ما كالاه أبو صراع شوف الطفلة وش درتو فيها رجعت جلد على عظم خليوها تقرر حياتها.. قالو هي بنتنا و حنا ما ظلمناهاش بالزواج هادي سنة نبينا و الشرع حلل ربعة و أنا و عمومو كامل متزوجين زوج و ثلاثة و ربعة عادي هي برك ما حبتش ترضى بمكتوبها، قالو أنا نحترم دينكم بصح هاد الشي محرم في دينا و صعيب باش تقبلو المسيحية، يماها قبلاتو من قبل وش نالت؟ الأفضل كل واحد يرجع لأهلو و دينو و بيئتو أحسن..
سمعت باب الڨاراج انفتح حكمت في يد خالي و زيرتو.. الحاج خرج من باب الصالو  و لاقى صراع و هو يڨاري فالطونوبيل، كي حبط قالو مرتك حبت تتطلق.. قالو طريق السد لي تدي ما ترد.. قولها تلحقها وقتها و فوقها صباط.. قالي ماشي إخلاص ليليان.. دخل يجري للصالون و شاف فيا أنا و خالي و هو مستغرب ما فهمش وش كاين.. ناض خالي سلم عليه و أنا قاعدة و نطرطق في صباعتيا قالي وش كاين ليليان؟ سكتت.. قالو خالي أبو حرب بنتنا خلاص مكتوبها معاك، أنا جيت باش نديها منا.. قالو وشنو هاد الكلام القارغ؟ أنا و ياها كيما كامل الأزواج نداوسو و نتصالحو.. و دار ليا قالي نوضي ليليان اطلعي لشومبرتك.. قتلو ما عنديش شومبرة في دارك قتلك لبارح نحيتك من قلبي فالدقيقة لي دخلت لغيري قدامي.. افهم و اعتقني.. قالي معليش ادخلي للدار و نهدرو.. قتلو ما قعد حتى كلام ما بيناتنا شبعت من الهدرة و الوعود، خليني نشوف حياتي.. قالي خالي نوضي بنتي نروحو.. قالو صراع ما عندها وين تروح هادي مرتي و واحد ما عندو كلمة عليها من غيري.. نضت حكمت في يد خالي و هو يحاول يشرحلو بلي خلاص ما بيناتنا و صراع ما حبش يفهم ما فقتش كيفاش حكم يدي لوخرا و جبدني لحضنو و باسني في راسي ما سنيتهاش منو قدامهم كامل.. قالي تعيشي ما تكبريهاش لي حبيتيها نديرهالك بصح ما تروحيش.. قتلو مانحتاج من عندك والو اخطيني و بعدت عليه..
وقف ما بيني و بين خالي و قالي ماكاش خرجة منا انسايها هادي هي دارك ماكاش وحدة تسمح في دارها.. قتلو الدار جات راعيتها لي توالمكم أنا عمري ما والمتكم، خليني نروح الله يخليك.. جبدتني الحاجة و نور و يحللو فيا دخلوني للهول و أنا نجبد في روحي منهم و نبكي و صراع واقفلي عند باب الصالون.. رحت نجري للكوزينة و نعيط قلتلهم بجاه ربي اخطيوني راني حايبا نعيش اخطيوني.. حكمني من يدي و يجبد فيا ما حبيتش قالي لي حبيتيها راني واجد مستحيل نسمح فيك.. قتلو خلاص صراع بجاه ربي و الله غير تآذيت من نهار تزوجتك لليوم، تهمتوني، ضربتوني، سرقتوني، طعنتو فيا، عذبتوني.. خليني نرتاح منكم.. قالي نشريلك دار وين ما يعجبك.. قتلو مانحتاجش و عمري ما طمعت فيك و لا حبيت نوصل لحاجة على ظهرك، كامل هادو لي راهم قاعدين في دارك على جال دراهمك بصح أنا حبيتك انت بصح عمرك ما كنت ليا.. أهلك و ناسك مستحيل يتنازلو عليك ليا يمال اقعد ليهم و أنا لي نجبد روحي منكم.. قالي علبالك شحال نعشقك بصح تهدني و خلينا نهدرو بلعقل ما تبكيش.. قتلو ما نتهدنش راني حايبا نعيش.. قالي و الله غير لي تحبيها نديرهالك.. قتلو ما نحتاجكش.. ماشي غير أنت لي ظالمني مام أنا غلطت حنا عمرنا لا كنا لبعضانا لا فالدين لا فالعمر لا فالبيئة.. تناسيت ديني على جالك و مشيت بشورك لخطر نحبك، نسيت عاداتنا و مشيت بعاداتكم على جالك، بصح عمرك لا فهمتني و لا فهمتك.. عقلي و عقلك ما توافقوش، مانيش نلوم فيك بصح و الله ما فهمت عقليتكم خلاص حايبا نعيش بلاما نخاف اخطيوني.. حب يطلعني للشومبرة باش يهدني و أنا قعدت نجبد في روحي، عيط على أهلو باش يخليونا وحدنا و أنا قعدت نجبد في روحي.. دخل الحاج حكمني و قالو خليها تروح و تقرر.. و خرجني للڨاراج.. و صراع بدا يرفد يرمي و يكسر و يعيط فهمتو غير كي قالهم طرطقتولي داري الله لا تربحكم..
طلعني خالي فالطونوبيل و دموعي تجري.. سلم عليهم و جا رايح خرج صراع عطالو دراهم قالو هدا مصروفها خليها دوك تروح معاك تتهدن يامات و نشوفو موراها كيفاش نصلحو الأمور .. سلم عليه خالي و هو عينيه ما نحاهمش عليا كانو حمورا و الدمعة حاصلتلو و هو يشوف فيا.. ديمارا خالي و أنا قعدت نشوف فيه فالمرايا بقى واقف في بلاصتو حتى خرجنا من الحومة و ولا ما يبانش..
جازت شهور حلول يصالحني بكامل الطرق و ما قنعتش، هو ما رضى يطلقني و أنا ما رضيت نرجع..
إخلاص مازالت على ذمتو، 4 مرات يحاوزها و يجي يطلقها ينوض الصباح يصيبها رجعت وحدها و تبكي و تحلل يولي ما يطلقهاش.. مازالو أسير أهلو و عاداتو و تقاليدو و أنا ما قدرتش، ماشي أنانية بصح ماكاش خيار ثالث يا أنا يا هوما و علبالي ما يقدرش يخلي يماه و هي الحاجة الوحيدة لي معلقاتو لتم ما يقدرش يخليها و يجي لعندي ما عندها حتى واحد من غيرو..
رفضت يشريلي دار وحدي و ما نقدرش نرجع و إخلاص على ذمتو و نعيش معاها في نفس الدار و تقتلني الغيرة..
حاولت نرفع دعوى طلاق ما قبلش قالي ارفعي و ديري وش حبيتي آخرتها ترجعي لحضني ما عندك وين تروحي.. هو ما حب يتنازل و يطلق و أنا ما حبيت نتنازل و نرجعلو..
كل جمعة يجي ليا لدار خالي و يحاول يقنعني بصح أنا نرفض حتى نخرجلو و نشوفو، هكداك و ما كرهش يراسلني و يبعثلي كلام حب و شوق و ما تنازلتش،  تلوعت بغرامو و قلبي تكوى من نارو و عذابو و قعد يبعثلي مصروفي كامل و ماشي مقصر معايا في حتى حاجة و كي نجي نرفض يقولي ماشي كيما تحبي ما نقبل حتى واحد يصرف عليك من غيري..
دار بابا كريتها و قعدت عند خالي هوما وحدهم و أنا وحدي.. صح يقنطوني مرات  بصح أهون من نارهم بألف مرة..
قررت نرجع لقرايتي بصح خفت هو كي السبع الهادئ علابالي لوكان نهيجو ما نقدرلوش مارانيش قدو.. حتى خالي كي حبيت نطلق قالي ما تحصلينيش مع صراع هو راجل تع عشيرة و قانونهم صعيب لوكان كاش ما نتلاعبو معاه يخرجها فينا طول و عرض..

[البنات حتى لهنا كامل حكاتو ليليان منبعد ابتداءا من الجزء الجاي كامل من مخيلة الكاتبة رايحة نحط منشور مباشرة بعد هاد الجزء نوضح بعض الأمور... كنت رايحة نخلي التوضيحات حتى نهاية الرواية منبعد بدلت رايي مانيش حايبتكم تبكيو فالباطل و حنا فالعواشير لخطر ليليان رجعت لصراع و راهي عايشة معاه لاباس عليها]