مراهقة والاربعيني بلهجة جزائرية

27

#المراهقة و الأربعيني:

#الجزء27:

هديك الفترة كانت شويا ماشي مليحة و تخلطت البلاد فيها و كثرت المظاهرات الإحتجاجية تنادي بتغيير الوضع المتدهور، كنت دايمن نشوف نائل و صراع يتكروشاو كي يبداو يتناقشو على الوضع السياسي، و نائل كان حايب يخرج يتظاهر بصح صراع ما كانش يقبل يقولو هدي نار راهي شاعلة ما نديو منها غير الرماد و ربي سبحانو يقول قو أنفسهم و أهليكم نارا وقودها الناس والحجارة..  و ما كاش ثمن لهاد النار من غير أرواحنا و حيطان ديورنا.
وصل صراع و باباه و خاوتو في هدوك ليامات لدرجة وين ما كانوش يروحو يصليو الجمعة في الجامع لخطر الاعتداءات كانت تستهدف التجمعات و الجيش و البلايص التابعة للدولة.
في هداك النهار كي صرا الإنفجار في الكزيرنة،  خرجوا كامل الرجال لبرا يحوسوا على صراع و راحت معاهم حتى الحاجة كان قلبها محروق على وليدها و ما قدرتش تصبر، هوما غير خرجو و نسمعو الإنفجار الثاني ناض العياط و البكا و الصوغان، انا كنت تحت التاقة و حاطة يديا فوق راسي كي تكلاطا الزجاج طاح كامل فوقي، سندت يدي باش نوقف دخلتلي زجاجة ما بين صباعتيا و دمي يشرشر بصح من الخوف ما اهتميتش كنت نستنى غير وقتاش طيح الدار علينا و نندفنو تحتها، خرجنا نجريو قعدنا فالڨراج و نطلو الجيران كامل خرجو يشوفو وش كاين، شويا هكدا و رجعت الحاجة تبكي و تندب على صراع مازال مابان عليه والو و سعد عيط علينا قالنا ادخلوا للدار.
خنقتني الدموع ما قدرتش حتى نسقسي بالاك كنت خايفة يقولولي كاش ما صرالو ما قدرتش نواجه، تخلطت عليا الاحاسيس ما بين الخوف و الندم دخلت للكوزينة و قعدت نبكي، جا الحاج و نائل سقساونا إدا جا قالولهم مازال مابان والو، كل واحد فيهم كان يعيط فالتلفون من جيه كان عندنا امل يشعل التلفون و نحكموه بصح والو غير مغلق أو خارج مجال التغطية.
حنا هكداك حتى تفتحت باب الڨاراج و دخلت طونوبيلتو كامل خرجو يجريو و هو حبط و عيط ياك كامل راكم ملاح؟ واحد ما تقاس؟ حضناتو الحاجة و حلا و حتى إخلاص و قاعدين يبكيو، عيط عليه نائل قالو ويييين كنت علاش تلفونك طافي النار شعلت في قلبونا عليك قالو التلفون خبطتو فالحيط قبل ما نخرج كنت مقلق راهو لفوق فالشومبرة، كي خرجت سمعت الانفجار رحت وين صرا و رفدت الموتى معاهم و رجعت باش نطمنكم علبالي نصيبكم محيرين، حضنو و قالو الحمد لله على سلامتك يا خويا.
أنا كنت واقفة عند باب الكوزينة و نخزر فيه و دموعي تجري ما قدرتش نبوجي من بلاصتي من الشوك كي شفتهم دخلوا عاودت رجعت للكوزينة غطيت وجهي بيديا و نبكي، دخل عليا من الباب الثاني تع الكوزينة و يقول عصفورتي وشبيها تبكي و حكملي وجهي قاعد يخزر فيا حضنتو و وليت نشهق بالبكا زيرني عندو و يقول هد الدموع كامل على جالي؟ تحبيني كامل هكدا و ساكتة؟ و يضحك
جبد كرسي و قعد و قعدني على رجلو جبدت راسو لصدري و نبكي و هو يضحك و يكالمي فيا حتى نتبه للدم في يدي قالي اصبري اصبري... دنيت شويا حكم يدي قالي وشبيها يدك باش قستيها.
نوال و حلا و إخلاص كانوا واقفات و يخزرو دار لحلا قالها بابا جيبيلي البوات فارماسي من الصالدوبا، قعد يخزر في وجهي و يمسح في دموعي و يتبسم قالي ما رضيتي عليا حتى طرطڨت الدنيا ظهرتي ماكيش ساهلة ضحكت و نوال ولات تضحك و إخلاص تمص فالقارص.
داوالي الجرح و غطاهولي كي كمل شاف الحاج جاي للكوزينة بعدني على رجلو و قال لنوال ختي نقيو انت والبنات الكوزينة قبل ما يجي الراجل باش يسڨم الزجاج تع التاقة هادي يدها مجروحة و خزر فيا تبسمت قرصني من خدي ضحك و راح قعد معاهم.
نقينا الكوزينة و جا الراجل عاود الزجاج، درنا ماكلة خفيفة لخطر قريب الظهر و حنا ما فطرناش.
الرجال قعدوا يڨصروا فالصالو و حنا بدينا نخملو فالدار، بديت نمسح فالهول و إخلاص و شيماء قاعدات، قالتلي اخلاص تعرفي تمثلي حتى انا و آمنت دموعك قلتلها و منكم نتعلم خلوصة حبيبتي .. بصح نوضي خليني نمسح الوسخ لي راهو تحتك خزرو في بعضاهم قالتلها شيماء وش تستناي من وحدة ساقطة ما عندهاش ألأصل، نضت خبطت النشاف فالقاعة و قلتلها أنا علاش راني حاملة سمكم؟! عندي راجل نقولو هو يعرف يرجعلكم مانيش قاعدة هنا باش ننهان و هو كاين و جيت رايحة ليه جبدتني أم سعد و قالتلي شدي لسانك عندنا عرس ما خصوناش مشاكلك قلتلها يمال شدي لسانات بنتك و بنت اختك نشد لساني، تعنكرت فيا و دارت ليهم قالتلهم خليونا نكملو عرس خوكم على خير هادي ما تستحيش و دوك تروح ليه ترجعها دراما و هو يجي يضبح عند ريسانا.
دخل صراع صابني نخزر فيهم و دايرا يديا في جنابي قالي ليليااان كاش ما كاين؟ قالتلو إخلاص لالا كنا نڨصرو معاها برك قتلو ظهري تكسر و هوما ما حبوش ينوضو يخليوني نمسح و تقولك كنا نڨصرو معاها؟ قالها يدها راهي مجروحة ما عندهاش الوقت للسماطة هادي لوكان تنوضي تمسحي في بلاصتها ماشي خير و دار و هوما ناضو ينسفو و راحو.
كملت مسحت و رحت للصالدوبا،دخل صراع وقف مع لافابو باش يغسل يديه صابني مطابسة و نغسل فالنشاف فالبيدون صفر و قالي عصفوراتي اطلعي لعندي شويا لفوق درت ليه تبسمت و قتلو ما راكش تشوف فيا مع الشغل، نفض يديه من الما و قابلني قالي تعياي و هوما كامل مريحين و الله ما صرات ضحكت جا يقرب ليا قتلو ما تقربش و الله غير راني عرقانة قالي شوف الستوتة كيفاش تشعلني و انا شايد روحي على شعرة منبعد تقولي عرقانة نضت نضحك ههههه قالي اشششت فضحتينا هادي غير ملبعيد يمال لوكان نقرب كيفاش ضحكت هههههه قتلو اطلع خليني نكمل خير ما يجوز كاش واحد يشوفنا و الله غير عيب قالي منبعد؟ لي حب يشوف يشوف علاش خايف منهم ياك حلالي، قتلو يمال مدام هكدا خليني نضحك براحتي و ضحكتلو ضحكة مصرية ههههههييييي .. قالي أسكتي الله لا تربحك بهدلتينا نروح خيرلي، نضت نضحك هههههههههه و كملت شغلي دوشت و دخلت لشومبرة الحاجة، شويا هكدا قالو جات أسماء بنت ام سعد، هادي موالفة كي جي هي و ولادها يقعد معاها راجلها و يبات بليامات حتى يروحو و صراع يتقلق منو، هو أصلا ما يرتاحلوش يقول بلي يشوف بزاف في نسا الناس و على هديك كلما يجي ينبهنا و يقولنا وحدة ما تخرج قدامو و لا تديلو حاجة.
لحقت ال4 صراع بدل و قال راني خارج عندي خدمة قالتلو الحاجة اقعد هنا يا وليدي ما تروحش راك تشوف فالحال كيفاش راهو قالها يما لي كاتبها ربي جوز ما تخافيش.
هو خرج و الرجال دخلو، الحاج دخل راجل أسماء للهول وسمو عادل و أنا ما قدرت ندخل ما قدرت نخرج و هيام نغزتني قالتلي ما تمشيش قدامو قلتلها وش رايحة ندير ماشي بيدي لازم نطلع و نحبط و نروح للكوزينة غدوا إن شاء الله العرس و رانا بشغالاتنا.
شويا هكدا الحاج طلع رقد و عادل قعد مع أم سعد و بناتها.
كنت فالكوزينة حتى نسمع في شيماء تقولو ادخل خويا انت وليد الدار ماراكش براوي و الدار دارك، كنت واقفة مع البوطاجي حتى دخل عليا فتح الفريجيدار و جبد الماء قاعد يشرب و يخزر فيا، شللت يديا و حبطت جبتي و جيت خارجة قالي من صابني شايد هد الطول ما بين يديا، تشوكيت خرجت نجري و دخلت لشومبرة الحاجة مخلوعة، خزرت فيا الحاجة قالتلي يا بنتي وشبيه لونك مخطوف هكدا؟ قلتلها ماشي صراع قال بلي عادل راجل أسماء ما يدخلش للدار؟ دخل عليا و أنا فالكوزينة قالتلي هدر معاك؟ قلتلها لالا بصح هكدا ما نقدرش نخدم الاز و هو يدور فالدار و تعرفي صراع لوكان يسمع بلي مشيت قدامو انا لي نخلص قالتلي دوك نقولهم يدخلوه للصالو.
خرجت من الشومبرة شافت أميمة بنت سعد قالتلها روحي عيطي لعلي وليد عمتك هيام، كي جا قالتلو روح ادي راجل عمتك يقعد فالصالو قالها علبالي بلي خالو صراع ما يحبوش يدور فالدار قتلو أيا نقعدو فالصالو بصح خالتي شيماء ما حبتش قالتلي هدا ماشي غريب هدا خونا. قالتلي نائل راهو لفوق و لا خرج؟ قلتلها واقيل راهو لفوق قاتلي روحي عيطلو، خرجت من الهول و عادل يكيل فيا، طلعت لنائل صبتو فالصالدوبا يغسل و غايس قتلو نائل ما انتبهش، نااااائل قالي اووو وش تحتاجي قتلو وين راك غايس عندي ساعة و انا نهدر معاك هادي كامل فرحة؟ قالي علاش ما نفرحش رايحين يزوجوني و لا يذبحوني قتلو لالا قصدي راك قابل تتزوج مرت المرحوم قالي أنا ماشي فرحان كي رايح نتزوجها بصح يبقى عرس و الفرحة كي رايح نجيب ولاد خويا الله يرحمو و نوقف عليهم بالاك يرتاح في قبرو و يطمن عليهم قتلو اممممم هدا ماكان قالي مي انت صح قراعجية مليااااار روحي خليني نبدل و نخرج و غلق الباب عاودت دقدقت فتح و قالي وشنوووو قتلو الحاجة تحتاجك كي شفتك غايس نسيت علاماش جيت قالي قوليلها نبدل و نحبط ليها.
حبطت صبت عادل راح للصالو، دخلت للكوزينة، هيام طلعت هي و إخلاص باش يسيقو السطح، شيماء خزرت فيا و قالتلي روحي افرزي الجنان و اصلحيه قلتلها صراع ما يحبش، قالتلي شوفي لالة ماناش خدامين عندك و لا عندو و حكاية ما يقبلش و ما نعرف واشن ما توكلش الخبز فهمتي.
لبست خماري و خرجت نقي الجنان حتى شفت عادل خرج من الصالو قلت في قلبي اووووف دوك هدا وين نروح نصيبو حبطت راسي و كملت نكنس حتى حكمني من يدو انخلعت جبدت يدي بلخف صبتو حطلي فيها نيميرو تلفون و اغمزلي و قالي عيطيلي يا الزينة، خليت كلشي و رحت نجري للدار خبطت في نوال قالتلي وش بيك بعقلك علاش راكي تجري قلتلها والو برك تعيشي روحي كملي الجنان في بلاصتي، جيت داخلة لشومبرة الحاجة صبت نائل خارج وليت طلعت نجري للسطح عيطت لهيام قلتلها دقيقة نحتاجك دارت ليا إخلاص قالتلي رانا نخدمو ماشي وقتك قالتلي هيام خير ليون و الله راني مشغولة مادابيا نكمل و نتهنى قلتلها دقيقة برك و غمزتها فهمتني حطت البالي و قالتلها اخلاص كملي مانطولش و نولي.
جات ليا حكمتها من يدها و حبطتها نجري لشومبرة صراع و هي تقولي يا بنتي بلعقل وش خداك، تأكدت بلي ماكان حتى واحد و درت ليها قلتلها هيام الله يسترك سلكيني و قوليلي وش ندير قالتلي غير لخير وش كاين؟ حكيتلها كلشي قالتلي ماشي صراع وصاك ما تخرجيش قدامو قلتلها ياك شفتيه بعينك ملي جا و هو يدور فالدار براحتو و شيماء جايبتها عڨابي، لوكان هدا يبقى هنا ما نرقدش هدا نخاف على روحي منو خاين الدار ما يتعسش، قالتلي احكي لصراع هو يدبر راسو قلتلها حبتيه يقتلني؟ قالتلي يمال كيفاش هدو حبوا يديرولك كومبلو إدا سكتي يزيدو يورطوك كثر و إدا هدرتي تحصل فيك و انا ما نقدرش نهدر و نتهمو لخطر علبالي كامل يوقفوا ضدي، تاخدي رايي قولي لصراع احسن هو يتصرف خير ما يزيدو للقدام و تندمي، و صراع لوكان يسمع من جيهة اخرى و الله واحد ما يقدر يسلكك منو قلتلها خفت منو قوليلو انت قالتلي ماتعرفيش صراع و التوسويس ديالو لوكان انا نقولو يقولي علاش انت لي قلتيلي و ماشي هي إدا صح تحرش بيها
يا بنتي خودي رايي خويا و نعرفو عيطيلو و اعرفي كيفاش تهدري معاه بينيلو بلي راكي خايفة و ما كاش واحد من غيرو لي يقدر يحميك.
طلعت تكمل التسياق و خلاتني حايرة ما عرفت نحكيلو و لا لالا بصح صبت عندها الحق فواش قالت.
حبطت لشومبرة الحاجة رفدت تلفونها و عاودت رجعت لشومبرتو عيطتلو هو يصوني و قلبي يخبط من الخوف رفد و قال وي يما قتلو لالا أنا قالي آه ليون هدا أنت حياتي قتلو وين راك قالي توحشتيني؟ قولي إيه برك و دوك نخلي كلشي و نجيك طاير قتلو لالا بصح.... قالي ليليان وش بيك وش كاين قتلو محتاجاتك قالي وش محتاجة قوليلي قتلو نقولك بصح ما تتقلقش قالي ليليان ما تقرقشينيش دوك قوليلي وش صرا قتلو بصح تواعدني بلي ما تتقلقش قالي تهدري دوك و لا و الله ما نتفاهمو قوليلي وش كاين حيرتيني قتلو اسمعني و حكيتلو كلشي بدا يعيط قالي ياك قتلك ما تمشيش قدامو و نبهتك ما تخرجيش لا للڨاراج لا لغيرو و لي يهدر معاك قوليلو راجلي ما يحبش و لتم تحبس راكي حايبا تباصيني و لا وشنو، شوفي تقعدي في شومبرتي حتى نجي و لوكان نسمع بيك حبطتي رجليك نقطعهم و كوبا عليا.
قعدت فالشومبرة حتى للمغرب و هو ما بانش، كرهت وحدي وليت حبطت صبتهم يصليو قلت لهيام صراع ما جاش قالتلي لالا مازال قلتيلو؟ قلتلها إيه و شبعت تبهدايل من عندو قالتلي ما تخافيش ما يديرلك والو بصح ماشي ساهلة باش يسمع بواحد يتحرش بمرتو.
قعدت خايفة رايحة جاية منبعد سقسيت على على عادل قالي خرج مع خالو نائل.
حطينا العشا بصح اللقمة ما قدرتش نجوزها، كملنا غسلنا الماعن و ما بان لا صراع لا نائل لا عادل.
كنت واقفة في الكوزينة نوجد فلاتاي حتى نشوف صراع دخل من باب الڨاراج و نائل حاكم عادل و يمشي بيه كان وجهو مديفورمي، طفيت الفورنو و رحت نجري دخلت لشومبرة الحاجة، سمعت أسماء صاغت كي شافت راجلها منبعد ما فهمتش وش كانو يهدرو جا علي وليت هيام جايز عيطتلو قتلو وش كاين قال عادل راجل أسماء تبلى طفلة متزوجة حكمو راجلها ضربة و خالو صراع و نائل جابوه.
غلقت الباب و قعدت رايحة جاية قتلني الخوف حتى دخل عليا صراع مقلق و عاقد حواجبو رحت نجري ليه حضنتو قبل ما يهدر و بديت نبكي و قتلو والله غير هو ماشي انا، مسح على راسي و قالي خلاص حبسي عليا هد الدموع راهو دا حقو و ربيتو باش مرة اخرى يخمم الف مرة قبل ما يدنى احاجة خاطياتو، و من الصباح ما نحتاجوش هنا لا هو لا عايلتو، رفعلي وجهي بيدو باسني في جبهتي و قالي روحي اغسلي وجهك و وجديلي لقمة ناكلها راني ميت بالجوع، جبدت روحي من صدرو و جيت رايحة عيطلي قالي ليون شكون كامل علبالو بهد الحكاية قتلو غير هيام برك حكيتلها و هي لي قالتلي احكي لصراع هو يتصرف، حتى الحاجة و ما علابالهاش، قالي احسن و ما تحكي لحتى واحد و بنات أم سعد ادا كاش ما معناو ثقليهم ما تواجبيهمش و ادا دناو ليك قوليلي و انا ندبر راسي معاهم. درتلو براسي إيه و خرجت نغسل جا مورايا باش يغسل شفت يديه بالدم انخلعت ضحك معايا نشفهم و خرج.
تبسمت و طمنت اووووف الحمد لله خلاص الخوف، رحت للكوزينة وجدتلو العشا و بعثتلو السنيوة مع محمد وليد سعد.
رحت نحيت حوايجو من الحبل و دخلت لشومبرتو حددتهم و علقتهم فلي سانتخ، شميت ريحتو مازالها في قميصو جبدتو لصدري و قاعدة نشم فيه ما فقتش حتى وقف قدامي قعدت يخزر فيا و يتبسم قالي وش راكي ديري تفرفشت، كنت قاعدة على طرف البونك و مقابلة الخزانة و فاتحتها و كي الحابسة جيت نسند روحي باش نوقف طيحت كامل الحوايج و طحت داخل الڨارد روب، شبع ضحك عليا حتى ولا يڨرڨر، مدلي يدو و قالي ارواحي ارواحي ههههههه، شديتو و نضت قتلو الصباح نعاود نسڨمهم و قاعدة نغاول باش نخرج سبقني طبع الباب بيدو غلقو و قالي ما كاش خرجة من هنا حتى تقوليلي علاش كنتي تبوسي و تعنقي في حوايجي قتلو اااااه ما.. ما... طاحو وحدهم قرب ليا و قالي ماشي غير هوما لي طاحو قدامك حتى أنا على كبري في هد العمر و طيحتيني قتلو اااا... وشنو... بصح خليني نروح و حطيت يدي على صدرو باش يبعد شويا فرفشني قربو مني بزاف، زيرني للحيط و باسني من شفايفي تجمدت ما درت حتى ردة فعل، بعد عليا شويا مسح على شعري و قالي في عوض ما تبوسي حوايجي بوسيني انا ياك حلالك، تخشبت في بلاصتي و بقيت نشوف في عينيه قالي عجباتك؟ قتلو ايه... قصدي لالا... ماشي لالا بصح...
قالي اهدري و حط يدو مور راسي و لوخرا حوطها على خصري و عاود جبدني ليه ما قدرتش نقاوم هد المرة و انا ما بين يديه و دخلت معاه في عالم وحدوخر نسيت فيه كلشي كنت نحس غير بصوت انفاسو و بلهفتو، ما فقتش لروحي حتى قعدني فوق البونك و بدا يفتح في القفالي تع قمجتو، نضت نجري جبدني من يدي قالي وييين... اسناي قتلو لالا نروح قالي وين تروحي قتلو دوك تسقسي عليا الحاجة و ما تصيبنيش، قالي ما دامك معايا واحد ما يسقسي عليه انا راجلك وش بيك قتلو لالا خليني نروح، حس بيا خفت و تفرفشت تنهد و و ناض قابلني و قالي ما تخافيش ما رايحش نآذيك و لا نفورصيك على حاجة ما تحبيهاش حطيت راسي و نبلع في ريقي، جبدني لصدرو زيرني عندو و يكاريسيلي في ظهري منبعد رفعلي راسي بيدو باسني على جبهتي و قالي معليه براحتك حياتي بصح فالليل ارواحي ترقدي هنا قتلو ما نعرف إدا شفت ما كاش بلاصة لتحت نجي نفرش هنا قرب ليا و همس في ودني قالي تفرشي هنا؟! و صدري ليمن نفرشو؟ ما عرفتش وش نقول حمارو خدودي و السخانة طلعتلي حتى وليت نعرق ناض يضحك قالي يا يما على الحشومية ههههه معليه حبيبي خودي راحتك وقتنا تحبي ارواحي هدي شومبرتك فهمتي درتلو براسي إيه و بعدت عليه فتحت الباب و خرجت.
حبطت و قعدت غايسة و نتفكر فواش صرا ما بيناتنا ضعت في بزااف مشاعر و أحاسيس، لأول مرة نحس بلي نحب راجل حب حقيقي، دخلت للصالدوبا غلقت الباب و قعدت نشوف في وجهي فالمرايا كي كنت معاه حسيت غير بالنشوة بصح كي شفت الآثار تع واحد تقول ضاربني، رقبتي كامل حمرة، خدي، شفايفي، تقول خرجتلي لاليرجي فيهم، غسلت وجهي و خرجت صبتو حبط و قاعد في الهول معاهم كامل طاحت عيني في عينو غمزلي و تبسم ضحكت و دخلت للكوزينة بقيت واقفة مع الزجاج تع التاقة و نهدر مع روحي و فرحانة دخلت إخلاص تضحك و تقول و الله يا أبو حرب يقتل بالضحك هههه زعما تبروفوكي فيا قلتلها على سيرة أبو حرب شوفي لي طراس لي في رقبتي و وجهي إدا راحولي حشمت ندخل عليهم هكدا عيب، تعنكرت فيا و قالت صح لي ستحاو ماتو يا قليلة الحيا.
سڨمت خماري و رحت صبتهم يڨصرو و يضحكو قعدت ما بين الحاجة و صراع، كي طالت السهرة قالتلي الحاجة ليليان بنتي نوضي فرشيلنا نرقدوا راهي الوحدة و غدوا عندنا عرس إن شاء الله.
نضت فرشت لهيام و بناتها و بنت سعد لي عايشة عند خوالها في الشومبرة، و لبنات  أم سعد فالهول و شومبرة الحاج، و في شومبرة الحاجة كنت نفرش و حلا قالت لباباها خليني نرقد في شومبرتك الكليماتيزور راهي حابسة في شومبرتنا قالها اطلعي علاش انا شديتكم بصح ما توسخوش و تزربعو الدنيا، كي كملت طلعت لشومبرتو وقفتلي حلا عند الباب قالتلي وين جاية انت؟ قلتلها و أنت وش دخلك ماكاش بلاصة لتحت جيت نرقد هنا، حتى نشوف في اخلاص لا حشمة لا حيا قاعدة على الفراش وتقولي ما عندك وين ترقدي راني انا و بنات اختي هنايا، دخل صراع متوضي ويمسح على راسو ووجهو و يقول وش كاين؟ قالتلو حلا بابا ماناش نحاوزو فيها بصح ماكاش بلاصة قالها و العياط علاشارقدي شكون راهو حاكمك كاين الوسع و دار ليا قالي ارقدي فوق البونك، تكسلت و هو صلى زوج ركعات و شعل الكليماتيزور نقصلها و تكسل قدامي، كنت دايرا بظهري رمى يدو و جبدني ليه درت ليه باسني في جبهتي و همسلي قالي بردانة و لا الحال مليح قتلو معلاباليش بصح حضنك دافي،  ضحك و باسني في لحيتي قتلو اووو عمو عيب راهم هنا قالي شكون عمك أنا؟! قتلو لالا بصح نحشم قالي عيطيلي باسمي قتلو أبو حرب قالي تتمسخري بيا وين راكي تشوفي في حرب ماكاين ما بيناتنا والو الهوا و ما راهوش يجوز جايبتلي حرب فالوسط؟ قتلو وش حبيتني نقول صعيبة و الله ما والفت قالي اشششت نقصي صوتك، طلع راسو طل عليهم و قالي قولي صراع قتلو لالا ما نقدرش قالي علاش راكي معقدتها قولي قتلو صراع... قالي يا روح صراع ضحكت قاطعني و حط فمو على شفايفي و قاعد يبوس باش يسكتني، عطست إخلاص عطسة تقول حكمتها كورونا ههههه قالها بنت عمي إدا بردتي طفي لاكليم، قتلو و هادي دوك ما تحشمش راقدة هنا و يعجبك بخمارها قالي اششت نقصي صوتك خليك منها ربي يسهل عليها، قتلو ما تحشم ما عندها إحساس قالي اليوم انا لي راني فالفايدة انت اهدري و ما تحبسيش و انا نعرف وقتاش نسكت بطريقتي ههههههههه قعدنا نضحكو و نڨصرو حتى نعسنا، كي ناض يصلي الفجر فطنت صبت إخلاص ما كاش في فراشها هو كمل و إخلاص دخلت زعما باش تصلي، جا ساماني و حط يدو على وجهو جيت نحط راسي على صدرو شرلي بعينيه ليها حطيت راسي قدامو و حضنتو جبد الكوفيرطا و تغطي باش ما تبانش يدي كنت حاطتها على كرشو.
الصباح حنا راقدين و هوما صبحو يقربعو وحدة ترفد فالفراش وحدة تسڨم في خمارها وحدة داخلة خارجة تغلق و تفتح فالباب ما احملش عيط حلاااااا اغلقوا الباب خليوني نرقد، خرجو كامل و غلقو الباب موراهم.
انا كنت راقدة على ظهري و هو راقد على كرشو و رامي يدو على كرشي، تحركت جيت نبعد يدو باش نوض دار على جنبو و حط يدو تحت راسي جبدني ليه و كمل رقد، قعدت نخزر في وجهو و مديت يدي نلعب بالموسطاش ديالو و هو يتبسم و يحاول يعض يدي تبسمت و عاودت مديتها حكمهالي قالي غير الموسطاش ما توشيهمش تهينيني بيهم قتلو علاش قالي عيب المرأ تلعب بالموسطاش تع الراجل قتلو علاش وش معنتها قالي انا نفهمهك وش معناها و جبد الغطا على ريسانا و هدا راحتو كيما واحد عطشان صبحية عرسو، بصح منبعد بدا يقرب كثر و يتوشي في بلايص حساسة نحيت الغطا و بعدت عليه قتلو حبيت نروح قالي وين تروحي؟ قتلو نحبط نعاونهم ليوم عندنا عرس و لا نسيت خليك منهم ارواحي نعرسو وجدنا قتلو لالا عمو قالي ولينا لكلمة عمو؟ قتلو مام انت تقولي بابا قالي ماشي كيف كيف بابا معليه بصح عمو لالا قتلو وين راهو الفرق، عاود قرب ليا و حوطني بيديه و قالي كي نقولك بابا و لا بنتي ماشي معنتها ما نحبكش، كملي شعري و كمل يهدر قالي بصح واحد كي يقول لوحدة بابا كي يحبها من قلبو لخطر غير الإبن لي يخرج من روحك و يولي اعز واحد لخطر خرج منك و انت كيما الوردة نبتي في قلبي... حط يدو على قلبو و قالي لوكان برك تعرفي هدا وش يصرا فيه كي يشوفك، قتلو صحا نقدر نقولك بابا في عوض عمو تبسم قالي انا من أول يوم شفتك عرفتك تحوسي فيا على الأب كثر من الراجل قتلو أنا بابا مات كي كان عمري 12 سنة و خويا ما عوضنيش و ماما كانت قاسية و مقلقة و أنت أول راجل شفتو و تمنيتو، أنا ما نحوسش عليك كزوج برك، الحاجة لي خاصتني هي أهلي و حضنت صدرو و تنهدت قالي انا يماك أنا باباك انا خوك و كل حاجة خاصتك، فرحيني و اسمعي لكلامي و ديري برايي ما نخيبكش، كي لبستلك الخمار ماشي لخطر حايب نظلمك و لا نقص من دينك بصح حنا شرفنا نسانا و أنت عندي الماسة  ما نحملش حتى واحد يشوف فيك من غيري، و كي نقولك ما تسمعيش الغنا ماشي باش نفرض عليك ديني بصح علبالي بلي ما رايح يفيدك فوالو و كاين غنا يبكيك و انا ما نحملش نشوف دموعك  ... هو يهدر حتى عيطت حلا من نو الباب بااااباااا بعد على صدري و قالها ادخلي، دخلت و قالتلو قالتلهم جدة ارواحو تفطروا قالها رانا حابطين.
هي خرجت و هو ناض باش يجبد الفوطة من الخزانة جيت موراه و حضنت ظهرو جبدني باس راسي و قالي احبطي تفطري ندوش و نلحقك درتلو براسي إيه.
حبطت قلت صباح الخير نص رجعهالي و النص لالا، رحت للصالدوبا نغسل شفت رقبتي فالمرايا تقول فيلم هندي بايت يشم و يبوس، غسلت وخرجت بدات إخلاص تنسف و تقول يا ربي ارفد علينا لي ما يستحوش درت ليها قلتلها انا ندعي معاك بصح علبالي بلي العار ما يترفدش  تعنكرت فيا قاتلي أم سعد بديتينا بسمك من صبيحة ربي احشمي شويا عيب عليك عندك ساعة و انت لفوق و هي تخدم لداخل قالتلي هيام ارواحي تقعدي ليون قعدت و عيطت لحرب يساميني باش نحكم بلاصة لصراع قدامي، شويا هكدا و حبط قال صباح الخير شريتلو باش يجي يساميني، جا قرصني من ظهري و ضحك و حط حرب في حجرو و قعد قدامي.
كملنا الفطور و رفدنا الماعن جات ليا هيام خبرتني قالتلي سڨمي خمارك مليح على رقبتك كاش واحد يشوفك عيب قلتلها بصح انا و الله ما درت والو صرا..... قالتلي اشششت يا الحابسة علبالي ماشي انت أسكتي. 
كملت شغلي و طلعت لشومبرة صراع صبت. قاعد يقلب فالورق جيت نركب لابريز تع الحديد ما حبتش تدخل جبدت مساك من شعري باش نعاون بيه و تخبطتي التريسيتي صغت ناض يجري ليا قالي وش بيك ضرباتك التريسيتي؟ قتلو اوووف يدي حسيتها انسان قالي وين كاين الماس قتلو لالا كي دخلت المساك، ضربني لراسي قالي مي انت صح حابسة كاش واحد يدخل الحديد فالتريسيتي؟! وليت نبكي الخلعة تع التريسيتي و السطر و زاد هو، جبدني لحضنو و قالي ردي بالك شويا على روحك ما نغيضكش انا لوكان كاش ما صرالك وين نروح منبعد داني للبونك جابلي الما و يسكت فيا.
قالي شوفي ليليان نقولك حاجة اول مرة ننطق بيها و الله غير عمري ما حبيت مرا في حياتي و لا حبطتلها راسي و لا دخلت قلبي، كامل لي عشت معاهم ما عاشرو غير جسمي و وحدة فيهم مادات حاجة من قلبي، و انا ماشي بالساهل باش نحب بصح معاك ما علباليش كيفاش صرات، في هد العمر حبيت وحدة ما تفهم والو تمشي بفطرتها و بريئة و حابسة ههههه بصح فيك أمور ما صبتهاش فكامل النسا، صدقيني ياك بنتي في نفس عمرك و ما نحسش فيها بالبراءة لي عندك، ربي بعثك ليا هدية يعوضني بيها و طفلة حلوة نربيها على يدي و كل يوم راني نشوف فيك تتعلمي فرق كبير كيما جيتي، كي نقعد نشوف فيك ماشي برك بشهوة و نتمناك نحس في قلبي بوحد العاطفة ما فهمتهاش، انا اول مرة نحب و راني نجرب فالحب معاك ما تقوليش انت راجلي انا اهلك فراشك خوفك راحتك كل حاجة تحسيها.... هو يهدر و انا غايسة فيه و حاكمة يدي ، قرب ليا و قالي ليليان نحبك و الله العظيم غير نحبك و جا يبوسني بعدت و قتلو نوض نكمل نحدد الحوايج.
كان كلما يتجرا باش يروح لحوايج ما كثر نبعد بصح هو يتبسم و يجوزهالي.
ناض من البونك و قالي خلي انا نحددهم ارتاحي، حبطت خزرت ام سعد في وجهي قلبت خليقتها..
بداو يجيو الناس و الدار تعمرت و حالة العرس ملي بدينا على ال9 ما كملناش على ال12 و نص، الشغل الثقيل كامل كان عليا أنا و نوال،.
سربينا لاتاي و بعثنا للرجال مع محمد و علي،شوبا هكدا جا لينا نائل قال شكون لي سربات لاتاي قالتلو يماه نوال قال بهدلتونا الكيسان موسخين دارت لينا قالت شكون لي غسلت الماعن قالتلها نوال ليا غسلت بنفس لافات لي غسلنا بيهم الطناجر هو ناض يرمرم بهدلتونا ما بهدلتونا قالتلو يماه خلاص ما صرا والو جيبهم دوك بلخف نعاود نغسلهم، غير خرج بدات تسب و تعاير فيا و راحت قدام النسا و تهدر عليا و أنا نخدم و نبكي.
راحو كامل يبدلو و انا شدتني فالكوزينة نغسل و نهنبر ما حبتش تخليني نطلع نبدل عيطت لمحمد قتلو روح لعمك صراع قولو ليليان راهي فالكوزينة تحتاجك، شويا هكدا و جا و هي واقفة عند راسي قتلو كامل طلعوا يبدلو غير أنا قالي اطلعي شكون راهو شايدك قتلو أهدر مع مرت باباك تعنكر قالي اطلعي هي قالتلو ما عندها وين تطلع مازال ما كملت الشغل قالها شوفي أم سعد العرس عرس وليدك و خياتو كاينين يوقفوا عليه وش تحتاجي من عند الطفلة خليها تطلع توجد روحها كيما هي كيما البنات، هو خرج و هي قرصتني، ديت حوايجي دوشت و طلعت لشومبرة صراع صبت لتم إخلاص و خياتها و حلا يماكيو قلتلهم دقيقة نبدل  قالتلي حلا واقيل راكي مأمنة بلي وليتي مرت بابا و هدي شومبرتك، قلتلها افهمي يا طفلة حبيت نبدل انت ادا حبيتي اقعدي بصح إخلاص تخرج قالتلي انا راني نماكيي شوفي شومبرة وحدوخرا، دخل صراع شافهم بلا خمار عاود خرج و خبط الباب و عيط حلاااااا خليوني نبدل اخرجو خرجو يجريو، قتلو راك تشوف كامل وجدو رواحتيكم قعدت غير أنا اخرج شويا برك تعيش قيس مانبدل، ناض يضحك و دار قالي بدلي بعقلك راني درت 
غير نحيت و جيت نلبس صبتو يخزر و يضحك لبست بالخف قتلو عيييب اخرج قالي مدوشة و معريا قدامي و تقوليلي عيب ارواحي لهنا قتلو مانيش معرية راني لابسة خليني ماشي وقتك و الله غير عيب بعد قالي اشششت خير ما نعرس قبلهم ليوم و زيرني على البونك و يضحك ماخلانيش نوضو انا نطبع فيه نووووض، حنا هكداك و إخلاص دقدت و دخلت تقول نسيت باش ندي الماكياج.... كي شافتنا بهداك الوضع عاودت خرجت و غلقت الباب قتلو مليح هكدا كي شافتنا ما تحشمش أنت، قالي خليك منها هي ما تستحيش ركزي معايا برك و قرب لرقبتي طبعتو و نضت قتلو تعيش ما تقربش ليا ضحك و دار يبدل حوايجو و انا حكمت الكوانة تخبيت و بدلت، جيت نمكيي قالي لالا قتلو بصح كامل دارو قالي باش يقولو عليك شابة قتلو يمال وش حبيتهم يقولو عليا، دور وجهو باش يسقم روحو درت لكحل و غوجلافغ حكملي يدي قتلو شويا برك قالي قتلك لالا و مسحولي بفمو خربطهولي ما صبت نبكي و لا نضحك وش ينحيهولي خزرت فيه صبتو لاصق في فمو شبعت ضحك قالي هدي آخرتها معاك بشلاغمو ومحمر علاش علاش وش ينحيهولي، حكمت لانجات نمسحلو و شابعة ضحك قتلو هكدا باش توب عليا، هنا هكداك و هو صونا تلفونو قتلو صار هكدا يا وحد السراق راك مركب لابوس ديالك في تلفوني و انا عمبالي شريت واحد جديد.
كثرو عليه بالتلفونات قالي أنا هداك هو نروح قتلو تعيش اصبر حتى نكمل و الله غير تفوت تخرج ما يخليونيش نسقم في عقلي قالي روحي كملي و خفي شويا رانا روطار، كملت و لبست خماري قالي هكدا تروحي وين راهي عبايتك قتلو لتحت دوك نلبسها.
حبطنا كامل كانو رايحين غير الحاجة و النسا الكبارات لي قعدو.
دخلت للشومبرة نحوس على عباية ما صبتش و هو واقف عند راسي خفي خفي درت ليه قتلو خليني نخرج هكدا ياك مستور تعيش تبسم و دارلي براسو هيا، درت يدي في يدو و جينا خارجين كانو واقفين ولاد عمومو قالهم بلا دورو مرتي راهي خارجة، دارو و ناضو يضحكو.
انا طلعت معاه في طونوبيلتو ملقدام و هوما قالولو هدي آخرتها معاك يا أبو حرب  تركب النسا ملقدام قالهم ما تحليها غير نساها، قاعد يسوق و شويا هكدا قرصني من خدي و قالي ما درتيش غوجالاف ؟ قتلو علاش انت تخليه؟ ضحك هههههههه  شفت هيام و بناتها وحلا و إخلاص شاورتلهم بيدي هيام ضحكت وودتلي ببوسة لا و هدوك زويجة المناڨش قالبين خليقتهم.
وصلنا لدار نور و دخل نائل عقدولهم.
خرجت أنا قبلهم وصلت للطونوبيل كان صراع قدامي يتيري بسلاحو فالسما معاهم تفكرت نهار جابوني غلقت ودنيا و بكيت، جا ليا الحاج قالي اطلعي مع النسا خلي الرجال يطلعو مع أبو حرب، بقيت نحزس وشمن طونوبيل فيها هيام جا صراع حط يدو مورايا و قالي امشي بجاه ربي بركاي ما تشوفي الدنيا كامل راهي رجال امشي قدامي وصلني للطونوبيل لي فيها هيام طلعني و غلق الباب و راح.
وصلنا للدار صبنا أم سعد و بناتها قالبينها مناحة حقا حقا تفكروا المرحوم.
طلعت بدلت حوايجي و حبطت للكوزينة كي العادة مع الشغل، حنين بنت سعد وقفت مع يماها و عاونتنا و علي داخل خارج للكوزينة يدي للرجال و الدراري منين يدخلو يخليو الباب مفتوح جا علي خزر في حنين و قالنا الدار معمرة بالرجال اغلقووووا الباب، راحت غلقاتو و جمدت في بلاصتها ضحكت قلتلها واقيل زهرك كي زهري قالتلي كيفاش محسوب قلتلها هدا تقول خالو ولدو و نساه فولة و تقسمت على زوج حشمت و حطت راسها قالتلي انا نحب عمو صراع نموت عليه قلتلها امممم وصلت فهمنا هههههه
دخل صراع من باب الكوزينة خزر فيا قالي عييتي، دخلت هيام قالتلو أبو حرب عندي هدرة معاك قالها خير  قالتلو خالتي أم وسام عاودت جبدتلي على حلا كنت قتلك من قبل و مازال ما رجعتليش قالي ماشي قتلك فهداك الوقت اغلقي هد السوجي ما عنديش طفلة للزواج خليني راني عيان قالتلو بصح علاش حتى توقف في مكتوب الطفلة قالها كي تكبر منبعد يعملها ربي تاويل قالتلو لي قدها تزوجوا هاي ليليان قل منها قالها جيبيها لليليان؟ و خرج و خلاها قالتلي هدا وشبيه قلتلها بالاك عيان خليه كي يتهدن و اهدري معاه.
فرزنا الدار و رحت لشومبرة الحاجة و هيام قالت ليماها راني رايحة و الظهر نجي ندي الجواب من عند وليدك اهدري معاه.
غدوا منداك جات ليا حلا قالتي حبيت نهدر معاك و داتني لفوق حكاتلي على وسام بلي تحبو و حب يخطبها و باباها ما حبش يقبل طلبت مني باش نهدر معاه و قعدت تحلل قلتلها نحاول.
قعدت مترددة ما عرفت نهدر و لا نسكت كي جا من الخدمة كان هيام جات غير قالتلو أبو حرب عرفها رايحة تجبدلو السوجي قاطعها قالي ليليان اطلعي شعلي الكليماتيزور تبردلي الشومبرة. و وجديلي ندوش راني عيان حبيت نرتاح و دار لختو و يماه قالهم مانيش قادر نسمع والو ولاو سكتوا في زوج.
طلع صابني كملت قرب ليا باسني تحت ودني و همسلي قالي ما تحبطيش ندوش و نجي، حبطت سقيتلو الماكلة و طلعت صبتو يصلي، كمل و جا تكسل فالبونك و قالي ارواحي تكسلت عندو و قتلو صراع قالي ا عينيا قتلو علاش راك تتهرب؟ عقد حواجبو و قالي من واش؟ من زواج حلا قالي الطفل ماشي تع زواج ما عنديش ثقة فيك قتلو وش تعرف عليه؟ قالي ما ارتحتلوش قتلو بصح هي حاباتو، قالي هي لي بعثاتك تهدري معايا؟ قتلو إيه ناض يضحك ههههه و باس جبهتي قالي ليليان حبيت منك حاجة قتلو لي هي؟ صونا تلفونو قالي اصبري دقيقة و قعد يهدر مع واحد يخدم معاه و طولو و انا بردت من الكليماتيزور تغطيت و ما فقتش كيفاش رقدت حتى حسيت عليه كي تكسل مورايا و حط يدو عليا و بدا يبوس في كتفي و رقبتي، نفسو تعالى و وضعو و حركاتو كانوا اكثر جرأة حتى تقلقت كي بدا يمشي يدو على رجلي و يبعد في حوايجي قفزت و قعدت قتلو وش تحتاج؟ قالي سلامتك، نضت قالي وين وين؟ قتلو مانيش حايبة نبقى عندك قالي خلاص ارقدي مانهدرش معاك حبطت من البونك قالي ارجعي قتلو ما نرجعش قالي ماشي كيما تحبي قتلك ارجعي سكت عليه و جيت خاجة قالي ليليااان ما تخشنيش راسك معايا قتلك ارجعي ما نديرلك والو، خليتو و حبطت لتحت قعدت معاهم، وحد النص ساعة منبعد حبط عاقد حواجبو و وجهو مقلب الخزرة ما خزرهاش فيا، هيام جا تهدر كي شافتو فهديم الحالة سكتت بصح الحاجة فتحت معاه السوجي و هو صابها سبة باش يفرغ زعافو قالهم قلتلكم ما نزوجش و لي يزيد يفتح معايا هد السوجي ما تفراش و ناض يكسر و يخبط منبعد قالي  روحي جيبيلي الما رحت نجيبلو بدا يعيط وين رااااكي ما صبتش الما بارد جبتلو نورمال غير داقو خبط الكاس على الحيط كسرو و بدا يسب و يعاير.