مراهقة والاربعيني بلهجة جزائرية

36

#المراهقة و الأربعيني:

#الجزء36:

غدوا منداك الصباح نضت ما صبتوش كان خرج، حبطت خدمت شغلي نور ماهدرتش معاها و هي حبت تفهم علاش راني زعفانة منها بصح ما قلتلها والو.
مع الظهر جا صراع تكسل قدامي سند راسو على يدو و قالي واش رايحين نقعدو زعفانين؟ صحا قوليلي وش راكي حايبا باش نتهناو من هاد الحكاية، قتلو بعدني مانيش في ڨوسطويا قالي معليه أنا نبعد بصح قوليلي وشنو الحاجة لي ترضيك دوك نديرهالك قتلو ما ديرلي والو، تنهد حط راسو على المخدة و بقى يشوف فالأخبار حتى غفى، طفيت التلفيزيون غطيتو و حبطت لتحت صبت حلا و إخلاص جاو سلمت عليهم و قلت لإخلاص مرحبا بيك خالتي ضحكت و قالتلي خالتك؟! ههههخ يخلخل عظامك، ضحكت قلتلها ههههه من باب الإحترام لخطر راكي قد ماما فالعمر، تقلقت ما عجبهاش الحال، شويا هكدا و حبط صراع قال أهلا بنت عمي ليوم راكي هنا قالتلو أهلا بيك وليد عمي و الله غير توحشتك مام بابا راهو زعفان منك قالها علاش؟ قالتلو زوج مرات جي لعندنا و ما تدخلش تسلم علينا قالها ما كانش عندي الوقت مرة اخرى إن شاء الله و دخل لشومبرة الحاجة و خلاها.
صراع بزاف ناس يقولو عليه متكبر و حاسب روحو بصح الحاجة المليحة فيه يعرف عليمن يتكبر و معامن يتواضع، كان يقولي كاين ناس مليحة ليهم كي تتكبر عليهم لخطر كي تقادرهم يطلعو فوق راسك و كي ترفع روحك عليهم يوليو للطريق، اما الناس لملاح و لي شايدين قدرهم الواحد يتواضعلهم و يتعامل معاهم عادي، هو أصلا دار عمو صالح كامل ما يحبهمش.
المهم كي دخل لعند يماه لحقتو صبتو متكسل على كرشو و حاط وجهو على المخدة غير حس بيا دخلت خزر فيا قالي واش لحقتيني هنا بديتي تتبلاي؟ قتلو لالا جيت نشوف المسلسل بدا مانيش قادرة نطلع حتى لفوق.
رجع غطا وجهو بالمخدة و أنا قعدت نتفرج و كل شويا يطل عليا يرمي كلمة و يعاود يغطي وجهو.
قال آخخخخخ لوكان غير عطاني ربي مرا قلبها حنين ماشي حجرة سكت عليه، زاد شويا قال ياااارب لي فالمسلسل كامل يموتو إلهي دعوة واحد مظلوم، قتلو و دوك شكون لي راهو يتبلى؟
دخلت هيام صابتو متكسل هكداك سقساتني قالتلي و هادي وش جابها ليوم؟ قلتلها متوحشة عندها فوق الشهر ما رماتش روحها، نطق هو قال حاليا راني مستقبل جميع وحدة ترمي روحها قتلني الجفاف، ضحكت هيام ههههههه خير أبو حرب كيفاش قتلك الجفاف و ليونة هنا؟ قالها خوك مسكين واحد ما راهو بحالو، قالتلو ههههه وعلاش راك متكسل هكداك عيان؟ قالها وش ندير ما عنديش مرة ديرلي مساج في ظهري و  تقول راجلي مسكين راهو عيان، قالتلو كيفاش و ليون..... و نغزتني باش نوض ليه خزرت فيها بنص عين و كملت نتفرج، هو شافها قالها ما كلاه ختي خوك لي ما عندوش إحساس منين تشريلو إحساس... اخخخخ تمنيت لي راهي في بالي دوك جي ديرلي مساج في ظهري، درت ليه قتلو و شكون هادي لي راهي في بالك؟ قالي بنت عمي علاش ماشي مرا؟! قتلو هديك لي عندها الوجه تع عبد الجبار شنشل؟! أنا قلت هكدا و هوما الزوج خزرو في بعضاهم و كلاطاو بالضحك، دار تكسل على ظهرو و يضحك حتى ولا يسعل و قالي و الله غير جبتيها ههههههه و هيام خرجت تضحك، جا لعندي تكسل على رجلي قتلو اووووو وخر وخر.. قالي ياودي خلاص و الله غير متوحشك و جبد راسي باش يبوسو قاعدة نطبع فيه ما خليتوش حتى دخلت الحاجة على غفلة ناض يجري قالتلنا اااااه يا لي ما تحشموش قالها يما و الله ما وقتك ڨاع و ناض خرج يضحك.
تبسمت و دارت ليا قالتي ما تبقايش تتعزي عليه بزاف الراجل صبرو قليل و إدا كملتي هكدا يجي النهار وين يدور عليك، قلتلها لالا الحاجة ما..... قالتلي ما تقوليلي والو راني نشوف كلشي بعيني هو يتمناك و يحاول فيك و أنت قالبة خليقتك عليه، اكسبي راجلك قبل ما تندمي، سكتت عليها و كملت المسلسل.
خرجت قعدت معاهم كان هو مع الحاج و نائل حتى دخلوا دار سعد ناض صراع سلم على نوال قالها وين راهو سعد؟ قالتلو خدام كي العادة ما تعرفوش؟ قالها و هدا علاش راهو قاتل روحو بالصبيغة تع المولدات قتلو دير خدامين و ما حبش من التمشحيح ديالو تقول عليه دعوة الشر، خزرت فيه إخلاص قال عبد الجبار شنشل و دار لهيام يضحكو.
ما حملتش الحس تع الغاشي دخت وجعني راسي طلعت للشومبرة نرتاح لحقني تكسل قالي شوفي فيا أنا صرووع يعطيك قلبك ديريلي هكدا، بدا يدغدغ في خصري و قالي مرتي .. مرتي .. مرتي .. شوفي فيا نهار الأحد الجاية نعقدو فالمحكمة و رايحة تولي مرتي و اسمك يتكتب مع اسمي و انت لدوك ما حبيتيش تشوفي فيا .. مرتي .. مرتي .. تقلقت منو درت ليه و عيطت اوووووووه .. خلاص صدعتني .. قالي ردي بالك تزيدي ترفعي صوتك في وجهي و طبعلي راسي بيدو ناض و قالي عندي ساعة قلت نضحكها و نلعب معاها ما نخليهاش مقلقة و واجعني قلبي عليك بصح على حساب الشوفة أنت ماشي حرة، لوكان نديرك في راسي و الله ما نزيد نشوف في وجهك بصح واقيل يلزمني نتعامل معاك هكداك قليلة أدب، و خرج مقلق.
شفت قرب المغرب قلت نحبط نعاونهم فالعشا، صبتو لتحت ما خزرش منبا فيا، هو راح يتوضى و أنا دخلت للكوزينة صبت إخلاص و نور لتم سمعت صراع يزڨيلي ليلياااااااان رحت نشوف وش يحتاج قالي البون تع الطونوبيل لي عطيتهولك لبارح وين راهو قتلو ما عطيتني ما عندي قالي وشبيك لبارح عطيتهولك فيدك نوضي بلخف حوسيلي عليه، قعدت غايسة هدا وقتاش عطاهولي ما شفيتش، خبرتني نور قالتلي صح لبارح حطهولك فوق الطابلة مع العصر كيما جا رايح هو و نائل للجنازة و قالك خبيه بالاك ما انتبهتيش و خليتيه فوق الطابلة.
هو راح يصلي و أنا قعدت نحوس عليه قلبت الدنيا عليه ما صبتوش حتى وقف عند راسي قالي وين وصلتي؟ قتلو ما كاش قالي ما تحبسيليش قلبي دوك عطيتهولك و قتلك خبيييييييه، ناضت الحاجة قالتلو استغفر ياوليدي دوك نحوسو عليه، جاو كامل يحوسو معايا هي هيام و بناتها نوال و حتى الحاج و هو واقف عند ريسانا، بداو ولاد نور يبكيو تالمو كان مقلق عيط عليها قالها سكتييييهم و دار ليا يبهدل فيا قالي هدا كامل لخطر عقلك ماشي معايا لاتيتلي بالمسلسلات، تمنيت نوصيك على حاجة و تبرديلي قلبي.. ربي بلاني بيك الله لا تربح النهار لي شفتك فيه ليوم نطرطق الدنيا على راسك لوكان ما تصيبيهش..
غاضتني عمري كي كان يبهدل فيا قدامهم كامل حسيتو كان يفرغ فيا زعفو كي ما صالحتوش الدمعة حصلت في عينيا.
حوسنا حوسنا ريحتو ما تسعاش و هو بدا يخبط و يعيط بون فيه الملاين حطيتو قدامك و قتلك خبيه وين كان عقلككككك، بديت نبكي و نقولو ما انتبهتش و الله ما انتبهت، قالي سينورمال ما تسمعينيش لخطر كي نكون نهدر معاك تبداي ترفدي في روحك عليا تقول ماني نهدر بصح انا لي غالط أنت وجهك ماشي تع عز و دلال..
الحاج و الحاجة بداو يكالميو فيه و نوال خزرت في إخلاص و قالتلها خلاص التعرويس و رجع أبو حرب تع زمان، ضحكو و دخلو للكوزينة.
ما حملتش جيت طالعة لفوق قالي وييييين رايحة وين راهو البون؟ قتلو و الله ما علبالي وين راهو قالي ماشي البروبلام ديالي ربي يسهل عليك جيبيه من السما من لرض ولا نقلب عليك الدار ليوم باش تتعلمي خطرة أخرى كي نكون نهدر معاك ما ديرينيش فالثقيل...
عييت دخلت لشومبرة الحاجة نبكي و هي تهدن فيا.
إخلاص ونوال و نور وجدوا الطابلة و سقاو الماكلة قالو نكملو العشا و ننفضو الدنيا بالاك نصيبوه.
حنا هكداك دخل نائل قال وش كاين؟ قالتلو أم سعد هادي موصيها راجلها باش تخيبيلو البون بحراتو قالها راهو عندي، قالو الحاج راهو عندك و ضارب النح؟ قالو صراع وين راهو قلبنا الدنيا و هو عندك؟ قالو و أنا وين علابالي بلي انت عطيتو ليليان كي شفتو فوق الطابلة خفت الدراري يلعبو بيه حطيتو مع كوارطي و عطيتهم لنور طلعتهم للشومبرة، قالتلو نور يتسمى راهو مع الورق لي عطيتهملي لبارح؟ قالها ايه اطلعي جيبيه راهو مكتوب اسم صراع فيه، طلعت تجري جابتو عطاتهولو شدو عليها و طلع للشومبرة.
دخلت لشومبرة الحاجة و كلاطيت بالبكا دخلت هيام تهدن فيا و الحاجة قالتلي ياك قتلك بركاي ما تعزي في روحك عليه يجي النهار وين يطرطق، لوكان كسبتيه بكلمة حلوة ما يديرش هكدا، قلتلها أصلا كرهتو كي نكون راضية يولي مليح و كي نخليه يدور عليا قالتلي ما تكونيش أنانية، كي يحبك ما تكرهيش و كي يتقلق تكرهي و تبداي تلومي فيه و أنت لي وصلتيه باش يدير هكدا، شوفي نور ياك راهي معاك غير قالها راجلها اطلعي جيبيه نتبهتلو، انت ما عندكش الدراري قال يشغلوك عليه، راسك لراسو برك و دوري وجهك عليه و حبيتيه يقعد مليح معاك، ادي ومدي يا بنتي، اعرفي كيفاش تمتصي الغضب ديالو و تهدنيه، نوضي بنتي تتعشاي ما تخليهمش يستشفاو فيك.
نضت قعدت معاهم فالطابلة و هو حبط مبدل قالتلو الحاجة اقعد تتعشى يا وليدي منبعد اخرج قالها راني مزروب و خرج.
نضت للكوزينة نغسل الماعن حسيت السخانة طلعتلي تخنقت، نحيت الخمار طلعت لي مونش و وقفت مع البوطاجي نغسل فالماعن وصوت عياطو في ودني و نتفكر كي كانوا يستشفاو فيا.
دخلت نوال و إخلاص و حلا يضحكوا يوتوتو و يحطولي فالماعن باش نغسل، نطقت حلا قالت هدا هو بابا من نهارو، حطيت وش في يدي و خرجت للجنان عيطتلي نور قالتلي وين رايحة ليليان ارواحي نكملو الشغل، عاودت دخلت قلتلها ياك جات حلا تحكم بلاصتي قالتلي حلا منيش خدامة عندك باش نحكم بلاصتك و الله غير نعيط لبابا يعاود يرجع ليا يوريلك، قلتلها مادام خرج صوتك ملي روحتي لخوالك غير عيطيلو من دوك، خليتهم يتعايطو مورايا و طلعت للشومبرة قعدت مع تلفوني حتى رقدت.
ما دخلش حتى الوحدة تع الليل حسيت بيه درت روحي راقدة و هو غطى راسو و رقد.
الصباح خبط الباب تع الخزانة قفزت من الرقاد رفعت راسي قالي علاش نايضة غير كملي ارقدي علاش انت كاش ما راهو هامك، ارقدي النوم خير للي ما فيه الخير لاه لا تنوضي، خبط الباب و خرج.
نضت غسلت و حبطت للكوزينة صبت حلا و إخلاص لتم وجدولو الفطور و هو قاعد يفطر غير حس بيا ناض غسل و خرج و إخلاص قالت مسكين أبو حرب ناض الصباح ميت بالجوع و واحد ما فطنلو مزيا كنت أنا وحلا وجدنالو فطر باش خرج.
درت كوراج و نضت لشغلي كي كملت تكسلت فالبونك تع الحاجة و رقدت ما فقتش حتى سمعت وليد نور يبكي و الحاجة تعيط لنور جي ليه، جات داتو و راحت، دارت ليا الحاجة قالتلي ليليان وشبيك راكي مريضة؟ ما كليتي ما شربتي غير راقدة قلتلها لالا برك مورالي عيان و ماعطانيش خاطري قالتلي مع صراع؟ هي ذكرت اسمو و دموعي طاحو وحدهم فتحتلي يديها قالتي ارواحي لعندي بنتي علاش هاد الدموع قوليلي وش صرا مابيناتكم راني فعوض يماك، رحت رميت روحي فحضنها و نبكي قلتلها ما يحبش كي نهدر وش كاين ما بيناتنا و ما عرفتش وش ندير، قالتلي احكيلي بنتي ننصحك انت مازالكي صغيرة و تتعلمي كامل جزنا على هاد الشي و تعلمنا بلعقل، احكيلي وش صرالكم حتى في ليلة تقلبتو على بعضاكم هكدا، رفعت راسي قلتلها نحكيلك و ما تقوليلوش قالتلي ياك شحال من مرة تغلطي قدامي كاش نهار وصلتلو الهدرة كيما هو وليدي أنت تان بنتي.
حكيتلها كلشي ما خليت حتى حاجة في قلبي، كي كملت قالتلي شوفي يا بنتي الحسد يحرق البنادم و انت نيه و حكيتي كلشي قدام مرت لوسك، ما تعطيش تفاصيل حياتك.. دارلي صراع و عملي و جابلي و داني... كامل كيما راهم حاسدينك و انت ما تعرفيش، عندك طبيعة تحكي كلشي.. ما تقارنيهش بخاوتو شوفي سعد متزوج بزوج نسا و نائل فورصاوه بنور و راجلك هايم فيك ولوكان ما جاش صح عاشقك ما يطلب منك ما يلح عليك، مرتو لولانية الله يرحمها ما كاش حاجة و ما درتهاش باش تجبدو هو والو كان بارد معاها و ما يهتمش لخطر ما كانش يحبها، اكسبيه و بالسياسة ادي الشعرة من راس السبع ماشي كلشي بالعياط و الدواس..
قعدت تنصح فيا حتى سولاجيت و قالتلي  يلا بنتي نوضي دوشي بدلي سڨمني روحك و ابداي من جديد مع راجلك ما تخليش روحك مضحكة ليهم.
نضت دوشت بدلت جبدت شعري و قابلت الكوافوز نماكيي حتى شفت فالمرايا الباب تع الشومبرة كي تفتحت و دخل صراع درت ليه نضحك و رحت ليه قتلو على سلامتك حبيبي و بستو من خدو.
عقد حواجبو ما سناهاش مني منبعد خزر في وجهي و تبسم قالي الله يسلمك حياتي، قتلو جيعان نوجدلك الغدا؟ قالي إيه قتلو برك نكمل الماكياج تصبر شويا؟ قالي خودي راحتك عمري بيدما ندوش.
رجعت للمرايا نكمل عيني لي بقات و هو فتح الخزانة باش يجبد حوايجو و قاعد يشوف فيا، بدا يفتح فالقفالي تع قمجتو منبعد دار ليا حضني ملور و غلق عليا بيديه و حط راسو على كتفي و قالي في وذني و الله ما نحب نآذيك و لا نقلقك و الله العظيم غير نعشقك، تبسمتلو و انا نشوف فالمرايا قالي اسمحيلي إدا قستك قتلو لالا عادي نسيت، دورني ليه خزرت فيه حكملي وجهي مابين يديه و بدا يبوسني بلهفة تفاعلت معاه بشوق حتى ولينا شغل نتسابقو، يبعد شويا يتنفس يخزر في عينيا و يعاود يولي، كان غير صوت محمد عبد الجبار فالشومبرة يغني شمسين و حنا ذايبين فاحساسنا واحساس الغنية.
بعدت و جبهتي على جبهتو و هو ينهت تقول كان يجري شفت في عينيه حكمت وجهو ما بين يديا و قتلو انت شمس في حياتي بلا بيك الظلمة نذبل و نتيه و ما نعرف لا نعيش لا نشوف، تحرقني و تآذيني و تعاود تحييني منبعد، ما تزيدش تخليني نجوز ليلة مظلمة.
جبدني من يدي و هو يتبسم، قعد فوق البونك و قعدني على رجلو قالي إدا أنا شمس أنت هلال شوال في حياتي، بلا بيك نعيش ياماتي صايم و كل لحظة فحضنك عيد، نقعد نستنى فيك على نار ما نرتاح حتى نشوفك.
حكم يدي و حطها على قلبو كان يخبط بالزور قالي راكي تشوفي؟ غير تكوني معايا يبدا يخبط هكدا حتى نحسو رايح يخرج مابين ضلوعي، ملي كنت مراهق حتى لدوك كي بداني الشيب جامي جاز عليا هاد الشعور مع أي وحدة، و الله غير كي نشوفك ننسى الدنيا لوكان نصيب ما نشوف حتى واحد من غيرك و لوكان جات بيدك نديك لبلاصة وين نكون غير أنا و ياك برك، تامني غير سمانة مور زواجنا رحت شريت مورصو تراب و بديت نبني و نعلي و نخطط و في راسي بزاف أحلام حبيت نعيشها معاك في دار خاصة بينا، قربت ليه و بستو.
قعدت ساكت و أنا حاطة راسي على صدرو شويا و رفعت راسي صبتو مغمض عينيه بستو في خدو فتح شافني و عاود غمض زيرني لحضنو و قاعد يكاريسيلي في ظهري، قتلو ماراكش جيعان رايح ترقد؟ قالي شويا برك.. نضت قالي وين؟ قتلو نحبط نوجدلك الغدا، دارلي براسو إيه و تكسل على كرشو حضن المخدة و رقد جيت خارجة قالي ليليان؟ قتلو انعم قالي ليمن شكيتي و هدر معاك و عقلك؟ قتلو لالا ما حكيت لحتى واحد قالي يما و لا هيام؟ قتلو الحاجة.. بصح و الله... قالي علبالي ماكالاه تهدري.. كي تكوني في مشكل و ما تصيبيش ليمن تفتحي قلبك احكي ليما هي برك وحدوخر لالا تفاهمنا؟ قتلو إيه تبسملي و عاود رجع راسو للمخدة و رقد.
طفيت التلفيزيون سڨمت روحي و حبطت نوجدلو الغدا، صبت هيام لتم و الحاج قضى من كلشي، سلمت على هيام و قلتلها علاش هاد القضيان كامل؟ قالتلي غدوا إن شاء الله عارضين عمومنا للغدا رانا نوجدو بصح وين راهو صراع؟ قلتلها راقد قالتلي آاااا راقد ماشي قالي نطلع نبدل و نحبط نكمل القضيان تع الوليمة؟ قلتلها مانعرف قالي خليني نرقد شويا برك، حطت يديه في جنابها و قالتلي يا بنتي وش درتي لوليدنا بعثناه فاطن لاباس بيه بلخف رقد؟! انطقي وش درتيلو؟ حشمت ضحكت و درت عليها.
وجدتلو الغدا و جيت رايحة نطلعهولو شفتو حابط كان دوش و بدل كي لحق عندي قرصني من خدي و ضحك، راح قعد فالهول حطيتلو ياكل كمل و خرج.
قعدت معاهم فالكوزينة نعاون فيهم، كي كانت هيام و إخلاص يقطعو فاللحم خنقتني ريحتو و دار قلبي منعد دارت بيا الدنيا حكمت فالبيفي و تغاشيت، جاو يجريو ليا غسلولي وجهي و شربوني الما قالولي وشبيك قلتلهم والو برك دخت قالتلي الحاجة اطلعي لشومبرتك ريحي شويا هاد ليامات كامل راكي فشلانة.
داتني هيام لفوق دخلت معايا و قالتلي ليونة وقتاش جاتك آخر عادة شهرية، قلتلها ملي كنت في دار خالي قالتلي يعني في رمضان؟ يمال راكي اونسانت درتيها يا البانديا ههههه قلتلها اونسانت!!! زعما صح؟ قالتلي إيه عندك شهرين بالاك رفدتي من ليلتك كنتي فيارج و الرحم ديالك نقي رفدتي بلخف، بقيت غايسة و نقولها أنا اونسانت؟ حسيت حاجة جديدة عليا، حضنتني و قالتلي يااارب تكوني اونسانت و تفرحي، دوك ارتاحي و ارقدي و انا غدوا الصباح نجيبلك تاست و كي نخلاص العرضة تع عمومنا على جال قضية علي نديك لجينيكولوغ تشوفك، درتلها براسي إيه و حكمت كرشي و فرحانة، كي جات رايحة قلتلها هيام ما تقولي لحتى واحد حتى نتأكدو قالتلي إيه.
غفيت شويا حتى حسيت بصراع كي تكسل قدامي، فتحت عينيا صبتو ساند راسو على يدو مقابلني يشوف فيا و يتبسم باسني قتلو جيت؟ قالي لالا مازالني فالطونوبيل نضت نضحك، قالي قالولي راكي مريضة حياتي كاش ما راهو يوجع فيك نديك للسبيطار دوك، قتلو لالا ما بيني والو برك دخت و دوك راني مليحة قالي الحمد لله، قالي شوفي وش جبتلك و جا يرمي يدو موراه باش يجبد واش جاب حكمتلو يدو و حطيتها على كرشي قتلو واقيل راني اونسانت، فتح عينيا مليح بفرحة و قالي ما تزيدينيش؟ قتلو و الله قال نحمدوك و نشكروك يااارب دعيتلك و استجبت و حضني قالي كيفاش عرفتي؟ قتلو هيام حسبتلي بصح مازال متأكدنا غدوا ان شاء الله جيبلي معاها تاست نديرو، قالي و الله غير شكيت فيك اونسانت كي ولا يدور قلبك من ريحتي و كي ما نديرهاش تولي نورمال، وجدان تان صراتلها هكدا، قتلو اااا.. ما علاباليش علاش تقلقت كي ذكر اسمها، قالي شوفي وش جبتلك و جبد باطة فيها زوج مسايس تع ذهب قتلو يااااا شحال شبان.. لبسهملي و باس يديا قالي ليمن يليق الذهب غير للذهب يا عمري  و الله تخنقت كي آذيتك و لدوك دموعك ما بين عينيا قتلو حبيبي انت ... و حضنتو .. قالي ارتاحي و ما تعبيش روحك بيا المهم تكوني مليحة انت و مسلم قتلو شكون مسلم؟ قالي وليدي لي في كرشك قتلو وعلاش مسلم؟ قالي عاجبني نعيطلك أم مسلم .. قتلو راك متمني طفل قالي لالا لي جي من عند ربي الحمد لله المهم كمال الخلقة و ما دابيا جيني طفلة شويبة كيما أنت و نسميها عسل بصح متمني أخ لحرب باسني في خدي و ناض قالي هاد التاست وين يبيعوه.. فالفارماسي؟ قتلو إيه قالي دوك نروح نجيبلك واحد، جيت نوض قالي ريحي كيما راكي قتلو راني مليحة و زيد مليت من الشومبرة.
حبطت لتحت صبتهم قاعدين و الحاجة عينيها يبرقو عرفت هيام قالتلها، قعدت قدامها قالتلي خبيتلك عشاتك نوضي تاكلي بنتي ما تقعديش هكدا للشر ماشي مليح ليك، راحت جابتلي هيام قعدت ناكل و إخلاص و حلا ما نحاوش عينيهم عليا، شويا و دخل صراع قعد واقف خزرت فيه شرلي بحواجبو تع نوضي، طلع و أنا لحقتو عطاني التاست قالي روحي ديريه قتلو كيفاش نديرو؟ قالي وين علابالي أنا شفتيني رفدت الحمل من قبل ؟! سقسي هيام و لا اقراي لانوتيس.
حبطت لشومبرة الحاجة و شريت لهيام جات وريتهولها ناض تضحك قالتلي يا يما على أبو حرب ما يقدرش يصبر و راح يجري جابو يااارب تكوني اونسانت و يفرح.
وراتلي كيفاش نديرو غير خرجولي زوج خطوط حمورا فتحت الباب و رحت نجري للشومبرة صبت صراع واقف يشوف فالتلفزيون صوطيت عليه حااااامل قالي الحمد لله ياربي ههههه ردي بالك طيحي يا المهبولة ههههه.
بقى قاعد معايا يضحك و يهبل فيا كانو عينيه يحكيو كامل الفرحة لي كانت في قلبو، كان غير يساعف فيا و يقولي وش متشهية نجيبلك و انا كنت حايبا غير حضنو و قربو مني.
غدوا منداك نضت جوايه ال9 ونص ما صبتوش تفكرت بلي كاين الضياف.
دخلت دوشت و بدلت جيت نلبس وحد الروبة جاتني مزيرة كان عندي بزاف ما لبستهاش مخبيتها غير كي يجي كاش واحد، نحيتها و لبست وحدوخرا.
جا جايز صراع صابني حاكمة هديك الروبة و نشوف فيها قالي صباح الخير وشبيك؟ قتلو هادي ضياقت عليا قالي لخطر سمنتي قتلو ما نظنش قالي سي وليتي تهبلي.
كملت و حبطت صبتهم كامل سامعين بالحمل ديالي لقاووني يباركولي و يسلمو، رحت للحاجة قالتلي اهلا بأم مسلم بستها و ضحكت.
خرجت شفت صراع قالي حياتي من نيتك رحتي خبرتي الدنيا كامل، قتلو و الله ما أنا شوف مع إذاعة مونتكارلو ناض يضحك هههههههه منبعد قالي إدا ما تقدريش توقفي معاهم فالوليمة ريحي راني وصيت يما عليك، قتلو لالا عمري ما بيني والو روح تقعد مع الرجال ما تخممش عليا.
رحت لهيام حكيتلها على الروبة جابتلي الميزان صابتني 60 كيلو، قلتلها أوووو ملوقتاش سمنت؟!! غمزتلي و قالتلي شوفي مع أبو حرب، قلتلها و هو علاش؟ قالتلي المرأ تتبدل الهرمونات دياولها مور الزواج و أنت كي راكي مرتاحة معاه سمنتي و زيد دايتها غير ماكلة و حلويات و سقايط و رقاد.
أم سعد و نوال و إخلاص كلمة مبروك ما سمعتهاش منهم و نور قاعدة غير تعيط يلا خفوا خليونا نكملو الشغل بركاونا من الڨصرة.
قعدت نخدم معاهم حوايج خفاف مع البوطاجي و كي لحق وقت الغدا دخلو باش يديو للرجال برا و فالڨاراج و الجنان، و كل دقيقة يعيطو علينا على باب الكوزينة باش نغلقوه.
نائل و صراع و هيام كانوا يسقيو الماكلة للرجال، شفت المرقة جاتني على البوزلوف و الدورة حطيت يدي على ظهرو و قتلو صراع و الله غير تشهيت بوزلوف و دوارة، دار ليا هو و هيام شافو فيا، قالت هيام  هدا وليد صراع لي راهو يخدم في كرشها ماشي هي، ضحك صراع ههههه قال ماشي خسارة في وليدي حب بوزلوف و دوارة دوك يحضرو، قالو نائل و الله يا أبو حرب غير جات في وقتها قالو و أنت شكون لي عرضك؟ أنا رايح نجيب لمرتي أيا قلع منا تشوف قالي نائل و الله يا ليليان غير تعرفيلها هاي النسا لي تعرف تتوحم ماشي لي تتوحملي على الفاكية و السقايط تشهاي تشهاي كولي و وكلي ناضو يضحكو ههههه.
صراع عيط لمحمد وليد سعد عطاه دراهم و قالو روح لرحمن قولو وجدلي سنيوة فيها بوزلوف و دوارة لعمي أبو حرب و استرها.
كملو غداو كامل الغاشي رجال و نسا و قعدنا غير حنا موالين الدار، جاب محمد سنيوة كبيرة عيطلي صراع قالي ارواحي تاكلي نطق نائل قالنا وين هاربين موراكم موراكم ههههه... قعدت أنا و صراع و نائل و هيام و وليدها و سعد، صراع يقسملي و يقولي كولي كليت حتى شبعت منبعد حسيت قلبي دار من الدسم قالي اشربي لاتاي يحبطلك قالتلو هيام زيد علمها زيد علاش راك تشوف فيها هايشة قالها هايشة ولا غزالة واحد ما يدخل روحو مرتي نعشقها كيما كانت تكون، كانت أول مرة يقول كلمة نعشقها قدام ماليه، قالها و خرج ما زادش كامل موراها دخل للكوزينة كان مندمج و فرحان بالحمل ديالي بصح نظراتهم لينا قلقاتو.
قعدوا الرجال يتناقشو على حكاية علي و النسا يدعيو يارب استرنا و احمينا و خرجها على خير.
وحد السويعة موراها دخل بدل حوايجو و راحو و حنا كملنا الشغل و قعدنا نشربوا فلاتاي و نڨصرو.
3 سوايع منبعد رجعو و سمعنا ولاد عمومهم يقولو الحمد خرجت على خير بصح صراع دخل وجهو ما يعجبش، دخل موراه نائل و سعد قالو قيس وش خبرك في ودنك أبو حرب؟ قالو ما قال والو، قالو نائل أبو حرب ما تخبيش حسباتلك ما شفتوش ما كانش عاجبوا الحال كي تفاهمنا و فالباب كي كنا خارجين خبرك في ودنك.
دخلو عمومهم و قوى صوت نائل و سعد واقفين لصراع و هو ماشي في حوالو.
سعد قال مزيا دخل فيها جدهم و سكت ولادو بصح قيس وش قالك هداك مساند الارهاب و ما...... قاطعو صراع يعيط قالو قلتلكم ما قال والو خلاص، قلبي تزير عرفتو بيه حاجة، نطقت الحاجة قالت وش كاين غير فهمونا وش قالولكم وش درتو فيها؟ قالها الحاج قعدنا معاهم قلنالهم هدا وليدنا علي نستعرفو بلي ضربو بصح وليدو هاو وش قال هاو وش قال ترضاو باش يطعن في عرضنا؟ و قعدنا نتناقشو قالهم جدهم عندنا عشرة 30 سنة مع دار أبو صراع و ولادهم ماشاء الله جامي سمعنا و لا شفنا منهم الدونية و هدر كلام صواب بصح قيس هداك ما ارتحتلوش و نائل قال بلي شفتو كي مشى قدام صراع هدر في ودنو وخرج و صراع راهو يقول ما قال والو، مادام الحكاية خرجت على خير و تراضينا علاش راهو مقلق لوكان ما قالوش كاش حاجة.
عمهم عزام قعد يهدر مع الحاج يوصي فيه باش ما نخرجوش و نشدو ولادنا نوصيوهم ما يدخلوش في نقاشات سياسية.
جيت نطلع لصراع للشومبرة نشوف وش بيه قالنا الحاج وجدو لاتاي للرجال، قالتلي نور روحي ليليان وجديلهم قلتلها راني طالعة لصراع قلبي راهو عندو نشوف وش بيه ناضت تعيط قالتلي ماشي دوك ما راكيش تشوفي فيا نوكل في ولادي.
رحت للكوزينة تقلقت منها، سمعت صوت لفوق خليت كلشي و طلعت نجري صبت نائل فاتح باب الشومبرة و صراع واقف، قالو إدا هددك قولنا يا خويا علاش راك تخبي راهي هاينة عليك روحك؟ قالو ماشي حكاية هاينة عليا بصح يلزمنا نخرجو منا قالو علاش نخليو ديورنا ياك الارهاب مازال ما وصل لعندنا قالو خود برايي دوك نشوف كيفاش ندبرلكم دار فالعاصمة و نرحلو ما نستناوش حتى يزدموا علينا، يهدر و بالو مشغول ماشي كامل جايب خبر يرفد الحاجة و يعاود يحطها، قالو نائل صراع ما راكش عاجبني غير قولي برك قيس وش خبرك، قالو أنا مارانيش خايف منو راني خايف ياذي واحد من أهلنا قالو وش قالك؟ قالو قالي اشفى عليا مليح قالو يتسمى تهديد قالو ٱيه بصح ما عرفتش إدا ليا و لا لعايلتي، دخلت نجري ليه قتلو صراع الله يخليك خلينا نروحو منا نخاف يقتلوك، قالي ما تخافيش دوك نشوف كيفاش نريڨليها و نرحلو للعاصمة، قالو نائل بصح العاصمة هي لولانية لي راهي مهددة باش يدخلوها الإرهاب، حبس الخدمة و اخرج كامل من البلاد قلوبنا رايحين يحبسو من الخوف عليك، قالو وش دخل خدمتي فالوسط دوك راني نخمم كيفاش نأمن عايلتي و الباقي ساهل قالو كيفاش ساهل؟ راهي هاينة عليك روحك انت؟! شحال من واحد راهو فراسك وين يروحو؟ خمم فيهم شويا قالو يرحم والديك نائل خليني نخمم كيفاش نخرجو للعاصمة راني دايخ، قالو و انت علاش ما هدرتش مع جدهم و قتلو هاو وش قالي وليدكم؟ قالو تتمسخر بيا جماعة تع ارهاب رايح يحكم فيهم شيخ؟ وش رايح يديرلهم؟ قالو و الحل دوك كيفاش؟  قالو الحل راهو عند ربي سبحانو، خرج نائل من عندو بالو مشغول و أنا حكمت يديه و قتلو صراع ما تضحيش بروحك في خاطري و خاطر لي في كرشي تعيش، جبد النفس و تنهد قالي شوفي هاد النفس ما يقطعها غير لي خلقها ما تعمريش راسك بهاد الأمور و ارتاحي..
بدل و حبط و أنا نضت نخمل فالحالة و بالي مشغول و ندعي.
كملت و حبطت صبت عمومهم راحو، و الحاج و سعد و العائلة يقنعو في صراع باش يحبس الخدمة و يخرج من البلاد و يحكم العقارات لي فالأردن، بصح هو يليكيديهم غير بكلمة إن شاء الله.
الحاجة تحلل فيه و تقولو يا وليدي راهم في رقبتك يتامى ما تريسكيش بعمرك و هو ماشي متجاوب كامل معاهم عقلو بعيد و يخمم...