مراهقة والاربعيني بلهجة جزائرية

جزء 12

#المراهقة و الأربعيني:

#الجزء 12:

انا سمعتو عيطلي هكداك الدم نشف في عروقي قالتلي الحاجة روحي لراجلك شوفيه وش يحتاج، طلعت ليه للشومبرة دقدقدت قالي ادخلي دخلت صبتو فاتح التاقة و منحي قمجتو قتلو انعم عمو قرب ليا و قالي انت كيفاش تهدري هكداك شكون طلب رايك؟ قتلو اسمحلي عمو و الله ما قصدت حبيت برك نقولك الحقيقة قالي و انت شكون سمحلك دخلي روحك؟ حطيت راسي و سكت، تنهد منبعد قالي شوفي ليليان جني و جن المرا لي دخل روحها و لي تقرعج ما تخلينيش نزعف منك و ناذيك هكدا؟ قتلو خلاص عمو و الله ما نزيد نعاود، قالي يا بابا افهمي وليد سعد عايش هنا و انت جديدة كي أنت جي تبيعيلي كيفاش رايحين يشوفوك لوخرين؟ يقولو جات دير الفتنة ما بيناتنا قتلو و الله ما قصدت نفتن كي شفت هيام تبكي غاضتني و هو صح عايرو هكداك قالي مازالي؟ و قرب ليا خفت غمضت عينيا قتلو خلاص فهمت قالي شوفي ليليان لوكان تشوفي واحد جايب بومبة و رايح يطرطق الدار ما تبيعيش، وش تشوفي و لا  تسمعي اتجاهلي كي شغل ما جازش عليك مفهوم؟ درتلو براسي إيه قالي حفظتي الدرس و لا نعاود؟ قتلو خلاص حفظتو، قالي أيا مليح دوك روحي خليني نبدل، خرجت و قلت في قلبي الحمد لله لي خرجتلي هكدا انا قلت ليوم يذبحني.
دخلت للصالدوبا فنفس ليطاح و كي خرجت شفتو دخل لشومبرة ولادو و كان علي وليد هيام لتم لقيتو يقولو تعرفني شحال نعزك وادا زاد معاك مرة اخرى بكلمة ارواح قولي و تشوف وش ندير فيه، رحت كملت نشوف ليطاج هدا كيفاش داير شويا هكدا خرج صابني قالي وش راكي ديري هنا قتلو عمو حبيت برك نشوف لفوق وش كاين قالي احبطي لتحت عيب قتلو معليه كي جيت نحبط حكمني من يدي و قالي ماشي هدا وين قتلك نكره المرا لي تقرعج علاش كنتي تتصنتي كي كنت نهدر مع علي قلتلو لالا ما كنتش نتصنت طلق يدي و قالي نشوفوها، منبعد سڨم قمجتو و حبط قبلي يميل بكتافو باين عاجباتو روحو بزاااف هههههه بصح الحق شكلو و طولو فيهم هيبة كي شفتو هكداك تبسمت و قلت في قلبي بابا كان ضعيف هدا طويل الله يبارك و كتافو عراض، شميت يدي ريحتو مازالها لاصقة فيها.
حبطت نعاون مرت سعد فالعشا صبتها تنسف قلتلها وش بيك علاش راكي تنسفي في وجهي؟ قالتلي شوفي مع سي راجلك يعرف غير يجي يعيط على وليدي و وليد ختو يبوس ويحضن فيه تقول وليدي جبتو معايا فالتروسو، قلتلها و أنت علاش ما تقوليلوش هد الشي في وجهو و لا حبيتيني انا نوصلو هد الكلام ما فهمتش، قالتلي اششت وش توصليلو هبلتي؟! ردي بالك كاش ما تقوليلو قلتلها يمال علاش راكي تلومي فيا على تصرفاتو و تقوليلي راجلك ما راجلك اهدري معاه و أنا وش دخلني فيكم قالتلي انا لي غالطة ما صبت ليمن نهدر ليك.
خلاتني و راحت تصلي المغرب، و أنا قعدت واقفة مع البوطاجي منبعد وجدنا الطابلة تعشينا كي كملنا قعدو يشربو فلاتاي كي العادة بيدما يأذن العشاء باش يصليو منبعد كل واحد وين يروح لي يروح يرقد و لي يخرج برا...
كملت غسلت الماعن حتى نسمع فالعياط في شومبرة سعد كانت مرتو تقولو خوك ما خوك و مليت من هد الوضع و ما نعرف وش جيت ندخل شفتهم خرجوا بفاليزاتهم وراحت نوال لأم سعد قالتلها راني رايحة لدارنا، دخلت نجري لشومبرة الحاجة قالتلي هيام خير؟ قلتلها نوال راحت لدارهم قالتلي عملت مليح خلينا نريحو منهم شويا.
حبطت حلا و سارة و علي بداو يوجدو فالديسار حلا دارت الجيلاتين و سارة قطعت البنان و انا نخزر فيهم تبسمت سارة معايا و قالتلي ديري معانا؟ ضحكت قلتلها إيه قالتلي خفي كسري البسكوت و فرغي عليه النوتيلا و ضربيه بالباتور، درت كيما قالتلي منبعد جبنا كاس كبير تع زجاج فرغت الخليط لي درتو فيه وسارة شافت البنان فوقو منبعد حلا فرغت الجيلاتين سڨماتو و جطاتو يبرد جا علي يمد يدو ضربتو ليها و نضحك قالنا بصح ناكل معاكم قالتلو حلا بصح تخلصنا ماشي أنا بالسيف باش خرجت الدراهم من جيب بابا و عطاني شريت الدوزان و أنت تصيبها واجدة قالها علي و ليليان ما شفتيهاش و لا غير أنا جيتك على العين العورة كسلت رقبتي و قلتلو علاش ما علابالكش بلي هداك رااااجلييي حب يقول دراهميييي حلالييي ناضو يضحكو، قالها صحا و سارة قالتلو أنا عاونتهم قالتنا حلا خلاص نقسموها على ربعة بشرط نلعبو و تربحوني قلنالها اوكي دخلنا للشومبرة ثرنا الحاجة و هيام يحكيو و حنا قعدنا نلعبو  اسم حيوان نبات جماد ... كل مرة نعطيو حرف و أول واحد يجيب كامل الأسماء يخبط يدو فلرض و يقول قبط..
دخل علينا صراع فيدو السقايط كي العادة انا قعدت نخزر فيهم و نسيت روحي فاتني علي خبط و قال قببببط ضحك صراع علينا و فرغ وش جاب فوق ريسانا و يقول كلوووو مادام كاين خالكم الطيب ههههه نطقت الحاجة قالتلو لوكان قسمتلهم خير قالها خليهم ياكلو بصحتهم.
قعدنا نلعبو و ناكلو بصح علي كي شاف حلا فاتو بنقطة كام عطالنا حرف ظ و خلانا مدوخين منين نجيبو أسماء بهد الحرف، حلا تقلقت قالتلنا نلعبو لعبة اخرى اكسيو فيريتي (لعبة الصراحة) و لي يسقسيوه و ما يجاوبش بصراحة ينضرب عشر ضربات على يديه بالبليغة.
لحقت دالة سارة و هيام و الحاجة و صراع يضحكو معانا و متفاعلين، منبعد سقساني علي و رافد لبليغة فالسما يستنى وقتاش نكدب و يضربني قالي كاش مرة سرقتي الدراهم قتلو إيه، تم تم جاني السؤال من مورايا قالي صراع من عندمن  سرقتي قتلو من عند يحيى قالي علاش ما علموكش بلي السريقة حرام؟ قلتلو لالا علموني بصح ملي مات بابا الله يرحمو خوالي لي كانو يصرفو علينا و فهداك النهار ماما ماكانتش فالدار و انا كنت رايحة للمسيد و ما عنديش المصروف و يحيى كان راقد طلبت منو ما حبش يعطيني نحيتلو من البورطفاي ديالو بالتخبية قيس مصروفي برك و رحت نقرا.
خزر فيا صراع منبعد قالنا بدلو هد اللعبة عيب تحكيو أسراركم ديجا نوضو ترقدو راهي ال 12 ونص.
راحت حلا جابت الديسار لي درناه و مغارف سبق صراع كلا منها منبعد حنا قعدنا نتخاطفو و الحاجة تقولنا بلعقل عليكم وش خداكم قتلكم الشر و حنا نضحكو منبعد فرغناها في طبسي و صراع واقف عند ريسانا و يمد مغرفتو و ياكل كملنا غسلنا و رقدنا.
غدوا منداك الصباح نضت ندير الشغل وهيام وجدت الفطور و خرجت للسوق شراتلي حوايج جبب و بيجامان و حجاب و خمارات عطاتهملي و قالتلي صراع ما يحبش تخرجي بلا حجاب ردي بالك درتلها براسي إيه.
وحدو فيهم عجبتني وردي و مرسوم فيهت لولو كاتي و فيها الريش، قستها فالصالدوبا و جيت رايحة لشومبرة الحاجة نوريلهم كيفاش جاتني
لبستها تلاقيت مع صراع قالي دوري نشوفك كيلني ملفوق لتحت و قالي تعمن هادي؟ قتلو هيام جابتلياهم دوك دخلت دخل مورايا كامل قالولي جاتك شابة غير هو ما عجباتوش.
مع لول قعد ساكت منبعد قالها لأختو هيام ماشي ألوانهم فاتحة بزاااف قالتلو ما تقوليش معول تابسها لكحل؟! قالها لالا ماشي هكداك بصح الطفلة منورة الله يبارك عليها و تزيد تلبس هاد الألوان تجيب غير العين لروحها، قالتلو ياخويا ربي سبحانو خالقها منورة ماشي غرضها و انت تطفيها؟ الطفلة شابة و صغيرة من حقها تلبس قيس عمرها علاش حتى تغمها. شاف ما بين الجبب وحدة لونها رمادي قالي هادي كي تشوفي جا كاش واحد البسيها ما تلبسيش هادي، صراحة تقلقت صح الرمادية شابة بصح قلت في قلبي لبسني خمار سكت جبة سكت حتى ألوان الحوايج كيما يحب هو!! إدا هو كبير وش ذنبي حتى نكبر روحي و نلبس كي العجايز.
معليناش سكت و طلعت نخمل شومبرتو، حطيتلو حوايج فالماشينة و خملت الشومبرة و مسحتها و عطرتها و رحت نشرت حوايجو. 
هيام دات ولادها و خرجت و صراع قاعد مع تلفونو دخلت الحاجة تمتمت مع روحها و تلبس في حجابها قلتلها كاش وين رايحة؟ قالتلي وليد جارنا توفى لبارح و ليوم جنازتو خليني نلحق بيهم ردي بالك على الدار و ما تبرونشيش لام اغلقي ودنيك و خليها تقول وش حبت و راحت.
صراع كان طالع و الحاج و أم سعد خارجين من شومبرتهم جات ليا قالتلي وجدي لي بلاطو تع الفور و نقي الخضرة الحاج تشهى الحوت، رحت نوجدهم حتى سمعت تلفونها يصوني رفدت و كانت تهدر مزروبة و تقولهم دوك نجي استناوني و جات لعندي قالتلي بنتي رايحة تزيد قلتلها يتسمى راكي رايحة؟ قالتلي لالا نقعد نقابل خليقتك قلتلها و الحوت؟ قالتلي راهو راح يجيبو نقيه و دوزنيه، ديري ملتحت البصل و الطماطيش و الفلفل و الحوت فوقهم و قطعي فوقو القارص فهمتي و لا لالا ماشي تروحي تخربيها قلتلها إيه إيه فهمت. و أنا ما فهمت فيها والو..
#يتبع.......