مراهقة والاربعيني بلهجة جزائرية

64

#المراهقة و الأربعيني:

#الجزء64:

جازو شهرين و أنا في دار خالي منبعد قنعني صراع باش نرجع معاه للدار، كي لحقنا جينا حابطين من الطونوبيل جبد راسي باسو و حكم يدي حطها على قلبو و قالي دارك راهي هنا سوا كنتي حاضرة و لا غبتي و الله العلي العظيم ما تحلى في عيني وحدة من غيرك، خلينا نقلبو الصفحة و ننساو لي فات أما إخلاص إدا رجعت و الله ما تهمني و مصيرها دار أهلها و ربي عطانا زوج ودنين وحدة نسمعو بيها الهدرة المليحة و لوخرا نخرجو منها الهدرة لي ما تفيدش و لي يدنى ليك نرجعو لكرش يماه و انت اسمعي لكلامي باش ما نوصلش نضربك، كي نهدرلك حاجة و نقولك نفذيها لمصلحتك ما رايحش نضرك.. درتلو براسي إيه قالي هيا احبطي باش نغلق الطونوبيل  ..
أنا حبطت و هو غلق باب الڨاراج و حبط الفاليزا ديالي حكم يدي و دخلنا للهول قال ربي يعاونكم دارو كامل ما آمانوش كي شافوني و جاو سلموا عليا.. هيام قالتلي واش المهبولة استعقلتي؟ أم سعد وجهها دار بصح نور، الحاج و الحاجة فرحوا بزاف بيا سلمت عليهم قالتلي الحاجة و الله غير توحشتك تقول فارقت وحدة من بناتي.. حضنتها و صراع فرحان و غير يضحك قالهم خلاص بركاو ما تبوسو فيها هلكتوها خليولي حقي تع الليل و هوما كلاطاو بالضحك.. طبطبت الحاجة على ظهرو و قالتلو تهنى وليدي تهنى حبط الشتور و اغلق الباب.. دار ليا قالي اااااه كلشي كلشي وكلام يما تعرفيني ما نكسروش، ضحكت و بلاما نفيق جيت طالعة فالدروج قالولو على حساب الشوفة ما صدقت راهي مزروبة كثر منك ههههههه.. تبهدلت قلتلهم لالا ماشي هكداك.. جبدني من يدي و قالي امشي معايا نوريلك كيفاش يمال... هوما يضحكو و أنا حشمت.. طلعني لشومبرتي توحشتها جيت نمشي فيها جبدني من يدي لحضنو و همسلي قالي عندك الوقت باش تتفاقديها و تشبعي منها، دوك تفاقديني أنا  راني تشرشمت.. ضحكت و قعدنا مع بعضانا ما حبطناش لتحت حتى غدوا منداك نحبطو وقت الماكلة برك.. و هو عطاني دراهم و دا سمانة من الخدمة باش يقعد معايا..
فهمت من نور بلي صراع هاجر إخلاص و ما يخزرش في وجهها و هاد الشي ريحني..
صراع اقترح باش يدير وليمة نهار الجمعة و يختنو ولاد نائل و هوما وافقوا..
بدينا نوجدو فرزنا الدار و درنا الڨاطو على الثلاثة تع الصباح و كي لحقت السبعة كان كلشي واجد جا الطبيب ختنهم في ثلاثة و أنا طلعت لشومبرتي وجدت روحي..
الدراري داروا حالة بالبكا، التوام أحمد و محمد توجعو كثر من عابد كي كانوا كبار، عاونا نور فيهم و شربنالهم الدوا هوما رقدوا و حنا قعدنا مع الضياف سنيوة رايحة و سنيوة جايا..
جيت داخلة للكوزينة سمعت صوت حلا و عجوزتها مع لي درت شفت إخلاص معاهم الڨاز طلعلي لراسي..
دخلو للدار سلموا عليا و إخلاص لحقتني للكوزينة تبوس و تحضن قالتي أهلا حنونة.. اخخخخ ظهري هلكني عندي شهرين قتلني، وش راكي حبيبتي؟ ما رجعتلهاش بصح توسوست قلت في قلبي زعما تكون اونسانت ولا راهي تكدب و تقنط فيا برك؟ تالمو كان عقلي بعيد و نخمم ما فقتش كيفاش تقلبت السنيوة من يدي و طاحو كامل الكيسان فلرض تكسروا حتى قفزت النسا، وحدة تقولي تكسر الشر و وحدة تقولي يا ستير.. ردي بالك.. خليت كلشي و طلعت لشومبرتي صبت إخلاص لفوق رايحة تفتح شومبرتها حاطة كيلو ماكياج في وجهها بكامل الالوان تقول ڨاراڨوز ولابسة جبة حمرا و شال أكحل، قلتلها ما عندكش كرامة تتحاوزي و ترجعي.. قالتلي شوفو شكون راهي تهدر.. ماشي حلفني ما توليش و تتطلقي؟ راني نشوف فيك رجعتي و جايا تحاسبي فيا.. قلتلها أنا على الأقل ما حاوزنيش و حللني حتى شبع باش رجعتلو ماشي كيما انت يا بقرة.. و دخلت للشومبرة رفدت التلفون لصراع قتلو راهي جات.. قالي إيه شفتها و أنت وش راحلك فيها؟ قتلو ما نحملش نشوفها.. قالي احبطي عمري تتغداي و ما تعمريش راسك بهاد الحكاية.. بلخف نشوفك قدامي الشابة ديالي.. هو قالي الشابة ديالي و أنا نسيت كلشي، ضحكت و قتلو راني حابطة حبيبي..
حبطت للكوزينة صبتو واقف قالي هادو خدود ولا ڨاطو؟ تعنكرت فيه لخطر كانو قدامنا يسقيو فالماكلة.. حط يدو على كتفي و جبدني لحضنو و قعدنا نهدرو مع بعضانا بلعقل حتى دخلت إخلاص قالتلو الله يعاونك أبو حرب.. رفع راسو خزر فيها ملفوق لتحت قالها أهلا و عاود حبط راسو كمل يهدر معايا حسيت الدخان خرج من ودنيها كي ما قيمهاش و أنا زدتها عليها ضحكت معاه و بستو في خدو، رفع حواجبو و ضحك و هي تقلقت و خرجت من الكوزينة، شويا موراها زاد خرج هو...
كملنا التحرحيرة تع الغدا و راحو الناس البراوية قعدنا غير حنا في حنا و عمومهم.. شعل نائل الديجي فالهول و ناضو يشطحو رجال و نسا و فرحانين.. دخل صراع قالهم دايرين الغنا في داري؟ نقصولو الصوت قالهم زيدولو ديدولو خليوني نشطحو كلاطاو بالضحك..
دارو غنية شعبي و ناض يشطح هو و نائل و علي و محمد، و هيام و نور يصفقو، جبدني صراع من يدي باش نشطح معاه و أنا حشمت كامل كانوا يخزرو فينا غير حنا الزوج و الحاجة من فرحتها بينا ناضت تزغرت... شويا هكدا و قالهم أنا خلاص ما نقدرش نتحمل كثر من هكدا.. ما فقتش كيفاش حتى رفدني قدامهم و هوما ناضوا يصفرو و يضحكو، لوكان صبت تنشق لرض و تبلعني.. وصلني للدروج حبطني و روشلهم بيدو و هوما يضحكو، طلعنا قتلو صراع منيتك؟! و الله غير حشمتني قدامهم .. قالي ما علابالي بحتى واحد ارواحي لهناااااا... ضحكت و قتلو مهبووووول..
مور ما كملنا خليتو راقد و نضت سڨمت روحي و حبطت، نشوف في إخلاص ما نحاتش عينيها عليا و أنا زكارة فيها بديت نضحك و نڨصر مع علي بصوت عالي..
جازو يمات الدعوة هاااانية واحد ما دنى ليا، كنت مرتاحة سورتو كي زدت شفت صراع كيفاش كان متجاهلها و الاهم ماكان لا حمل لا والو كانت تحاول تغزلني برك..
ما كنتش نحط يدي كامل فالشغل، كنت نسهر مع صراع فالليل، هو يرقد على الوحدة تع الليل و أنا نقعد مع التلفون نقرا فالقصص و الروايات ما نرقدش حتى ال5 تع الصباح و نوض مع الظهر نسڨم روحي و نحبط نصيب الغدا واجد ناكل و كي يجي صراع نطلعلو ياكل فالشومبرة و نقعد معاه..
كان شغل الدار و الطياب على إخلاص و نور و أنا واقفة غير على روحي و على شومبرتي
ما نعرف وش نلت من قبل كي خدمتهم، ياك جاب مرا و قال خدامة يمال خليها تهنبر، علبالي كانوا كامل مقنوطين من هاد الوضع و كانوا رايحين يطرطقوا بصح ساكتين خافو كاش ما يصرا مشكل و أنا عاجبني الحال و مرتاحة هكدا و زكارة قاعدة نغزل فيهم و نزيد الله لا تردهم يسكتو بالسيف عليهم خلاص وقت الحنانة و النية تعلمت عليهم الطبايع الشينة و ما ولا يهمني والو من غير روحي...
وحد النهار مع العصر كنت قاعدة لفوق سمعت الزڨا و التشقلالة لتحت حبطت نشوف صبت علي و محمد متضاربين و هيام و سعد يتعايطو.. لي فهمتو أنو محمد سمع ختو حنين تهدر مع علي فالتلفون و ضربوها.. حكمتني الحاجة من يدي و قالتلي غاولي عيطي لصراع.. عيطتلو حكيتلو قالي دقايق و نكون فالدار.. كوبيت..
هيام تكروشات مع سعد و الحاجة تحاول تهدن الحالة و أم سعد ترفد و تحط فالكلام مع علي منبعد قالتلو انت ما عليك لوم لخطر تربية نسا.. لتم هو هبل و بدا يسب و يغلط فالكلام معاها و الحاج حاوزو و ما خلالوش بالمعايرات، و إخلاص قالتلو خسارة مات خويا و قعدت زريعتو بلا تربية و هيام كروشات معاها..
شويا هكدا و دخل صراع قال وش كاين وش صرا؟ دارو كامل ليه سكتوا و الحاج قالو علي قليل أدب و ما عندوش غرام تع تربية.. هو قال هكدا و هيام و سعد و أم سعد ناضوا كامل يهدرو على ضربة و يتعايطو.. عيط عليهم قالهم خلاااااص خليونا نفهموا.. و دار للحاجة قالها يما وشنو كاين؟ حكاتلو كلشي بالباء و التاء هو ضرب على عقلو ما صابوش قالها مازال ما جابتو يماه لي يقول على علي تربية نسا، هداك تربية يدي و يسوى عشر رجال و كي يغلط أنا لي نحاسبو أنا باباه واحد ما يزيد يهدر مع هيام عليه ما راهوش دراري..
طاحت عينو في عين هيام شافها تبكي و تمسح في دموعها  ناض راح ليها باس راسها و قالها أنا عايش و أنت تبكي ما تعمريش راسك بحتى واحد ختي راني هنا.. جا سعد يهدر قالو نوض خويا نهدرو فالصالون لخطر الكلام لي يتهدر في وسط النسا ما يصدقش..
دخلو الرجال للصالو كملو كلامهم و النسا مازالهم يبلبلو لداخل، دخل صراع عيط عليهم سكتوا.. راحت إخلاص للكوزينة و هو قعد فالهول شاف فيا تبسمت قالي و أنت يا أم الديڨات معامن داوستي؟ قتلو أنا شكون يتجرأ يدنا ليا و أنت راجلي؟
قالي ياودي راجلك خصو كاس لاتاي.. قتلو أنا نكون ليك لاتاي.. قالي يا يما على عقلي اخخخخ و راح للصالون.. رحت للكوزينة باش نديرلو لاتاي و سقسيت نور وش هدرو الرجال قالتلي صراع حط اليد على حنين لعلي و سعد ما قبلش قالو يا ودي انساو الحقد و استروهم مع بعضاهم ما دام يحبو بعضاهم.. حنا نحكيو و إخلاص دخلت سربات لاتاي و داتو لصراع هزيت يدي و كملت نحكي مع نور منبعد نضنا نديرو فالعشا..نور و إخلاص كانوا يطيبو و أنا نوجد فالشلاظة حتى دخل صراع رفد حبة خيار عضها و همسلي في ودني قالي يا طفلة نحتاجك لفوق، شفت فيه تبسمت و درتلو براسي إيه.. عاود رفع صوتو قالي ليليان اطلعي للشومبرة جيبيلي الشارجور.. حطيت كلشي من يدي ، غسلت و قتلو تأمر عمري.. سبقت خرجت طلعت فالدروج و هو جا مورايا، لحقتنا إخلاص قالتلو صراع وين رايح راهو وجد العشا.. دار ليها و تعنكر فيها قالها العشا يستنى شويا..
خليتهم و طلعت للشومبرة غير دخل و جا يغلق الباب طبعتو عليه و تكيت على صدرو قتلو أنا علاش نحبك لهاد الدرجة؟ قالي يا باباااا الطفلة هادي معولة تهبلني..و أنا نموت عليك و لوكان جات بيدي نهرب بيك لبلاصة ما فيها حتى واحد من غيرنا حنا الزوج.. ضحكتلو و هو بدا يتغزل و قعدنا مع بعضانا حتى دقدق أحمد وليد نور علينا فتحنالو قال لصراع عمو قالتلكم جدة احبطو تتعشاو.. ضحكنا على هدرتو كي يعوج الكلام و حبطنا معاه.. إخلاص ردت بالها بلي شعري كان مشمخ بدات تخبط و بان عليها الزعاف منبعد خبطت الطابلة و عيطت عليا قالتلي وجدي الطابلة ولا فالحة غير باش تلصقي فالراجل..قلتلها و أنت وش ديرونجاك عينيا راجلي و حاليتلي نلصق فيه ما خطفتش رجال الناس كيما شي عيباد.. نوال كانت جات كي كنت أنا و صراع لفوق قالتلي وش انت ما تحشميش ماراكيش مآمنة بلي عندك راجل واقيل يحي مخلوعة.. قلتلها انت مادابيك تخلي روحك ضيف خفيف ظريف و تشدي قدرك... و ينوضو ليا يتعايطو حبو ياكلوني.. دخل صراع يجري عيط علينا قالنا اشششت و الله لي نسمع صوتها غير نعلقها.. نطقت نوال قالتلو يعطيك الصحة أبو حرب ولينا نتحاوزو من نص دارك، إدا ما راكش قابلنا قولنا مانزيدوش نوصلو عتبة الباب.. قتلو و الله غير راهي تكدب ما حاوزتهاش...... قاطعني قالي خلاص روحي جيبيلي تلفوني.. جزت عليه مقنوطة و هو قعد يهدر معاهم.. كي حبطت صبت نور توجد فالطابلة.. عطيتلو تلفونو و البورطفاي جبدني من يدي قربني ليه و همسلي قالي ما تتصادمي مع حتى وحدة فيهم خليهم يموتو بالحقد و القنطة، هوما مادابيهم يقلبو الكلام باش نداوسو و نبردولهم قلوبهم.. تبسمتلو و قتلو معليش حبيبي أنت تأمر..
قعدنا ناكلو، أنا كنت متكية يدي على رجل صراع و نتهامس أنا وياه و نضحكو و إخلاص ما حملتش ناضت بلخف راحت للكوزينة..
كي كملنا العشا نضت نرفد الماعن و ديتهم للكوزينة صبت إخلاص حاكمة راسها ما بين يديها و تبكي و نوال تصبر فيها كي شافوني دخلت خزروني بوحد الشوفة حتى حسيت روحي أحقر وحدة على وجه الأرض..
صراحة في داخلي غاضتني بصح هي جابت البلا لعمرها، طيحت بكرامتها و ذلت روحها..
خليتهم و طلعت لشومبرتي قعدت مع التلفون حتى دخل صراع وجه ما يبشرش بالخير لا كلمة لا تبسيمة راح قبالة للخزانة يجبد حوايجو قتلو حبيبي كاش ما تحتاج؟ قالي ليليان علاش ما تسمعيش الكلام؟ قتلو علاش وش درت؟ قالي كيفاش تقولي لإخلاص هو جابك خدامة و كيما أنت كيما الصباط في هاد الدار صوتك ما يترفعش قدامي سينو نقولو يحاوزك؟ قتلو و الله العلي العظيم ما قلت هاد الشي.. و نضت من الفراش جيت خارجة، قالي وين راكي رايحة؟ قتلو نروح نجيبها تحلف قدامك على المصحف.. قالي ارواحي لهنا خلينا منها، قتلو لالا ما نخليهاش مادام طلعت باش تحاسبني يعني آمنتهم.. قالي احكيلي انت وش صرا.. حكيتلو وش قالتلي إخلاص و نوال.. قالي خلاص خليك منهم أنا ندبر راسي معاهم، قتلو بصح أنت شكيت فيا.. قالي خلاص ليليان ما تكبريهاش ما شكيتش فيك و جيبي خدك نبوسو يا لالة.. باسني و قالي ديريلي مساج راني ميت بالعيا..
غدوا منداك حبطت جوايه ال11 صبتهم قالبين خليقتهم و إخلاص قاعدة تهدر مع الحاجة كي شافوني سكتو..
أنا نهدر مع الحاجة و هي مدورة وجهها عليا و ما تواجبنيش حتى دفق وليد نور الما فالقاعة زڨات عليا قالتلي نوضي يا العروسة تحركي شويا و لا دايتها غير رقاد.. سكت نضت مسحت الما و طلعت لشومبرتي ما حبطتش حتى الثلاثة غير ربع الوقت لي يجي فيه صراع دخلت للكوزينة شويا و دخل صابني نغسل فالماعن تع الغدا و مقلقة قالي خير وش كاين؟ قتلو المفروض أنا لي نسقسيك مرة يحرشوك أنت مرة يحرشو يماك راهي من الصباح و هي مدورة وجهها عليا و ما تهدرش معايا.. قالي ديريلي كاس لاتاي و ارواحي معايا..
سربيتلو كاس لاتاي و ديتهولو صبتو قاعد غير هو وياها، حكمو عليا و قالها يما غير لخير وشبيك مع ليليان.. تعنكرت فيا و قالتلو وشبيني معاها؟! قالها و أنت وين علبالي أنت لي قوليلي وش دارت؟ قالتلو شوف معايا لي كل يوم ما تنوضش حتى تحمى الڨايلة و طاس الما ما ترفدوش و كلشي طايح على راس إخلاص و نور ما كفاتش غير في ولادها.. قالها يما خليني من هاد الحكايات قوليلي إدا غلطت مع كاش واحد، رفعت صوتها؟ طيحت القدر؟ قالتلو لالا.. قالها خلاص يمال ما عندك علواش تزعفي.. و دار ليا قالي نوضي جيبيلي نشرب الما.. عرفتو حب يليكيديني باش ما يهدرش قدامي.. نضت بلخف كي خرجت صبت نور تتصنت عند الباب و إخلاص قاعدة فالدروج.. سمعتو قالها راني خرجتها باش ما تقوليش راهي تعمرلو في راسو.. ما نسمح لحتى واحد يأمرها دير حاجة فالدار، أنا رجعتها ليا ماشي باش تخدم على حتى واحد.. يكفيني كي راهي مريحتني و واحد ما عندو كلمة عليها من غيري.. منبعد رفع صوتو و قال و لي يزيد يحرش عليها نحرقو، أنا ما رانيش راقد على ودنيا علبالي السوسة المدسوسة كيفاش راهي تمشي، زوج نسا قد الباب ما يقدروش لشغل الدار حتى يستناو ليليان، ما عندها لا طفل يوسخ موراها لا ضيف يجي يطل عليها، ديروها كلي ما كاش و لي ما عجبوش الحال كاين الحيوط بزاف
ناض و هو مقلق قالتلو الحاجة صراع نعرفك حقاتي لالا ماشي هكدا وليدي
هديك وش ذنبها باش ترفد الدار كامل فوق ظهرها و فوقها هاجرها و تعاملها بجفاء.. قالها يما أنا ما ظلمتهاش هي لي خيرت تعيش هكدا و تولي خدامة واحد ما جبرها علاش ما تروحش لدار باباها و تعيش معززة مكرمة اما أنا ما عندها حتى حق معايا..
هو غير فتح الباب دخلنا نجريو أنا و نور للكوزينة حتى نسمعو في إخلاص تصوغ تبكي بالشهقة، خرجنا نشوفو وش كاين، كانت لفوق فالدروج منهارة و تبكي على طول صوتها على يد صراع و هو حضنها و مشاها لشومبرتها و غلقت الباب و أنا ضربت على عقلي ما صبتوش، قعدت رايحة جايا فالهول نسمع فيها تبكي و تشكي و تتمسكن قالتلو غير قولي وش خصني أنا حتى راك مضحك الغاشي عليا، قتلك وليد عمي برك خليني تحت جناحك و راني نمشي معاك على الشعرة و إدا ملت على كلمتك كسرلي رقبتي
علاش حتى تشفي فيا لي يسوى و لي ما يسواش و أنا بنت عمك دمك و لحمك، وش حبيتني ندير؟ نقلع قلبي و نلومو على حبو ليك؟ هو لي ذلني.. وش ذنبي باش تذلني لمرتك...
فتحت الباب عليهم صبتها قاعدة قدام رجليه و هو مطابس حب ينوضها و يحلل فيها باش تسكت.. صبتو يقولها يا بنت عمي قدرك عالي بصح..... قاطعتو و قلتلها ماراهوش حايبك افهمي علاش بالسيف؟! احشمي على روحك و اخطينا.. تعنكر فيا و عيط عليا قالي ليلياااان اخرجي منا.. قتلو لالا ما نخرجش و ماكالاه تلعبها تتمسكنلك لخطر هي لي رضات تكون خدامة في هاد الدار، واحد ما قالها تحط عينها على راجل متزوج و تلصق فيه بسحورها.. نطقت أم سعد قالتلي يعزيك في راسك إن شاء الله إدا بنت ختي دير السحور إن شاء الله يلصق ذنبها في رقبتك يالي ما تستحيش.. ناض يعيط علينا قتلو خليك منها يلا اخرج نووووض.. قالي امشي منااااا روحييي دوك نجي موراااك.. بديت نعيط و نخلط فالهدرة و هي تبكي ناض يعيط و يسب فالنهار لي تزوج فيه، ما خلاش كلمة ما قالهاش و بدا يكسر سكتنا في زوج و رحت لشومبرتي نبكي بالسكات... قالتلو الحاجة هادي حالة لي يعصي ربي ما يرتاحش حتى نهار يعدل.. و هو زاد هبل و  جهل فالكلام منبعد حبط لتحت قالو الحاج اعدل مابين نساك حرام عليك كيما هديك مرتك لوخرا تان مرتك، ليلة لكل وحدة و يوالفو مع الوقت..  قالتلو الحاجة هاني أنا و أم سعد كي الحباب عادي... وقفت فالدروج و بديت نعيط قلتلها و أنت راكي حايبتني نولي كيما نتيا مذلولة واحد ما يحترمني و نعيش على الهامش حتى نمووووت... صراع جا يجري ليا حكمني من شعري و بدا يعيط قالي أنت تعايري يما يا بنت ×××× بديت نصوغ ما بين يديه و هو طايح عليا بالكفوف و الكوتبيات حتى رعفت و أهلو يحاولو يسلكوني منو و هو يقولهم ما نحتاجهاااااش في دااااري خرجوها عليا منااااا... جبدتني نور طلعتني فالدروج و نيفي يسيل بالدم لاقاتني إخلاص مربعة يديها و تضحك قالتلي شفتي بلي راني ساكتة غير بمزاجي و كي نحب نحرق الأخضر و اليابس واحد ما يحبسني.. قالتلي نور بركاينا إخلاص ماشي هدا وين كنتي تتمسكني.. و شافت فيا قالتلي امشي ختي امشي.. داتني للصالدوبا غسلتلي و أنا نبكي شعري طاير فالسما و لحمي كامل يوجع
رحت لشومبرتي طميت حوايجي و دوزاني كامل في فاليزا كبيرة و نور تجبد فيا و تقولي انعلي ابليس ساعة شيطان دوك يتهدن يجي يطلب منك السماح، قلتلها أنا يضربني هكداك؟ و الله ما نزيد نبقالو هنا دقيقة لوكان يبوس رجليا و خلي بنت عمو تنفعو..
لبست حجابي و حبطت لتحت صبت الحاج يقولو لالا وليدي ماشي هكدا ياك تعرف لسان مرتك هي طايشة.. شافتني الحاجة حابطة جات وقفتلي فالدروج قالتلي جابها الشيطان يا بنتي على وجه شيبتي ريحي.. قلتلها و الله ما نقعد ياك خلاص حاوزني.. دار ليا قالي اطلعي تشوفي لشومبرتك.. قتلو ما نطلعش و ما نحتاجكش دوك تديني لدار خالي.. بعدت الحاجة و جيت حابطة حكمني من يدي كركرني للشومبرة غلق عليا الباب بالمفتاح و راح.. رميت الفاليزا فالقاعة و قعدت نبكي و رجعت نلوم في روحي علاش وليت لعندو..
نص ساعة منبعد عيطتلو فالتلفون ما يرفدليش نضت نخبط فالباب بيديا في زوج باش يفتحولي واحد ما جا بديت نرمي فالدوزان فالشومبرة و نكسر من حرقة قلبي.. شويا و دخلت عليا هيام كلاطيت في وجهها قلتلها شفتي خوك وش دار فيا؟ دوك تعيطيلو يجي يديني يلاااااا.. قالتلي استهدي بالرحمن دقيقة تع شيطان.. قلتلها راني نقولك عيطيلو دوك يجي.. حكمتني من يدي و قعدتني و بدات  تنصح كي العادة حتى دخل هو دورت وجهي عليه، جبد طابوري و قعد مقابلنا قالها أم علي غير قوليلي شحال من مرة قلتلها وش راحلك فيهم يهدرو وش يهدرو ما علابالكش بيهم، اسمعي وش نقولك أنا برك، منهار دخلت على إخلاص مازدتش قربتلها.. و نغزتي قالي انطقي راني نكدب؟ قالتلو هيام لالا حاشا خويا بصح هي تان مازالها صغيرة و طايشة و انت راك كبير و شارب مخك بلعقل عليها.. قالها أم علي بعد كامل وش جوزت يما علينا و صبرت على الظلم و الحڨرة باش كبرتنا جي دوك هادي فيها شبر تعايرها قدام لي يسوى و لي ما يسواش؟! و الله و جات وحدوخرا غير ندفنها في بلاصتها و هي حية.. قتلو ما تدفني ما ندفنك وشنو المطلوب مني دوك؟ قالي تشدي لسانك برك، ملي جيت من الخدمة و أنا ندافع عليك و مع لخر ديريلي هكدا؟! قالتلي هيام و الله غير ماشي غير قدامك مام كي تكوني غايبة لي يجيب اسمك على لسانو ما يخليلوش.. قلتلها ادا كان يحبني يمال علاش يديرلي هكدا؟ شوفي وجهي شوفي.. قالي الله يعميلي عينيا و الله غير نعشقك و جا ساماني فالفراش جبدني لحضنو و هيام ناضت تضحك و خرجت..
قالي أنا اكبر حيوان و جحش و همجي بصح ما تبكيش ما نحملش نشوف دموعك.. قتلو وخر عليا يلا.. قالي أنت تان ليليان ديري ديڨا و تزيدي تبكي؟ شحال من مرة قتلك تجنبيني كي نكون مقلق ولا زعفان.. قتلو بعد عليا يدي راهي توجع فيا جبدها يشوفها صغت من السطر  و درت عليه عطيتو بظهري و هو مورايا حاط يدو على خصري و راسو معايا فالمخدة، سمعتو يجبد فالنفس كي شغل واحد يبكي قفزت درت ليه صبت دمعتو حبطت بلخف حضني و قالي شاب راسي و رايح نولي جد و حالتي هكدا معاك كي نآذيك و الله غير ندمر.. خزرت فيه و قتلو و دوك أنا وش ندير؟ ندعي عليك تان ما يعطينيش قلبي.. قالي ادعي دعوة يتيمة و مظلومة ادعي تتكسر يدي.. درت و سكت عليه..
صح راح الزعاف بصح قعدت يمات و أنا نهدر معاه فوق نيفي ماشي حاملاتو و هو كل يوم يحلل و يحضن و لاصق فيا كي ما حبيتش نرضى كره و هو تان رجع يدخل يتجاهلني و واحد فينا ما يهدر مع لوخر..
إخلاص استغلت الموقف و رجعت تفتح معاه سوجيات تع الفاميليا و حكايات تع بكري و هو يضحك و يحكي معاها و وقت الماكلة تريح قدامو و تتعمد ما نعرف بواش تهمسلو و هو يتبسم و كي نتعنكر فيه ما يشوفش منبا فيا .. كانت واقفة على ماكلتو و شرابو و رجع ما يبعثنيش حتى باش نحدد حوايجو و نسيرجلو صباطو مايقوليش ليا يبعثها غير هي و أنا بديت نتقلق..
وحد النهار حنا فالطابلة تع الماكلة و هي دير نفس ليمانيار باش تغزلني والحاجة تشوف فيهم و تضحك هنا انا ما قدرتش نزيد نحمل طلعت لشومبرتي و قعدت نستنى فيه يجي نوريلو الزنباع وين يتباع بصح ما طلعش، هنا توسوست عمبالي راهو معاها لتحت ولا دخلت معاها لشومبرتها خرجت نجري نحوس عليه صبتو راقد في شومبرة يماه طمنت وليت رجعت لشومبرتي و قعدت نتفرج المسلسل فاليوتيوب حتى لحق المغرب طفيت التلفون و حبطت لتحت ما صبتوش قلت بالاك خرج بصح كيفاش خرجت و هو ما دخلش لعندي باش يا حوايجو؟! مع لي طلعت نشوف فيه واقف عند الباب تع إخلاص، رامي السربيتة على كتفو و  حاكم الباص و يهدر معاها و هي لداخل تضحك بصوت عالي.. غير شافني جبد الباب غلقو و دار راح للصالدوبا و أنا دخلت لشومبرتي نغلي شويا و دخل.. صوطيت فيه قتلو بوجهك و جاي لعندي لعندي يا وحد الرخيس و الله ما نزيد نقعد عندك دوك طلقني يلا.. قالي تشدي قدرك ولا نقطعلك لسانك، شكون الرخيس يا حيوانة.. قتلو ما يهمنيش دوك طلقني ولا هدوك الموسطاش دايرهم شباح في وجهك برك.. قالي علاش ما تقادري حتى واحد؟ راكي تحوسي نقتلك؟ قتلو تقلني، تدفني، ما نستعرفش بيك ليوم طلقني يعني طلقني.. وعدتني و خنت وعدك ما نحتاجكش.. قالي وش راكي تخلطي وش خنت؟ قتلو يمال الشي لي شفتو دوك وشنو؟ ما تنكرش كنت عندنا ورحت للصالدوبا.. قالي وشبيك طلعت باش نتوضى عيطتلي تطلب مني...... قاطعتو قتلو كداب.. قالي يعطيك الصحة و فرش السجادة باش يصلي نضت نصوغ دار و قعد يشوف فيا مستغرب قالي وشبيكي هبلتي؟ باش نحلفلك بلي ما قربتهاش منهار دخلت عليها..أنا تقولي عليا كداب؟! مسي شعري هدا مدوش ولا متوضي.. حكم يدي و جوزها على شعرو صبتو صح متوضي ماشي مدوش.. جبدت يدي و قتلو مام ما قربتهاش بصح وليت دير كلشي معاها.. حط يديه في جنابو باستهزاء و قالي كيفاش محسوب؟ قتلو تضحك و تهدر معاها و أنا تقول مارانيش نبان.. قالي خافي مولاك شويا ما كفاش هاجرها و مخدمها في كلشي و أنت شابعة راحة استكثرتي حتى نعاملها بالحسنى.. و زيد كلشي من تحت راسك لوكان عندي مرا نضحك و نڨصر معاها ما نحكيش مع غيرها
و دار للقبلة رفع يديه قال الله أكبر و دخل فالصلاة.. كي كمل حبط للهول حبطت موراه و قعدت قدامو نعس فيه، جات إخلاص قالتلي ليليان نوضي عاونيني حط لاتاي فوق النار و وجدي الكيسان، نور راهي لاتية مع ولادها.. قلتلها شوف يا لالة هداك وش خص علاش أنت جايبينك حنا باش نشوفو طولك؟ نطقت الحاجة قالتلي ليليان احشمي على روحك و نوضي عاونيها.. قلتلها و الله ما نحط يدي في حاجة حتى يطلقها و ترنك لعند دارهم.. قالتلو صراع أهدر معاها شويا وش حكايتك انت، هو دار روحو مبرونشي مع التلفون.. رفع راسو قالها انعم يما هدرتي معايا؟ قالتلو ماراكش تسمع كلامها؟ ربي سبحانو من فوق العرش يرحم و أنت ما ترحمش و مطلع هاد المصفارة على ظهورنا؟ دار لإخلاص قالها ديريلي كاش لاتاي باش نطلع و تعنكر فيا بوحد الخزرة حسيت قلبي طاح و عاود حكم تلفونو يخنتش فيه و الحاجة عند راسو تهدر..
جابت إخلاص العشا و حطاتو قدامو جيت ناكل دار ليا قالي نوضي أنت وجديلي الدوش نكمل نتعشى و نطلع نصيب كلشي واجد.. خبطت و نضت بالزعاف طلعت وجدتلو و دخلت للشومبرة.. شويا هكدا جا مدوش ما شافش منبا فيا بدل حوايجو و عاود خرج.. قعدت نستنى فيه و أنا مقنوطة ساعة باش جا.. كي شفتو دخل حكمت فراشي و درت عليه.. حطلي صاشي فوق الطابل دونوي عرفتها ماكلة من ريحتها.. لبس بجامتو و حشر روحو مورايا، حط راسو على يدو و قالي المهبولة ديالي وقتاش تستعقل؟ سكت عليه.. قالي وين راهو لسانك الطويل هداك يا وحد الوقحة، خرجيه دوك علاش سكتي؟ قتلو وش دير بلساني؟ قالي توحشت نبوسو.. قتلو وخر عليا صراع، تنوضني على الماكلة و دوك جاي لعندي.. قالي لخطر ما تقادريش روحك و تحوسي على المشاكل راس براس.. قتلو يمال وخر عليا علاش جاي لعندي؟ قالي ليليان احشمي على روحك شويا عندك كثر من سمانة و أنت راميتني و مخليتني كي الزوفري لوقتاش نقعدو هكدا؟ قتلو أنا راهو عاجبني الحال هكدا حتى تنفحلي.. قالي إيه ما دام عاجبك الحال هكدا ريحي حتى أنا عندي مرا وحدوخرا علاش معذب روحي و ناض مشى.. قتلو صراع و الله و تروح لعندها ما نزيد نحبك و تخلصها غالية.. قالي هي ملول نورمالمو نديرلك هكدا لخطر ما تكسر المرا غير المرا و جا رايح هو قريب لحق للباب و أنا صوطيت نجري من فراشي غاولت غلقتو بالمفتاح ناض يضحك قالي و الله غير مهبولة.. جبدلي الماكلة و قالي ريحي تتعشاي.. قتلو قبل ما ناكل اوعدني ما تزيد تحكي معاها ما تاكل من عندها.. ابعثي أنا نوضني ما علاباليش المهم واحد ما يلبي طلباتك من غيري.. قالي حرام عليك هي تان بشر و الكلمة الطيبة مطلوبة ماشي شرط نكون حايبها.. قتلو ما يهمنيش قتلك ممنوع يعني ممنوع نغيييير ما تفهمش.. قالي تعشاي دوك و ربي يعملها تاويل..
غدوا منداك غير حسيت بيه خرج من الشومبرة نضت نجري حبطت لتحت باش نوجدلو لفطور صبت إخلاص سبقتني قلتلها أنت شكون قالك وجديلو يفطر حبيتي تلصقي روحك بالسف؟ قالي أنا تان راجلي و عاجبني نخدمو و انت وش ضرك؟ قلتلها في منامك يولي راجلك وخري منا تشوفي أنا لي نحطلو و جيت نحيلها البقراج هي تجبد و أنا نجبد دخل صراع صابنا نداوسو قالنا وش كاين تان مع صباح ربي؟ خزر فينا و خرج و إخلاص عيطتلو قالتلو أبو حرب ولي فطورك راهو واجد..قالها مشكورة بنت عمي راني مزروب..قلتلها شفتي لدوك مازالو يعيطلك بنت عمي يعني ماشي حاسبك مرتو.. قالتلي بلعي فمك..
طلعت للشومبرة مرتاحة كي ما كلاش من عندها بصح كي حبطت مور الظهر صبتو يتغدا و هي قاعدة معاه، بقيت مشنفة و نشوف فيه رفع راسو قالي ما تتغدايش؟ قتلو لالا  و طلعت زعفانة.. قعدت نستنى فيه حتى دخل باسني في خدي و تكسل في فراشو باش يرقد قتلو وجهك صحيح تاكل من عندها و دوك جاي تبوس فيا.. قالي إيه وجهي صحيح إيه.. قتلو راك تغزل فيا؟! قالي حياتي معليش نأجلو الدواس حتى لليل لخطر دوك راني دايخ و جيت عيان من الخدمة حبيت نرقد، هكدا عمري؟ قعدت غايسة فيه قلت وشبيه هدا راهو منيتو ولا يتمهبل عليا؟! و هو ضحك و رقد..
كي ناض خرج لبرا و رجع فالليل غير دخل لعندي حطيت يديا في جنابي، باسني و عطاني صاشي قالي راني جبت شويا سقايط و حلوى للسهرة ديريلنا قعدة حلوة يا الشابة نديرو فيلم نشوفوه بلا دواس.. تبسمت و قتلو أوكي.. قالي و عمريلي الرنڨيلة معاك ياك؟ قتلو ادلل حياتي..
وجدت كلشي و طلعت السنيوة صبتو فالصالة لفوق شعل الكليماتيزو و حط فيلم تع انجيلينا جولي و جوني ديب فيه شويا رومانسية شويا اكشن.. قعدنا فالقاعة متكيين على الكنابي و متغطيين و نتفرجو و هو يدو مورايا.. شويا و دخلت إخلاص قالتنا وش راكو تشوفو في فيلم؟ سكتنا عليها.. قالتلنا شوفو ديك لاطاي لي عندنا ماشي كيما حنا.. قلتلها و حبيتيها تكون بقرة؟ نطق صراع قالنا اشششت خليونا نسمعو.. قعدت تتفرج معانا منبعد ريحت قدام صراع و حطت راسها على كتفو قالتلو واقيل حكمتني الحمى بردت.. شاف فيها بنص عين و تبسم و كمل يشوف الفيلم.. تقلقت كي شفتها لاصقة فيه نضت و رحت للشومبرة شويا و لحقني قتلو علاش ما قعدتش باش تدفي البردانة؟ قالي هي دفي روحها انا نعست نصبح خدام.. غلقت الشومبرة بالمفتاح و حطيتو تحت مخدتي و رقدت عليه.. قالي لوكان عيني فيها نروحلها و ما نستناش منك الأوكي، هادي يسموها قلة ثقة.. قتلو أنا عاجبني الحال هكدا..قالي و على المجنون حتى يعقل..