مراهقة والاربعيني بلهجة جزائرية

60

#المراهقة و الأربعيني:

#الجزء60:

[ لبنات هنا صراع لي راهو يحكي كيفاش حتى جاب والديه للدار و معاهم إخلاص و والديها....]
قال صراع: رحت لعند هيام سقسيتها قلتلها ما هدرتيش مع يما؟ قالتلي و الله يا أبو حرب يما ما علاباليش وش بيها شايدة في كلمة وحدة تقول لازم يتزوج و نشوف ولادو و بنت عمو أولى بيه.. خلات الدنيا كامل و راحت لإخلاص بصح و الله غير تصيب هادي لي ما تسواش كاش ما دارتلها.. قلتلها كيفاش محسوب؟ قالتلي شوف خويا راني ببناتي بصح إخلاص و خياتها تع ڨري ڨري.. قلتلها لا سحور لا والو دارو لعبها و عرفوا كيفاش يخيطوها على راسي.. واحد ما راهو علمني فيهم من غير يما.. قالتلي و الله العظيم ياراجلي من عمايلهم كان ما يشوفش في وجهي و دايرينو كي الخاتم في صباعتيهم يدورو فيه كيما يحبو.. قلتلها أنا حكايات السحور و هاد التخربيشين ما علاباليش كامل بيهم دوك قوليلي الحل كيفاش؟ يما ما حبتش ترفد عليا التلفون و بابا أنا أصلا ما نشوفش في وجهو على الهدة لي دارهالي و عمومي رايحين جايين عليا و عمي عزام يعيطلي فالتلفون و يقولي أنت الخير و البركة و أنت زينة الرجال عندنا حط بنت عمك تحتك و استرها وراضي أهلك.. و عمي صالح هبل كيفاش رافض بنتو.. قالتلي تزوجها.. قلتلها راكي منيتك أنا نتزوج مع إخلاص؟!! و الله ما نحملش حتى نشوف في فيڨورتها خصني غير نزيد نجيبها لداري إلا إدا راهي حايبا ندفنها و نساميها لختها هديك حاجة أخرى.. قالتلي خويا ماراك لا أول و لا أخر واحد يتزوج.. حنا هادي عاداتنا و تقاليدنا و رجالنا كامل دايين زوج نسا.. و لوكان ما تتزوجهاش العيب يلصق فيك أنت ماشي هي لخطر بنت عمك و ترجع عليك.. قلتلها هاد الشي لي راهو قاتلني راني حاس روحي مربوط ما قدرت ندير والو.. داري في كفة و أهلي و عشيرتي في كفة أخرى.. قالتلي تزوجها خليها عندك شهور و طلقها علاش راك حارق روحك بهاد النار؟ قلتلها و المهبولة لي في داري علبالك تموت...ضحكت قالتلي همك ليليان... قلتلها أم علي يمال كي نقول داري راني نقصد الحيوط؟! أنا ديجا راني رايح معاها غير بلعقل باش نرتاح و بالسيف باش راني مسيطر على عقلها لوكان نتزوج وش يصرالها.. قالتلي تتقنط صح بصح رايحو تتفهم كي نشوفك صح ماشي حايب إخلاص.. قلتلها راهي جايا في بالي نهرب بيها للأردن و الله ينعلني إدا خزرت مورايا ما نحتاج لا أهل لا عشيرة.. قالتلي لالا خويا الواحد ما عندوش من غير أهلو و عشيرتو لوكان تروح و يما شكون بيها؟ قلتلها ااااااخ أنا واحد ما راهو كاسر ظهري من غير يما و الله غير كرهت روحي راني مربوط ما عرفتش كيفاش نتصرف عمري ما نحطيط في موقف كيما هدا.. أنا نجيب إخلاص لداري؟! نحات قدامي لا حشمة لا حيا و ما دارت كار لا للجنازة و لا للفضيحة وصلت لدرجة مارجع يهمها والو المهم دير فضيحة معايا باش نسترها عفتها.. ليليان صغيرة و كنت كي نحكم يدها و أنا راجلها نحسها ترجف و مانفيقش حتى يجيني الكف من الحشمة ديالها و تهرب مني، و أنا راجل بشلاغمي و بداني الشيب ما تخممش غير تستر روحها.. و دوك بعدما ربي عطاني طفلة كيما هادي نجيب عليها وحدة كيما إخلاص؟! قالتلي فترة و طلقها علاش رايح تقعد معاها طول عمرك؟ هي ما بيها والو حبت تتهنى من كلمة بايرة رايحة تدخل ال40 و ما تزوجتش، دير في بالك مام تتزوجها منبعد طلقها ما يهمهاش تفضل تقول للناس ماكانش مليح معايا و طلقني و ما تقولهمش بايرة و واحد ما حب يقبلني.. قلتلها شوفي أم علي تروحي لإخلاص تقوليلها راهو يقولك أبو حرب ياريت تحبسي هاد الحكاية من عندك و ما تحطينيش في موقف محرج مع عمومي أنا ما نقدرش نبهدلها و هي مرا بصح لوكان تكتب و جي لعندي ما تظنش بلي رايح نرحمها ولا نديرها زوجة و نرضى بيها.. تقعد خدامة في داري و ادا رضات باش تذل روحها لهاد المستوى دبر راسها المهم نتهنى من ذنبها علاش حتى نتزوجها باش نهجرها و نظلمها منبعد؟ من دوك نتفاهمو باش ما نكونش ظالم قدام ربي سبحانو لوكان تتقدر.. يلا هيام البسي دوك و خليني نوصلك في طريقي....
[لبنات هنا هيام لي راهي تحكي وش صرا كي راحت لاخلاص....]
قالت هيام: داني صراع و رحنا لدار عمي صالح، قالي أنا عندي شغل خلاني و راح.. دخلت صبت أم سعد عندهم قلت في قلبي هادي ساس البلا و المصايب، استقبلوني و حطولي لاتاي و أنا بلخف جبدت السوجي ما حبيتش نطول و نكعرر.. قلتلها شوفي إخلاص رايحة نهدر قدام يماك و خياتك شاهدين.. أنا بعثني أبو حرب ليك قالك حبسي الحكاية من عندك و ارفضي لخطر مارانيش حايب نوصل نكسرك قدام العشيرة و تتفضحي و نكون سبة باش نوقف في مكتوبك بصح لوكان تكتب انساي باش نديرك زوجة.. يمال ارفضي أنت و حبسي علينا هاد الحكاية علاش حتى نتزوجك و نهجرك و نبان ظالم مانيش حايبك افهمي.. قالتلي إخلاص قوليلو ما نحتاج من عندك والو من غير يحط اسمي قدام اسمو فليفري و يسترني و راضية باش نكون خدامة في دارو ليه و ليماه.. قلتلها بصح إخلاص ما راهوش حايبك و تعرفي رايو فيك مليح.. قالتلي ما يهمكش انت برك وصليلو كلامي.. حرت في جدها هادي مرخسة بروحها لهاد الدرجة؟!! رفدت التلفون و عيطت لصراع حكيتلو قالي راني جاي.. شويا هكدا و دخل ما قعدش وقف فالباب قال راني مزروب باش نروح للدار خليت مرتي وحدها.. شوفي عمتي أم بندر و إخلاص و كامل لي راكم حاضرين هنايا.. انا سبق و ديت من عندكم مرا و عرفتو اسلوبي مع النسا كيفاش داير و كنت نحاوزها و ترجعوها حتى ديتها لبلاصة وين ما ترجعش و زيد وجدان كانت تربطني بيها حلا على هديك كنت نتنازل على جالها بصح إخلاص ما يربطني بيها والو.. نضرب، هجر و لا ندير وش ندير واحد ما عندو الحق يحاسبني.. نتوما راكم مضحيين بوحدوخرا من بناتكم و حايبين نساميها لختها؟! قالتلو يماها يا وليدي الهدرة ماشي هكدا حنا نعرفوك راجل و فحل و هي بنت عمك ماراهي حايبا والو من غير تسترها الناس كلاتها بالهدرة علاش ما تزوجتش و أنت وليد عمها واجبك تسترها و هي راهي قدامك تحلف مادخل روحها لا في عايلتك ولا في مرتك.. نطقت إخلاص قالتلو والله ما نقرب من ليليان ولا نحتك بيها و راضية تخليني تحت يد الحاجة يماك حاجة مانحتاج والو ناكل اللقمة في دارك و نسكت و الله ما نضرك بحاجة....
[ دوك صراع لي يكمل يحكي...]
قال صراع حرت وش نزيد نقول هزيت راسي و قلت لهيام يلا أم علي خليني نوصلك لدارك راني مزروب.. ديتها و خرجت وصلتها لدار سعد و قعدت معاهم قلتلهم راني رايح نتزوجها بصح ليليان ردوا بالكم تعرف حتى نهار العرس.. هي رايحة تعرف تعرف بصح مانيش حايب نقهرها يامات من قبل علاش حتى نزيد عليها الهم.. قالتلو الحاجة أنا نحوس نشوف ولادك برك.. قلتلها باش نجيب ولاد من إخلاص انسايها لوكان تبقى غير هي مرا في هاد الدنيا حدي معايا ليلة عرسها و موراها تبقى خدامة عندك ما نحتاجهاش و يكون في علمكم كيما راكم هاد الزواج عندو وقت و يخلاص بلاما نقولكم وش رايح ندير..
غدوا منداك عيطولي من الخدمة قالولي بنت عمك راهي عندنا و الشيخ راهو فالدار.. قلت لنائل يوصي نور باش ما توصلش الكلام لليليان و لوكان تسمع نقلب الدنيا عليكم.. كامل وافقوا المهم يكملو حكاية الزواج.. قرينا الفاتحة و داو إخلاص و راحو كامل لداري...
[ هنا ليليان لي تكمل تحكي....]
قالت ليليان كي دخلو حسيتهم ماكانوش على طبيعتهم و لي استغربتها صراع كان مقنوط في عوض ما يفرح كي رجعوا أهلو.. سقينا الماكلة و قعدت قدامو سقسيتو قتلو وشبيك مما راكش في حوالك.. قالي ما بيني والو برك عيان و متوحشك نكملو و نطلعو لفوق.. قتلو و أهلك؟ قالي ما عندك حتى علاقة بيهم خلينا نرتاحو لفوق..
كملنا الغدا جيت نرفد الطبسي من قدام صراع حبت تسبقني إخلاص قلتلها خلي خالتي أنا نرفد.. تقلقت و نسفت رفداتو و راحت للكوزينة و صراع تبسم كي قلتلها خالتي و قالي اغسلي يديك و الحقيني راني عيان بزاف خلينا نرتاحو لفوق.. قتلو إيه إن شاء الله... 
[ هنا نور تحكي وش صرا فالكوزينة...]
قالت نور: دخلت إخلاص للكوزينة قالتلي خبي هاد الحوت ما تخليهش هنايا ماشي مليح... قلتلها حنا نعرفو شغلنا انت اخرجي من الكوزينة و ما تدخليش ليها مهما يكون راكي ضيفة.. قالتلي واقيل آمنتي روحك حنونة.. هاد الدار دار راجلي يعني داري أنا و ديري حسابك كيما خليتو يتزوجني نخليه يخرجكم كيما راكم حتى هديك المصفارة تروح معاكم.. قلتلها بلعقل عليك حنونة راهو لهيه و دوك نروح نقولو مادام مازالنا فالبداية.. قالتي إيه غير روحي.. دخلت ليليان سكتنا.. قالتلنا وش كاين؟ قالتلها إخلاص ما كاين والو حبيبتي... 
[هنا ليليان لي تكمل تحكي.....]
قالت ليليان: قلت لنور.. نور راني طالعة لفوق صراع ما علاباليش وشبيه عيان و مقنوط، كملي أنت الشغل و أنا نطلع ليه هو قالي.. قالتلي روحي حنونة ربي يكون معاه هاد الراجل كل حكاية مافيهاش الخير طيح على راسو.. الدار دارك كيما يقول صراع تقعدي هنا و لا تطلعي لفوق واحد ما يحكم فيك... استغربت من كلامنا بهاد الطريقة و هي لي كل مرة نقول راني طالعة تتقلق و دوك تقولي الدار دارك.. خليتهم و طلعت للشومبرة صبت صراع يبدل في حوايجو قتلو هادي لي ما تستحيش بوجهها و تعاود جي بعدما حاوزتها؟ ما عندهاش كرامة! قالي تسمعي بهداك لي يقول ما عنديش شغل فالسوق جيت برك نشوف؟ قتلو قصدك جات تشوفك أنت.. تكسل فوق البونك و فتحلي يديه رحت لحضنو قالي شوفي عمري.. إخلاص وحدة قلبها و نفسها موسخين.. عينها كانت عليا ملي كانت ختها عايشة.. قتلو راك منيتك؟! يعني كانت ختها في رقبتك و هي تحبك؟! قالي إيه و الله.. ما كانتش تقرب ليا و لا تهدر وش في قلبها بصح كي كنت ساكن وحدي مع ختها كانت جي تقعد معانا بليامات و ما تنحيش عينيها عليا حتى وليت نديرونجا كي جي و ما نقدرش ناخد راحتي في داري و مع عايلتي.. كانت تعسني مع ختها في أدق التفاصيل و وحد الخطرة كنت مداوس مع وجدان و ما نتهادروش و هي جات لعندنا.. كانت تبعثلي وجدان معاها كلام و أنا نردلها معاها يعني كانت وسيط منبعد قالتلي بعظمة لسانها وجدان ما تستهلكش.. مع لول كنت نحطلها الأعذار و قلت بالاك مازالها صغيرة و طايشىة ما نبرونشيلهاش منبعد قلت لوجدان اختك إخلاص ما نرتاحلهاش ما نحبهاش تزيد جي هنا مانيش نقدر ناخد راحتي و هي زعفت و دارت حالة قالتلي كيفاش تحاوز ختي و تهدر عليها هكدا و كان هيام لي جات تحاوزها؟ المهم دخلنا في متاهة وصلت بيها حتى تبيعلي على وجدان وش دير باش نداوس معاها.. قتلو ما تزدنيش!! قالو و الله العلي العظيم غير كيما راني نحكيلك.. قتلو وعلاش ما كنتش تفضحها؟ قالي ليليان حنا عايشين في مجتمع عشائري و الفضيحة فالعشيرة و الطفلة لوكان تتوسخ سمعتها ماشي حاجة ساهلة عندنا.. كنت نحاول ننصحها بصح هي كانت كلما تزيد.. قتلو وعلاش ما تزوجتهاش كي توفات ختها.. قالي أنا وجدان ماكنتش حاملها حبيتيني نحمل إخلاص؟ بصح على جال ولادي كنت راح نتزوجها و كي جيتي أنت لغينا حكايتها.. قتلو يعني عنست على جالك و هي تستنى فيك.. قالي تقدر تقولي هكدا.. قتلو ايماجيني لوكان تتزوجها وش رايح يصرا فيا.. قالي لوكان تزوجتها وش يصرالك؟ قتلو وشنو هاد الكلام صراع و الله غير نهبل نحط رصاصة في راسك و لوخرا في راسي.. قالي و هي تعيش؟ قتلو أصلا الدنيا قعدت غير لهاد الكاليتي الموسخ... حضنتو و زيرتو لعندي قتلو راك منيتك أنا نخليك لغيري؟ أنت ليا وحدي أنا و برك فهمت.. حكم يدي حطها على قلبو و قالي هدا ما يحب حتى وحدة من غيرك و غير أنت لي راكي مربعة فيه مستحيل نقارن وحدة بيك... أنا وياك ماشي غير راجل و مرتو.. مرات نحس بشعور الأبوة معاك و نصيب روحي نخاف عليك تقول بنتي، و مرات نهيم بيك و ننسى الناس و الدنيا و نشوفك قدامي المرا لي يعشقها قلبي بكامل جوارحو، و مرات نعيا و نولي ما بين يديك كي الطفل لي يحوس على يماه و نبقى حاضنك و خايف اللحظة لي تنوضي فيها من قدامي و أنا راقد على هديك مين داك نقفز و نقولك ارجعي... الشي لي ما بيناتنا أكبر من الزواج... 
صراع كي يكون يهدر هكدا نفرح بزاف، نحس كلامو دوا على الجرح و نحبو كثر لخطر ما نحسوش يكدب، كي نحط راسي على صدرو و هو يهدر قلبو يبدا يخبط بطريقة عجيبة تشرحلي كامل أحاسيسو، نعشق أنفاسو مابين يديا نحس فيها لهفة و حب كبير.. أول دقة قلب كانت ليه، أول احساس حب في حياتي كان معاه، اول بوسة و احساسي كأنثى كان مابين يديه، يآذيني بصح ماكاش واحد يقدر يداويني من غيرو لخطر هو الجرح و هو الدوا، حتى كي نتقلق و نزعف و نتقنط و نولي نغلي لوكان الناس كامل يتلايمو يهدنو فيا ما يقدروش بصح بكلمة منو ننسى و نسامح...
جازت يمات واحد فالدار ما غلط معايا بكلمة ولا جاست كانوا يتجنبوا فيا بطريقة ماشي طبيعية مام نقصر و نرقد حتى لمور الظهر واحد ما حاسبني
من جيهة فرحت كي تسڨمو معايا و رجعت نعاملهم بشكل طبيعي قلت الحمد لله ياربي تهنيت من المشاكل بصح من جيهة أخرى كان عندي احساس يقولي بلي كاينة حاجة بصح ما عرفتهاش.. سورتو عينين صراع فيها هدرة.. نفس النظرة تع الشفقة لي شفتها فيهم نهار توفات ماما و ما قدرش يقولي و هاد الشي لي خوفني.. مرات نحسو رايح يهدر منبعد يقعد يخزر فيا زمان و الكلام واقف في حلقو ما يقدرش يخرجو و كي نسقسيه نقول وش كاين؟ يجاوبني بتبسيمة تضيع فيها كامل نظراتو يقول والو برك نحبك.. و أنا ننسى كلشي في هديك اللحظة و نحضنو لخطر مطمنة معاه ما يحتاجش باش نعمر راسي...
كنت داخلة للشومبرة شفتو يحسب فالدراهم حطهم بجيه و زادت حسب وحدوخرين.. جبدت لولانيين حسبتهم قالي شحال هدوك في في يدك قتلو مليون.. قالي وهدا مليون.. قتلو ليمن؟ قالي خبي الباقي فالخزنة و خلي المفتاح عندك.. خبيتهم و حبطت موراه مد ال
راهم قدامي لأم سعد و قاللها وصليهم للجماعة.. قتل. وشمن جماعة؟ قالي وحد الناس شريت عليهم كبش رايح ندير وليمة نهار الجمعة على روح حرب و خاوتي الله يرحمهم... قتلو تان عرضة وحدوخرا؟ و الله ماراني قادرة.. خزر فيها و سكت.. هز راسو و جبد تلفونو يقلب فيه.. قعدت قدامو قتلو صراع حقا اشريلي تلفون كرهت نفتح اللابتوب ولا نستناك حتى جي باش تعطيني ديالك، نحتاج تلفون.. خزر فيا بنص عين و قالي نشريلك واحد باش تهربي؟ قتلو وعلاش نهرب كاش ماكاين بيناتنا باش نهرب، حبيت نلعب بيه.. قالي يعني لوكان كاش ما يصرا ما بيناتنا معولة تهربي؟ ضحكت و قتلو وعلاش لالا؟ قالي نكسرلك رجليك لوكان تزيدي تخرجي و تخليني... قتلو ما نخليكش بصح حبيت تلفون.. قالي ماشي دوك حتى نشوفك استعقلتي.. قتلو استعقلت وشبيك.. خلاني و رفد تلفونو و مفاتح طونوبيلتو و خرج.. قعد نتبع فيه بعينيا و هو يمشي فالڨاراج و قلت ربي يخليه ليا...
غدوا منداك عيطلي فالتلفون تع الحاجة و هو فالخدمة.. هدرت معاه قالي عمري وجدي روحك باش نجي نديك نحوسو شويا برا.. قتلو نحوسو؟ قالي وشنو ماراكيش حايبا تخرجي؟ قتلو لالا بصح كي ترجع تريح شويا منبعد نخرجو.. قالي لالا ندخل برك نحي الميليتار و نلبس سيفيل و نخرجو هكدا؟ قتلو أوكي..
وجدتلو حوايج. و لبست.. جا دوش و بدل حوايجو بلخف و خرجنا.. استغربت قتلو علاش خارجين مع الظهر نحوسو وشنو هاد الحكاية؟ قالي ماراكيش حايبا نحوسو؟ قتلو لالا بصح حسيت حايب تخرجني من الدار بالسيف تقول هاربين.. قالي علاش حسيتي هكدا؟ قتلو ما علاباليش... جبد يدي باسها و قالي نكمل الوليمة و ندي يمات نطلعو لتركيا كيما فالعيد وش رايك؟ قتلو قول والله... قالي والله.. نريحو لتم شفتك عجبك الحال لتم المرة لي فاتت.. قتلو إيه تركيا هايلة إيه تعيش الله يخليك نزيدو نروحو.. قالي شحال قعد للعيد؟ قتلو ما علباليش.. قالي وحد 15يوم هكداك.. ندي يمات و نروحو كيف كيف نريحو سمانة و نتهناو من هاد الفواڨر... ضحكت قتلو ههههه وشمن فواڨر قصدك أم سعد؟ قالي كامل كرهتهم و الله لوكان ماشي حرام و عيب لوكان تبريت منهم.. ضحكت..
قعدنا ندورو بالطونوبيل وهو مشعل ناظم الغزالي (سمراء من قوم عيسى ) بصح هو يقول شقراء ماشي سمراء ههههه...
صونا تلفونو نقص الصوت و رفد قال واش مازالكم.. ايه.. لالا رانا ندورو.. إيه بعقلكم حنا فالليل نرجعو.. يلا مع السلامة.. قتلو شكون؟ قالي نائل.. قتلو وش كاين؟ قالي مطلع الشومبرة لفوق عطيتها لولادو و راهو يرتب فيها.. قتلو اااا.. إيه مساكن كسروا كامل الشومبرة و حنا ما نحتاجوهاش.. سكت و كمل يسوق و هو ساكت.. حبطني فالسوق قعدنا نشوفو و نشريو.. دخلنا للريسطورو كلينا منبعد رحنا لدار هيام دخلنا و هو سقساها بحواجبو هاااا؟ و هي واجباتو اقعدو جوزو لداخل...
ما فهمتش النظرات لي كانت ما بيناتهم.. قعدنا نڨصرو بصح حسيتهم مفرفشين و متوترين ما عرفتش من واش.. قتلو صراع نعست بزاف هداك هو نروحو للدار.. قالي برك نكمل هاد الڨارو.. ما سنيتوش حطيت المخدة و رقدت شويا هكدا نوضني باش نروحو كانت الطناش تع الليل هكداك.. كامل راقدين و أنا كملت رقادي فالطونوبيل.. كي وصلنا رفدني و دخل بيا للدار و طلعني للشومبرة.. حسيت بيه كي كان رافدني قتلو حبطني.. قالي يعجبني الحال كي نرفدك و ندللك.. خبيت وجهي في صدرو و تبسمت و أنا مغمضة عينيا.. حطني فوق البونك و قعد معايا يدلل و يحضن و يبوس تقول عروسة ما بين يديه...
غدوا منداك جا من الخدمة بدل و ما حبش يحبط حكمني معاه فالشومبرة قالي ما نشبعش منك و مانيش حايب نشوف غيرك.. و صح حسيتو ملي رجعو أهلو ما قعدش كيما كان يحب يريح و يڨصر معاهم.. رجع يفيتيهم و كامل وقتو يجوزو يا فالشومبرة معايا ولا يخرج برا..
حتى أنا ما مانعتش، ماكاش كيما كي يكون معايا و قريب ليا و مقابلني.. بالعكس وليت ندير كلشي باش حتى الخرجة و ما يخرجش و يبقى ليا و مقابلني وحدي...
عيطلو صاحبو خرج و أنا رحت دوشت و رجعت جبدت شعري و حطيت الماكياج قاعدة نشوف في وجهي فالمرايا و نخمم وش من ألوان يجيو مع حوايجي.. دقدقت نور فالباب و دخلت قالتلي ليليان.. قلتلها ارواحي نور خمي معايا وشمن لون ندير.. قالتلي خلي الماكياج عندي هدرة معاك.. قلتلها وش كاين؟ قالتي شوفي ليليان إدا كامل راهم مستغفلينك أنا ما نقدرش نخليك راقدة على ودنيك.. ما ننساش وقفتك معايا في مشكلتي.. قلتلها خير نور وش كاين قلقتيني علواش يستغفلوني؟ قالتلي عرس صراع غير غدوا.. خزرت فيا قلتلها وشبيك راكي تنومي؟ وشنو هاد الكلام؟ قالتلي و الله غير كيما راني نقولك و فالنهار لي جاب أهلو كان عقد على إخلاص... قاطعتها و أنا نصوغ قلتلها عقد عليهااااا....... وش راكي تهدري نوووور.. وليت نرجف ما أمنتش.. صونا تلفونها قالتلي اسمعي بودنك.. كانت إخلاص لي عيطت رفدت عليها قالتلها وش نور وين راهو راجلي راهو فالدار ولا خرج راني نعيطلو و ما يرفدش.. نحيت التلفون لنور و عيطت عليها قلتلها قح.... كيما أنت مرت راجلي... ينعل باباك لبابات لي جابك لكل واحد قابل بيك يا بنت ال........ كوبات بلخف في وجهي... عيطت لصراع و أنا نرجف و دموعي يطيحو وحدهم النار شعلت فيا.. رفد عليا غير قلت ألو عرف صوتي قالي ااا حبي قولي... قتلو ينعل باباك لبابات لي جابك لبابات عشيييييبرتك.. ياوحد ××××× يا بو النسيوااااات.. دوك جي للدار ليوم نقلب الدنيا فوق راااااااااسك تتزوج عليا يا سااااااااااقط ....
بديت نعيط على آخر صوتي و هو ساكت منبعد خبطت التلفون فالقاعة و نضت نبكي و نور واقفة تحلل فيا قالتلي تعيشي ما تقوليلوش أنا لي خبرتك و الله غير يذبحوني، الله يسترك ما تجبديش اسمي.. عيطت عليها قلتلها اخرجي علياااااا... اخطيييينييييي روووحيييي.. حاوزتها من الشومبرا و أنا نرجف و دموعي جرايا.. هاد الرخيس يستغفلني و يتزوج عليا و بديت نندب و نجبد في شعري و نصوغ.. نرفد فالدوزان و نرمي كسرت الدنيا.. النار شعلت فيا و السخانة طلعتلي للراس.. قعدت فالقاعة و نضرب فيها و نصوغ وين راك يا بااااابااااا ذبحونيييي.. عاودت دخلت نور تحلل فيا قالتلي تعيشي ليليان و الله ما قدرت نخبي عليك بصح ما تبيعينيش و الله غير نائل يذبحني.. وصاني و أنا ما حملتش يستغفلوك.. قلتلك أخطيني رايحااااا نمووووووت.. يقولي نحبك مع لخر يتزوج علياااااا... وشمن حب هدا صرااااااع....
نائل طبطب فالباب قالي ليليااااااان... قتلو مانيش حايبا نشوف حتى واحد فيكم يا رخااااااس.. علاش تآاااااذوني وش درتلكم.. كل مرة تآذوني و نسامح و مع لخر تساندوه باش يتزوج علياااااا..
هو يضرب فالباب باش نفتحلو و الحاج طلع قالو سمعت بينا كامل الناس صوتها راهو واصل لطرف الدنيا.. نضت و نور صفارت قالتلي ما تخرجيش.. طبعتها قلتلها وخري عليا.. خرجت للحاج و بديت نعيط قتلو تزوج رااااجلييي قعدت كي الشيفونة في يد أم سعد و تخطب لراااااجلي ما فيكش الخييييير... تهدد عليا و بدا يزيد فالكلام و نائل واقف ما بيناتنا قالو خليها بابا قلبها راهو محروق على زواج راجلها.. و الحاجة تعيط ملتحت قالتلي علاش انت أول وحدة يتزوج راجلها؟ قلبتي الدنيا نقصي صووووتك... درت للحاج قتلو روووووح لأم سعد... و نور حطت يدها على فمي و تجبد فيا... طلع صراع يجري جبدني لحضنو حط راسي على صدرو و زيرني ليه و دار للحاج قالو اذبحها.. عيط على نائل قالو احبطوووو.. أنا بديت نطبع فيه باش نبعدو عليا و نصوغ و نضرب فيه.. دخلني للشومبرة قتلو تتزوج عليا رخييييس... قالي تهدني منبعد نهدرو.. قتلو ما تهدرش معايا طلقنييي ما نبقاااااش هناااا.. قالي الشي لي حبيتيه نديرهولك برك تهدني و اقعدي..
قتلو ما نتهدن ما نقعدددددد.. دوك اطلقني مانزيدش دقيقة في دارك.. و رحت للخزانة نجبد فالحوايج و نرجف الطريق وليت ما نشوفهاش حتى حكمني الحريق فليسطوما من لينار.. وليت نضرب في روحي و نعيط و نجبد في شعري.. قعدت على ركايبي ما قدرتش نوقف رجليا فشلو قتلو علاش دير فيا هكدا صراااااع علاااااش... قالي وراس وليدي لي راهو تحت التراب غير مصيرها تتطلق.. قتلو وخر عليا كداااااب... قالي و الله ما راني نكدب عليك بصح تهدني و خليني نفهمك.. حكمتو من حوايجو و قتلو وش تفهمنيييي اااااه.. تتزوجها، تجيبها لهنا، تبدلتي بيها صرااااع علاش أنا وش درتلك علااااش.. قالي و غلاوة دموعك عندي غير حدي معاها ليلة العرس  و موراها تبقى خدامة لتحت، ما نبدلهاش حتى بصباطك.. قتلو و راك حايب تدنى ليهاااااا و تكسرني حبيتني نموووووت.. طلقنيييي ما نحتاجكش.. الله يخليك أخطيني عييت و الله غير عييت.. دخلت الحاجة قالتلي يا بنتي وش خداك قوليلي.. نضت و شفت في وجهها قلتلها هدا الشي كامل على جااااااالك... جيت نهدر حط صراع يدو على فمي و بدا يعيط قاللها يما اخرجي.. قالتلو سمعت بينا الدنيا وش نخرج.. قالها يمااااااا اخرجيييي.. بعدت عليه و بديت نصوغ و نائل واقف عند الباب و يعيط على نور و يداوس معاها كي قالتلي.. و أنا نصوغ على طول صوتي و نقولو طلقنيييي.. ارحمنيييي.. رحت نجري لابوبال تقييت فوادي من القهر.. و هو يعيط جيبو الماااااا... راحت تجري مور جابت طاس ما و هو يغسلي في وجهي عمري خرجت ما حملتش و تغاشيت ما بين يديه.. كي فتحت عينيا صبتو يرش بالريحة في يدو و يديرلي في نيفي و نور ترش فيا بالما.. غير فطنت حضني و نور خرجت.. بعدتو قتلو وخر عليا نكرهك و نكره ريحتك.. قالي و الله غير نعشقك و ما تبقى عندي.. قتلو علاش تكسرني و تتزوج مور ظهري؟ ما غضتك ما قلت وش راح يصرالها علاش تآذيني.. قالي ما قتلكش على جالك و الله.. علبالي آخرتها رايحة تعرفي علاش نخليك تتعذبي مدة من قبل.. كلما نجي نحكيلك نتخنق و ما نقدرش نخرج الكلمة و الله غير خفت من اللحظة لي تنهاري فيها قدامي ما نقدرش نتحملها.. قتلو طلقني.. قالي مستحيييل.. أنا ما نرضاش نطلقك بسبتها.. انت روحي في هاد الدنيا.. ما نسمحش في شعرة منك.. لوكان نخسرك نهبل.. قتلو علاش تزوجتها عليا؟ اخلاص؟! صراع علاش؟ قالي حكاية انهدرت فالديوان قدام الشيخ ريكان و الرجال ما نقدرش نكسرها.. ما تقوليش ما حاولتش و الله غير درت كامل وش نقدر عليه بصح عمي حاكم الناس و يقولهم صراع حب يكسر ببنتي و عمومو كلاولي راسي.. قتلو هي ما قدرتش تكسرها و أنا كسرتني عادي؟! قالي لالا ما كسرتكش انت متربعة هنا في قلبي ماكاش لي تدي بلاصتك و الله العظيم و اديها مني وعد غير مصيرها تتطلق.. قتلو مانيش حاملة نزيد نقعد هنايا حبيت نروح لعند خالي.. قالي ما نخليكش تروحي.. قتلو ما نقدرش ارحمني.. قالي شوفي جي و تعيش هنا و لوكان تشوفيني فضلتها عليك في هداك الوقت و الله لي تحبيها نديرهالك و نتحمل غلطتي.. قتلو راك في عقلك؟ ما نقدرش نتحمل تدخل لهنا حبيتني نهبل؟ راك حايب تقتلني انت.. قالي تعرفيني نحبها؟ واجبيني.. قتلو ما علاباليش اني راني حايبا نطلق.. قالي برك واجبيني تحسيني نحبها؟ رايح نديها على جالها هي؟ قتلو يمال علاش تزوجتها؟ قالي ما قدرتش.. اعتزلت الناس كامل وخليت اهلي زوج سمانات و غلقت راسي بصح هداك الحد كامل يهدرو عليا بلي بعت أهلي على جال مرتي.. قتلو امشي نروحو منا و نعيشو فالعاصمة.. قالي علاش انا ما خممتش نتهنى من كامل هاد التكعرير و نرتاح بصح و يما؟
قتلو تقعد عند الحاج.. قالي و الحاج ملوقتاش اهتم بيها؟ راكي مستنيا منو دوك يرفدها؟ ما عندها حتى واحد من غيري ما نقدرش نخلي يما هنا و هي ما تقبلش جي معايا.. قتلو و أنا راني نتحرق.. قالي و غلاوتك و غلاوة حرب الله يرحمو غير دموعك هادو نجيب حقهم بصح اصبريلي.. قتلو مانيش حايبا.. حايبا نعيش برك أخطيني.. سكت.. درت عليه جبدت الغطا و غطيت راسي و بديت نبكي و هوما مازاد هدر والو.. شعل ڨارو و قعد يتكيف عند راسي.. قعدت نخمم في كلامو منبعد تفكرت كي قالي حدي معاها ليلة العرس.. يتسمى ماراهوش حايبها.. تقعدت و درت ليه بلخف قتلو و لوكان ترفد منك ليلة العرس؟ حط الڨارو ديالو و قالي طفل من غيرك ما نحتاجش و ادا ما جبتيهش راني راضي بحكم الله و مانحتاجش الدراري.. قتلو و إدا رفدت منك؟ قالي راني نقولك مانيش حايب يخلاص حدي معاها كي نفض عذريتها و نخرج.. منبعد ما تسالني ما نسالها تبقى تخدم على يما.. و أنت ما عندك حتى علاقة لا بشغل الدار و لا بخدمة يما... مد يدو و رجعني قعدني فالفراش قالي تشفاي نهار قتلك رايح نخليك ملكة فوقهم و نخليهم يتمناو يعيشو في بلاصتك يالوكان نهار؟ قتلو بصح ما صراتش.. قالي لوكان ما صراتش.. ما كانش يصرا هاد الشي كامل.. أهلي و عمومي و عشيرتي كامل يعيطو و يقولو دات عقلو.. هاد الناس ما يحبوش يشوفو زوج متفاهمين، لازم يدخلو ما بيناتهم و يخربو، كل واحد خرب ما بيناتنا ماشي عاجبو الحال كي نحبك يتمنى معيشتك..يتمناو لبستك، ماكياجك، ذهبك، خرجاتك، و حتى الدار لي راكي قاعدة فيها، و مخليك هنا فوقهم الوقت لي تحبي تنوضي و تصيبي الماكلة واجدة ملبرا و الشي كامل لي تحبيه، و كي يتقلقو نوقف في وجوههم و نقول لي ما عجبوش الحال ربي يسهل عليه، وين ما يقعدو يقولو جابلها خدامة و ترقد حتى لنص نهار، حتى اقرب الناس ليا كرهوك على قد ما دللتك و دخلو في شحال من طريق باش يسرقو راحتك.. قتلو بصح أنا ما كنتش مرتاحة.. قالي علاش وش راهو خاصك؟ قتلو دايما أنا و ياك مداوسين.. قالي و شكون السبة؟ ماشي أنت؟ ياك كل مرة اما أنا نجوز المشاكل و أنت جي عندها و توقفي و تخلقيها منين ما تكون و هكداك و ما يعطينيش قلبي نخليك زعفانة و نجي نسلم على راسك حتى و تكوني أنت لي غالطة برك باش ما نشوفكش مقهورة.. قتلو بصح دوك راني نموت.. قالي شوفي الشي لي نقدر نقولهولك دوك هو أقسم بالله العلي العظيم غير إخلاص لي نطلقها و الوقت لي نطلقها الحاج و أم سعد يخرجو معاها من هاد الدار و هادا وعد مني و ترجع الدار هادي ليك وحدك.. العقل هو أنك تربح كلشي ماشي تخسر ولا تنهزم.. كنت نقول أهلي و من كثرة حبي ليهم ما حطيتش عقلي معاهم بصح بعد الضربة لي داروهالي و ما همتهمش سمعتي و وين ما يقعدوا يقولو صراع خو مرتو و فضلها على أهلو.. و الله يا لعبتهم الحقيرة لي داروهالي غير نردهالهم بالتالي و المتلي بصح بلعقل.. قتلو بصح كيفاش؟ قالي كيفاش هادي خليها عليا يقولك لي يزرب لخبزتو ياكلها محروقة ولا عجين.. المهم تسانديني و ما تخلينيش.. قتلو ما تقنعنيش بهاد الكلام.. انت رايح تتزوج و رايح تعاشرها ليلة ماخممتش وش رايح يصرالي.. حبيتني نموت و لا نهبل.. سكت.. عيطت عليه قتلو نكرهكككك.. و دورت وجهي عليه و نبكي بالشهقة.. بقى قدامي يمسحلي على شعري حتى جوايه ال11 غفيت.. حسيت بيه كي فتح الباب و خرج قفزت خفت يروح يعيطلها خزرت صبت تلفونو قدامي رميت الغطا و خرجت سمعتو يقول للحاج هدا أنا و هدا لي عندي، مرتي صغيرة و عقلها قدها لي حب يتحملها زين يا مليح و لي ما حبش هداك الشي شغلو.. وين نديها؟ كيما راني متحمل غيرها نتحملها، خلاص راني متزوج عليها و حبيتني نحاسبها؟ قالو يمال تقولي ما فيكش الخير و عادي؟! سكت عليه.. شفتو ملفوق خلاه و راح و الحاج دار لأم سعد قالتلو ما تسعاش التربية و لوكان وليدك جا مزيرها ما تلحقش تتجاوز حدودها معاك..
حبطت قدامهم دور الحاج وجهو عليا و هو يزيد فالكلام.. خليتو و خرجت، صبت صراع قاعد فالجنان حاط يديه فوق الطابلة و حاكم راسو.. قعدت نخزر فيه ما عطاني قلبي ندعي عليه ما قدرت نتقبل زواجو.. و شكون؟! إخلاص لي نكرهها فالدم تولي ضرتي؟ أنا كي جي ضيفة لوكان نصيب ناكلها كيفاش رايحة نحمل تعيش معايا في دار وحدة..
كنت دايمن نشوف أهلو و فاميلتو رجالهم متزوجين زوج حتى لثلاثة قليل وين تصيب واحد خادي وحدة برك و النسا عايشين عادي.. الضراير تقول حباب هوما في جيهتهم عندهم تعدد الزوجات سنة نبوية محببة و امر عادي حتى و يتزوج الراجل بربعة ما يهمهمش.. و يموتو على لمة العايلة و الضيفات و الولائم.. بصح عندنا لالا بابا كي كسر العادة و دخل فالاسلام و تزوج اأهلو و عمومو و عشيرتو كامل تبراو منو.. بصح على حساب الشوفة لي كاتبة على ماما كاتبة عليا، الراجل لي نحبوه يتزوج على جال الدراري و تحمل و تصبر على جال كي تحبو بصح أنا مستحيل نحمل ما نقدرش عندي عقلية تع ليا وحدي برك و لا ما نحتاجوش و ما نتحملش فكرة يجيب دراري من غيري ولا يشوف في وحدة من غيري..
أنا نطلع و نحبط و هو رفد راسو شافني واقفة نخزر فيه و دموعي على خدي، ناض من بلاصتو و جا لعندي جبدني لحضنو و مشاني معاه فالجنان.. قالي قتلك و الله ما نحبها و مصيرها الطلاق ما تبكيش.. قتلو مازال ما جاتش و بديت نخاف كي تخرج من الشومبرة وين تروح، يمال كيفاش نهار جي، راسي رايح يكلاطي من القهر ارحمني، قالي كوني هانية و الله ما نقلبها ما نحبهاش.. قتلو مانزيدش نآمنكش.. قالي ما تآمنيش بصح كي جي و تشوفي بعينك..
خليتو و طلعت للشومبرة تغطيت و بديت نبكي جا ساماني و أنا دموعي جرايا و عقلي يطلع و يحبط ما عرفتش كيفاش رايحة نستوعب الموقف زعما نقدر نتحمل؟
رقدت مع الصباح و ما فطنتش حتى ال15 تع لعشية.. جا هو من الخدمة رفعت راسي صبتو مطابس راسو يفتح فالرونجاس ديالو.. قتلو رحت ليها؟ قفز و خزر فيا قالي بسم الله الرحمن الرحيم.. وشبيك يا مخلوقة الله ليمن نروح؟ قتلو ما تلعبهاش مغندف.. قالي و الله ما رحت لبلاصة جيت قبالة من الخدمة لهنا.. قتلو طلقها.. قالي علاش هي جات باش نطلقها.. قتلو أنا ما نحملش و انت تحوس تقتلني... سكت و كمل يفتح فالخيط و نحاه.. نضت قتلو امشي وريلي شومبرتها.. قالي وش ديري بيها؟ قتلو حبيت نشوفها يلا.. قالي ريحي و استعقلي.. و راح للصالدوبا.. قعدت نحوس فالمفاتح حتى صبت مفتاح شومبرتها رحت فتحتها و قعدت نشوف فيها هي جابلها شومبرة عراقية يمال أنا علاش جابلي وحدة تركية؟ شويا و دخل مورايا قالي ما رتحتي حتى شفتيها.. سكتت عليه و بديت نمشي و نتفقد و قلت نحط لفعى هنا كي جي تموت و نتهنى منها.. قالي فكرة هايلة.. قتلو راك تتمسخر بيا.. تبسم و قرب ليا و هو يضحك قالي مادام الشومبرة جديدة وش رايك نجربوها؟ قتلو في منامك.. انت تان ما نزيدش نقلبك و ما نحبكش.. قرب مني كثر و قالي بصح أنا نحبك و راهي نافحتلي نستفتحها بيك.. قتلو وخر و بقيت نطبع فيه و هو يتبسم.. ما كانتش نافحتلي و ما كنتش حايبا بصح زكارة فيها تفاعلت معاه في شومبرتها.. كي كملنا و شفتو رقد نضت لبست و رحت نجري جبت التلفون ديالو و رجعت للوضعية لي كنت راقدة بيها معاه.. تكسلت قدامو و صورت شحال من سالفي  و ركزت باش تبان وحد التفاصيل و نبانو بلي رانا في شومبرتها..
قلبت على الكونت فايسبوك ديالها في تلفونو ماكاش.. علبالي بلي مسمية روحها (دمعة الاحزان) و دايرة صورة فيها وردة حمرة.. حوست ما خرجتليش، دخلت لي مبلوكيهم صبتها ديبلوكيتها و بعثتلها شحال من صورة و أنا مغطية وجهي بإيموجي بصح خليت شعري يبان واضح بلي أنا و كنت حاطا يدي على ظهرو و هو راقد و وجهو على المخدة.. و صورة فيها التاج تع الشومبرة باينة بلي ديالها و كتبتلها فيها ( مبروك شابة الشومبرة ) غير شفتها وصلوها عاودت بلوكيتها.. جيت نفاصي المحادثة طلع راسو فاصيتها بلخف قالي وش درتي؟ قتلو والو قالي وري نشوف.. ما حبيتش نحالي التلفون و شاف التصاور قالي وش درتي ليليان؟ حبطت من البونك.. قالي ارواحي لهنا وش درتي بهاد التصاور ليلياااان؟ قتلو ما درت والو.. سڨمت روحي و خرجت نجري و هو جا مورايا.. قالي ليليان لوكان نعرف كاش ما درتي ديڨا مورايا بهاد التصاور و الله واحد ما يسلكك مني.. راني نهدر معاك انطقي.. قتلو ما درت والو.. قالي ما تخربيش الدنيا بالطيش ديالك ياودي استعقلي عييت، هاد التصاور خاصة بزااف وش درتي بيهم؟ سكت بصح خفت كي شفتو زعف و قلبها سيريو.. خبط الباب و خرج مقلق.. مازال ما برد قلبي وش نديرلها هادي؟
هو دوش و عاود دخل ما هدرش معايا جا يخرج قتلو وين راك رايح؟ قالي راني خارج عندي شغل.. قتلو معاها ياك؟ قالي صباط كيما هديك نروح أنا لعندها، حكاية التصاور تحكيهالي و لا لالا.. و الله و نسمعها من غيرك ما نرحمك.. قتلو بعثتهم لإخلاص.. قالي راكي تهدري منك بالصح؟ قتلو إيه و الله باركتلها و قلتلها مبروك شابة الشومبرة.. قالي و تصاورنا خرجو يااااك؟ قتلو لالا برك انت و مغطي وجهك و أنا غير شعري يبان.. التصاور مازالهم عندك فالتلفون.. فتح التلفون و قالي ارواحي تشوفي وريلي شكون فيهم.. وريتهملو فشلو رجليه قعد فوق البونك و يزومي فيهم و يدقق قالي يا بابا من دوك رايحة تجلطيني و دوك كيفاش آخرتها معاك؟ قتلو ما راكش مجبور بيا خليني.. قالي وقتاش تستعقلي نتيا؟ قتلو علاش انت خليت عندي عقل؟ بزاف عليا اليوم حنتها و أنا قاعدة هنا.. هدرتها و بكيت.. قالي يا أم الديڨات دايرا ديڨا كثر من راسك و تزيدي تبكي؟ دوك هادي كيفاش رايح نرقعها غير قوليلي؟ سكتت عليه و قعدت نبكي بدا ينسف منبعد رفع يديه للسما و قال يااااربي اعطيني القوة و الصبر.. و خرج
قعدت في شومبرتي نخمم و نحسب و نتخيل فيها ما بين يديه نولي نشهق بالبكا..
فالليل دخلت هيام قعدت تعقل فيا قلتلها اخرجي عليا مام انت منافقة كيما هوما ما نزيدش نآمنكم و ما نحتاجكمش.. تقوليلي راني دايراتك كي بنتي و لا كي ختي و ديري فيا هكدا و تزوجي راجلي؟ بصح كامل سبقتو مصلحتو و ما همكمش وش رايح يصرا فياااا.. نهدر و نعيط و هي تهدن فيا بصح كلامها ما أثرش فيا شعرة خلاص دوك رايح يتزوج.. دورت راسي عليها بدات تحكيلي على الحنة قالتلي يودي ولات مضحكة مشعلة الغنا و تشطح بوحد الشطيح يبهدل بهديك لاطاي لي دايرا كي البناء الفوضوي.. ما أمنتش بلي دبرت راجل.. و كي لحق المغرب بدا تعيط كي المخلوعة.. قالت ياااا هدا أبو حرب بعثلي ميساج مسكين.. هي فتحت الميساج و هي هبلت قالتلي دوك تعيطي لخوك
قلتلها بلعقل عليك حنونة علواش نعيطلو؟ ياك قالك ما تحلميش باش نديرك زوجة و ادا على الشومبرة ياك شومبرتو و هو أحق    بيها و تصيبي ليليان كانت تلعب بالتلفون لخطر مخليه عندها و حبت تڨصر معاك.. قلتلها و صراع ما رفدلهاش؟ قالتلي لالا ما رفدلهاش بصح يماها عيطتلو و قالتلو الشي لي بعثاتو مرتك عيب.. قالها وش بعثت؟ ما علاباليش.. قالتلو بعثت أمور خاصة ما بينك و بينها في شومبرة إخلاص.. قالها عمتي من دوك نقولهالك حكايات النسا ما ندخلش روحي فيها.. خليتهم ياكلو في رواحتيهم...
قلتلها وش فايدة هاد الكلام غدوا تجي لهنا و تولي ضرتي و مرت راجلي.. قعدت تحكي معايا شويا منبعد خرجت و أنا قعدت نبكي و هو جا فالليل شافني قعد قدامي قتلو نوض مانيش حاملة نشوف في وجهك غدوا في هاد الوقت تولي مرتك.. جا يهدر نضت نصوغ قتلو مانيش حايبا نسمعك اخطيني الله يخليك اخطيينيييي.. قعدت ليل كامل نبكي و هو ما رقدت حتى لمور الفجر و أنا حبطت شربت زوج حبات كاشي قلت بالاك نرقد و ما نحسش لعرسو.. قعدت نبكي ساعة منبعد رقدت..