مراهقة والاربعيني بلهجة جزائرية

68

#المراهقة و الأربعيني:

#الجزء68: 

عندي صديقة كنت تعرفت عليها فالفايسبوك شكيتلها من ضرتي قالتلي الشي لي يصرا معاك اشكي لصراع بالتفصيل باش يكون على علم بكلشي و إدا شفتيه كره قوليلو أنا ماشي قصدي باش نعمرلك راسك بالمشاكل بصح شكون عندي في هاد الدنيا من غيرك باش نشكيلو.. مشيت بهاد الأسلوب حتى ولا يعيط للحاج و يوصيه عليا..
وحد المرة كنت ندوش و إخلاص كانت رايحة تكسر عليا الباب كي طولت لداخل و كي خرجت تزايدنا بالكلام حكمت البليغة و طاحت عليا بالضرب قالي الحاج لوكان نسمع بيك حكيتي لصراع نحكمك نجلدك.. أنا رفدت التلفون في هاديك الدقيقة عيطتلو و أنا نبكي و نشهق حكيتلو و صورتلو آثار الضرب و بعثتلو فالميسنجر، كي شاف التصاور هبل عيط سور بلاص للحاج قالو راني جاي غدوا ان شاء الله لوكان نصيب إخلاص فالدار نحط رصاصة في راسها.. و الحاج عيط لخو إخلاص جا داها لدارهم..
قعدت 3 سمانات في دارهم برد راسي منها و صراع رجع لخدمتو عادي كي رجع دايمن معايا زدت ارتحت كثر..
حلا جاها السطر تع الزيادة و صراع دار حالا هو لي جرا بيها للسبيطار ما تكلش على راجلها و كي زيدت و شاف حفيذو لولاني بكا من الفرحة.. رفدو باسو و أذنلو و سماه عبد الله..
وحد النهار الحاجة كانت راقدة و الرجال خرجو و نور راحت لدارهم و حلا كملت نفاسها و راحت لدار راجلها..
حبطت لتحت نتفاقد الدار سمعت الهدرة فالصالون عرفت بلي كاين ضياف، جا بندر خو إخلاص و هي كانت قاعدة معاه..
خرجت للڨاراج قعدت فالقاعة و حكمت تلفوني نكونكتي، كانت التاقة تع الصالو مفتوحة سمعت خوها يقولها بعت المورصو تع التراب باش نفتح مشروع بصح لوكان نمد لنائل الدراهم ما يقعدلي والو.. قالتلو إخلاص افتح المشروع ديالك و ماراحلك في حتى واحد و إدا سقساك على الدراهم قول تسلفتهم و المورصو تع التراب ما نباعش و زيد نائل يلعب بالملاين ما عندو ما خصو و أنا نهدرلك مع صراع يسمحلك فيه..
من كلامهم فهمت بلي الحكاية فيها دراهم نائل و حبوا يخرجوا عليه طريق و أنا علبالي بلي الخدمة عندو نقصت ماشي كيما بكري و زيد في رقبتو التوام و وليدو و نور حامل..
شويا و خرج خوها.. أنا دخلت للكوزينة و هي وصلاتو للباب و طلعت لشومبرتها..
دخل نائل ملبرا قبالة للكوزينة قالي ليليان الله يسترك إدا ما نشقيكش ديريلي حاجة ناكلها راني جيعان ميت باش نروح نجيب نور و الدراري من دارهم.. قتلو ماشي مشكل ريح دوك نسخلك.. أنا حطيت الماكلة فوق النار و هو انتبه للسنيوة لي جابتها إخلاص من الصالون كي كان خوها و حطتها فوق البوطاجي.. نطق قالي كاش ضياف؟ قتلو بندر خو إخلاص كان هنا جا يشوفها.. سكت و قعد يشوف في تلفونو و يستنى فالماكلة.. مع لول ترددت منبعد قتلو حقا نائل شحال تسال دراهم لبندر؟ عقد حواجبو مستغرب و قالي نسالو سبع ملاين بصح علاش؟! قتلو لالا هكداك برك سقسيتك شفتو طول ما رجعهملكش.. قالي كلما نقولو عليهم يقولي الأرض مازال ما نباعت أصبر ليوم غدوا و مازال ما بان والو.. قتلو شوف نائل تعرفني شحال نعزك و حاسباتك كي خويا الكبير.. قالي الله يعزك غير لخير.. قتلو خفت نقولك وحد الحاجة و تصرا مشاكل.. قالي خير اهدري ختي وش كاين؟!  حكيتلو كلشي قفز من بلاصتو و قالي صااااار هكدااا و خرج حاولت نحكمو بصح راح و خلاني و أنا قعدت نلوم في روحي وش داني نهدر..
شويا و شفتو دخل هو و صراع للصالون وليت نرجف.. عيطلي صراع رحت نجري صبتو يغلي و عينيه يخوفو قالي ارواحي تشوفي ليليان منين جبتي الكلام لي حكيتيه لنائل؟ قتلو و الله ما قصدي..... قاطعني قالي خليني من هاد الهدرة قوليلي الكلام هدا كاين منو ولا لالا.. قتلو إيه و الله جا مع العصر و سمعتهم يتفقوا و حكيتلو وش هدرو..
زاد عيط لإخلاص كي سقساها نكرت كلشي قالتلو هادي راهي تكدب أصلا ما جبدناش حكاية الدين راهي جيب وحدها من راسها و ناضت تعيط و تتحسب عليا عيط عليها سكتت.. منبعد دار لنائل قالو نوض معايا أبو فهد بربي إن شاء الله ليوم حقك نجيبهولك يالوكان يكون في فم السبع..
هوما خرجو و إخلاص ناضت ما خلاتليش و حبت تضربني لوكان ما دخلتش الحاجة على غفلة و تخبيت موراها.. عيطت علينا قالتنا عيب عليكم ما تستحوش صواتكم راهي واصلة لسابع جار.. حكيتلها كلشي ناضت تندب في حناكها قالتلي ليوم صراع يتضارب مع عمومو و قادر يوصلها للدم وعلاش يا ليليان.. قالتلي إخلاص إن شاء الله يحكمك كونسار نتهناو من شرك يا المسمومة حبيت يتقاتلو باش يبرد قلبك.. نضت نعيط عليها قلتلها لي ما في كرشو التبن ما يخاف من النار، لوكان ما سرقتوش هداك المسكين علاش حتى تخافي و تتحسبي عليا.. جات تتلاح فيا هربتلها لفوق..
دخل الحاج سمعتو يسقسي على ولادو حكاتلو الحاجة خرج يجري  حتى لليل جاو صراع يغلي و نائل وجهو صفر و إخلاص تخبات في شومبرتها خافت.. شويا و دخلت أم سعد و الحاجة نغزتني باش نحط العشا.. نضت للكوزينة جا نائل قال أنا نروح نجيب نور و الدراري طولت عليهم بزاف..
حطيت العشا فالهول و هوما كامل كانوا فالصالون نسمع في صراع يعيط و يقول لوكان ما نربيهمش ولاد ×××× ما نتسماش، نوريلهم كيفاش ياكلو حق نائل.. و الحاجة تهدن فالحالة.. قعد نتصنت عليهم حتى نطقت إخلاص ملفوق قالتلي ارتحتي دوك يا العقرب الصفرة يا الفتانة؟ طلعت راسي قلتلها ما نواجبكش نخاف نولي نشبهلك.. قالتلي تع وجهك يحبلك باش توصليني انت ريحي هكدا ق.... بلا أصل.. قلتلها لا يظن السفيه إلا ما فيه.. قالتلي شوفي فيا و اسمعيني مليح.. ديري في بالك بلي العد التنازلي ديالك في هاد الدار راهو بدا.. وجدي روحك لي جاي ما رايحش يعجبك و قولي إخلاص ما قالتش.. و راحت
طلعت لشومبرتي شويا و دخل صراع لعندي بدل حوايجي جا تكسل و قالي ارواحي تشوفي لهنا احكيلي وش سمعتي.. قعدت على طرف البونك من الخوف و قتلو و الله كيما حكيتلك و عاودتلو وش صرا كامل.. قالي و كيفاش تروحي تقولي لنائل ما خممتيش يروح يضارب معاهم و هو مريض بقلبو؟ لوكان كاش ما صرالو؟ ما قدرتيش تصبري حتى نجي للدار و تخبريني؟ قتلو هدا وش صرا دوك ما تبقاش تلوم فيا.. قالي لوقتاش نقعد نعلم فيك؟ يصرا وش يصرا فالدار جي ليا تخبريني و أنا ندبر راسي ولا مانيش معمرلك عينيك؟! تقلقت حتى دمعوا عينيا و تخنقت قتلو هادي لي قالك خيرا تعمل شرا تلقى.. أنا ماكانش قصدي نضر حتى واحد خفت ياكلو حقو.. تبسم جبدني لحضنو و باسني قالي ما تعمريش راسك بالكلام بصح عجبني هاد التصرف.. قلبك علينا و تخمي فينا؟ قتلو و أنا شكون عندي من غيركم، فتحت عينيا عليكم و لي نحبو فيكم يهمني سورتو أنت.. قالي تواعدني بلي المرة الجاية وش يصرا تخبريني ماشي تخليني آخر من يعلم؟ قتلو أنت تأمر.. بقينا في حضان بعضانا و رقدنا ما فطنتش حتى حسيت بباب الخزانة يتفتح كان صراع يجبد في حوايجو باش يبدل، رفعت راسي و قتلو نحبط نديرلك تفطر؟ قالي لالا ما كالاه مانيش قادر.. نضت وقفت مقابلاتو نغلق فالقفالي تع قمجتو و هو يخزر في عينيا قتلو صراع.. دارلي براسو وش كاين؟ قتلو لبارح قتلي ما تخبي عليا والو.. قالي وش مازال ما قلتيليش؟ قتلو لبارح إخلاص شبعتني سبان و حبت تضربني و أنا سكتت إحتراما ليك.. شاف فيا و قالي إختراما ليا ولا خفتي منها؟ قتلو في زوج.. قالي ما تعمريش راسك بيها.. قتلو و كي كنت انت تعيط فالصالون هي هددتني و حكيتلو وش قالتلي.. قالي ساهل أنا ندبر راسي كي نجي بصح ما تخرجيش من شومبرتك و ما توري وجهك لحتى واحد دوك راهم دايرين بلي صرا المشكل بسبتك.. هو خرج و أنا عزلت روحي في شومبرتي كيما وصاني..
جازت سمانة و المشكل ما فراش حتى دخل فيها عمهم الكبير عزام قالهم اعطيو مهلة لهاد الكداب تع بندر و كي تخلاص إدا ما رجعش الدراهم لنائل أنا ندبر راسي معاه..
جازت يمات كل يوم سهرات مع ولاد عمومهم في دارنا كي العادة، كانوا كامل يجيو من غير خاوة إخلاص ماولاوش يجيو معاهم ملي صرا المشكل تع الدين..
في هدوك ليامات كانت الحاجة مرضت و طاحت فراش و الناس يجيو يطلو عليها، كنت قاعدة معاها دخلت إخلاص قالت راهي جات خالتي أم سليمان نضت بلخف سلمت عليها و رحت للكوزينة نوجد لاتاي و المعمول..
نائل كان خارج من الدار لخطر كان حاط طونوبيلتو للبيع و جاه مشتري كان مزروب قال لوليد عمو سليمان ادخل للصالون شويا و نولي..
انا رحت حطيت السنيوة لأم سليمان و رجعت للكوزينة صبت إخلاص واقفة عند التاقة و كل على الڨاراج.. جيت باش نوجد سنيوة وحدوخرا للرجال قالتلي إخلاص سليمان راح و صراع جا راهو فالصالون وجديلو غير ليه و اديلو.. شويا و قالتلي اعطيلي الشال ديالك نروح نسلم على خويا ما يقدرش يدخل.. عطيتهولها و كي الحابسة سڨمت شعري و دخلت بالسنيوة للصالون على أساس ندي لصراع مع لي حطيت رجلي لداخل تغلقت الباب مورايا و صبت غير سليمان وحدو تشوكيت و هو حط راسو بلخف، رحت نجري نجبد فالباب ما حبش ينفتح واحد كان حاكم ملبرا حتى دخلت أم سعد و الراجل جا خارج قالتلي يالي ما تستحيش داخلة على الراجل هكدا تغوي فيه بصح هادي هي لي يجيب بنات الشارع لدارو و تعيط و تقول ارواح تشوف مرتك يا أبو حرب كيفاش داخلة تغوي فالراجل.. أنا قطرة دم ما قعدت في وجهي و سليمان قالها خليلي الطريق عيب و إخلاص واقفة برا مربعة يديها و تضحك.. جات الحاجة و أم سليمان و أنا خرجت نجري رحت قبالة لشومبرة الحاجة تبهدلت قعدت نبكي و نرجف طحت في موقف صعيب.. و نسمع فيهم يتعايطو.. أم سعد قالت شفتهم بعيني لوكان ما دخلتش عليهم على غفلة ما نعرف وش كانو رايحين يديرو.. و الحاجة تسكت فيها و أم سليمان ما خلات ما بقات.. شويا و دخلت لعندي الحاجة قالتلي وش دخلك لعند الراجل يا المخبوطة انطقي.. بديت نبكي و نخلف قلتلها والله غير إخلاص لي ورطتني.. قالتلي ما تعرفيش تقوليلها ما نقدرش نحي الخمار و الضياف داخلين خارجين؟! وش يسلكك من صراع ليوم يجي يقلب الدنيا على ريسانا وين نخبيك؟ و أنا غير نبكي قالتلي أسكتي بنتي ما تبكيش ادعي لربي يخرج ذنوبك فيهم..
ساعة منبعد جا الحاج و نائل قال وين راهم دار عمي راحو؟ واحد ما واجبو.. شويا و دخل صراع و أنا قلبي طاح.. سمعت أم سعد تقول ليوم صرات حكاية ما ينسكتش عليها.. قالها الحاج وش كاين؟ قالتلو أم سليمان جات تطل على الحاطة و وليدها الشريف الصاين للعرض بقى قاعد فالصالون.. قالها صراع إيه منبعد وش فيها؟ سليمان ملوقتاش رجع براوي؟! قالو نائل ياخاه عليه طاحلي شغل قتلو ادخل دوك نولي و نسيتو..
قالتلو أم سعد شوف أبو حرب أنا كي يتعلق الأمر بالعرض ما نقدرش نسكت، راني ببناتي و شفت بعيني واحد ما حكالي، دخلت للصالون و شفت ليليان و سليمان وحدهم فالصالون و غالقين الباب على رواحتيهم و يماك و يماه و إخلاص راهم شاهدين.. أنا ما قدرتش نخلي الماء يمشي من تحت رجليك و لحقت حتى حاوزتهم.. تعالات الاصوات صراع يقول وين راهي ليليان و الحاج يقول ليوم نذبحها و نائل يهدن فالحالة و الحاجة تقولهم افهموا الحكاية منبعد احكموا.. صراع كان يغلي عينيه ولاو حمورا و عروق رقبتو يبانو قالها جوستوما راني حايب نفهم ماشي أنا لي مرتي يطعنوا فيها.. قعد و يهز في رجلو  خزر فيا و قالي ليلياااان ارواحي لهنا فهميني وش صرا.. قربت ليه و أنا نرجف و دموعي يجريو ما قدرتش حتى ننطق من الخوف منبعد درت كوراج قتلو قبل ما نحكيلك نحلفلك و الله العلي العظيم.. ورحمة بابا تحت التراب و راس ماما لي انقطع و ما شفتها غير ماشي كامل وش حكاولك.. قالتلي إخلاص هادي لي قالك قالو للسراق احلف قال جاني الفرج.. رفد السوندريي تع الدخان و خبطها بيها عيط عليها ما خلالهاش بالسبان منبعد قالها ارواحي لهنا اقعدي قدامي تشوفي .. قتلو و الله غير هي لي ورطتني و حكيتلو كلشي.. قالي الحاج وشنو هاد الفيلم ياك الصالون فيه زوج بيبان علاش ما خرجتيش من الباب الثاني مادام شفتي الوضع ماشي مناسب.. عيط عليه صراع قالو بابا يرحم والديك خلاااااص.. و دار ليا قالي روحي ليليان من قدامي غاولي اطلعي لفوق.. تفاجأت يعني صدقني؟! خليتهم مصدومين و دخلت لشومبرة الحاجة قاعدة نطرطق في صباعتيا نبكي و خايفة حتى دخل صراع و غلق الباب كان يعرق و يديه يرجفو من الزعاف قالي دوك تحكيلي وش صرا.. قتلو و الله غير حكيتلك كلشي حكمني بيديه قعدني فالبونك و قابلني قالي ليليان الكلام لي نهدر ماشي قليل برديلي قلبي خلاص ما قعدتليش الكوراج.. خمارك علاش نحيتيه؟ قبل ما نواجبو رحت نجري لابوبال تقييت حتى تغاشيت.. حسيت بيه كي رفدني و حطني فوق البونك و كي فطنت صبتهم كامل فوق راسي.. صراع خرج هو و نائل و الحاجة تقول لاحول و لا قوة إلا بالله العلي العظيم  و الحاج يهدد فيا نقتلك و نذبحك و أنا طلعت لشومبرتي قعدت وحدي نستغفر و ندعي ربي يبين الحق حتى سمعتهم دخلو خرجت نجري وقفت فالدروج نسمع في صراع داير حالة بالعياط و ما نعرف وش كسر و الحاجة تدعي كي سمعتو جاي للشومبرة دخلت نجري.. هو دخل غلق الباب كان يغلي نحا قمجتو و جا قعد قتلو  صراع ياك راك مصدقني؟ قالي عندك شك في هاد الشي؟ قتلو بصح تصرفاتك تقول العكس.. قالي شفتيني كاش ما هدرت معاك ولا حاسبتك.. ديري في بالك لوكان عندي شك بنسبة 1% برك نذبحك بلاما ترمش عيني بصح خلي حتى نشوف سليمان و نفهم الحكاية مليح.. بكيت و قتلو الحكاية هادي مخططيلها من قبل.. ما عندهاش سمانة قتلك بلي إخلاص هددتني.. قالي خلاص بركاي ما تبكي إدا راكي مظلومة عندك راجل في كتافك يجيبلك حقك من فم السبع.. امسحي دموعك و انساي هاد الحكاية و الله غير طلعتلي لاطونسيو..
سكت و تكسل حط يدو على عينيه و لوخرا على كرشو.. شويا و نحا يدو شاف فيا قالي ريحتي شويا؟ قتلو راني مليحة بصح ليسطوما تحرق فيا.. جبد النفس و هز راسو.. صونا تلفونو تقعد و رفد كان سليمان لي عيطلو.. هدر معاه و كوبا و جا نايض قتلو وين راك رايح؟ قالي رايح نبين الحق عندي ثقة فيك بصح باش ما نظلم حتى واحد بصح والله و يظهر إختلاف فالكلام ما نرحمك يا ليليان و إدا ظهر نفسو و الله غير نخلي إخلاص تحبط عند رجليك..
هو لبس و خرج و أنا حبطت قعدت مع الحاجة.. قلتلها راكي مصدقتهم؟ قالتلي لالا يا بنتي جيتي عودك أخضر و أنا لي ربيتك و نعرف وش فيك وش ما فيكش.. شدي في ربي سبحانو أنت يتيمة و ما يضيعش حقك..
ساعة منبعد جا نائل قالي ندير لاتاي.. نضت للكوزينة جا صراع و سليمان دخلو للصالون و راح الحاج قعد معاهم.. جا نائل دا السنيوة و أنا قعدت نتصنت عليهم.. قالو صراع المفروض حنا لي نعتذرو و ربي شاهد عليا بلي دايرك واحد من خاوتي.. قالو سليمان و الله العظيم غير صبت روحي في موقف صعيب و الطفلة هادي معتبرها بنتي ولا ختي الصغيرة بصح مرت عمي ما خلات ما بقات و أنا قاعد و ما فهمت فيها والو.. و لوكان ماشي نائل قالي ادخل دوك نولي ليك و الله ما ندخل ما نقعد.. قالو ما صرا والو بصح ياريت تحكي قدامهم كامل الشي لي صرا.. سليمان حكى كيما حكيت بالضبط.. قالو الحاج ما صرا والو سوء تفاهم و الحاجة قالتلو ما صرا والو وليدي ما تزعفش امسحها في وجهي.. شويا منبعد بقاهم على خير و راح.. هوما كامل خرجو من الصالون و أنا قعدت فالكوزينة.. الحاجة قعدت تتحسب و صراع وصل سليمان للباب و عاود رجع يغلي قالي وين راهي الق.... لي مخليها في داري و بدا يعيط إخلاااااص ليوم نحرقلك الراسة منين جيتي يا بنت ××××
حبطت تجري كي لحقت لنص الدروج حكمها من شعرها و طاح عليها بالضرب و يقولها انت ماشي معولة توبي يتيمة تطعني في شرفها يا بنت الكلب و هي بكل وقاحة تقولو مرتك لي ماشي مربية أنا شفتها معاه.. هوما يحاولو يسلكوها من يدو و الحاج يقولو ماشي هكدا تنحل الأمور.. قالها صراع يا تعترفي يا راكي مطلقة.. هنا خافت و قالتلو و الله غير جابها الشيطان تعيش.. قالتلها الحاجة انت هي الشيطان في حد ذاتو.. ما تخافيش ربي تهتكي عرض وحد يتيمة ما خفتش يخرجو ذنوبها فيك؟
ضرب ضرب حتى عيان ما خلا فيها ما يصلح و قعد ينهت قالي نائل خفي جيبيلو الما يشرب..رحت نجري جبتلو ما شربش قالي اوقفي ما تروحيش.. و دار لإخلاص و هي مرمية فالقاعة قالها دوك تحبطي عند رجليها.. عيط عليه الحاج قالو خلاااااص حابها الشيطان و استعرفت بغلطتها.. قالتلو الحاجة على وشمن اعتراف راك تهدر و هي قريب راحت مابين الرجلين.. عيط عليها صراع قالها يلااااااا احبطي عند رجليها.. و طبعها برجلو.. أنا جبت روحي و قعدت نستغفر.. حكمني الضحك من الموقف هادي لي يقولك شر البلية ما يضحك.. طبعاتو أم سعد من صدرو و قالتلو ما تخافش ربي راهي قد يماها عيب عليك.. رفع يدو جا يضربها وقف نائل ما بيناتهم و حكملو يدو .. قالها أنت تعرفي ربي يا وحد ×××× ؟!
قالهم هاد المرة ما تقعدش على ذمتي غدوا الصباح نروح نطلقها فالمحكمة و هي ناضت تحلل فيه و تبكي.. منبعد راحت حضنت الحاجة و تحلل فيها قالتلها عمتي قوليلو ما يطلقنيش و الله غير جابها الشيطان.. طبعتها الحاجة و ما حبتش تهدر معاها.. صراع قال لنائل راني طالع كي نحبط ما نصيبهاش هنا.. طلع للشومبرة و عيطلي طلعت موراه نجري قالي جيبيلي حبة كاشي تع لاطونسيو.. مديتهالو حكمها عليا و يدو ترجف قالي جيبيلي سربيتة.. فتح قمجتو و راح حط راسو تحت العين فلافابو شعل الما بارد و نشف و دخل في فراشو قالي طفي الضو.. أنا خفت عليه كاش ما يصرالو قاعدة غير نتبع فيه.. طفيت الضو و حبطت للكوزينة درتلو لاتاي بالڨارص و رحت للحاجة سقسيتها قالتلي نائل و أم سعد داو إخلاص لدارهم.. و صراع كيفاش راهو؟ قلتلها طلعتلو لاطونسيو شرب دواه و راني نديرلو في كاس لاتاي باش يقعد راسو.. سربيتلو كاس و طلع حطيتهولو فوق الطابل دونوي قتلو صراع رقدت؟ نوض تشرب لاتاي ديالك تريح شويا.. مد يدو جبدني قعدني على البونك و حطلي راسي على صدرو قالي راكي زعفانة مني؟ قتلو علاش نزعف فوق ما جبتلي حقي؟! باس راسي و حضني نحس في صدرو سخون و قلبو يخبط بالزور قتلو كيفاش راك دوك؟ قالي راني مليح مادام راكي معايا.. تنهد و قالي شوفي سبحان الله ما تسرعتش و ظلمتك و إلا عمري ما كنت رايح نسامح روحي.. قتلو انت سندي و اهلي و بابا و دنيتي و حبيبي و الله بلا بيك نضيع.. قالي شوفو شوفو كيفاش راهي قاعدة في حضني و تتغزل فيا ما تخافيش ربي و الله غير راني مريييض و عياااااان ماشي كامل وقتك.. رفعت راسي على صدرو خزرت فيه قتلو أنت لي تخمامك منحرف.. ضحك و عاود جبدني لعندو قالي يمال ارقدي..
رقدنا و الصباح كي فطنت جوايه ال10 ما صبتوش قدامي قفزت من بلاصتي قلت من لبارح العصر و أنا راقدة حتى لدوك و ما فقتش؟!! غسلت و مشطت و حبطت لتحت صبت الحاجة فالكوزينة و نور واقفة دوزن فالغدا.. قالتلي الحاجة وشبيهم عينيك منفخين زدتو داوستو لبارح؟ قلتلها لالا بالعكس رقدنا مرتاحين.. قالتلي يمال ريحي تفكري باش نلحقوا الشغل لخطر صراع راهو عارض دار عمو أبو سليمان للعشا دوك نعيط لهيام جي تعاونا.. خليتهم و رحت نحوس على صراع ما صبتوش..
مور الغدا جات هيام هي عاونت نور فالطياب و أنا غسلت الماعن و الحاجة حشاتلهم الخصرة تع الدولمة.. خرجت طميت الخبز حتى نحس واحد واقف مورايا كي شميت الريحة عرفتو صراع درت ليه حضني و باسني قتلو على سلامتك حبيبي.. قالي الله يسلمك حبي و نحالي مورصو خبز باش ياكل قتلو نسخنلك الغدا؟ قالي قبل الغدا الحقيني لفوق راني محروق عليك.. ضحكت و رحت مديت الخبز لهيام قلتلها نروح نغسل باش نطلع لفوق غمزتلي و قالتلي روحي روحي.. كي دخلت للشومبرة صبتو هداك وين خرج من الدوش غير شافني هجم عليا و دخلنا في عالمنا الخاص.. نسيت الوقت ما بين يديه و حنا نضحكو و نڨصرو حتى حسيت واحد راح يفتح الباب قفزنا و تقعدنا و صراع جبد الغطا علينا و قال  شكوووون؟ قالو وليد نور أنا عمو قالك جدو ارواح.. قالو إيه روح دوك نحبط.. و خطرة أخرى دقدق فالباب و كي نقولك ادخل افتحو تفاهمنا؟ قالو إيه عمو.. الطفل راح و صراع دار ليا يضحك و قالي انفضحنا ههههه.. دخلنا دوشنا كيف كيف.. هو حبط قبلي منبعد أنا لحقتو صبت هيام و الحاجة يڨرڨرو من الضحك قلتلهم وش كاين قالتلي هيام وليد نور نقل وضعكم صوت و صورة.. قلتلها ما تزيدينيش.. وش قال؟ قالتلي قوليلي وش ما خلا ما قالش ههههه.. كي حبط قلنالو نوضت عمك؟ و هو قدام باباه و جدو قالنا أصلا هوما راهم نايضين و ماشي لابسين حوايج هههههههه... ياخاااه تبهدلت
جا علي وليد هيام رافد سنيوة تع كباب مشوي، شويا موراه و زادت دخلت أن سعد كانت عند وليدها قالت وش كاين راكم مشغولين.. قالتلها الحاجة صراع عرض دار عمو أبو سليمان.. قالتلها عرضهم على كي خرب دارو؟ قالتلها هيام راكي قلتيها دارو يعني يعرض لي حب و وقتاش يحب هو حر..
مع المغرب جاو الضياف جينا نحط للرجال وحدهم و النسا وحدهم قالنا صراع لالا حطو ناكل كامل كيف كيف دار عمي أبو سليمان ماشي براوية.. قعدنا فالطابلة ناكلو أنا ساميت صراع غير قلنا باسم الله نطقت أم سعد قالت أبو حرب علاش ما ترجعش بنت عمك و الله غير حالتها تشف مسكينة.. هز راسو و قالها ان شاء الله.. و نائل بدل السوجي و بدا يهدر على معرض السيارات..
كملنا العشا و حطينا لاتاي هوما يشربو دخل وليد سعد قالو عمو صراع بندر راهو عند الباب يحتاجك.. قالو الحاج قولو يدخل.. قالو صراع روح عمو قولو راهو مشغول منبعد هو يجوز عليك..شويا و عاود رجع الطفل قالو قالك نهدر معاك برك .. قالو روح قول. ما عندوش الوقت ليك..
شويا و صونا تلفون الحاج ناض دخلهم للصالون بصح صراع ما راحش معاهم.. أم سليمان قالت الله يجمع لمتكم بالخير و يبقي الستر و يدوم الأفراح.. و راحو
دخل الحاج قال لصراع نوض ولاد عمك حبوا يتفاهمو معاك.. رفع هو صوتو باش يسمعوه.. قالو قولهم ادا على جال ختهم إدا نفحتلي نرجعها و إدا نفحتلي نطلقها.. راح الحاج شويا و سمعنا بندر يعيط.. تقعد صراع و قال هدا معامن راهو يعيط؟! و ناض، قالتلو الحاجة يا وليدي الله يرضى عليك تهدن.. راح دخل عندهم نسمعو في بندر يقول لاه لا رجعها بصح حقها يوصلها على آخر دورو و أنا علابالي كيفاش نديه.. ماشي دايرها خدامة لي يسوى و لي ما يسواش.. قالو صراع على وش من حق راك تهدر ياك ختك و راهي عندك كي نطلقها و ارواح تدي مؤخر صداقها قالو ما تسوى لا انت لا دراهمك.. على هاد الكلمة و نسمع غير فالخبيط و نائل خرج يجري و حنا رحنا نطل وش كاين صبنا صراع طايح على بندر بالضرب و خوه فيصل يحامي معاه و نائل طبعو لبرا و الحاج قال لوليد سعد اجري لباباك عيطلو.. و جبد بندر من تحت صراع ما خلا ما يصلح فيه ديفورماه.. قالو الحاج روح اسلك برقبتك..
هوما راحو و هيام دخلت طمت هداك التكسار و الحاجة و نائل و صراع قعدو.. نطق هو قال و الله و يقرب واحد فيهم للدار غير نبعثو مكفن ولاد الق.... دخلت أم سعد قالتلو تع وجهك ولاد ختي.. ختي تشرفكم  و تشرف خوالك بصح يخرجو فيك ذنوبهكم غير ما تخافش.. دار للحاج قالو أنت مرحبا بيك و الدار دارك بصح هاد المرا ما نحتاجهاش عندي.. قالتلهم حتى أنا ما نقعدلكش بناقص.. خرجت و هي تقول الله لا تربحكم ان شاء الله تروحو بلا ذر و ما يبقالكم حتى أثر.. ناض نائل
يسكت فيها بزقت عليه و طبعاتو قالتلو أنت اقعد كي الشيفونة في يد خوك.. دخل سعد شاف الحالة ما تعجبش قبل ما يسقسي ناض صراع قالو أبو محمد الدار خليتهالك تكفيك ولا لالا؟ قالو الحمد لله تكفي و توفي غير لخير خويا حبيت تبيعها؟ قالو لالا ما نبيعهاش بصح مادا بيك تدي يماك تعيش معاك و مام الحاج إدا حب يروح ما نشدوش.. نطق الحاج قالو صراع راك تحاوز فيا؟! قالو حاشا يا بابا العيب عليا إدا حاوزتك بصح أنا وليدك و هو وليدك و في زوج دياري روح اقعد لتم و ديرها دارك و أبو محمد ما يقصرش و خزر فيه قالو يااااك؟ قالو إيه..
راحت أم سعد و هي تقول الله لا تربحكم و ربي يفرجني فيكم.. دار طول و عرض تمشيها وحدة بنت حرام بلا أصل.. مام الحاج ما تحملش و راح..
جوزنا زوج سمانات سوسطا منبعد جاو عموم صراع و خاوة إخلاص جابو خمس ملاين لنائل و تفاهمو يكملو زوج ملاين بالتقسيط كل شهر و رجعوا إخلاص و صراع حلف فيها وين يقعد ما تقعدش..
جازت يمات منبعد عيطلي علي فالتلفون قالي انا خطبتي تمت بسبتك و حبيت نرجعلك الدين.. شوفي الخمس ملاين لي جابوهم لخالو نائل، عمتي إخلاص تسلفتهم من عند واحد تعرفو و قالتلو على شهر نرجعهملك و ليوم سمعت جدة تقولها الراجل جا يحوس عليك و قال يا ترجعلي دراهمي يا نروح نفضحها في دار راجلها و يرجعولي دراهمي و إخلاص قالتلها قوليلو إدا حب ننذبح يجي.. ليوم نروح للسوق نبيع ذهبي و نجوز عليك نخليلك الدراهم اديهملو.. قتلو وسمو هاد السيد قالي وسمو قيس الدلال و خالو صراع يعرفو.. كوبيت من عند علي و عيطت لصراع قتلو وين راك ارواح لعندي دوك نحتاجك مصيبة رايحة تصرا.. جا يجري للدار طلع لعندي للشومبرة قالي وش كاين؟ قتلو قولي قبل إخلاص وين راهي؟ قالي قالتلي الحاجة حبت تروح مع نور للسوق و خليتها.. قتلو يعني الحكاية كاين منها راحت تبيع ذهبها.. قالي وشمن ذهب؟! وشمن حكاية؟! حكيتلو كلشي هو سمع اسم قيس الدلال و الراجل هبل قالي هدا اسقط واحد على وجه الكرة الارضية على آخر عمري عرضي تروح تسلف من عندو دراهم؟! و الله غير ليوم نقتلها.. جا يعيطلها قتلو ما تعيطلهاش هادي حية لوكان تفيق بيك زعفان تروح لدارهم تحط الدراهم و ترجع لهمنا بلاش و تنكر.. خلي كي جي و فتش صاكها ادا فيه الدراهم ولا لالا بالاك رانا ظالمينها.. قنع برأيي و راح قعد رايح جاي فالهول حتى للمغرب دخلت هي و نور لاقاها نحالها الصاك ماصاب فيه لا دراهم لا ذهب قالها روحي جيبيلي ذهبك.. قالتلو وش دير بيه؟! عيط عليها قالها راني نقولك روحي جيبييييه.. قالتلو وش تحتاج عندي؟! حكمها من خمارها و طلعها لشومبرتها و بداو يتعايطو هو يقولها جيبيه و هي تقولو راهو عند يما.. قالها تعيطيلها دوك قدامي تقوليلها جيبو دوك.. ولات دير فالسبايب و تحلل فيه باش يتهدن.. عيط لنور راحت لعندو ترجف قالها إخلاص جازت لعند الصياغ كي كنتو فالسوق؟ قالتلو خويا الله يسترك ما دخلنيش في هاد الأمور انا يمات وليدات ما خصنيش ندخل في هاد المشاكل.. عيط عليها و حاوزها و راح للصالدوبا جاب تويو طواه و غلق الباب على إخلاص و طاح عليها بالضرب حتى استعرفتلو بلي باعت ذهبها باش تخلص دين خوها.. كركرها من شعرها مسح بيها الدروج و هي طبع فيه حتى قريب طاح.. قالتلو راك حاسب روحك راجل و أنت شيفونة في يد بنت الحرام هديك.. لوكان جيت راجل لوكان قدرت تدخل عليا النهار لولاني ماشي جاي تسترجل عليا دوك.. هنا رجع ما يضويش و هي هربت منو للڨاراج بحوايج الدار لحقتها الحاجة عطاتلها حجاب و خمار.. و هو يسب و ينعل فيها و يمسح فالدم من نيفو و خرج ما رجعش حتى الزوج تع الليل و غدوا منداك الصباح راح طلقها فالمحكمة و جاب معه مينويزيي للدار ديمونطا كامل دوزانها و خرجهم حطهم فالجنان.. في سمانة كملت اجراءات الطلاق و تهنيت منها للابد..