مراهقة والاربعيني بلهجة جزائرية

جزء 18

#المراهقة و الأربعيني:

#الجزء 18:

درنا دولمة للغدا كامل قعدو فالطابلة غير هو قلتلها للحاجة وين راهو عمو صراع قاتلي هو ما يحبش الدولمة كملي ماكلتك و شوفي وش ديريلو، ما هنانيش خاطري ناكل و هو بلاش طلعت لشومبرتو دقدقت قال ادخل صبتو متكسل و حاكم تلفونو قتلو قالتلي الحاجة بلي ما تحبش الدولمة وش تحب نديرلك تاكل؟ قالي ما كالاه بابا روحي كولي بصحتك انا أصلا راني عيان نرقد شويا برك اغلقي التاقة و شعلي الشوفاج و طفي الضو على يدك و كي يأذن العصر نوضيني نصلي و نديك للطبيب يشوفك ماراكيش عاجبتني.
كي درت وش قالي حبطت كليت شويا و رحت للشومبرة شعلت التلفزيون و قعدت نتفرج حتى أذن العصر طلعت لعندو دخلت و غلقت الباب مورايا قربت ليه باش نوضو كان داير يدو تحت راسو و مغمض عينيه قعدت نتفرج فيه و ندقق في تفاصيل وجهو شميت ريحتو سحرتني تحسسني بالامان، أنا هكداك تايهة فيه و هو حس بيا فتح عينيه قفزت من الخلعة حتى تعكلت و طحت رمى الغطا و ناض يجري نوضني قالي يا ستير باسم الله عليك وين راهو بالك يا بنتي قتلو جيت نوضك تصلي العصر، خزر في ساعتو قالي راهي ال3 ونص اجبديلي حوايجي من الخزانة بيدما نتوضى نصلي و احبطي البسي باش نديك.
درت وش قالي و احبطت لبست الروبة لي شراهالي و درت من الريحة تع حلا لوكان تفيقلي دير حالا.
حبط و هو يقول واش ليليان فريتيها؟ قتلو إيه رفع راسو عقد حواجبو و قالي هد اللبسة باردة عليك بابا روحي بدليها قتلو لالا و الله ما باردة دافية قالي لالا راني نقولك باردة روحي بدليها قتلو انت ما بيك لا باردة لا والو ما عجبكش الحال كي جاتني شابة شفتو شايد الضحك و لعبها سيريو قالي قتلك روحي بدليها، تقلقت قتلو خلاص بطلت ما نروحش خلي نموت و دخلت لشومبرة الحاجة، وقف و بدا ينسف و يستغفر قاتلي علاش عليك خشانة الراس هادي قالك بدلي بدلي راجلك و كلمتو تمشي عليك، قلتلها وين راجلي هدا؟ ماراهو راجلي ما راني مرتو هو يقولي أنت كيما حلا بصح حلا تلبس كيما تحب ما يقولها والو، ياك ما قبلش نلبس ألوان فاتحة و هد الروبة الوانها غامقة و زيد هو لي شراهالي وش يحوس فوق هد الشي دخل قالي راني نشوف لسانك طوال شديه خير ما نقطعولك قتلو ما تقطعوا ما والو دوك نبدل و نرقد ما نروحش للطبيب، قاتلي الحاجة يا بنتي عوذي من الشيطان و نوضي مع راجلك امشي بشورو ما تكسريش كلمتو قلتلها مانيش نكسر في كلمتو خلاص ما نروحش حب يروح لشغلو يروح قالي اسمعي شوفي فيا مليح واقيل أثرو فيك المسلسلات التركية لي راكي تبعي فيهم نوضي بدلي تشوفي، نحيت الفيستا رميتها و تكسلت و درت للحيط عطيتو بظهري لتم وين زاد هبل جا يتلاح ليا شداتو يماه قالي نوضي نوريلك كيفاش تمشي كلمتك عليا بعدت عليه و وقفت مع الحيط قتلو و الله ما حبيت نجوز كلمتي عليك برك مانيش حايبا نروح للطبيب قعد فالبونك يغلي و ينسف و الحاجة نغزتني قاتلي اكسري الشر، نضت بدلت حوايجي فوق قلبي و زكارة فيه لبست شال وردي خزر فيا قالي عندك غير هد الخمار؟ هنا الحاجة تقلقت طبعتني عليه و قاتلو اديها و روح ... وش بيك حبيت تدفن الطفلة في الحياة لي تلبسها تعكر فيها هادي لالا هادي لالا و حنا نساعفو فيك اخرجوا عليا رايحين تخرجوني من عقلي و ادا قلت لالا دوك انا نديها و قيلوني و عيطت نااااائل وين راك؟ ناض جبدني من يدي و خرجني قتلو اصبر صاكي ما رفدتوش جابو رماه عليا و قالي امشي منبعد نتفاهم معاك كي عاد في حاجة صغيرة كيما هادي ما قدرتش نسيطر عليك خبط الباب تع برا و فتح باب الڨاراح و طلع فالطونوبيل، طريق كامل و هو يسب و يهدد و انا مدورة وجهي عليه و نبكي.
وصلنا لعند الطبيب حبط و قالي امشي قدامي تشوفي و انا ما عرفتش منين كلما نغلط يبدا يعيط منا يااااربي ماشي مناااا المهم دارلي سينما بلا دراهم وليت وقفت في بلاصتي قالي علاش حبستي؟ راكي حايبا تقرقشيني؟ قتلو عمو والله ما عرفت نمشي نجي قدامك تقعد غير تعيط خلينا نمشيو كيف كيفا، نسف و تنهد و مشى و انا حاكمة في يدو و هو يكركر فيا  تقول رايح يطير بيا يا بن عمي علاش راهو يجري هكدا قتلو عمو بلعقل و الله غير رايحة نطيح، نقص شويا الفيتاس منبعد عاود قلع هدوك الدروج هو طالع ثلاثة و أنا هداك وين راني فلولانية يا حي يا عمري تقول يكركر في شكارة ماشي حاكم يد بنادم.
وصلنا للكابيني تع الطبيب صبنا غاشي كحل راح هدر مع لاسيستو مرة يخزر فيا مرة يخزر فيه خافني كاش وين نروح لي يشوفو يقول خاطفني، شويا هكدا و شاورلي بيدو رحت ليه قالي كاين 14 واحد قبلنا قتلو بزااااف قالي نستناو وش رايحين نديرو بلاني ربي بيك، بدا يخزر من و من يحوسلي على بلاصة باش نقعد بصح كانت كومبلي شويا هكدا شاف راجل قاعد مع مرتو راح ليه قالو معليش تقعد الطفلة في بلاصتك مع المرا خير ماراهي واقفة و الدنيا مخلطة قالو ماشي مشكل، قعدني و هو سند روحو على الحيط و كل شويا يخزر في ساعتو و ينسف، منبعد جا ليا خبرني قالي اسمعي ما تقدريش ديري قالب تلعبيها دختي و طحتي باش يدخلونا بلخف؟ قتلو كيفاش؟ قالي ما تسلكيش راسك في حتى حاجة لوكان جات إخلاص هنا تقتل روحها و جوزهالهم و ما يفيقولهاش تقلقت قتلو كي راهي عاجبتك إخلاص لوكان جبتها علاش حتى تستنى مني نمثل باش نعجبك ياك أنا ما نوالمكمش توالمك هي، انا نستنى دالتي و ادا تقلقت رجعني للدار بناقص.
قالي شدي لسانك خير ما نقطعو قتلو غير قطع منو تحتاجو زيدو للسانك لي راك من مقبيل و انت تعاير فيا بيه و تسبني و تزيد تكومباريني بوحدة كدابة كيما هي، حكمني من يدي و عصرهالي حسيتو رايح يكسرها سكتت و هو دار و عطاني بضهرو حتى جات وحدة جايزة عليه زابطة روحها في سروال و شوميزيي وشمن طالو وشمن ماكياج وشمن لي لونتي و راسمة حواجبها تقول شيطان عثرت عليه شدها و يقول باسم الله يا ستير و هي تقولو اسمحلي ما فهمتش انا كيفاش حتى طاحت عليه بانتلي دارتها بلعاني حبت تدراڨيه و هو يقولها ما صرا والو و أنا قلتلها هد الوسع كامل ما شفتيهش خزرت فيا و راحت و هو دار ليا قالي ما تحشميش تهدري مع المرا هكدا؟ قتلو لوكان انا لي عثر لوكان ما خليتلي ما بقيتلي بالمعايرات بصح للشابات تولي تعرف تتبسم و تضحك و تقلهم ما صرا والو، تبسم و دور وجهو.
وصلت دالتنا و دخلنا شافني الطبيب و طلب تحاليل دم رحنا حللت قالو عندها فقر دم حاد عطاني تراتمو و وصى ناكل مليح، كملنا و خرجنا طلعني فالطوموبيل و هو راح شرا الدوا و جا خزر فالساعة صابها ال 8 غير ربع قال راح نهاري صلاة المغرب فاتتني و العشا كيف كيف هدا كامل على جالك سكت ما رجعتلوش، حبس قدام ريسطو جاب زوج سوندويش كبدة و عصير برتقال و جا، حطهم في حجري و قالي تاكليهم في زوج سينو راسك نطيرو خير ما تموتيلي و نباصي بيك قتلو و كي تقطع راسي ما موتش و تباصي بيا؟! شد الضحك و قالي يا مو لسان طويل كولي و أسكتي. خليتهم كيما راهم قالي قتلك كولي قتلو كي نوصل للدار ناكل قالي يا بنتي فالدار العينين بزاف كولي هنا واحد ما شافك قتلو ما نعرفش ناكل و الطونوبيل تمشي قالي دوك نحبس قدام الجامع نصلي المغرب و العشا وانت كولي براحتك.
غلق الطونوبيل و خلا الشوفاج شاعل قالي باش ما تبرديش و حبط هو يمشي و أنا نتبع فيه بعينيا مرات يخليني نكرهو و مرات نشوف فيه حنان فاقداتو و يحسسني كلامو بالامان قعدت ناكل و نخمم فيه حتى رقدت، حسيت بيه كي طلع فالطوموبيل دورت راسي لعندو صبتو يشوف في وجهي دنلو براسي وشنو قالي علاش حتى تخليني نقسى عليك؟ قتلو ما فهمتش تنهد و مسح على راسي و تبسم قالي ارقدي تريحي شويا و نوض الطونوبيل، أنا قعدت نخزر فيه قلت في قلبي دوك هدا يتحب و لا يتكره.
كي وصلنا للدار قالي احبطي نروح نجيب شويا سقايط لولادي و نجي، دخلت لشومبرة الحاجة سقساتني حكيتلها وش قالي الطبيب، بدلت و تكسلت و قعدت نتفرج فالتلفزيون جا ساماني رقد و حلا في تلفونها كي العادة، شويا و دخل صراع سلم على راس يماه و قعدو يحكيو منبعد قال لحلا نوضي حطيلي نتعشى دارت ليا قاتلي ليليان نوضي انت حطيلو راني بالحمى قفز من بلاصتو و راح ليها يمس في جبهتها قالها ما كيش سخونة قالتلو راني نحس بالسخانة على لداخل، غطاها و باس راسها، عرفتها تمثل خرجت رحت للكوزينة صبت نوال طيبت نص جاجة لراجلها قلتلها هادي كامل ياكلها سعد؟ قالتلي لالا كاين الماكلة قلتلها معليش ناكل منها شويا قاتلي معليه نحيت الكويس كليتو و نقبت من و من و وجدتلو السنيوة تع العشا و ديتهالو صبتو قاعد في فراشي و حاكم تلفونو حطيتلو ياكل و رحت حطيت لاتاي على نار هادية وجبتلو الما و قعدت نشوف فالتلفزيون جات لقطة تع واحد يشوف في شفايف لي معاه رايح يبوسها خزر و قالي بدلي ما صبتي ما تتفرجي؟ نحالي التيليكومند و بدل لاشان دار الاخبار و قعد ياكل و يشوف قلت في قلبي حتى المسلسلات و يخيرلي وش نشوف؟
عيطتلي نوال على لاتاي رحت سربيتلو و قعدت ناكل قالي هاكي الكبدة لي خليتيها فالطوموبيل راني حبتهالك معايا قتلو كرهتها تشهيت هد الماكلة قالي كيما تحبي بصحتك، كملت كليت و رفدت الماعن نغسلهم و هو راح يغسل كي وليت صبتو طاوي المخدة ديالي و متكسل على الزربية، جبدت مخدة و حطيتها قدام يدو باش نشم ريحتو تكسلت و قعدت نخزر فيه منبعد طلعت لشومبرتو جبت فراش خفيف جيت نوضو باش نفرشهولو فوق الزربية نطقت حلا قاتلي خليه كيما راهو بركاي ما دخلي روحك فيه إدا راكي طامعة يوالفك و يحبك غير انسايها، سكت عليها و قتلو عمو... فطن قتلو نوض بدل حوايجك و ارقد على الفراش الزربية خفيفة و يابسة عليك، ناض بدل و رجع رقد، علقت حوايجو و تكسلت قدامو قربو يريحني مام كان داير بظهرو، كي أذن الفجر نوضاتو يماه يصلي فطنت راح صلى و طلع لشومبرتو و انا ما قدرتش نعاود نرقد بعيدة عليه بقيت نتقلب كي شفتها  ال 7 غير ربع طلعت لشومبرتو صبتو راقد نوضتو باش يروح للخدمة و وجدتلو حوايجو و حبطت للكوزينة درتلو الفطور كمل و حبط قالي صباح الخير قتلو صباح النور قعد ياكل و انا مقابلاتو و نخزر فيه ولا كلشي يعجبني فيه و نهتم بأدق التفاصيل لي تخصو مجرد هد الشي يفرحني حتى و لو ما ردش البال ليا.
كمل كلا و عطاني دراهم قالي هدو اعطيهم ليما قوليلها مصروف و انت كاش ما تحتاجي؟ قتلو لالا قالي أيا يمال السلام عليكم و خرج، قعدت هيمانة بطولو وهو يمشي..
كملت كلشي و طلعت لشومبرتو خملتها، شفت الريحة ديالو تبسمت و رشيت منها فالهوا و شميت حسيت الباب تنفتح خبيت القرعة في حوايجي دخل شافني قالي يا درا ليون كاش ما درتي ديڨا ليوم هههههه قتلو و الله حددتلك حوايجك بصح ما حرقتهمش قالي راكي سور؟ و حكم القمجة يقلب فيها قتلو و الله ما حرقتها عرفت نحدد تبسم و قرب حط يدو على راسي و قالي شاطرة.
حبطت و خبيت ريحتو ما بين حوايجي و غلقت و فالليل كي سقسى عليه حشمت نقولو راهو عندي قلت كي يغفلو نطلع و نرجعها وضميتو، الحاجة قاعدة تحوس و تعاود قالها خلاص يما كي نخرج نشري وحدوخرا وليت خليتها عندي و كلما نتوحشو نجبدها نشمها و نعاود نخبيها، كنت مخبيتها تحت سبعة و سبعين قايمة خفت يفيقولي.
مع ليام حفظت طبايعو لي جاست دياولو كلشي عليه حسيتو انتبه لنظراتي ليه بصح غالق راسو ما علاباليش علاش حتى وحد النهار كنا قاعدين كامل مور لعشا نسيت روحي و قعدت مركزة معاه كي كان يشرب فلاتاي و يشوف في تلفونو حتى حسيت بالحاجة خبطتني لرجلي درت ليها قاتلي ساعة و انا نهدر معاك وين راكي غايسة روحي جيبيلي الما هو خزر فيا و  تبسم قاتلو ما نعرف وش راهو خاديها راهي تغيس بزاف قالها و هو شايد الضحك بلعقل عليها يا يما مازالها صغيرة.
جبتلها الما و قتلو عمو كاش ما تحتاج قبل ما نروح نرقد نطق نائل قالي ليليان راهم جايين ولاد عمي يسهرو عندنا وجدي لاتاي و شعلي الفحم للرانڨيلات قالو صراع و هي وش تعرف في الرنقيلة يا نائل عمرها انت و ممنوع ليليان تدخل لعند الرجال انت لي تدي لاتاي و انت لي جيبو قالو ايه انا نديها هي تشعلي الفحم برك علاش راك مكبرها.
سكت و رحت طيبت لاتاي تفكرت ماما قلت علاش ما سقساتش عليا لا حية و لا ميتة انا نخمم هكدا و هو دخل عليا قتلو عمو نسقسيك ماما ما عيطتلكش كامل؟ قالي علاش هد السؤال؟! قتلو ما فهمتش علاش نساتني ملي جيت ما سقسات ما حوست عليا قالي ليليان حياتك عند اهلك انسايها مام هوما انسايهم قتلو علاش رايحة نقعد هنا طول عمري؟ قالي ماراكيش مرتاحة عندي؟ قتلو لالا بصح من حقي نعرف مصيري أنا حايبا نرجع لدارنا و نكمل قرايتي لوقتاش نقعد خدامة هنا قالي و شكون قالك راكي خدامة؟
قتلو يمال الشي لي راني نديرو من الصباح حتى لليل وش تسميه؟! انا ما كنتش هكدا في دارنا قالي أي طفلة تتبدل حياتها مور الزواج قتلو مور الزواج؟! علاش أنا متزوجة؟! حط يدو على دراعي و قالي انساي بابا انساي و خرج.
سمعت أم سعد طبطب بالزور على وليدها سعد و تقولو نوض خف نور رايحة تزيد و صراع يقولهم إدا تحبوا نديكم خرج سعد من شومبرتو قالو ما كالاه راني جيت.
راحوا و صراع راح قعد مع وليد عمو و نائل وجد 5 رنڨيلات و قالي جيبي زوج حطيهم عند الباب، رفدتهم و نسيت روحي دخلت موراه حتى فقت على صوت صراع وين داخلة راهم غير الرجال حطيت الرنڨيلة فالقاعة حتى نسمع نائل يعيط كسرتيها هكدا يحطوها الناس قالو صراع و انت علاش ما جبتهمش وحدك قالو قلتلها حطيهم عند الباب و هي عقلها مبحر.
رحت للكوزينة جا مورايا صراع حكمني من يدي قالي ما تحشميش داخلة هكداك فوسط الرجال قتلو والله غير نسيت قالي زيدي انساي و تشوفي كيفاش نديرلك فقدان ذاكرة تع الصح و طلق يدي و خرج.
بايتة نديرلهم فهداك لاتاي كل نص ساعة يجي لعندي نائل يقولي طيبي تقول سكروا بيه حتى سمعتهم يتعايطو كي لمهابل فتحت الباب تع الكوزينة و قلتلهم وش كاين وش صراااا؟! شافوني حطو ريسانهم جا ليا صراع و يسب فيا و يقولي فضحتينيييي... عاودت دخلت نجري للكوزينة و غلقت الباب على روحي و هو يعيط و يخبط فالباب افتحيييييي قتلو من مور الباب و الله غير عمبالي طرطقتو قالي يطرطق راسك كنا نتفرجو الماتش وش جابك؟ قتلو غير روح و الله ما نخرج، جاني من الباب لوخرى كل عليا شايد الضحك قالي روحي ترقدي يرحم باباك خير ما نبتلي بيك هد الليلة وليت نضحك تبسم و قالي روحي ترقدي بابا و الله غير شيبتيني هدا كامل من نائل و لاتاي ديالو، دخلت للشومبرة نضحك و قعدت نتفكر كي كان زعفان و يتبسم في نفس الوقت.
رقدت و حسيت على صراع كي هدر مع يماه مور صلاة الصبح سقساها على نور قالتلو دخلوها للبلوك، غطى ولادو و غطاني و خرج.
غدوا منداك جابو نور و فرحانين بولادها و بكاو كي مات عابد و ماشافهمش.
الدار تعمرت بالغاشي أصلا هوما كامل خاديين من عند بعضاهم يعني عقلية حنا في حنا ما كاش البراوي، هوما يعيطولي على لاتاي و أنا قلبي يفرفر غير وقتاش نصيب الفرصة و نشوف التوام سماوهم أحمد و محمد.
الحاج عيط لصراع باش يأذن لولاد خوه ناض رفدهم و يبوس فيهم و عينيه يبرقو من الفرحة وقفت معا يماه و رفدت معاه واحد قتلو عمو خليني نشوفهم رفع راسو خزر فيا و تبسم قالي ارواحي و حطهملي في حضني و ورالي كيفاش نشدهم، شديتهم و عينيا رغرغو بالدموع من الفرحة، قالتنا الحاجة ربي يفرحني بيكم و نشوف ولادكم يجريو فالدار.
دار ليا صراع و قالي اسبقيني للشومبرة وجديلي حوايجي دوك نطلع ندوش، طلعت وجدتلو الدوش و خرجت شفتو واقف عند باب شومبرة الدراري و يتصنت قربت ليه جيت نخبرو بلي وجدتلو الدوش خزر فيا و دارلي بصبعو اششششششششت خفت سكتت و قربت منو باش نسمع سمعناهم يداوسو وحرب يهدد في ختو حلا
كان يقولها و الله غير نبيع لبابا وش درتي لليليان و هي تقولو لوكان تقولو تشوف وش نديرلك قالها يمال قريتي قاتلو ما نقريكش عوم بحرك كي وليت تهددني، خزرت في صراع قتلو بلعقل و الله ما درت والو قالي اشششت و شدني و بعدنا من الباب غير خرج حرب عيطلو باباه قالو  وش بيك؟ قالو حلا لاتية مع التلفون عندي امتحان و ما حبتش تقريني قالو روح لشومبرتي دوك ندوش و نجي نقريك، مشيت حرب و يدي على راسو قتلو تع واش الامتحان؟ قالي تع الاملاء و المعلمة تضربني كي مانجاولش قتلو تحب نقريك أنا؟ قالي تعرفي؟ قتلو ايه روح جيب دوزانك و ارواح، راح يجري جابهم قعدنا في شومبرة صراع و نقراو حتى دخل علينا بالفوطة حطيت راسي لبس و جا قعد معانا فالفراش، حسيتو زعفان من حاجة بصح ما عرفتهاش قتلو وشبيك هو راسو و قالي كملي حنا هكداك حتى دخلت حلا قالتلو بابا نجي نرقد هنا قالي اخرجي عليا قاتلو علاش بابا وش درت قالها قتلك اخرجي براااااا مانيش حايب نشوف وجهك تشوكيت هو يحب بنتو جامي هدر معاها هكدا، هي خرجت و انا كملت لحرب و حبطت دوزانو كي رجعت صبت صراع مقلق و حرب يبكي قتلو وش كاين قالي فرشي انت و ياه و ارقدوا فرشت لحرب و ساميتو حتى نشوف في صراع يتكيف الڨارو مور خوه كي كمل فتح التاقة و قالي اتغطاو مليح بيدما تخرج الريحة و نغلقها، ما فقتش كيفاش غفيت فطنت على صوت الخزانة جيت نوض قالي بالاكي تحبطي لتحت الدنيا نقلبها على راسك قتلو علاش قالي ندير مالادي ساعة و نولي هنا تقعدي مام يجيو يطبطبو عليك ما تحبطيش حتى نولي هكدا؟ جيت نهدر قالي ما نعاودش الهدرة فهمتي قتلو فهمت، هو خرج و أم سعد جات كي العادة تضبح قلتلها ما نقدرش نحبط و حكيتلها وش وصاني قاتلي علاش وش كاين قلتلها ما علاباليش بصح من البارح و هو مقلق و عيط على حلا و حرب صبتو يبكي تبدل لونها قاتلي علاش قلتلها و الله ما علبالي ما فهمتش وش كاين حنا هكداك دخل صراع تفاجأ كي شاف أم سعد قاعده على فراشي وتسقسي فيا قالها خير قاتلو جيت نشوفها علاش ما حبطتش قاتلي بلي انت ما حبيتش قلتلها معليش خليه براحتو قالها تقدري تخليني نبدل؟ خرجت جا ليا قالي وش قاتلك حكيتلو خبطني بيدو على راسي قالي قلتيلها كلشي كي الحابسة و فتح الباب و عاود خرج زاد حيرتي خرجت نجري موراه لقيتو يعيط حلااااااا.. و هي خرجت تجري من المخزن و ام سعد خرجت موراها، قرب ليها و قالها وش راكي ديري لتم؟ نطقت أم سعد قاتلو عيطتلها ترفد معايا قالها قتلك وش كنتي ديريييييييي .. قاتلو و الله يا بابا غير رفدت معاها، خرجوا كامل على عياطو، راح للهول و قعد و حلا ميتة بالخوف و تبكي، نحى السلاح من خصرو و حطو قاتلو الحاجة وش بيك؟ قالها ما يهدر معايا حتى وااااااحد.
دخلت هيام مخلوعة و حنا كامل واقفين و هو قال لبنتو ارواحي هنا ما كفانيش عار يماك خرجتلي كثر منها نشوف في عينيه حمورا خفت ادا طلعتلو لاطونسيو رحت نجري جبتلو كاس ما بصح خفت نعطيهولو قاتلي هيام اعطيلو يشرب هوما مادا بيهم يموت، رفع راسو و خزر فيا قالي كيفاش نقابل ربي و تهمت اليتيمة زور وين نروح من ذنبك و الشي لي درتو فيك كي قال هكدا حبطوا دموعي شد عليا الكاس و قالي اقعدي و دار لبنتو قالها راني نستنى احكي و هي تخزر فيا و ساكتة و تبكي، خبط يدو و قالها تحكي كلشي دوك قدامهم كامل انطقييييي قاتلو بابا غلطت الله يخليك اسمحلي و حبطت تسلم على رجليه ضربها برجلو وهو لابس الصباط على وجها الدم ولا يجري جات تهدر إخلاص قالها احكمي بلاصتك يا زريعة الكلاب و دار لبنتو قالها علبالي ما درتيش هد الشي وحدك شكون عاونك علبالي ما درتيش هد الشي وحدك؟ منين جبتي التلفون؟ منين جبتي رقم الارهابي؟ كيفاش دخلتي لشومبرتي و ديتي الدراهم؟ انطقييييي قاتلو التلفون تع عمو عابد الله يرحمو قديم و الرقم ديتو من تلفون جدو، كي سمعنها أم سعد تنهدت رفع راسو و قالها تنهدي على راحتك علبالي بلي مادارتش هد الشي وحدها و حكم حلا من شعرها و كركرها و هي تعيط ناضت تعيط يماه صرااااع حرام عليك هدي بنتك و هيام تبوس فيه و تقولو على وجهي يا خويا تعيش خمم في صحتك، و انا حاكمة يدو و نقولو تعيش عمو ما تضربهاش بصح واحد ما قدر يحبسو داها لشومبرتو و غلق الباب عليها نسمعو غير فالعياط و السبان و البكا، و سعد يطبطب ما حبش يفتحلو و إخلاص تبكي و تعيط رايح يقتلها طبعتها هيام قالتلي رايح يقتلك في جرتك وجه الشر منهار ناسبناكم ماربحنا لوكان كاش ما يصرا لخويا نمحيكم كيما راكم.
أم سعد ما طلعتش كامل و الحاجة تبكي و تدعي اللطف ياااارب.
سعد كسر الباب و دخل عيط صراع قالنا لي يدخل نتيري عليه، سعد قالو تحب تيري تيري و نحالوه الطفلة من تحتو كفن و ادفن رفدها و راح يجري بيها للسبيطار، و صراع قعد و يديه يرجفو و نيفو يسيل بالدم رعف، ناضت هيام تعيط و راحت تجري ليه فتحتلو حوايجو و يماه تبكي و تراوحلو و تنسف في وجهو و تدعي يااااااارب في عنايتك و هو ضايقة فيه النفس يشهق و يقول وحدة خلاتلي العار و ماتت و لوخرا جات تخلف بلاصتها و تفضحني، انا ما عرفت وش ندير قتلتني الخلعة نبكي و نخزر فيه خفت يموت جا ينوض حط يدو على الحيط و يتمايل ما قدرش يشد روحو جات تحكمو هيام طاح و هي صاغت يا يمااااا خويا راح ...