مراهقة والاربعيني بلهجة جزائرية

53

#المراهقة و الأربعيني:

#الجزء53:

كان عرس حلا بالجمعة، يومين من بعد صراع قالي لحقت دالتي باش نحكم برمانونس فالكزيرنة ما نجيش حتى نهار الثلاثاء احكمي شومبرتك و ريحي، قتلو معليه.. حطيتلو فطر و خرج.. مع الظهر كنت نكونكتي مع يحي و نحكيو.. فتحت الكاميرا معاه و شفتو شحال تبدل كي حفف.. قعدنا نڨصرو حتى سمعت صوت صراع فالهول تع لفوق و رايح يدخل للشومبرة تخلعت أوووو وش جابو هدا ماشي قال ما يجيش حتى نهار الثلاثاء.. غلقت الكاميرا بلخف و يحي يهدر.. دخل صراع حطيت التلفون داخل الكوفيرطا و نضت قتلو اااا جيت على سلامتك.. قالي وشبيه لونك تخطف؟ قتلو ما بيني والو.. قالي وين راهو تلفونك؟ قتلو علاش؟ قالي وخري تشوفي.. قتلو نسقيلك تتغدا راك جيعان.. قالي وخري برك أنا كي رجعتلك التلفون علبالي كاينة موراك حكاية بعدني و جبد التلفون فتحو راح ديراكت للميسنجر..
يحي كان مسمي روحو (انور الغريب) و داير صورة تع شاب.. غير شافو صراع فتح عينيه و تعنكر فيا قالي شكون هادا لي فتحتي معاه الكاميرا؟!قتلو صاحبتي.. قالي و صاحبتك دايرا اسم راجل؟!
كان لحقني فوكال من عند يحي فتحو سمعو يقولي ( واقيل راكي مشغولة معليه حبيبتي أنا نروح نخدم ما تنسايش تفاصي المحادثة بالاكي يشوفها راجلك) بدا يعيط قالي شكوووون هدااااااا؟!!! تلفتلي الهدرة قلت نقولو صاحبي و ما نقولوش يحي لخطر لوكان يحكموه يقتلوه .. قالي انطقيييييي.. قتلو واحد.. قالي و بصحانية وجه تقولي وااااااحد... شكون هدا انطقيييييي.. ضربني لجنبي حتى تقطعت فيا النفس وليت نتخبط فالقاعة.. كان لابس لاتونو ميليتار ديالو نحى السبتة و طاح عليا بالضرب.. أنا نصوغ وهو يعيط قالي تصاحبي راجل مورا ظهري يا السااااااقطة.. حكمني من شعري و كركرني لتحت كانوا كامل واقفين فالهول ما فهموا فيها والو.. جا يسلكني نائل من يدو بعدو و رماني عند رجلين الحاج و قالو هاد الفاجرة ما تبقاش على ذمتي راهي طاااااااالق..
قالو الحاج استهدي بالرحمن يا وليدي استغفر فهمونا وش صرا؟! قالو تهدر مع راجل في الميسنجر مورا ظهرييييي تكدب علياااااا تقولي صاحبتي و يظهر راااااجل..
قالو نائل يا خويا تهدن خلينا نفهمو..قالو وش تفهممممم؟!! قلتلها شكون هدا قالتلي وااااااحد بصحانية الوجه..
و طبعني برجلو.. الحاجة وقفت ما بيني و بينو.. قالي الحاج اهدري معامن كنتي تحكي.. و الحاجة قالتلي يا بنتي انطقي شكون هاد الراجل؟
قعدت نبكي و نتنخفت.. قالي الحاج و الله غير خسارة عليك أنت يخرج منك هاد الشي؟! حسبناك كي بنتنا و مع لخر تدوري مع واحد مور ظهر راجلك؟ تحوسي على واحد صغير.. قال صراع أنا نروح نجيييييب سلااااحي و نعرف كيفاش نتصرف مع هاد القح.... هو طلع لفوق يجيبو و نائل حبط راسو ليا قالي يا ودي اهدري انطقي.. قالتلو أم سعد علاش راكم تسقسيو فيها ماشي استعرفت لخوك؟ قلتلكم ما عندهاش الأصل و بنت شارع و نتوما ما أمنتونيش..
حبط صراع و السلاح في يدو.. الدراري يتبكاو و يتصاوغو و نائل و نور يشدو فيه و الحاج قال ما دامها ساقطة خليوه يغسل عارها.. و الحاجة خباتني موراها و قالتلو رجعها لخالها و ما تقتلهاش.. لتم نطقت قتلو خويا خويا واحد ما سمعني كي كان صوتي مخنوق و الزڨا و العياط بصح الحاج انتبهلي قالو اصبر اصبر ما نعرف وش قالت ما توسخش يديك بيها اسمعها منبعد اديها لخالها.. دارت ليا الحاجة قلتلها يحي.. قالتلي يحي خوك؟!! قلتلها إيه و بديت نبكي بالشهقة.. قرب ليا صراع قالتلو الحاجة يا وليدي بجاه ربي ما تقتلهاش.. قالها وخريييي.. حكمني من دراعي و نوضني قالي خووووك؟! انطقي هدا يحي؟!! قعدت نبكي و نتنخفت و نرجف.. طلقني و ناض يعيط و يخبط و يكسر كي الهايح قالي علاااااااش ما تقوليلييييش خوووووك؟؟!! تقوليلي وااااااحد... و هوما يحكو فيه.. طلع جاب تلفوني و عيطلو صابو ديجا عيطلي.. غير رفد قالي انعم ليليان.. قالو صراع شكون انت؟ قالو وش حبيت؟ قالو اهدرررر.. قالو أنا يحي خو ليليان.. و يطيح عليه بالسبان  و قالو لوكان نحكمك و ندير و نعمل و يا كدا و يا كدا... قوا الحس فالدار و أنا تغاشيت كي فتحت عينيا صبت روحي فالسبيطار و معلقين السيروم في يدي و الحاجة و نائل عند راسي يهدرو مع الطبيبة..
قالتلهم الجروح لي في جسمها آثار ضرب ماشي تع وحدة طاحت من الدروج دوك ندير رابور و نحولو للأمن.. و هوما يحاولو يقنعوها بلي طحت من الدروج..
كي شافتني الطبيبة فطنت قربت ليا قالتلي الحمد لله على سلامتك.. قولي الصح ما تخافي من حتى واحد.. إدا مضروبة اهدري نكتبلك تقرير.. قالها نائل يا ختي بلا مشاكل الطفلة بنتنا و قتلك طاحت من الدروج و دار ليا قالي ماشي هكدا ليليان؟ ما هدرت والو كنت دايخة
و الكور ديالي كامل يوجع من الضرب ما خلا فيا ما يصلح فيڨورتي ديفورماهالي..
هي خرجت الطبيبة و نائل قالي هكدا خير؟ يا ختي علاش تورطي روحك و جيبي لعمرك المشاكل.. الغباء و عندو حدود.. كاين وحدة تقول لراجلها راني نهدر مع واحد؟! معليش علبالنا خايفة على خوك بصح كنتي تقوليلو راني نهدر مع خويا و تبرري لروحك بلاما تقولي وين راهو.. علاش رايحين نحطولك الموس في الرقبة باش تقولينا وين راهو ولا رايحين نبيعو عروستنا للدولة بلي راهي تتستر على واحد ارهابي.. لوكان هدرتيلو الصح مام يصرا مشكل ما بيناتكم بصح ما رايحش يكون كيما هكدا..
قالتلو الحاجة منهارها حابسة ضرت روحها و ضرت راجلها.. قالتلي هو طلعتلو لاطونسيو حتى طرطق نيفو بالدم و قادر يتجلط في أي لحظة ما حمل غبائك ما حمل كي ضربك.. وشبيك يا بنتي وقتاش ديري العقل و تفهمي مرضتيني و مرضتي راجلك.. هوما يهدرو و أنا ساكتة و دموعي تسيل..
فالليل رجعت هديك الطبيبة عاودت سقساتني قلتلها طحت كيما حاولت معايا قعدت شايدة في كلامي ولات كتبتلي الدوا.. نوضوني باش يخرجوني حكمت الحاجة من يدها قلتلها عيطي لخالي يجي يديني مادام طلقني.. قالتلي الطلاق باطل يا بنتي قالها في لحظة غضب.. قلتلها خلي هاد الكلام ينفعو مانيش حايبا نرجع معاكم عيطي لخالي.. قالتلي امشي برك.  قلتلها هنا تحبس مع وليدك ما نقدرش نكمل معاه خليوني نعيش حياتي مانيش حايبا نرجع..
عيط نائل لصراع فالتلفون حكالو، قالو اديها لدار هيام خليها تريح و تتهدن لتم منبعد يعملها ربي تاويل..
داوني لدار هيام و شرطت عليهم يعيطو لخالي.. كي دخلت لعندها صبتها موجدتلي بونك فالشومبرة الصغيرة داتني لتم و قعدوا معايا ساعة و هوما يهدرو معايا و أنا غير ساكتة منبعد خلاوني نريح و طفاو الضو.. قعدت وحدي نبكي مرة نلوم روحي و مرة نحقد عليه كي ضربني ما رقدتش حتى للفجر و مع الظهر فطنت سمعت صوتو فالهول جابلي الدوا.. قالتلو هيام ادخل ليها قالها لالا راني مزروب خليها هنا ترتاح عندك يمات و راح..
دخلت هيام عطاتني الدوا و قالتلي ليليان علبالي الشي لي صرا ماشي ساهل بصح خمي مليح و الله ما تصيبي واحد من غيرو يدفي كتافك و يحامي عليك.. انساي حكاية خالك و الله غير يحبك ما علابالكش وش صرا فيه.. قلتلها خلاص ما نزيد نآذيه ما يزيد يآذيني كل واحد فينا يروح في طريقو.. قالتلي وشمن طريق يا بنتي وين تروحي؟  قلتلها لي ما عندو أب عندو رب.. أنا وين نروح معذبة خليني نتعذب بلا بيه يمات و نربح روحي خير ما نتعذب معاه طول عمري.. قالتلي يقولو نارك ولا جنة أهلي راكي دايرا الدنيا ساهلة؟ انت وحدك ما تعرفيش تتصرفي و ابن آدم عظمو ثقيل واحد ما يحملو.. تعقلي و خمي مليح..
هي راحت و أنا ساعفت روحي رحت للصالدوبا شفت وجهي فالمرايا وليت نبكي رجعت نخوف.. شفت رجليا كيف كيف.. بديت نشوف فالصالدوبا تفكرت آخر مرة كي كنت أنا وياه نلعبو هنا بالشومبوا و نضحكو و نتباوسو.. تفكرت حبنا بصح كي شفت جروحي ما عرفت نحن ليه و لا نحقد عليه.. بصح لوكان تولي للصح يلزمني نحقد على روحي أنا لي وصلت روحي لهاد الحالة..
جازت 5 أيام و قعدت شايدة في كلمتي باش يعيطو لخالي و ما نرجعش و صراع ما حبش قالهم خليوها تريح و تخمم مليح واحد ما يخرج الهدرة و يحكي وش صرا علاش حتى تكبروها.. صرا سوء تفاهم مع الوقت و تتصلح الأمور..
بصح أنا قعدت في راسي باش نروح قلت خلاص هنا حدها واحد ما يموت بلا لوخر.. تلفوني كان مازالو عندو و وجهو ما شفتوش من نهار صرا المشكل.. سارة بنت هيام كانت مينداك و تعطيلي تلفونها نتفرج بيه و مرات نتفرج فالتلفزيون..
جوايه الوحدة تع الليل كانوا كامل راقدين غير علي ساهر مع النت فالهول.. جا صراع فتحلو الباب و هدر معاه بلعقل قالو راهي راقدة ولا نايضة؟ قالو علي ما علاباليش خالي واقيل راقدة.. راهي وحدها فالشومبرة جوز لداخل.. دخل لعندي للشومبرة كان الضو طافي و التلفيزيون شاعل، درت روحي راقدة، قرب مني مسح على راسي و بعد شعري من وجهي باس خدي و قعد يشوف فيا مدة منبعد جبد النفس تنهد و خرج راح..
ما علاباليش وش راهو يحس بصح كي يجي يديرلي هكداك يخربطلي كياني و يقلب حوالي في لحظة خلاني نحن ليه و نتوحشو بصح هكداك و قعدت رافضة باش نرجعلو.. عييت.. رميت الغطا و قعدت.. ما عرفت نخليه و نروح نشوف حياتي و لا نتحمل على جالو.. طحت في تناقض.. ما نقدر نعيش و نكمل معاه يا لوكان نهار و فالمقابل ما نتخيلش حياتي بلا بيه و لو دقيقة.. اوووف جا خربلي فليسونتيمو وراح ..
غدوا منداك مع الظهر جا الحاج و الحاجة هدروا ما هيام قالتلهم و الله غير عجزت معاها عييت ننصحها و هي في راسها غير تروح لخالها.. عيطولي رحت قعد معاهم عاودولي نفس الحكاية قالولي الغلكة ديالك الراجل عيا فيك خلاص تعقلي شويا بلا نوضي تروحي معانا ديريلنا الوجه و احتارمي جيتنا لعندك.. قلتلهم جيتكم على عيني و راسي بصح افهموا انا مليت ما رايح يموت بلا بيا ما ريحة نموت بلا بيه.. حياتنا كامل مشاكل أنا عييت و هو عيا خلاص.. قالتلي الحاجة لالا ما كاش مشاكل ان شاء الله هو راجلك و المرا الصالحة تعرف كيفاش تكسب راجلها بالكلمة الطية بفراش دافي بماكلة مليحة.. علاش وش طلب منك.. يا بنتي المشاكل جيب غير وجيع الراس.. شفتو كيفاش يجوزلك مام تحوسي على المشاكل راس براس بصح هو همو غير باش تعيشو مرتاحين.. ما هدرت والو قعدت ساكتة حتى قالو خليوها على راحتها.
جازت 3 أيام و جا صراع من الخدمة قبالة لعندنا.. سقاتلو هيام الغدا كلا و قعد معاهم شويا ڨصر معاهم منبعد قال لهيام
ختي راني حايب نهدر معاها..
قالتلو جوز لعندها حنا رانا داخلين للشومبرة نقعدو لتم ونتوما خودوا راحتكم..
دخل لعندي صابني نتفرج فالتلفزيون قالي الله يعاونك.. ما خزرتش فيه، قعد فالبونك قالي نقدرو نهدروا؟ قتلو ما عندي حتى هدرة لي عندي راني قلتو، عيطو لخالي و خليوني نروح، قالي على وشمن أساس تروحي؟ قتلو على أساس تعبت، قالي لالا ما تقوليش عييت.. عييتي من فعايلك  إدا قعدتي تتصرفي بهاد الطريقة تبقاي عيانة طول عمرك.. قتلو إيه أنا ما نعرفش نتصرف خليني.. قالي وعلاش نخليك و أنا نحبك و شاريك؟! و إدا راكي دايرا روحك عييتي أنا راني عيان كثر منك و سبابي أنت.. قتلو علاش حتى نعييك ولا تعييني خلينا نتفارقو و كل واحد يروح في طريقو.. قالي ماكاش حياة مافيهاش مشاكل بصح حنا لي نحلوها، أنا نحبك و أنت تحبيني علاش نبهدلو رواحتينا بلا بعض؟ خليتك يامات تخمي بالاك تراجعي روحك.. قتلو أنا عييت و مارانيش قادرة نزيد نتحملك، ديتها معاك غير ضرب خلاص ارحمني و طلقني و خليني نروح، قالي لالا كيفاش خلاص علاش أنا ضربتك بلا سبة؟ ما ننكرش بلي كي جيتي لعندي مع الأول كامل ظلمتك بصح ياك قتلك ندمت و راني حايب نفتح صفحة جديدة معاك  يا بنت الناس.. منبعد ماتت يماك قلت ما قعدلها حتى واحد من غيري.. تتعداي حدودك معايا و نعفس على كرامتي و نجوزلك و نغلق على السوجي باش واحد ما يسمع..نقول نحمل و نكبر عقلي و كامل يعيطو هو لي فتحلها العين و كبر راسها.. ديري غير الديڨا لي قد راسك و نسامح غير باش ما نشوفكش مهمومة و نخليك تعيشي.. و أنت باش جازيتيني؟ كاش ما عطيتيلي؟ دللتيني و تهليتي فيا؟ حتى حقي الشرعي نديه من عندك بخروج الروح و فوق قلبك.. الماكلة وش تحطيلي ناكل و نسكت حتى و ناقص عمري لا نتقدتك ولا بريزيتك عليها.. الشغل و خليتلك المرا تخدم في بلاصتك كل سمانة باش ما تعيايش.. ماكاش حاجة طلبتيها و لا تشهيتيها و خليتها في قلبك.. نقول يتيمة و راهي في رقبتي ما نظلمهاش و واقفلك كي السيف في وجه أهلي و كامل لي يعرفوني.. وش درتيلي أنت اااه؟ ربي سبحانو يقول ( كل نفس بما كسبت رهينة) و أنت رهينة غلطاتك و غباءك ماشي غلطاتي.. ألف مرة قتلك يا بنت الناس سڨمي روحك و امشي معايا سواسوا و لوكان ندنى ليك راني ما نسواش.. صح ولا راني نجيب من راسي؟ ما تعيشيش دور المظلومة و تتمسكني لخطر أنت لي راكي ظالمة روحك ماشي أنا لي ظلمتك.. قتلو كيفاش هدا ما ظلمتنيش؟ حتى تلفوني عندك زوج سمانات ملي ديتهولي و خليتو عندك و انت علبالك بلي ما هدرتش مع واحد غريب هدرت مع خويا، و مهما يكون يقعد خويا و الشي لي ما بيناتكم ما عندو ما دخلني فيها.. قالي هاد الكلام كنتي تهدريه مع الأول و تفهميني ماشي أنا نسقسي فيك و أنت تقوليلي صاحبتي و كي نفتح و نصيبو راجل تقوليلي واحد و كي نقعد نسقسي فيك شكون هادا تبقاي ساكتة.. روحي جيبي أكثر واحد أوفار فالبلاد و حطيه في بلاصتي و يشوف مرتو فاتحة الكاميرا مع راجل و تقولو واحد و موراها ما تزيد حتى كلمة و شوفي وش رايح يدير.. قتلو تلفوني علاش راك حارمني منو؟ قالي أنا نهدر معاك في حاجة و أنت تخمامك فالتلفون؟! انت دراري لهاد الدرجة؟! رايحة جيبيلي جلطة أنت علبالك؟ سكتت.. جبد تلفوني من جيبو و قالي هاكي و امشي تروحي معايا هكدا ما بقاتلك حتى سبة.. خلاص و الله غير راني نتحرق بلا بيك.. قتلو خلاص خليني مانيش قادرة نرجع اعتقني.. قالي وين تروحي؟ قتلو راك حاڨرني عندبالك ما عندي حتى واحد.. قالي أنا حڨرتك؟! كاش نهار حسستك بلي ما عندك حتى واحد؟ ماشي دايمن نقولك أنا أهلك ما تعمري راسك بحتى واحد؟ وين راكي حايبا تروحي؟ قتلو حايبا نطلق و نعيش حياتي نشوف الدنيا مليت من مشاكلك و من أهلك و من معيشتك.. قالي بان يحي استقويتي بيه؟ تشري لي باعك و تبيعي لي شراك؟ قتلو ما نحوس لا نبيع لا نشري.. قالي راك منيتك طامعة بلي خالك يستقبلك؟ و صدقتي بلي يحي تاب يا الحابسة؟ ما تاب ما والو.. المنطقة ديالكم خلاص تحررت و يامات و تصدر الدولة بيان الانتصار مور ما نديرو عملية تمشيط للمنطقة.. ماكاش واحد فيهم تاب.. يحي راهو هارب هو و جماعتو لخطر خلاصت و تكشفت لعبة الإرهاب.. طلب من عندك دراهم؟ قتلو لالا و زيد حاجة تخصني إدا رحت معاه ولا صدقتو.. قالي لالا ما  تخصكش و الطلاق ما نطلقكش و باش تعيشي مع يحي انسايها.. هدا تزير فالدراهم حب يستفاد على ظهرك غير يكمل صلاحو يعاود يبيعك.. ما تكونيش حابسة ديري العقل و بركاي من هاد الخدايم خلاص مرمدتيني و مرضتي قلبي معاك.. قتلو راك حايب نرجعلك ياك؟ قالي ادا عندك كلام اهدريه راني نسمع فيك.. قتلو تشريلي دار وحدي و نرجع لقرايتي.. قالي اسمعي أنا جيت لهنا باش نراضيك و تقلقت كي ضربتك بصح باش تستغليني غير انسايها لخطر طلباتك ما عندها حتى علاقة بالمشكل لي صرا.. دار و شريتلك و ما خالاونيش وش حبيتيني ندير؟ و القراية هدرنا من قبل في هاد السوجي ما تبقايش ديري فالسبايب.. قتلو هدا لي عندي.. قالي براحتك تحبي تبقاي هنا عند هيام يومين شهرين ما عنديش مانع.. قتلو عيط لخالي.. حكم يدي حطها ما بين يديه و قالي استعقلي و خمي مليح حياتك ماشي لعبة.. قالها لي و خرج..
قعدت نخمم في كلامو ما عرفتش إدا راني ظالماتو بصح لوقتاش؟ لازم نعيش.. فتحت تلفوني صبتو ديزانسطالا الفايسبوك و الميسنجر و ما فيهش النت و هيام ماشي مدخلة الانترنت على جال قراية ولادها و هي مبرطاجي من عند جيرانهم..
عندي النيميرو تع يحي بعثتلو ميساج كتبتلو فيه يحي أنا ليليان.. سنيتو ما واجبنيش.. عيطتلو ما رفدليش حتى لليل باش رفدلي التلفون قتلو ألو يحي.. قالي وي ليليان وش صرا عرف راجلك؟ قتلو إيه.. قالي وش دار؟ قتلو مانزيدش نعيش مع هاد الهمجي خلاني غير دمومات حتى بعثوني للسبيطار.. طلقني بصح دوك يحوس يرجعني.. قالي منك بالصح؟ قتلو إيه و الله.. يحي ارواح اديني عييت ما نقدرش نعيش عندو.. قالي جي معايا لتركيا؟ راني مسافر بعد 4 أيام.. قتلو نخاف.. قالي تخافي منو؟ ياك خلاص طلقك ارواحي معايا نعيشو لتم غير أنا و ياك و نساندو بعضانا.. قتلو بصح كيفاش؟ صعيبة.. قالي صعيبة مع الاول برك منبعد نعيشو حياتنا..
تركيا و برطما و شهرية و ادا حبيتي حتى تكملي قرايتك.. علاش راك قاعدة عندو غلطة و صرات خلاص خليك منو و ارواحي.. قتلو كيفاش جي ليا؟ قالي روحي لدار خالك و أنا نجيك نرفدك ملتم.. قتلو ما يحبش يديني.. قالي وش راحلك فيه عيطي لخالك اهدري معاه يجي يديك.. قتلو ما نعرف.. قالي وش ما تعرفيش ليليان ما تبدايش تكعري عليا مازالي 4 أيام برك و نسافر.. قتلو يحي ما نقدرش نتخيل حياتي بلا بيه صح آذاني بصح... قالي وشنو بصح؟ خلاص و زيد كبير عليك.. نديك لتركيا و توالفي و تعيشي لتم حياة وحدوخرا و تقراي.. قتلو ما علاباليش..
قعدنا نحكيو شويا و كوبيت.. بقيت نخمم قلت في قلبي تركيا أوروبا نلبس بلا واحد ما يحاسبني و نقرا و نخدم.. حياة وحدوخرا ما فيها لا الحاج لا أم سعد لا مشاكل.. بصح لوكان نروح مانزيدش نشوف صراع في حياتي يعني ما نعاودش نسمع الغزل ديالو ليا و ما نزيدش نشم ريحتو.. ما نقدرش هكدا نموت ما نقدرش نحمل بلا بيه نحبو.. بصح حبو آذاني لازم نربح روحي نوالف مع الوقت بلا بيه و نعيش حياتي.. خلاص قررت و عيطت ليحي  جوايه ال4 تع الصباح نوضتو من الرقاد، رفدلي قالي خير وش كاين؟ قتلو حبيت نسقسيك شحال باش نستقرو في تركيا؟ قالي شهرين.. علاش؟ قتلو يعني شهرين منبعد نعيشو بشكل طبيعي؟ قالي إدا كان عندنا الدراهم نعيشو كي السلاطين ماشي غير طبيعي.. عندك الدراهم انت؟ قتلو أنا آاااا ما نعرف.. قالي جيبي وش عندك دراهم و ذهب تعيشي كي الملكة.. قتلو بصح الدراهم و الذهب عطاهملي صراع.. قالي خلاص مادام عطاهملك يعني رجعو ملكك ولا كي تخدمي حلال و كي تدي الدراهم حرام.. شحال عندك كلشي؟ خبرتو شحال عندي الدراهم و الذهب قالي ممتاز جيبي كلشي و خلي الباقي عليا و الله غير تعيشي كي الملكة.. قتلو بصح نخاف.. قالي ما تخافيش غير نفوتو نخرجو واحد ما يقدر يهدر معانا.. قتلو صحا كيفاش نروح لدار خالي ما حبش يديني..قالي عيطيلو وشبيك؟ قتلو ما عنديش النيميرو ديالو ابعثهولي إدا عندك قالي دوك نبعثهولك.. كوبينا و قعدت نخمم حتى رقدت و ما فطنتش حتى مع الظهر رحت لهيام قلتلها خصوني حوايج من داري.. قالتلي مع العصر نروح لتم و نجيبلك..
رحت لجنات قلتلها نطلب منك حاجة لوكان ديريهالي نعطيك براسلي كادو.. قالتلي وشنو؟ قلتلها بصح تواعديني ما تقولي لحتى واحد.. قالتلي و الله ما نقول.. قلتلها كي تروحي مع ماماك لعشية باش جيبلي حوايجي.. روحي للقجر ديالي تصيبي باطة حمرة فيها ذهبي، و زيدي روحي للخزانة تصيبي دراهم حاطتهم في وسط تريكو وردي ما بين حوايجي جيبيهملي.. قالتلي وش ديري بيهم؟ قلتلها نلبسو كي نروح نشري من السوق.. قالتلي أوكي.. قلتلها بصح ردي بالك كاش واحد يشوفك.. قالتلي أوكي.. ضحكت..
مع العصر راحت هيام و أنا طلعت للسطح عيطت لخالي فالنيميرو لي بعثهولي يحي.. رفد عليا قتلو خالو أنا ليليان.. قالي أهلا وش راكي صحتك لاباس؟ قتلو مارانيش مليحة تقدر جي تديني؟ قالي خير وش صرا؟ حكيتلو كلشي و قتلو بلي طلقني.. قالي راكي تهدري بالصح؟! قتلو إيه و الله خالو بصح حب يرجعني و أنا رافضة.. تقدر جي تديني؟ قالي مانيش هنا راني بعيد عندي شغل كي نرجع نجي نديك.. قتلو وقتاش ترجع؟ قالي فالويكاند.. قتلو ما تقدرش في هاد اليومين؟ قالي و الله ما نقدر اصبري هاد السمانة برك و أنا نجي نشوفك و نهدر مع راجلك و إدا ما تفاهمناش نديك.. تنهدت و قتلو معليش أيا تبقى على خير و كوبيت..  عاودت عيطت ليحي حكيتلو.. قالي تقدري جي للڨاراج فالعاصمة و أنا نديك ملتم.. قتلو لالا أنا آخر الشارع ما نعرفش نوصلو و زيد نخاف ارواح انت اديني.. قالي وشبيك انا ما نقدرش نجي لوين راكي صعيبة.. احكمي طاكسي يوصلك للعاصمة كي تلحقو لتم جوزيهولي فالتلفون أنا نڨيديه يوصلك لوين راني و نرفدك ملتم.. قتلو لالا أنسى خلاص ما نروحش.. قالي عندك الدراهم و الذهب ولا ما عندكش؟ قتلو بعثت بنت لوستي جيبهملي..قالي خلاص ما تخافيش احكمي طاكسي كيما فهمتك.. لإدا ما تقدريش تسلكي راسك هنا كيفاش معولا تعيشي فالخارج؟ قتلو و الله ما علابالي بصح نخاف.. قالي يمال ريحي و خلي صراع يمشيك كيما هوالو.. اشفاي بلي قلتلك ارواحي ماشي منبعد تقولي قصر خويا معايا..
قعدت نخمم و كل شويا نعيط ليحي فالتلفون و نسقسيه كيفاش حتى تقلق مني..
جات جنات و جابتلي وش وصيتها فالساكادو ديالها تع المسيد.. خبيتهم في وسط الفراش..
كي بدا يطلع الفجر كانو كامل راقدين ديت تلفوني و دراهمي و ذهبي و تكلت على ربي..
[البنات هنا كانت خرجت ليليان من الدار و صراع لي يبدا دوك يحكي كيفاش حتى عرف و وش دار]
قال صراع: صونا تلفوني رفدت قلتلها أهلا أم علي غير لخير؟ قالتلي صباح الخير أبو حرب وين راك؟ قلتلها راني خدام علاش كاش ماكاين؟ قالتلي حبيت نسقسيك برك إدا تصالحت أنت و ليليان؟ قلتلها ما تصالحنا ما والو مازالها راكبة راسها.. قالتلي و كيفاش قبلت تروح معاك؟ قلتلها تروح معايا؟؟!! وين تروح معايا؟؟!! قالتلي يعني أنت ماجيتش فالليل و ديتها؟! و أنا عمبالي تصالحتو.. قلتلها اصبري اصبري وشنو هاد الحكاية أنا ما ديتش ليليان من عندك.. وين راهي؟؟!! قالتلي و الله يا خويا غير نضت الصباح ما صبتهاش عمبالي ديتها يمال وين راهي؟! قلتلها تسقسيني على الطفلة و هي عندكم هياااام.. قالتلي دوك نعيط ليما بالاك راحت للدار..
كوبيت و عيطت في تلفونها عيطت ما ترفدليش زدت تقلقت كثر.. جيت نعيط ليما النيميرو  تلفلي حتى خبطت في وحد العسكري طاحلي التلفون ما شفتوش و أنا نمشي، طلبت منو السماح و رفدت التلفون من القاعة طفى و النار شاعلة فيا وين راحت هادي يعني خرجت.. شعلتو و عيطت للحاجة غير رفدت قلتلها يما عيطتلك هيام؟ قالتلي إيه عيطتلي و حكاتلي.. ليليان ما جاتش للدار.. قلتلها اسمعيني يما ردي بالك تحكي لكاش واحد حتى الحاج ما تخبريهش و الله لوكان يسمع واحد ما تفرا.. طلعت فالطونوبيل نوضتها و رحت نمشي بيها 180 كم/سا .. نحك في وجهي حاير وين راحت و هي ما تعرفش توصل حتى لآخر الشارع.. حكمت التلفون عيطت لأم علي قالتلي أبو حرب الطفلة ماكاشها حوست الدار كامل.. قلتلها وشنووووو... كيفاش طفلة تخرج من الدار و أنت ما علابااااالكش.. كي راحت ما حسيتي ما سمعتي البيباااااان كي تفتحو... قالتلي و الله ما سمعت تهدن خويا.. كوبيت و بديت نضرب فالفولو أعصابي تحرقو وين راهي مرتييييي..
عيطت لخالها رفدلي قتلو ألو أبو حنا.. قالي أهلا أبو حرب.. قتلو برك حبيت نسقسيك على ليليان ما جات لعندكم ما عيطتلكم فالتلفون؟ قالي أنا راني بعيد و عيطتلي لبارح باش نجي نديها على أساس طلقتها و قلتلها فالويكاند نجي.. قتلو يحي وين راهو؟ قالي يحي راهو هارب مع صحابو و رايحين يطلعو لتركيا.. قتلو شكون صحابو منين تعرف خباراتو؟ قالي خويا يسكن قريب ليهم و يعرفو.. قتلو شكون هادو صحابوووو؟! قالي هاربين من الارهاب.. قتلو قصدك جماعة تع إرهاب هاربين من المنطقة بعد ما انهزمو هكدا؟ قالي إيه.. قتلو يتسمى ليليان راحت لجماعة تع إرهاب.. قالي علاش وين راهي؟ قتلو ليليااان خرجت من الدار الصباح أبو حنااااا... واحد ما علابالو وين راهي.. قالي أبو حرب مستحيل ليليان ما تعرفش تخرج وحدها.. قتلو ليلياااااان ماكاشها و لوكان يوصلني خبر بلي علبالكم وين راهي قسما بالله العلي العظيم غير تخلصوها غالية.. إدا كاش ما سمعتو عليها خبروني ولا ما تلومو غير رواحتيكم و كوبيت..
عاودت عيطت فالتلفون ديالها كيف كيف يصوني يصوني و ما ترفدش وليت نعيط ارفدي يا بنت الناااااااااس...
وصلت لدار هيام حبطت و نضت نخبط فالباب بالزور.. دخلت قلتلها هيااااام ليليااااان وين رااااهي.. راحت مع خوها مع كيلكة تع ارهاب و أنت لا خبر.. قالتلي تهدن خويا ما يكون غير لخير.. قلتلها وش نتهدن.. اسمعي أم علي ردي بالك جيبي سيرة لكاش واحد ما نحتاج حتى واحد يعرف بلي راحت.. شيبتني و بهدلتني الله لا تربحهااااا.. هادي لي واقف و نعرض في صدري و نضارب على جالها تبيعني و ترووووح و تحط راسي فالطييييين.. وش نقول لأهلي و عشيرتي مرتي ما علاباليش وين راهييي.. خرجت من عندها نعيط و رحت لداري دخلت النار شاعلة فيا سقساوني وش بيا نضت نعيط قلتلهم ما بيني وااااالو... طلعت لشومبرتي حوست في خزانتها ما صبتش ذهبها و الدراهم و باسبورها و كوارطها.. أوووو هادي وقتاش دخلت هنا و دات كلشييي؟؟!! وليت نرفد و نكسر فالشومبرة و نعيط على آخر صوتي..  رجعت كي المهبول.. ما نقدر نهدر و نحوس عليها ما نقدر نسكت و نحوس وحدي.. وين نصيبها وين نروح وين نحوس.. نعيط ما ترفدش التلفون.. و الله و نحكمها غير نقتلها..
خرجت من الدار ندور فالزنيقات و عقلي طار من راسي.. عاودت عيطت فالتلفون رفدت عليا نضت نعيط ألووووو.. قالولي ألو انعم تفضل.. استغربت قتلو شكون أنت ؟! وين راهي مولات التلفون؟! قالي أنا الطاكسيور لي طلعت معايا نسات صاكها فالطونوبيل فيه التلفون و باسبور و كوارط باسم ليليان جرجيس و ذهب و دراهم.. قتلو و هي وين راهي؟! قالي ما علاباليش أنا وصلتها للڨاراج و رحت.. قتلو وين راك أنت دوك راني جاي لعندك.. عطاني العنوان كوبيت و بديت نضرب فالفولو حاااااابسة.. مغندفة.. بحرت كلشي و زادت تاهت كلبببببة من غير نحكمهااا..
رحلت للطاكسيور تلاقيتو قتلو عقداش طلعت معاك و وين وصلتها؟ قالي جوايه ال8 تع الصباح.. قتلك وصلتها للڨاراج يا خويا أنا خاطيني المشاكل و ما نديش الحرام هاكهاد الأمانة سلمها لمولاتها.. قتلو خويا نتعبك معايا الطفلة يتيمة و ما عندها حتى واحد و دوك زادت بحرت كلشي.. ما علابالكش وين راحت ما حكاتلك والو؟ قالي الطفلة ملي طلعت ما تعرف والو قالتلي اديني للڨاراج لي يخرج للعاصمة.. قتلو العاصمة؟!! وش عندها فالعاصمة؟! قالي و الله هدا وش قالتلي.. ديتها للڨاراج كي وصلنا لتم سقسينا على الطاكسيات لي يديو للعاصمة قالو على ال7 تع الصباح..
رحت لاجونس سقسيت قالولي كاينة طاكسي خرجت على ال9.. عيطو للراجل لي كان رايح للعاصمة سقساوه قالهم إيه طلعت معايا طفلة كانت تبكي تبحرلها صاكها و دوزانها و ما عرفتش وش دير وصلتها للڨاراج و راحت..
وليت نسب و ننعل دوك أنا هاد المغندفة وين راح نصيبها..
نوضت الطونوبيل و رحت للعاصمة حرت وين نحوس وين نلقاها الطفلة خارجة لا دراهم لا تلفون و في نص البلاد.. فتحت تلفونها صبت يحي معيطلها 5 مرات.. صار هكدا و تزيد تعيطلو مور ظهري.. عيطت رفد عليا قال ألو ليليان وين راكي واصلة؟  قتلو اليوم نحكمك يا *********** وين راااااهي ختك؟ كوبا بلخف.. عاودت عيطت طفا التلفون.. نضت نعيط قلت هداااا تامنيه على روحك ليليااااااان.. تبيعيني على جال واااااااااحد جربووووع ..
كنت نعيط و نخبط فالتلفون ما فقتش حتى حسيت بطونوبيل خبطت فيا.. حبطت قالي السيد وشبيييك ما تشوفش؟! قتلو أيا قادر روحك أنت الفوتيف.. قالي انت لي ماراكش جايب خبر لروحك شوف وش درتلي فالطونوبيل.. قتلو يمال وش نقول أنا شوف طونوبيلتي وش صرالها.. بعد عليا خير ما ندخل فيك دوك.. قالي ااااااا على حساب الشوفة ارهابي و جاي تتفرعن عليا.. قتلو أنا ارهابي؟ يمال ارواح لهنا تشوف وش ندير فيك.. دخلت عليه بالضرب خرجت فيه كامل زعافي منبعد طبعتو و قلعت بالطونوبيل رحت حارڨ يدي بالدم و داخل على الدخان الڨارو مور خوه و كل تنهيدة رافدة معاها هموم الدنيا.. راسي قتلني و كل شويا يتطرطق نيفي بالدم من لاطونسيو.. قعدت نحوس عليها حتى ال10 تع الليل منبعد قدمت بلاغ للشرطة بمواصفاتها و خليت النيميرو ديالي..
مرة نولي نسب و ننعل و مرة نرفع وجهي للسما و نقول ياربي راهي أمانتك احميها من كل مكروه و بعد عليها ولاد الحرام..
رحت لدار أبو صفاء فتحلي هو قالي أهلا أبو حرب زارتنا براكة.. قتلو أهلا.. قالي غير لخير ماراكش تبان في حوالك؟ قتلو ما بيني والو برك قولهم يوجدولي الدوش يرحم والديك راني ميت..
رحت قعدت فالصالون شعلت ڨارو و بديت نتكيف دخلت اسمهان قالتلي أهلا أبو حرب وش راك توحشناك.. قلتلها وجديلي الدوش بلخف.. قالتي غير الخير كاش ما كاين؟ تعنكرت فيها سكتت و راحت..
دخل أبو صفاء قالي خير وش صرا احكيلي يا وليدي.. قتلو و الله ما عرفت منين نبدالك راني حاير في زماني.. داوست أنا و مرتي صرا سوء تفاهم و عيطلها خوها هداك الكلب الارهابي و خرجت من الدار باش تروح لعندو و بحرت دوزانها و خوها ما علابالوش وين وصلت مانعرف وين راهي.. قالو بصح تبان طفيلة عاقلة.. قالو أنا لي زاد قتلني وين رايح نصيبها..
دخلت اسمهان قالتلي أبو حرب راني وجدتلك الدوش.. قالي أبو صفاء نوض وليدي دوش و ريح و الصباح ان شاء الله نروح انا و ياك لواحد  نعرفو هو يعاونا..
جيت رايح ندوش حبستني اسمهان حكمتني من يدي قالتلي وش صرا أبو حرب؟ خزرت فيها و خزرت في يدها حشمت جبدت يدها خليتها و دخلت للصالدوبا..
اسمهان هي مرتي بالفاتحة برك بصح ما بيناتنا حتى حاجة.. تزوجت بيها قبل ليليان بعام و نص برك على جال وصية صاحبي المرحوم على ولادو لخطر اهلها ما قبلوش الدراري و أبو صفاء ما قدرش يعيشهم هو انسان كبير و قيسو قيس روحو.. سكنت الدراري في داري مع جدودهم و هي خليتها معاهم بعقد شرعي فتحلنا الشيخ باش ما يفرقوها على ولادها و انا نقدر ندخل و نخرج بلا احراج  كي نتفاقدهم لخطر كنت متكفل بيهم.. و هاد الشي يعرفوه غير أهلي و شويا من الفاميليا و واحد ما معتبرو زواج.. أنا أصلا ماشي متقبلها على جال كي كانت مرت صاحبي الله يرحمو على هديك لي كنت متزوج مع أم مصطفى مالڨري كانت اسمهان كاينة لخطر ما قدرتش نتوشيها من غير مرة وحدة هي طلبت و أنا ما قدرتش نرفضها و نهينها جوزتها فوق قلبي كنت نشوف صاحبي صفاء الله يرحمو ما بيناتنا.. منبعد موراها وليت كلما نجي ما نخليهاش قريبة و نزبط وجهي فيها مالڨري علبالي بلي عندها حاجة في قلبها من جيهتي بصح ما قدرتش نعتبرها زوجة شرعية..
و كي جات ليليان لعندي عمري ما جبت سيرتها و أهلي أصلا ماشي معتبرينها زوجة بحكم الظروف لي درنا على جالهم الفاتحة على جال الدراري..
علبالي ليليان حساسة و أنا دايمن نجي للعاصمة بحكم خدمتي ماشي غير من ليوم من قبل ما تدخل ليليان في حياتي.. و علبالي لوكان تعرف تحرق روحها و تحرقني معاها و تتقلب حياتنا مشاكل فوق ماراهي مقلوبة.. على هديك قلتلها ما عندي معاها والو و صح ما عندي معاها والو ما كدبتش عليها ما كان حتى حاجة في قلبي من جيهتها..
قعدت يومين و أنا نحوس عليها فالعاصمة و قلبي محروق ما خليت حتى بلاصة ما حوستش فيها حتى المنظمات و المؤسسات.. ما فهمت وين راحت ما عرفت وش صرالها.. قلت معليه ما نحتاج والو منها المهم نطمن بلي راهي بخير و واحد ما دنى ليها.. ما قعدلي حتى عقل في راسي عييت و تقنطت حتى ال3 تع الليل صونا تلفوني بنيميرو ما نعرفوش رفدت بلخف قلت الوووو ......