مراهقة والاربعيني بلهجة جزائرية

جزء الثامنة✨

#المراهقة و الأربعيني:

#الجزء الثامن:

رقدت و وشمن رقاد بايتة نتقلب من السطر مرة نغفى مرة نفطن راسي بدا يوجع و السخانة طلعتلي قعدت هكداك حتى سمعت الآذان تع الفجر و الحاجة ناضت من فراشها و تقول يا حي يا قيوم و خرجت و بدات الحركة في الدار ناضو يصليو.
راحت الحاجة توضات و عاودت رجعت طرحت السجاده و بدات تصلي، كي كملت دخل صراع قالها صباح الخير يما قالتلو صباح الخير وليدي، سلم على راسها و قالها ربي يتقبل قالتلو يتقبل منا و منكم و ربي يحفظك من كل شر بجاه السميع العليم قالها و يحفطك يا رب،منبعد قالها و هادي كيفاش راهي؟ قالتلو و الله مسكينة بايتا تتوجع غاضتني قرب ليا و طابس راسو وحط يدو على جبهتي قالها هادي راهي تغلي بالحمى، قالتلو قول و الله يا عمري عليها مسكينة، ما عندكش حاجة تحبط الحمى براسيتامول و لا حاجة؟ قالها والله ماعلبالي ما نعرفش بزاف فالدوا هيام لي تعرف و ناض جاب الدواوات و قعد يحوس حتى صاب كاشيات قالي نوضي اشربي من هادو دوك تريحي قلتلو مانيش قادرة قالي ماشي كيما تحبي حبيتي تموتي و تحصلي في راسي نوضي نوضي، درت و عطيتو بظهري و ما وجبتوش، دار ليماه قالها يما هاكي شربيها الدوا انا ما نشدش في روحي و هي راهي مريضة و زيد مانيش قادر نجري بيها فالسبيطارات من دوك، قالتلو روح دوك انا نشربها، قالها راني رايح نرقد وحد السويعة و كاش ما كاين خبريني، خفت نقعد معاها و ما نفطنش للخدمة، قالتلو روح ترقد راني معاها.
كي خرج جات ليا قالتلي نوضي بنتي تشربي دواك قلتلها و الله يا الحاجة ما راني قادرة حايبا نرقد برك، قالتلي إيه معليه نوضي اشربي الدوا و ارقدي باش تصبحي مليحة، ساعفت روحي و نضت شربتو و عاودت رقدت حتى حسيت بيد على جبهتي فتحت عينيا صبتو صراع، ما هدر والو دور وجهو عليا و قال ليماه راني رايح نخدم و كاش حاجة و لا خبريني.
نوضتني الحاجة باش ناكل ما قدرتش ولات غطاتني و كملت رقدت.
نضت باش نروح لتوالات صبت حلا فالشومبرة قلتلها تعيشي عاونيني نروح خزرت فيا ملفوق لتحت و رجعت تخنتش في تلفونها، سندت روحي على الحيط و بديت نمشي حتى نشوف في تلفون الحاجة سيلونسيو شاعلل بالضو و مكتوب أبو حرب، درت لحلا قلتلها أبو حرب راهو يعيط ناضت رفدت التلفون سمعتها كي رجعتلو السلام و قالتلو رانا ملاح منبعد خزرت فيا و قالتلو ما بيها والو راهي كي العود وش خصها، خليتها و خرجت، تلاقيت مع نوال قالتلي وين راهو خمارك لوكان يشوفك أبو حرب خرجتي بلا بيه ما تسلكيش منو، قلتلها سيتو لبارح فالمخزن و كملت مشيت صبت الصالدوبا مغلوقة قعدت نستنا حتى خرج وحد الطفل هو راح و أنا دخلت.
غسلت يديا و رجعت للشومبرة، كي توشيت الما حكمتني الحمى بالبارد وليت نرعش نحس عضامي يسطرو، دخلت الحاجة سقساتني قالتلي كيفاش راكي تحسي روحك قلتلها الحمد لله احسن، دخلت موراها أم سعد قالت واش العروسة وقتاش معولة تنوض راهي الطناش يا لالة، قالتلها الحاجة خافي الله الطفلة راهي مريضة ليل كامل و هي تنازع من الحمى بايتين نتفاقدو فيها، قالتلها بايتة انت و وليدك سهرانين على جال خت الإرهابي شغل ماراكمش حازنين على وليدي، قالتلها يا مخلوقة هي وش دخلها افهمي ماشي هي لي قتلاتو و إدا كان خوها لي قتلو لا تزر وازرة وزر أخرى حرام عليك تحاسبيها بذنب خوها قالتلها هي لي غرت بوليدي و تقوليلي ما عندهاش ذنب كامل وش صرا بسبتها علاش راكي دافعي عليها، قالتلها ما راني ندافع على حتى واحد بصح واحد ما علابالو وين راهو الصح مادام وليدك توفى الله يرحمو و راهو عند ربي فواش رايحة تفيدك المشاكل رايحة ترجعو؟ خلاص يا أم سعد هدا ما كتب الله و هو طاحت ورقتو الله يرحمو خلي الطفلة طرونكيل، قالتلها وليدي حلف على المصحف هي لي كدابة و الله ما يبرد قلبي حتى ناخذ ثار وليدي منها و جات ليا حبت تضربني تخبيت مور الحاجة و نبكي  و عياطهم قوا و تلفون الحاجة يصوني ما حبسش، كي انتبهت الحاجة لتلفونها و لوخرى عرفت بلي صراع لي راهو يعيط قطعت حسها ضربة وحدة و راحت عرفتها بلي تخاف منو، رفدت الحاجة عليه و قالتلو اهلا وليدي لاباس ... ماكاين والو ما سمعتوش برك ... خلاص ما تتقلقش لاطونسيو تطلعلك ... إيه راهي مليحة خير ملي كانت ريحت شويا ... ما تعمرش راسك المشاكل تنحل يا وليدي.
كملت معاه شافتني نمسح في دموعي قالتلي فوضي أمرك لله يا بنتي اثبتيلهم بلي راهم غالطين فيك و ندميهم على تصرفاتهم هادي و باستني من راسي. رجعت رقدت حتى حسيت بيد في ظهري كي درت صبتو حرب ضحك معايا تبتسمت معاه قالي جبتلك حليب و كايك تاكلي؟ درتلو براسي لالا و فاتوني دموعي قالي علاش راكي تبكي بابا ضربك؟ درتلو براسي لالا قالي يمال وشبيك قتلو توحشت دارنا قالي توحشتي باباك؟ قتلو بابا ميت قالي مام انا ماما ميتة
غاضني كي قال هكدامسحت على راسهو قالي ماشي لبارح تفاهمنا نكونو صحاب؟ وش رايك نوليو خاوة قتلو خلاص متفاهمين، باسني على خدي و عطالي الكيك و الحليب و قالي أنا نروح نكتب. خليت الفطور في بلاصتو ما قدرتش ناكل و عاودت رجعت رقدت عاودت طلعتلي الحمى و رجعلي وجيع راسي و عظامي، نشف ريقي و عطشت و الحاجة ما جاتش ما قدرتش نوض باش نروح نشرب طفيت كامل عينيا ما قدرتش نفتحهم انا هكداك حتى سمعت صراع عند راسي قال ماشي قالولي ريحت و راهي مليحة؟! هادي راهي تغلي بالحمى يمااااااا يمااااا وين راكي؟ و جا باش يعاوني قالي علبالي ماكيش قادرة بصح ديري شدي روحك نوضي نوضي معايا حتى دخلت يماه تجري قالها يا يما وين رحتي هدا لي وصيتك عليها زعما قالتلو وشبيها؟ قالها الطفلة تغلي بالسخانة و انت تقوليلي وشبيها، أنا عينيا ما قدرتش نفتحهم و هو يضبح عند راسي، قالها امشي تروحي معايا نديوها للسبيطار قتلو لالا ما نروحش اعطيوني برك الما نشرب تعيشو، دار لبنتو لي كانت متكسلة من الصباح و ما رحمتنيش لاتية غير بتلفونها، قالها حلا روحي جيبيلها الما قالتلو قول لحرب يجيبلها عيط عليها حلااااااا خافت راحت جابتلي شربت قالتلي الحاجة نوضي بنتي نديوك يشوفك الطبيب نضت نبكي قلتلهم  تعيشو اديوني نشوف ماما قالتلي يا بنتي و الله ما غرضي حتى هيام ليوم ما جاتش علبالي هي تنحيلك على خاطرك، قالها صراع حقا صح ليوم ما بانتش ماشي من عوايدها ياك موالفة غير توصل ولادها للمسيد جوز للدار قالتلو راهي زعفانة من لبارح قالها و شكون لي زعفها؟ قالتلو كي قلتلها اسكتي و بركاينا من المشاكل قالها يما منك بالصح لي راهم يديرو المشاكل كامل واحد ما هدرتي معاه  و ما صبتي غير هيام سينورمال تزعف.
راني داير ليوم صدقة على المرحوم دوك نجوز عليها للدار نجيبها هي و ولادها تتعشى هنا و انت اقعدي مع هادي و عسيها و خرج.
شويا هكدا و دخلت هيام قالت وش راهي الطفلة قالتلها يماها اهلا بالغضبانة لوكان جات هاماتك لوكان راكي جيتي من الصباح ماشي حتى لدوك قالتلها و الله غير حار الواحد كيفاش يرضيكم جينا ما سلكنا قعدنا كيف كيف و جات مستني قالتلها ياخاااااه هادي علاش راهي سخونة هكدا؟! دخل أبو حرب قالها اهلا ام علي قالتلو أهلا بيك خويا، قالها إدا تحتاج طبيب قوليلي حتى باش نديها دوك قبل ما يطيح الليل قالتلو لالا دوك نعطيلها تخاتمو و نديرلها تشكة تولي هايلة إن شاء الله قالها أيا مليح منبعد قالتلي نوضي بنتي نوضي ياخاه مازالها لدوك بحوايجها لي جات بيهم ما كاش واحد فيكم رد البال و عطالها تبدل و قالت ليماها وين راهي فاليزتها؟ وراتهالها راحت جابتها و فتحتها باش تعطيني وش نبدل و هو يخزر حتى نطق قالها ما تلبسيلهاش من هادو ماشي مستورين، فتحت خزانة حلا و جابتلي جبة و قالتلي نحي تريكو نعاونك تلبسي قلتلها بلعقل ما نقدرش راهو هنا حشمت قالتلي راهو لاتي بتلفونو ماشي من عوايدو يخزر و يدقق، خزر فينا قالنا وش كاين علاش راكم توتوتو قالتلو حبيت نبدلها حوايجها و حشمت منك قالها مادامك أنت هنايا أنا نطلع نرقد و الله غير راني عيان نتكل عليك اختي قالتلو روح تريح كون هاني راني معاها، غير خرج أنا نحيت التريكو و هي شافت ظهري تشوكات عيطت قالتلي ياخااااه وش بيك راهو كامل زرق هو سمعها عاود رجع قالها وش كاين؟ قالتلو شوف ظهرها كيفاش راهو و انا زربت جبدت الغطا و غطيت روحي قالها وشبيها وري نشوف ما حبيتش قالتلي هيام راهو راجلك ليليان خليه يشوف وشنو هدا، قالي شويا برك ما تخافيش و حط يدو على كتافي و بعد شويا الغطا و انا قعدت مغطية صدري قالها ما تكونش زعما كي راهي مريضة قالتلو لالا هدا من الضرب تع أم سعد لبارح، زربت غطيت ظهري و قلتلها لالا ماشي هي ضربتني خويا قالتلي خوك ضربك هكدا؟ قلتلها إيه كي ما حبيتش نتزوج بقى يعفس فيا على ظهري قالتلي الله يجيبهالو وش بيه هدا هبل؟ و دارت لخوها قالتلو شفت حتى هي و فورصاوها باش تتزوج بيك قالي صراع و هو علاش فورصاك على الزواج قلتلها طاطا تعيشي لبسيلي تريكويا دور وجهو لبستلي الجبة تع حلا و قالتلي نوضي اطلقيها تحبط وقفت و فتحت سروالي على لداخل و هو داير يزابي بالتلكومند فالتلفيزيو. ..
يتبع......