مراهقة والاربعيني بلهجة جزائرية

جزء 16

#المراهقة و الأربعيني:

#الجزء 16:

رمالي جبة و خرج ، نضت نحيت لي كنت لابساتها و لبست لي عطاهالي و قعدت نبكي حتى سمعت صوت برا مسحت عينيا و خرجت غسلت وجهي و رجعت للكوزينة، لحقت ال11 باش راحو الضياف كملت وش في يدي و دخلت للمخزن، عيطلي صراع ليلياااان..اطلعي وجديلي حوايجي و شعلي الشوفاج، كنا في زمان الشتا رحت درت وش قالي كي جيت خارجة تلاقيتو عند باب شومبرتو داخل جيت نجوز قالي ولي تشوفي قتلو انعم قالي ادي فراشك لشومبرة الحاجة و ارقدي لتم ما ترقديش فالمخزن قتلو راني مليحة لتم قالي راني نهدر معاك، حبطت و خليتو رحت للمخزن تكسلت و رقدت من التعب بلخف حتى حسيتو فتح الباب نسف و عاود خرج غلقو موراه.
غدوا منداك الصباح جات نوضتني أم سعد كي العادة للشغل و نفس الروتين.
جوايه العشرة جا نائل و جاب مطارح للهول قالنا خير ما يقعدو كل مرة فالقاعة، رفدت معاه انا و نوال و عاوناه ستفناهم، حنا هكداك حتى دخل صراع خزر ما هدر والو بصح قعد، قال نائل وش رايكم ملاح؟ قتلو و الله شابين يعطيك الصحة و ألوانها شابين نحب هد اللون خزر فيا صراع و قالي روحي جيبيلي الما و طلع لشومبرتو رحت جبت الما و طلعت باش نديلو دقدقت ما رجعش دخلت صبتو متكسل بحوايجو و يدو على وجهو، كي حطيتلو نحى يدو خزر فيا و قعد فتح قمجتو و قالي اعطيني حوايجي جبتلو كان منحي حتى السروال ناض لبس بلخف و فالي هدو اغسليهم دوك و سيرجيلي الصباط، رفدتهم و خرجت شعلت الماشينة حتى نسمع فالحاجة تعيطلي باش نحوسلها على وحد النيميرو فالتلفون باش تعيط لخطر ما تعرفش تقرا الأسماء منبعد خملتلها شومبرتها كي سمعت الماشينة صونات رحت صبت الدراهم يعومو بالما نسيت باش نحيهم من سروالو ياربي وش يسلكني ليوم منو، خرجتهم و نشرتهم على حافة السلة و أنا ميتة بالخوف كي رفدت السروال حسيتو ثقيل صبت البورطفاي في جيبو و فيه كامل كوارطو تشمخو لتم زدت يبست في بلاصتي ليوم يقتلني ما فيهاش هدرة.
قعدت نبكي منبعد خممت خممت وليت قلت الضرب فيها فيها خلي كيما جات جي، نشفت الحوايج و نشرتهم و حددتهم و نشفت الدراهم كاين لي سلكو و كاين لي فسدو بلاما نحكي على الكوارط ولاو ما يصلحوش، حبطت كملت الشغل حتى حبط هو عينيه منفخين من الرقاد عاقد حاجبو و الحاجة كانت قاعدة قالها يما اعطيني الكاشي تع الراس راسي راح يطرطق، عطاتلو و قالتلي روحي جيبي لراجلك الما باش يشرب، أنا كنت مبحرة نخمم كيفاش رايحة نقولو، جبتلو الما شرب الدوا و قالي ديريلي لاتاي ثقيل رحت درتلو و حطيتلو كي جا يرفدو قاسو وليد سعد الصغير دفقهولو ناض يسب فيه و عيط لنواااال جات تجري رفداتو قالها شدي ولادك ماشي كي نضربهم تزعفي و خزر فيا قالي و انت راكي تتفرجي روحي جيبي شيفونة امسحيه و ديريلي وحدوخر، يا ربي هدا ناض تقول محرش ماراهو حامل حتى واحد لوكان يعرف وش درت يمال كيفاش.
مسحت لاتاي لي دفق و درتلو وحدوخر بصح خلاه و جا خارج قالتلو يماه وين راك رايح؟ قالها لنار جهنم قاتلو بسم الله الرحمن الرحيم وش بيك ياوليدي علاش هد القلق كامل و انت عندك لاطونسيو حافظ على صحتك مارجعلهاش و دار لعندي قالي انت اطلعي وجديلي حوايجي، طلعت موراه نطايح من الخوف، هو دخل يدوش و انا وجدتلو حوايجو و حبطت حتى نسمع فيه يعيطلي طلعت نجري قالي وين راهم حوايجي قتلو وجدتهملك هامليك خطفهم من يدي صونا تلفونو خبطو و رماه فوق بونكو و ناض يسب كثرو عليه على حكاية الطونوبيل و على حساب الشوفة طاح في ناس شويا شويا.
بقيت واقفة و هو يبدل كمل دار الريحة و دار ليا و هو  يلبس في ساعتو و قالي البورطفاي ديالي و المفاتح وين راهم؟ عطيتلو الهوية العسكرية و البرمي و المفاتح ناض يعيط قالي و الهوية المدنية و الدراهم و البورطفاي وين رااااااهم؟ بلعت ريقي و حبطت جبتهملو سبقت عطيتلو الدراهم حكمهم خزر فيا قالي و هادو علاش راهم مقرقشين هكدا؟! زدت عطيتلو الهوية المدنية و يدي ترجف تصويرتو قريب ما تبانش و الحبر سايل الكتيبة راحت قالي وش زدتي درتي انطقييييي قتلو عمو و الله ما بلعاني نسيتهم فالسروال و تشمخو داخل الماشينة، خبطهم على وجهي و جبد عليا بكف، المهم فهداك النهار خرج كامل زعافو فيا عندو ما ضرب.
كي عيا قعد على طرف البونك و يزير بيدو في وجهو من الزعاف، بعدت عليه و انا فالقاعة و قعدت نطم في شعري و نبكي، حبط يدو و خزر فيا كمشت روحي و قتلو و الله ما بلعاني يا عمو ناض يستغفر و انا لبست خماري و حبطت نجري.
قعدت في شومبرة الحاجة بكيت مخ راسي منبعد طليت من الباب صبتها قاعدة قلتلها صراع وين راهو؟ قاتلي خرج بصح وش بيك معاه عياطو كان يتسمع منا قلتلها سقسي وليدك لي ماراهوش حامل روحو و كل مرة يصيبني غير أنا قدامو باش يفرغ زعافو فيا.
ما عجبهاش الحال و دخلت للشومبرة قالتلي يا بنتي شدي لسانك راكي حايبا تتشردي قتلها نتشرد و ما نقعدش معاه حاسب روحو عزرائيل و ارواح الناس في يدو قالتلي احشمي شويا لي راكي تهدري عليه هكدا راهو وليدي تكملي هكدا لسانك لي يجيبلك الأذى
قلتلها تعيشي خرجيني شويا و الله غير تخنقت رايحة نطرطق قالتلي ما راكيش تشوفي كيفاش راهي الدنيا قلتلها المشاكل و الزعاف و الحكم غير عليا ارحميني راني نشوف فيكم كامل لي ما يعجبوش الحال يهرب لبرا و انا واحد ما راهو حاس بيا أنا بشر يا ناس من لحم و دم مانيش حديد ارحموني قالتلي يا بنتي شكون لي راكي تشوفي فيها خرجت ياك رانا نهار كامل و حنا مقابلينك قلتلها حلا دايرا الدار اوتال يومين هنا و عشرة تفرفر، ام سعد إدا قعدت ساعة فالدار راهي مليحة حتى انت يوميا تروحي للطبيب ما تقعديش قالتلي وصلت بيك تحسدني على الطبا ما تحشميش؟ وليت نبكي خزرت فيا قاتلي خلاص نوضي البسي.
كنت حايبا نروح عند هيام نبات و نهرب من هد الجو ما قدرتش خلاص ضاقت بيا الدنيا.
عيطت الحاجة لنائل قاتلو إدا تقدر توصلنا لدار هيام قالها ماشي مشكل قاتلو إدا ما نشقيكش يا وليدي لوكان دينا ليليان درنالها ليزاناليز و قسناها لاطونسيو شوف وجهها راهو كي حبة القارص قالها و الله غير تعملي مليح يا الحاجة مام انا ما راهوش عاجبني حالها ما تاكل ما تشرب و التعب ملفوق و قلة النوم و الزعاف منين حبيتيها ينزرع الدم في وجهها مختبر نحلل قاتلو علاش ظلم خوك خلاها ترفد صحتها الله يهديه.
-رحنا لابوراتوار دارولي ليزاناليز قالها البيولوجيست وحد السويعة يوجدو قاتلو خليهم عندك منبعد أنا نجوز نديهم.
رحنا لدار هيام فرحت بينا مسكينة غير تبوس و تعنق ما أمنتش كي دخلت عليها.
حكاتلها يماها كلشي قالتلها وش بيه هدا زاد عليه الحال؟ قالتلها و الله ما فهمت وش خداه من نهار صرات لاكسيدو و هو حوايجو قريب يخرج منهم طونوبيلتو بطونوبيلة السيد مضرورين و السيد مازالو فالسبيطار و يبانو ناس صعاب لي طاح فيهم.
قالتلها لهد الدرجة راهي معقدة ما بيناتهم حتى يفرغ زعافو فيها قالتلها راكي تشوفي و الله ما خلى فيها ما يصلح لي خلاهالها خويا كملها هو.
هوما يهدرو و انا نبكي و ساكتة خفت كاش ما نهدر يجي يقولي رحتي شكيتي بيا لأختي، دارت ليا هيام قاتلي ما تبكيش جيبيها غير في صحتك هادو هوما الرجال يا بنتي حبال الديس يرشاو و ما يتقطعوش.
راحت جابتلي الما و قعدت تهدن فيا منبعد خزرت في حوايجي قالت ليماها وش بيه وليدك حب يدفن الطفلة فالحياة؟! منبعد عيطت لوليدها راح شرا ڨاطو و راحت دير قهوة رحت موراها قلتلها أم علي معليش نبات عندك ليوم تعيشي قنعي الحاجة تخليني قالتلي يا عمري ادا ما كفاتكش الدار نحطك في عينيا كوني هانية دوك انا ندبر راسي.
شربنا قهوة ناضت الحاجة و قالتلها هيام عيطي لنائل باش يجي يدينا هداك هو قبل ما يطيح علينا الليل قالتلها دوك نعيطلو بصح تعيشي ما تردينيش خلي ليليان تبات عندي ليوم قالتلها حبيتي ديريلي مشكل مع خوك عييت من عياطو.
قالتلها حصليها فيا قوليلو دبر راسك ما اختك هي ما حبتش تطلقها و خلي الباقي عليا أنا نتفاهم معاه، قالتلها دبروا ريسانكم ما بيناتكم بقاتنا على خير و راحت مع نائل و أنا قعدت مع هيام.