مراهقة والاربعيني بلهجة جزائرية

40

#المراهقة و الأربعيني:

#الجزء40:

وحد النهار عيط صراع للحاج على ال8 تع الليل كنت فالكوزينة، رحت نجري بالاك كاش ما نسمع كلمة بصوتو كنت متوحشاتو بزاااف، كنت نسمع غير فالحاج يقولو إيه وليدي هديك هي كون هاني و كوبا عيط لنائل و سعد و دخلو للصالو رحت موراه قتلو الحاج وشبيه صراع؟ قالي ما بيه والو بنتي برك عيط على الدراهم و وحد الامور وصانا نديروها، شويا و عاود عيط عندي قلت للحاجة يما صراع راهو يعيط و رحت نجري للكوزينة رفدت عليه غير قال ألو قتلو اخخخخ شحال راني متوحشاتك،  قالي انساي الوحش دوك و ركزي معايا مليح وش رايح نقولك، روحي للشومبرة وش عندنا كامل ذهب و دراهم و كوارط حبطيهم للحاج و خلي في يدك مبلغ صغير، قتلو بصح علاش ما فهمتش، قالي ماشي الوقت باش نفهمك ليليان، قتلو بالي راهو عندك صراع، قالي ليليان راني مشغول ما نقدرش نرد، أنا كي نشوف عندي شويا وقت نعيطلك و نحكيلك بصح دوك روحي ديري وش قتلك باش يبعثهم الحاج للحساب لي راهو فالأردن، قتلو الإرهاب وصلو لينا؟ قالي ليليان خودي حذرك و ارقدي مع يما، ارقدي مستورة ما تلبسيش القصير و العريان الوضع خطير و وصي أم علي جي تقعد معاكم، و قولي ليما ترد بالها على حلا قتلو معليش عمري كون هاني و كوبيت طلعت للشومبرة طميت كامل وش قالي و عطيتهم للحاج.
المنطقة لي كنا فيها كانت مهددة الخوف قتلنا و حنا نسمعو كل يوم القتيلة و الذبيح و التنكيل بالجثث.
غدوا منداك قعدنا كامل فالدار حتى الحاج و نائل و ما خرجوش نشوفو غير فالأخبار، و أنا سترت روحي ملفوق لتحت خفت جينا الهربة على غفلة.
عيط صراع للحاج فالليل قالو الطناش تع الليل تخرجو تروحو ديراكت للعاصمة، عيط مام لعمومي يخرجو من لتم، وصلني خبر من عند صحابي بلي الجيش لي راهم عندكم جاتهم أوامر بالإنسحاب خلال 48 ساعة.
نضنا نجاراو طمينا كلشي و سعد يعيط و يقول انا ما نخرجش نقعد هنا وش حب هدا صراع يمشينا كيما يحب هو ؟! إدا ضطريت و تحتمت نروح لعند نسابي و أم سعد تبكي و تحلل فيه قالتلو ياوليدي ما تقعدش هنا هادو ما يعرفوش ربي بصح والو بقاهم على خير و خرج..
الحاجة عيطت لهيام باش توجد حوالها جات قالها الحاج علاش هيام تروح معانا؟ قالتلو الحاجة يمال نخليوها هنايا؟! الارهاب يقتلو وليدها و يديو بناتها قالها بصح الطونوبيل ما تكفيش أنا ما نسوقش فالليل ما نشوفش مليح رايحين بطنوبيلة نائل.
دار لهيام عيطي لواحد من عموم الدراري يجي يديكم معانا، قالتلو يا بابا ياك هوما ملي مات راجلي الله يرحمو ما شافو في وجهي حبيتهم دوك يجيو يخرجوني؟!! نتزاحمو فالطونوبيل خلينا نسلكو رواحتينا قالها لالا يا بنتي رانا في بزاف و ولادك كبار ماشي صغار وين رايحين نديروهم، قالو علي خلاص روح جدي دوك أنا ندي يما و نخرجها للعاصمة روح و ما تخممش قالتلو هيام يا وليدي وش يخرجنا وين رايحين نصيبو طونوبيل؟ قالها و حبيتينا نقعدو نحلو و نبوسو اليدين باش يسلكونا و يديونا معاهم؟ مانروح لا أنا لا انت لا خياتي معاهم.
الحاجة راحت تهدر مع الحاج و نائل ما دخلش روحو تقول ماسمع.
نائل و الحاج و أم سعد و نور حامل و ولادها و حلا و أنا في هونداي صح ما تكفيش بصح الله غالب تحتمت حتى و نقعدو فوق بعضانا المهم نهربو.
هيام قعدت تبكي و علي قالها أصلا رايك لي جابنا هنا و قاعد يعيط امشي نروحو للدار و هي تحلل فيه، قالها الحاج يا بنتي ما راناش في وقت معايرات النسا عيطي لواحد من عموم الدراري يجي يخرجكم معانا، قالتلو بابا أنت وشمن نهار في حياتي وقفت في كتافي؟! نخرج مور أبو حرب و ليا ربي، غاضتني و هي تبكي هوما يهدرو و أنا حاكمة تلفوني و نعيط لصراع وحد 25 أبال باش رفدلي ناض يعيط قالي وش تحتااااااجييي قلتلكم ألف مرة ما تعيطوليش حتى نعيطلكم حرڨتي عليا التلفون، قتلو وشبيك اسمعني دقيقة و حكيتلو قالي و أم علي وين راهي دوك؟ قتلو هنا فالدار قالي جوزيلي يما، عيطتلها و هي تحلل فالحاج قلتلها صراع يهدر معاك قالها شوفي يما اعطي مفتاح طونوبيلة بابا لعلي هو يسوق و أنت اقعدي معاه ملقدام وريلو الطريق و قالها جوزيلي علي، قالو دوك نبعثلك النيميرو تع الشيخ ريگان تهدر معاه هو يسهلهالك ادي جداتك و يماك و خياتك معاك في طونوبيلة الحاج، كمل معاه خزر فيا علي مشنف شرلي تع ادي التلفون لجدي يهدر معاه، ديتهولو قالو بابا مفتاح طونوبيلتك اعطيه لعلي، قالو هدا نعطيلو طونوبيلتي؟! عيط عليه صراع قالو ماراناش في وقت هاد الهدرة تع صغييييير ما بقاش الوقت اعطيهالو و إدا كاش حاجة أنا نخسرهالك قالو خلاص معليه..
عاودت حكمت التلفون قتلو ااا صراع قالي وي عينيا هيا تهلاي في روحك قتلو حبيت نروح مع الحاجة و هيام ماشي مع نائل، تنهد و قالي روحي معاهم معليه بصح ردي بالك على روحك.. عاود تنهد و قالي ليليااااان... قتلو انعم قالي لا إله إلا الله محمد رسول الله قتلو ربي يحميك و كوبيت، خليت فاليزتي في طونوبيلة نائل و جيت طالعة في طونوبيلة الحاج، قالي نائل اطلعي هنا ماشي لتم قتلو لالا قلت لصراع رايحة مع هيام، قالتلي هيام معانا دونجي عليك روحي مع نائل خير قلتلها لالا نروح معاكم تبسمت و حضنتني قالتي اطلعي الغربة أحسن من لي يتخلى عليك.
في هديك الليلة كنا في نوفمبر 2014 جاز عليا عام بالضبط ملي دخلت لدار صراع جيت بالسيف من دارنا و دوك خارجة بالسيف من دارو..
كانت الحال بارد و الدنيا ظلمة و الطريق تخوف، الحاجة خرجت خوفها بالدعاء لربي سبحانو و هيام خرجاتو بالدواس مع  وليدها و انا و بناتها ساكتين و غير نشوفو، الحاجة عيطت على هيام باش تسكت و تخلي الطفل يركز و يسوق في عقلو و هي  توريلو فالطريق فجأة قالتلو هادي ماشي طريق العاصمة، قالها جدة و الله غير انت لي قلتيلي روح منا قالتلو لالا ما قتلكش قالها جدة ما تخرجينيش من رحمة ربي و الله غير انت لي قلتيلي صحا و دوك وين رانااااا و يخبط فالفولو  يسب و يحوس على الطريق باش نرجعو، رفدت التلفون نعيط لصراع الريزو ما كاش كامل، أنا غير حطيت التلفون شفت مسلحين قاطعولنا فالطريق، علي وجهو صفار و الحاجة تعيط و هيام حضنت بناتها و تبكي، غير قالولو زير يبست في بلاصتي.
زير علي و الخوف قتلنا رجال لابسين أقمصة ملثمين و مسلحين، يديا بداو يرجفو و ندعي، عيطو على علي قالولو احبطططط.. دار علي للحاجة قالها جدة وحدة فيكم ما تحبط، فتح الباب و حبط فتشوه قالولو كوارطك.. و موجهين السلاح عليه و هيام تبكي و تقول يا يما وليدي راح نحبط نحللهم يخليوه، قالتلها الحاجة رايحي بنتي اصبري نشوفو وين رايحة توصل، هادو اقمصتهم طوال ماشي قصار يعني ولاد عشائر ماشي إرهاب، عطالهم كوارطو قالهم مطلع جداتي للعاصمة مريضة و تلفت الطريق، قالت الحاجة للي كان يهدر مع علي و الله وليدي ما عندنا حاجة رايحة للعاصمة نداوي هنا ما بقاتش سبيطارات و أنا زاد عليا الحال ما قدرتش، شعل الضو علينا فالطونوبيل و قال سنة و لا شيعة؟ قالو علي كامل سنة، قالو يمال علاش هاربين قالو ماناش هاربين قتلك داي جداتي داوي و جبت معايا يما و خياتي لخطر ماكان حتى واحد من غيري راجل فالدار بابا شهيد و أنا لي واقف عليهم قالو وين مات باباك؟ قالو في 2006 خطفوه و قتلوه في حرب الطائفية  و عمومي كل واحد لاتي بدارو و إدا تحب نعيطلهم و نعيطلك للشيخ ريكان شيخ عشيرتنا، وجه علينا الضو قالو علي عمي قتلك كاين غير النسا قالو بعد تشوف قالو تحبو اديوني اديوني بصح خليو النسا، جا راجل وحدوخر قالو انت من وشمن عشيرة قالو من عشيرة الشيخ ريگان قالو وش يكولك قالو من عمومنا، فتشو الطونوبيل و شافو كوارطنا كامل من بعد قالو ليليان جرجيس مسيحية؟ قالو لالا مسلمة راهو مكتوب زوجة صراع.... هداك خالي و مسلم قالو وش يخدم خالك قالو عندو مولدة كهربائية في حي ...... ( عطالو خدمة سعد ما حبش يقولو بلي صراع يخدم عند الدولة) ، زاد قالو نورية حمدان نعيمية شيعية؟ قالو لالا قتلك و الله كامل سنيين، و إدا حبيت نعيطلك لشيخ عشيرتنا و تأكد منو بنفسك، خليني نوصل النسا و نرجعلكم مانيش هارب، قعدو يتناقشو ما بيناتهم حبطونا و فتشو كامل الباڨاج جات تهدر معاهم الحاجة تعنكر فيها علي سكتت، حكمت الصليب تحت الخمار و قاعدة ندعي انتبهلي علي ضربني و حبطلي يدي بلخف و خبرني قالي اوقفي مور جدة..
كي كملو قلبو كلشي منبعد قالو الشيخ ريگان نعرفو ما راهو لا مع الإرهاب لا مع الدولة بصح وصلو خبر قولو لوكان واحد يدنى لنسانا  نعوموكم فالدم و طلقونا نروحو معجزة و صرات ربي حمانا.
علي أعصابو تلفت يسوق مقلق و يسب قالتلو الحاجة استغفر ياوليدي وشبيك رايح تقلبنا رانا ملاح كي سلكنا يلزمنا نخرجو وعدة، قالها جدة كاش ما بقالي عقل هادي وضعية رانا عايشينها؟ ما يقبلها لا ربي لا عبدو، تيتمنا و حنا صغار و دوك هاربين من ديورنا لوقتاش هاد الحالة ، جماعة تع فوايو يحبسوني و يقعدو يشوفو في خيااااتي.. قالتلو هيام شد لسانك ما كفاكش طفل صغير انذبح بسبتك، قالها ياااااا صار هكدا كي دافعت على عرضي وليت أنا لي ذبحتو، يااارب اديني من هاد الدنيا و هنيني، قالت شفتو كيفاش راهو حايب نهينو قدام البنات؟ قالها انت اسكتي هبلتيني اسكتيييييي، قالتلو ما تعيطش خير ما نفقسلك عينيك كلبببببب.. قالتلهم الحاجة وشبيكم وش صرالكم استغفرو خليونا نركزو مع الطريق و كي نلحقو إن شاء الله بخير و على خير داوسو حتى تشبعو، نغزت هيام قلتلها أم علي وشبيك ماشي ساهلة عليه هو تان باش يوقفونا هكداك و يقعدو يدققو في وجوهنا و ما يقدر يدير والو خلاص خليه تعيشي، دورت وجهها و هي تغلي..
قال علي للحاجة جدة و دوك الطريق منيييين راكي ناوية دخلينا فوسط الارهاااااب هاد المرة نتذبحو ما عندنا وين نهربوووو.. قالتلو حبس علينا العياط ديالك كسرتلي راسي سكتنا خليني نتفكر..
قعدنا ندخل من و نخرجو منا غير نخربطو و الخوف و الرعب، رفدت التلفون و قعدت نحاول نحكم صراع و لا الحاج و لا نائل بصح الريزو ما كاش حتى بدا يطلع الفجر حكمت صراع صونا عندو رفدلي ها ليليان ¥¥¥¥¥  علاش ما ¥¥¥¥¥...
قتلو صراع صوتك ماشي واضح حنا...... جيت نهدر خبرتني الحاجة قالتلي ما تقوليلو قاطعولنا هدوك و اعطي التلفون لعلي يهدر معاه، عطيت التلفون لعلي قتلو هاك أهدر معاه بصح الصوت راهو يتقطع، هدر معاه و هو يفهم فيه على الطريق حتى شفنا طريق العاصمة ارتحنت، غير دخلنا صونا تلفوني عيطلي الحاج قالي وين راكم لاحقين هداك الراس اليابس علاش ما ما مشاش مورانا قتلو وصلنا للعاصمة قالي جوزيلي الحاجة علاش تلفوناتهم كامل طافيين، عطيتلها تهدر معاه و درت لهيام قلتلها وين راهو تلفونك؟ قالتلي طاحتلي الباتري و راحلي الريزو بصح يما و هاد ال.... تلفوناتهم شاعلين، خزر فيها منبعد دار ليا قالي لالين ديالي راهي مكوبيا ما خلصتش..
بقات الحاجة تحكي مع الحاج نسمع فيه يعيط و يسب كوباتلو في وجهو عطاتلي التلفون و تقول كل واحد رافد علينا شنايفو بجيه وين ما ندورو غير العياط.
دخلنا لوحد الحومة صبنا الحاج و نائل و واحد الراجل يكون فالستينات هكداك واقف و يرش بالتويو عند الباب.
ڨارا علي الطونوبيل جا الحاج بدا يداوس مع الحاجة و هيام، حنا حبطنا و هداك الراجل بدا يرحب بينا، دار نائل لعلي قالو وش صرالكم علاش ما تبعتنيش ياك خرجنا كيف كيف، قالو خالي صراع قالي جداتك توريلك بصح صبنا الخرجات كامل مغلوقين، قالو معليش وليدي ادخلو الحمد لله على سلامتكم.
دخلنا لهاديك الدار واسعة الله يبارك، لاقاتنا وحد المرا تكون فالخمسينات هكداك رحبت بينا، صبنا حلا قاعدة و نور ترقد فوليدها، قلتلها وش راكم؟ قالتلي أهلا ليليان وشبيك؟ قلتلها الدوخة و دار قلبي قالتلي تقلقنا عليكم وين كنتو؟ قلتلها اسكتي برك حكايتنا حكاية خرجنا ملتم بقدرة ربي..
دخلت مرا فالثلاثين رحبت بينا وسلمت علينا، هيام كانت مقلقة و الحاجة ظهرها يوجع فيها من القعدة تع الطونوبيل و مقلقة من الحاج، قربت ليها وسقسيتها قلتلها يما ماشي صراع قال وجدتلكم دار علاش حتى جينا لهنا، قالتلي هادي هي دارو قلتلها يمال شكون هادو؟ قالتلي هادو أهل صاحبو اشتشهد في 2011 و وصى صراع عليهم لخطر هو وحدو ما عندوش خاوتو و ملي مات و صراع مخليهم هنا خرجهم من الكرا و كل شهر يبعثلهم المصروف، قلتلها و أنا علاش ما علاباليش بهاد الحكاية؟ قاتلي بالاك نسى يقولك عليها
المرا هديك وسمها أم صفاء قالتلي فكريني بنتي وسمك نسيتو جاني صعيب باش نحفظو، قلتلها ليليان، قالتي رانا وجدنالك شومبرة ليك إدا راكي عيانة جوزي تكسلي و ارتاحي أبو حرب وصانا عليك، قلتلها لالا عادي نرقد وين جات، قالتلي لالا يا بنتي أبو حرب رايح و يوصي فينا عليك قالنا يماها انقتلت و طرحت ولادها و مرضت، ناضت عروستها قالتلي نوضي نديك لشومبرتك، مشيت معاها نشوف فالدار و هيام جات معايا توريلي فالدار حتى قالتلي هادي شومبرتك بدلي الفراش و افرزي دوزانك دوشي و ارقدي، حنا نهدرو دخلو وحد الدراري يلعبو ضحكت بصح ما حسيتش روحي مرتاحة، فتحتلي هديك الطفلة الخزانة و قالتلي هاو الفراش هنا
قلتلها يعطيك الصحة، هي خرجت و أنا نحيت الحجاب بدلت الفراش و رقدت بلاما نبدل حوايجي ما قدرتش كان عندي يومين ما رقدت من الخوف ما فطنتش حتى للمغرب دخلت دوشت بدلت و دخلت للكوزينة صبت هيام توجد فالدولمة و وحد المرا واقفة مع الكوزينيار طيب، نور كانت دوش لولادها، الحاجة و أم سعد قاعدين بجيه.
دارت ليا هديك المرا خزرت فيا و قالت للحاجة هاد الشقرا شكون؟ قالتلها هادي مرت أبو حرب، قالتلها يا عمري مسكينة صغيرة ما تقوليليش هادي لي خوها إرهابي، قالتلها هيام إيه هي، تبسمتلها و تقلقت من هاد الكلمة مالڨري حقيقة، قربت لي حضنتني و تقول الله يبارك عليها ما شاء الله صار هادي مرت الغالي و الله غير يستاهل أبو حرب وسمك الزينة؟  قلتلها ليليان قالتلي عاشت الأسامي بصح صعيب شويا باش ينحفظ، ضحكت في وجهه، قالتلي أنا أم صفاء وهادي إسمهان عروستي مرت المرحوم، قلتلها معريفة خير إن شاء الله خالتي و وقفت مع البوطاجي باش نعاونهم عيطت عليا قالتلي لالا يا بنتي ما تحصليناش مع أبو حرب ما تمسي والو رايح و يوصي عليك، تبسمتلها قلتلها نورمال خالتي وش فيها دارت لعروستها قالتلها اسمهان نوضي في بلاصتها الطفلة راهي مريضة، قلتلها و الله ما بيني والو برك صراع هكدا يخاف عليا..
حسيت روحي أنا هي السلطانة  هويام ههههه غير عرفو بلي مرت صراع ما خلاوني نمس حتى حاجة.
قعدت قدام الحاجة و هوما يحكيو بصح إسمهان ما نحاتش عينيها عليا.
حطو العشا كملنا و قعدنا بصح عيانين مورالمو عيان مقلقة و الحاجة لاطونسيو تطلعلها ملي مات حرب، و أم سعد تبكي كي ما جاش معانا سعد و كل شويا تعيطلو فالتلفون تحاول تقنعو، و أنا تخمامي عند صراع شهر ما شفتو قلبي شعلت فيه النار عليه.
رحت للكوزينة صبتهم يدوزنو قلتلها خالتي أم صفاء ياك تعشينا قالتلي هادو لغدوا إن شاء الله، ودخلت هيام معاهم دارت الڨاطو ماكملوش حتى ال12 تع الليل.
رحت للشومبرة فرزت دوزاني شعلت التلفيزيون ما حبش يمشي وليت رقدت.
غدوا منداك دخلت هيام عليا قالتلي وجهك راهو غير شعر ارواحي نحيلك يجي راجلك عيان يصيبك هكدا؟ قلتلها وين يجي قال ما عنديش الوقت، قالتلي ارواحي برك ما تخليش روحك هكدا، كملتلي نضت جبدت شعري سڨمت روحي و ماكييت، كانت قدامي جنات بنت هيام ما صبتش وش ندير من الفيد ماكييتلها، راحت تجري ليماها توريلها و فرحانة عيطت عليها كي دارت، دخل علي جاب معاه سقايط لخياتو و قعدنا فالهول نتفرجو فيلم و أم صفاء و الحاجة يڨصرو.
شويا و دخلت للشومبرة تكسلت و حكمت  تلفوني حتى سمعت الحس، نضت باش نلبس الخمار و نشوف وش كاين سمعت الباب تنفتح و صوت صراع يقول إن شاء الله إن شاء الله يما.. درت صبتو واقف قدامي لابس لاتونو ميليتار رحت نجري صوطيت عليه عنقتو حبيبيييييي... حضني رفعني على لرض يضحك و قالي عمري أنت.... هدا وين ارتحت كي شميت ريحتك، من الفرحة وليت نبكي، حبطني قالي ما نحبش نشوف دموعك و مسحهملي قالي و الله غير توحشتك، عاودت عنقتو و زيرتو لعندي بعدني عليه حكم وجهي ما بين يديه و بدا يبوس فيا بلهفة، و أنا من لهفتي عليه و شوقي ليه ذبت في حضنو و بحرت كلشي تفاعلت معاه بنفس اللهفة.
حطني فوق البونك يشم في شعري و رقبتي منبعد جا نايض حوطت رقبتو بيديا و أنا متكسلة على ظهري قتلو ويييين؟ قالي ندخل ندوش راني فايح حاشاك شوفي كيفاش راني باللحية، قتلو ما تروحش مارايحاش تقتلك اللحية، همسلي قالي الشابة ديالي متوحشتني كامل هكدا؟ قتلو اووووو ما تقدرش تيماجيني شحال.. قالي الدنيا بلا بيك تخنق و كمل يبوس فيا..
ناض قعد على طرف البونك باش ينحي الرونجاس ديالو جيت نحيهولو قالي لالا عمري أنا نحيه قتلو ما دخلش روحك و بديت نفتح فالخيوط ما حبش ينحيه قدامي قالي ما عندك وين تهربي مني اقعدي هنا نوض ندوش برك و نرجعلك، بصح ما عنديش حوايج نقايا، كابتي راهي برا إدا ماراكيش عيانة اغسليهملي، قتلو جبتلك معايا، قالي اووووو تعيشي اجبديهلي..
عطيتلو الحوايج جا داخل للدوش رفعلي حاجبو قالي اييي الزينة علبالي بيك دوك تخرجي بالاكي تنساي روحك راجعلك، فرحت بيه كي حسيت نفسيتو تحسنت شويا ملي مات حرب..
خرجت قالتلي هيام مسكين راهو بزاااف عيان حتى القعاد و قدرش يقعد معانا، قلتلها لالا دخل يدوش بصح مورالو خير ملي كان كان يتبسم، قالتلي معاك برك حنا باش قالنا وش راكم رانا ملاح ضحكت ههههه قلتلها يمال وش تحوسي كثر منها.. اسمهان كانت واقفة قالتلي تحبيه؟ قلتلها و شكون عندي من غيرو باش ما نحبوش.. هو أهلي و كامل دنيتي، قالتلي علاش ما دخلتيش فالإسلام يمال؟ لي تحب راجلها تبعو عقدت حاجبي قلتلها وش دخل الدين فالحب؟ هو تان يحبني علاش ما يوليش مسيحي علاش غير أنا؟ قالتلي الله يدومها، دخلت للشومبرة خملت الشومبرة سمعتو خرج من الدوش جا يدخل عيطلو الحاج راح قعد معاهم سقسى عليهم و على حوالهم و كي عرف بلي سعد ما حبش يجي رفد التلفون عيطلو بهدلو و كوبا عليه.
بقى قاعد و أنا واقفة عند الباب نشوف فيه خزر فيا و تبسم قالي ارواحي تقعدي علاش راكي واقفة؟ رحت قعدت قدامو قالي خفتي فالطريق؟ قتلو مزيا جازت سلامات سلكنالها على شعرة، قالي علاش وش صرا؟ قتلو ياك قاطعولنا الارهاب... شفت الحاج و علي تعنكرو فيا عرفت روحي عميتها كي العادة، قالي وشمن ارهاب؟! خزرت في الحاج و علي، دار ليهم قالو بابا وش صرا؟ قالو ياك تاهو فالطريق هدا ماتبعناش قاطعولهم هدوك لي نضمو للارهاب من العشائر بصح جوزهم بخير و سلامة، قالو راهو تهدرو منكم بالصح؟! كيفاش يحبسوهم و هوما غير نسا؟ قالو أهدر مع وليد ختك لي راسو يابس، قالو لالا يا بابا الهدرة معاك كيفاش عطاك قلبك تروح أنت و نائل و تخلي هيام هي و ولادها و الحاجة؟ ما عرفتش تقول ليما تطلع مع نائل و أنت تطلع معاهم، كنت قادر نقول الحاجة دير هكدا بصح سنيتها منك، قلت ما يقبلش و دوك يراضيهم و يطلع معاهم بصح أنت خليتهم وحدهم، لوقتاش تبقى هكدا مع هيام ياك بنتك ما جبتهاش من الزنقة ديرني ميت ياسيدي ماشي أنت باباها؟
كي سمع الأذان راح يصلي قالي الحاجة ارتحتي دوك يا المصفارة ما قلتي عيان ما قلتي مريض ما برد قلبك حتى قلتيلو، نضت و خليتو رحت للكوزينة وقفت معاهم كي كملو و بداو يوجدو فالطابلة دخلت صبتو يشوف فالأخبار و مقلق قتلو زعفت مني؟ قالي و أنت علاش؟ قتلو كي قتلك، قالي لوكان ما غلطتيش راني كي الأطرش فالزفة نسا داري يفتشوهم الارهاب و واحد ما علبالو بصح معليش، قالتلو الحاجة و الله يا وليدي واحد ما فتشنا، حوسو غير علي و الطونوبيل، قالها إيه و أنا نستنى حتى يفتشوكم و ندعي باش واحد ما يشوف فيكم ياك.
سقاو الماكلة قعدنا نتغداو و هو يغلي قالتلو اسمهان يلا أبو حرب استغفر و سمي باسم الله كول لقمة، درت ليهم هو هز راسو ما رجعلهاش سمى باسم الله و مد يدو يتغدى.
كملت و دخلت للشومبرة حاكمة تلفوني و نستنى غير دوك يجي غير دوك يجي ما كاش، كي شفتو طول تكسلت باش نرقد حتى دخل جوايه ال11 تع الليل جيت نايضة قالي ريحي في بلاصتك نحى قمجتو و جا تكسل قدامي قتلو ما قصدتش نقلقك، قالي ليليان غير معاك لي نرتاح ما تجبديلي حتى حكاية خلينا في رواحتينا، تبسمت و قتلو معليه بصح رميتلي الما و رحت قعدت مع أهلك، قالي تغيري منهم؟ قتلو أنا نغير عليك حتى من خيالك، قالي و أنا كامل ليك ارواحي عندي.. قربت لحظنو و بقى سهران معايا كي لحقت ال4 تع الليل دار حط راسو على المخدة و رقد، أنا خرجت ندوش صبت اسمهان في وجهي ما هدرتش معاها برك تبسمتلها رديت بالي كانت تخزر في رقبتي، سمعت الحس فالكوزينة طليت صبت أم صفاء توجد فلاتاي غير شافتني ضحكت قالتلي يا صباح التعرويس ان شاء الله، قلت بووووه هادي كيفاش عرفت، قالتلي اقعدي تفطري قلتلها لالا ما عندي حاجة قالتلي روحي بنتي غطي رقبتك دوك يحبط أبو صفاء، غير قالت هكدا خبيت رقبتي و دخلت نجري للشومبرة شفتها الله لا تربحو بهدلني، رفع راسو يشوف فيا قتلو عندو بزاف ملي أذن نوض دوش إدا حبيت، هو ناض دوش و راح يصلي و أنا نشفت شعري و رقدت، جا شرب الدوا حطني على يدو ساعة منبعد باش رقد حتى خدم فيه الدوا
ما فطنتش حتى ال3 تع لعشية نضت نجري ما صبتوش لبست بلخف و خرج صبتو قاعد فالهول شافني تبسم رحت لعندو قعدت تحت جناحو و نثاوب قالي صحا النوم الزينة، قتلو هدا كامل من تحت راسك حتى نضت جيعانة قالي وش راكي متشهية نبعثلك قتلو وقتاش يخلاص البرميسيو ديالك قالي على يومين قتلو أيا نخرجو برا ضاق خاطري، قالي الحالة ماراهيش تعجب قتلو اووو صراع، قالي وش راكي حايبا بالضبط؟ قتلو تحب الصح؟ قالي إيه قتلو حبيت نروح للكنيسة ياك كاين هنا فالعاصمة، قعد غايس فيا و ساكت قتلو وشبيك علاش ماشي من حقي عندي بزاف ما رحتش اديني قالي ماشي ليوم، بعدت عليه قتلو انا نوض نشرب الما و نرجع للشومبرة جامي طلبت منك حاجة و درتهالي، درت صبت اسمهان تشوف فينا تقلقت درت ليه قتلو انت وش راك دير هنا نوض للشومبرة، ضحك و قالي روحي دوك نلحقك
رحت غسلت ورجعت صبتو فالشومبرة، شويا و قالي البسي نديك للكنيسة مادامني قادر، رحت حضنتو بستو في خدو تبسم.
داني بصح ما دخلش كي كملت و خرجت داني لريسطورو كلينا و جبناهم معانا بقلاوة و فاكية عطيتهم للحاجة وزعتلهم.
قعدلو نهار و يرجع لخدمتو ليل كامل و أنا نبكي و نحلل فيه باش مايروحش حتى تقلق و قالي ما تبقايش تندبي عند راسي راني مليح كي جيت و قعدت 3 أيام رانا في حالة طوارئ نورمالمو ما نجيش كامل بالسيف باش تفاهمت مع صحابي كي راكي فالعاصمة جيت نشوفك ادعيلي نرجع سالم.
غدوا منداك الصباح بقيتو على خير بالبكا خفت مانزيدش نشوفو، زيرني عندو بزوج يديه قالي و الله غير نرجعلك برك ما تمرضيش قلبي بدموعك، قتلو اقعد معايا الله يخليك واحد ما بقالي من غيرك لوكان كاش ما يصرالك وين نروح، قالي اذكري ربي سبحانو و ما تخميش فالموت، باس راسي و جا خارج حطيت راسي و كلاطيت بالبكا رجع حضني قالي إدا صح تحبيني ما تبكيش و الله ما نحمل، مسح دموعي و خرج و أنا حكمت حوايجو لي كان لابسهم نشم فيهم و نبكي ما حبيتش نغسلهم خبيتهم فالفاليزا كلما نتوحش نشم ريحتو فيهم.
مع الظهر وصلنا الخبر بلي منطقتنا سقطت كلياً في يد الارهاب و زوج من ولاد عمهم يخدمو فالجيش ذبحوهم الارهاب و نكلو بالجثث ديالهم
أم سعد كل ساعة تعيط لسعد و ما تحكموش شعلت في قلبها النار
كامل توقعو بلي الارهاب رايح يلحق ا
للعاصمة قالنا الحاج يلزمنا نطلعو للأردن و عيط لصراع شاورو قالو إيه روحو أحسن الوضع راهو يخوف قالو اديهم و اخرج بيهم،  كي قالنا الحاج هبلت قتلو ما نروحش حتى و نعرف روحي نموت ما عنديش وش نزيد نخسر قعدلي غير صراع في هاد الدنيا إدا يروح نروح ما يروحش نقعد هنا نستناه، ما كفانيش هو في وسط الموت و أنا قلبي نار عليه نخليه و نروح مستحيل و عزلت روحي فالشومبرة قد ما حاولو معايا باش يقنعوني والو.
يومين منبعد عيطلي هو فالتلفون رفدتلو صابني نبكي و كان عندي يومين لا ماكلة لا شراب، غير جا يهدر معايا قتلو غير ما تسييش ما نرووووحش.. قالي ليليان ما تمرضينيش ما بقاش لامان فالعاصمة روحي معاهم، قتلو علاش انت راك في أمان؟ ارواح سافر معايا بصح باش نخليك في وسط النار و نروح غير انساها، قالي يرحم والديك ارحميني و الله ماراني قادر اسمعي الكلام و اطلعي للأردن مع الحاج و العايلة، قتلو حبيتني نسافر بالسيف ياك؟ قالي ليليااان.. قتلو طلقني، قالي راكي فايقة لعمرك وش راكي تهدرييييي.. قتلك سافري مع الحاااااج ما تبقايش هنااااا.. قتلو ما نرووووحش فهممممت... طلقني خلينا نتفارقو و حنا مطلقين و ما دخلش روحك وين نروح بصح باش نخليك هنا و حنا متزوجين غير انساها، غير قلت هكدا ما خلاليش بالسبان و بهدلني قالي راني عيان و ما عنديش الوقت لحكاياتك كي نحي نوريلك شكون لي نطلقها كوبيت في وجهو، زاد هبل كثر عاودلي رفدتلو قالي ياك نحكمك ولا لالا... لوكان ما نعاودلكش التربية و نوريلك شكون تكوبي في وجهو ما نتسماش، خليتو يهدر و رميت التلفون فوق البونك و نضت نبكي..
طمينا بڨاجنا و طلعنا للمطار أنا و الحاجة و الحاجة و أم سعد و حلا و هيام و ولادها، و نائل ماراحش معانا لخطر نور ماعندهاش باسبور قال نوجدهولها و نلحقوكم.
قلعت بينا الطيارة من العاصمة للأردن، كي لحقنا قعدت الحاجة تريح عيات و أم سعد تبكي على وليدها، جيت جايزة سمعت الحاج قال بهيام شحال من مرة و انا نقولو يا وليدي حبس هاد الخدمة و هو مخشن راسو راهم زادو ليميتاوه لبلاصة وحدوخرا بصح ما تقولي لحتى واحد هو وصى سورتو يماه و مرتو قالي ما تخبرهمش، أنا غير سمعت اسم البلاصة لي بعثوه ليها يبست في بلاصتي لخطر كامل علبالنا بلي معظم لي بعثوهم لتم ما رجعوش
ما فقتش لروحي كيفاش تغاشيت حتى صبتهم يفطنو فيا و يغسلولي في وجهي، خزرت فالحاجة حطيت راسي في حضنها و نضت نبكي و هي تهدن فيا و تقولي ما تفاوليش عليه و ادعيلو، واحد ما كان علبالو بلي سمعتهم كي قالو على البلاصة لي راهو فيها.
رحنا لعمان عاصمة الأردن في بلاصة كالم و فيها أحياء راقية، هنا كان صراع يخدم دراهمو فالxxxxات و والإيجارات، هو عندو حكمة فالتصرف لي يشوفو ما يقولش عندو الدراهم لهاد الدرجة، عايش حياة طبيعية يصرف فالحدود ما يبخل ما يبذر، عندو نوع من الكرم جامي شفتو في حياتي و كلمتو كلمة.
بعدما تبدل النظام في بلادنا باع الفيرما و دارو و ذهب مرتو و يماه و طونوبيلتو و لي فوقو و تحتو و دخل بالأسهم في أكبر مول فالعاصمة و نجح، منبعد استثمر دراهمو و بدا يشري و يبيع شقق و ايجارات و كبر بلعقل حتى لحق لهاد الدرجة من الثراء.
تفاجات كي شفت شحال عند ليزابارتومو في عمان عاصمة الأردن، حكمنا زوج وحدة أنا و الحاجة و هيام و ولادها و لوخرا لان سعد و الحاج و حلا.
هيام كانت هي لي طيب و الخدامات يديرو الميناج من ضمن خدمة الشقق و انا نوقف معاها كاش ما تحتاج بصح ما تخليني نمس والو كانت مقدره حزني على صراع وهو ملي خرجو وهو يوصي فيهم عليا و يقولهم يتيمة وما عندها حتى واحد فالغربة كونو نتوما أهلها في غيابي.
يومين مور ما سافرنا كنت راقدة فالليل حسيت بتلفوني يفيبري شفت صبتو صراع يعيطلي فالميسنجر، رحت للكوزينة و رفدتلو لخطر الحاجة كانت راقدة معايا و هيام راقدة مع بناتها فالشومبرة لوخرا و علي يلعب بلاي فالصالو.
رفدتلو قالي أهلا عمري قتلو ما تقوليش عمري راني حاقدة عليك، قالي علبالي بصح و الله غير لمصلحتك، قتلو انت أناني خممت تأمني و تطمن عليا بصح ما خممتش شحال قتلتيني كي بعدتني عليك حرام عليك صراع شكون قعدلي في هاد الدنيا من غيرك، قالي و الله هكدا أحسنلك و زيد راكي لتم اخرجي بدلي الجو و ما تخافيش انا غير يصحلي كيفاش نحكم الطيارة نجي نشوفك و نقعد معاك يالوكان سمانة حتى يفرج ربي، قتلو علبالي وين راك ما صبت وين تروح صراع حبيت تموت أنت؟ ما خممت لا فيا لا في حلا لي رجعت جثة منهار لي مات خوها، خمم فينا شويا وين نروحو بلا بيك، قالي خلاص ليليان ما تزيديهاش عليا، صحا افتحي لاكام نشوفك راني متوحشك قلبي راهو يغلي عليك، فتحت كاميرا تنهد ميل راسو يشوف فيا و غايس، و انا نشوف فيه شحال كنت متوحشة نشوف الملامح ديالو.. أنا نهدر معاه و هو ساكت و عينينا يبرقو حتى نطق قالي وش كان رايح يصير لوكان راهي بلادنا بخير و راكي دوك في حضني ماشي كل واحد في جيه، حبطو دموعي، قالي فراقك يقتلني و انا نشوف وش دار الحزن في عينيك و وجهك، قتلو صراع بلا بيك راني بلا روح خليني نرجع لعندك، دارلي براسو إيه قالي نرجعك و الله غير نرجعك يتحسن برك شويا الوضع، قتلو وين راك دوك؟ قالي فالخدمة.
قعدت سهرانة معاه حتى للصباح نحكيو حتى شافني كل شويا نتثاوب تبسم و قالي اعطيني بوستي و غمضيلي هاد العينين المذبالين و ما تبكيهمليش راني صابر و شايد الكوراج غير باش نشوف فيهم، بستو كوبينا و رقدنا...