مراهقة والاربعيني بلهجة جزائرية

42

#المراهقة و الأربعيني:

#الجزء42:

لحق وقت الفجر نوضت الحاجة و عاونتها باش تتوضى تصلي، في نص الصلاة قطعتها قالتلي رجعيني راسي رايح يطرطق من السطر ما قدرتش.
رجعتها و قستلها لاطونسيو صبتها 17، رفدت التلفون عيطت لهيام باش نسقسيها على الدوا ديالها صبتو مغلق وليت عيطت لوليدها علي قالي ألو ليليان قتلو يماك راهي راقدة؟ قالي إيه هدا وين حطت راسها علاش غير لخير كاش ما تحتاجي؟ قتلو إيه باش نسقسيها على دوا الحاجة طلعتلها لاطونسيو، قالي اصبري دقيقة نوضها، نوضها و جوزهالي قالتلي هيام انعم ليليان قتلتها الدوا تع لاطونسيو ما صبتوش وين راكي دايراتو قالتلي واقيل نسيتو في دوزاني، حوست صابتو قالتلي دوك نبعثهولك مع علي.
كوبيت و خرجت فتحت الباب خرجت للڨاراج نستنى فيه، أنا واقفة حتى حسيت دراعتيا بردو انتبهت بلي مانيش لابسة الخمار نسيتو لداخل، قلت في قلبي خلي معليه ياك راهم كامل راقدين و أنا أصلا مانلبسش الخمار قدام علي لخطر دايراتو خويا عشنا في دار وحدة عام و نص مالبستوش قدامو، غير سمعت الحس قدام الباب تع برا رحت نجري فتحتو دخل  عطاني الدوا قالي اعطيلها حبة برك و جا رايح جيت نغلق الباب موراه دار ليا قالي حلا وين راهي كاش ما دارولها؟ قتلو لالا نائل برك عيط عليها طلعت لشومبرتها، قالي ردي بالك عليها مسكينة غاضتني و إدا كاش ما حتجتي ابعثيلي، قتلو إيه بصح روح خليني ندخل بردت، تبسم و راح.
غلقت الباب و رحت نجري دخلت للدار درت باش نغلق الباب حتى واحد جبدني للصالو درت صبتو محمد طبعني للحيط و زيرني، بديت نطبع فيه و نقولو وخر يا حقييير، حط راسو قدام ودني و قالي بلعقل لوكان تصوغي جيبي الهدرة ليك أنا ما عندو ما يصرالي يمال ريحي عاقلة يا الشابة، عيطت وخر يا حيواااااان وخر، حط يدو على فمي قالي لوكان علي ما طبعيهش يعجبك ياك، جيت نصوغ ما قدرتش حبطت دموعي و أنا نحرك في راسي كيفاش نسلك روحي، ما علاباليش كيفاش حتى تفتح الباب تع لداخل محمد بعد عليا بلخف صغت دخل علي يجري على صوتي قالي وش دارلك؟ بديت نبكي و هو دخل في محمد بالضرب خرج الحاج يجري عيط عليهم بديتونا مع الصبااااااح.. و هوما يتضاربو خربطو وجوه بعضاهم، الحاج يسلك ما بيناتهم ما قدرلهم مع هو قصير ماشي كيما ولادو، و أم سعد تضرب في علي لظهرو باش يبعد، حبط نائل يجري و يعيط سلك ما بيناتهم و هوما يطيحو و يسبو في بعضاهم.
نور حبطت تجري تلبس في خمارها و تقول وش صرا وشبيكم عندنا يومين برك ملي جينا هبلتو، دخلت نبكي نسمع في محمد يقولو هاد القح.... تتواعد معاه فالفجر و يتباوسو عند الباب، تشوكيت لبست خماري و خرجت ليهم قتلو خاف ربي والله غير يكدب حراااام علييييييك، قالي محمد أنا كداب ياك و فتح التلفون كان مصور لقطة كيما جا علي خارج و دار ليا يسقسيني على حلا كنا قراب من بعضانا غير شافها نائل و يجبد على علي بدبزة و يعيط جاي مع الفجر و مع مرت خااااااالك وشنو هاد العااااااار، علي دار لمحمد قالو ديرها و تحصلها فياااا لوكان ما دخلتش باش نجيب تلفون يما و صبتها تصوغ و تبكي منك.... و شاف فيا قالي ليليان قولي وش دارلك...
قالو الحاج الله لا تربحك اخرج برااااااااااا.. قالو علي و الله العظيم غير يكدب كان يتحرش بيهااااااا.. محمد قالو ما تحشمش و تزيد تكدب عيب عليييييييك..
قالت ام سعد قلتلكم شحال من مرة هادي قح.... كبيرة و ما أمنتونيش حبت تفضحناااااا.. قلتلها و الله ما كاين منها خرجت برك باش نشد عليه دوا الحاجة، عيط عليا الحاج قالي ادخلييييييي.... قالتلو أم سعد و حبت ترميها في راس وليد سعد هاد الساقطة لي ما عندهاش الأصل...
حاوزو علي و أنا دخلوني لشومبرة سعد القديمة و غلقو عليا قاعدة نبكي و نعيط لعيام فالتلفون مغلوق، نسمع فيهم يتعايطو كل واحد في جيهة حتى سمعت هيام جات و تتضارب معاهم قالتلهم ما تحشموش تطعنو في وليدي مع مرت خالو و هوما عندهم عام و نص عايشين في دار وحدة كي الخاوة و نتوما شاهديييين...
فتحت عليا الباب و قالتي ارواحي اهدري ما تبقايش ساااااكتة هدا شرفك دافعي عليييييه.. قلتلها أم علي و الله غير عيطتلك صبتو مغلق عيطت لعلي باش بعثتيلي الدوا ليماك فتحتلو شديتو عليه و راح منبعد محمد حكمني فالصالون زيرني مع الحيط و قالي لوكان علي ما طبعيهش قالتلي وشنووووووو محمد تحرش بيك؟! قالتي أم سعد تحوسي تلفقي الحكاية على راس وليد سعد و تكروشيهم في بعضاهم يا لي ماعندكش الأصل ارهااااابية، قلتلها و الله ما راني نتبلا عليه، قالي الحاج بنتي على حقيقتك يا وحد المصفارة.. انا ملبكري علبالي بيك لفعى مسمومة كي كنتي تعمري في راس المرحوم علينا و ما تبردي حتى نتقاتلو.. قتلو ماشي مرحووووم ما ماتش هدا كامل باش تحاوزوني من الدار و تنحيولي أملاكو.. ان شاء الله يرجع و يقطعلكم ريسانكم كيما راكم..
نائل كان طالع كي سمعني قلت هكدا عاود حبط قالي يقطع راس شكون؟!! قادري روحك ليليان فوق غلطتك تزيدي تصحي في وجهك، قتلو غلطتيييي؟! انا أشرف منكم و نشرف لخراني فيكم، حكمني الحاج من شعري قالي أشرف من شكون؟ و بدا يضرب فيا أنا نصوغ و هياك نحاتني من يدو و داتني لشومبرة الحاجة، و أم سعد تعاير و تعيط، بدات تعيط هيام قالتلهم هدا كامل على الدراااااااهم تخونو وليدي و تتبلاو على مرتو، حرام عليكم راكم كامل عايشين من خيرو راني قاعدة هنا و نشوف شكون يقدر يحاوزني منا.. نحوسو تحاوزوني و تحاوزو مرتو باش يخلالكم الجو .. نسيت يا الحاج نهار بعت الدار لوليدك باش تعطي دراهمها لولاد أم سعد يديرو التاويل و انا قعدت عند صراع و دوك جايين تحوسو على الدراهم..
راحت للحاجة تنوضها باش تشربلها دواها والو ناضت تصوغ يماااااااااا.. اجريو لياااا.. يما راحت مابين يدياااااااا..
دخل نائل يجري رفدها للطونوبيل و راحت معاه هيام و الحاج، بديت نندب و نبكي كنت دايرة الأمل فيها إدا ماتت وين نرووووح.
جات ليا نور سقساتني كيفاش صرات مع محمد و علي حكيتلها، قالتلي ما تزعفيش من نائل و الله ما راهي هاماتو لا دراهم لا حاجة اخرى بصح تعرفيه هو ما يحبش المشاكل، ماراهوش في حوالو من نهار راح أبو حرب علبالك شحال يحبو و يقادرو.
حبطت حلا قالتنا صباح الخير وش كاين ماكان حتى واحد؟ وين راهي جدة، قالتلها نور تسمعي بهداك المثل لي يقول كي تقطعو البنادر نفحتلها تشطح؟ هكداك راكي انت، أنا نطلع نشوف ولادي خيرلي و راحت، دارت ليا حلا قالتلي وش كاين ليليان؟ قلتلها راكي منيتك ما سمعتي والو؟! ما راكيش عايشة معانا، قالتلي لالا ما سمعتش كنت سهرانة مع وسام رقدت غير مع الفجر و لي كيتمان في ودنيا و السطر قتلني من ضرب محمد.. بصح وش صرا؟ حكيتلها كلشي بدات تبكي قالتلي هادو صح ما يحشموش و يزيدو يطعنو في عرض بابا؟!! و الله ما توقعت منهم يديرو فينا هاد الشي كامل..
قلتلها أنا نعيط لخالي نروح عندهم و لا هاد الذل، قالتلي هبلتي؟ هادي دار بابا ماشي كان يقولك إدا مت ما ترجعيش لحتى واحد، قلتلها بصح فضحوني و طعنو في شرفي و زيد ما عنديش لامان في محمد، قالتلي و الله غير نديرلو السم فلاتاي نقتلو.. تهدر بحرقة و تمسح في دموعها حتى دخلت إخلاص  فتحت يديها لحلا ترمات في حضنها تبكي قالتلها يضربوك عمبالهم ما عندهم حتى واحد و الله غير نحرقهم، و جدها يعيطلها ملهيه قالها لمي قشك نديوك معانا ما تقعديش هنا..
أنا قاعدة و علي عيطلي فالتلفون رفدت عليه قالي يما راهي معاك؟ راني نعيطلها هي بجدة ما يرفدوش وين راهم باش نخرج خياتي راهم وحدهم فالدار، قتلو تلفون هيام مغلق و تلفون الحاجة راهو هنا ياك تصرعت رفدوها للسبيطار جوايه ال8 تع الصباح، قالي قولي و الله، قتلو و الله ما حملتش ربي ياخذلنا حقنا من محمد، قالي علبالك كي رجعت باش ندي تلفون يما مع الشي لي صرا نسيتو لتم،حقا وش دارلك؟ قتلو زيرني مع الحيط و قالي لوكان علي ما طبعيهش، قالي و الله غير نشرب من دمو اصبري عليا برك، قتلو علي رد بالك أم سعد ما رايحاش تسكتحتى و يآمنونا الحاج و نائل هي تحرش الحاج و تقدر دير كلشي ياك تعرفها، قالي نشوف جدة دوك و كي تريح نديها لدارنا و نجيبك معاها و لا كان وحدة فيكم دير توكيل للحاج و لا لسعد نوريلكم، قتلو و دارنا هادي كيفاش؟ قالي نفريو هاد المشكل منبعد يعملها ربي تاويل، دوك نجيبلك خياتي نخليهم عندكم باش نروح نشوف جدة و يما، تقعدو في شومبرة الحاجة و تغلقو على رواحتيكم الباب، و أنت ليليان ما تطلعيش لفوق و ما تبقايش رايحة جاية فالدار، قتلو أنا قلت نعيط لخالي يجي يديني قالي وش من خال ليليان خلينا يرحم والديك أصلا هاد الدار لي راني ساكن فيها أنا و يما و خياتي تع خالو صراع يعني ما ريحينش نديرو فيك مزيا..
غير كوبيت دورت وجهي صبت إخلاص مادة راسها من الباب تسمع معامن راني نهدر كي شافتني خزرت فيها غلقت الباب وراحت، طلعت لنور قلتلها عيطي لنائل شوفيلي الحاجة كيفاش راهي، قالتلي عيطتلو قالي راهي عيانة بزاف و زادت روشوتات هاد الشي كامل من مشاكلكم، قتلها حنا و لا هداك سعد و وليدو، قالتلي ادخلي لشومبرتك اغلقي على روحك و ما علابالكش بيهم، قتلها أنا لي غاضتني واحد ما صدقني أنا نقولكم محمد ترحش بيا و نتوما ساكتين و مصرين بلي عندي علاقة مع علي، قالتلي هدا كامل مخطط تع سعد و وليدو على جال الدراهم، قلتلها بصح علاش يبات هنا علاش ماراحش لدارهم؟ قالتلي هو ملبكري يجي يبات هنا عندو بزاف ما راحش لدارهم، قلتلها بصح دوك جينا يروح يحكم دارهم..
حنا نهدرو دخلت حنين سلمت على نور قالتلها وشراكم جيتو؟ قالتلها إيه جابنا بابا كامل ماما و مرتو راهم لتحت، و قعدت تقصر معاها ما سلمت عليا ما خزرت فيا، نور رفدت ولادها و حبطت و أنا جيت خارجة قالتلي حنين ليليااان صح علي يحبك و صبحتو تتباوسو عند الباب؟  قلتلها قادري روحك عيب عليك علاش كاين واحد يلحق غير ظفر صراع باش نخزر فيه، ماكاش واحد يقدر يتوشيني من غيرو و لي يدنا ليا يدو نقطعها، خبطت الباب و دخلت لشومبرتي فتحت خزانتو قعدت نشم في حوايجو و نبكي..
بزاف لاموني كي قعدت عندو و قالولي كبير عليك كيفاش حبيتيه؟ 
الشي لي صبتو عند صراع ما صبتو عند حتى واحد، كان زوج و أب و سند و أول راجل زغد في قلبي و عشقتو وجربت الحب معاه..
قعدت نبكي فالشهقة حتى غفيت في وسط حوايجو، شفت كي شغل تفتح باب الخزانة و وقف صراع قدامي مدلي يدو خرجني منها و تبسم معايا، كان لابس لكحل و حوايجو كامل بالتراب، ترميت في حضنو نبوس فيه و هو حابس في بلاصتو ما دار حتى حركة خزرت فيه شفت حبل داير على رقبتو، كان يحاول ينحيه و انا غير نشوف فيه ما مديت يدي ما عاونتو، تفتحت الباب دخل بابا استغربت عيطتلو بابااااا و تخبيت منو مور ظهر صراع، هو ما خزرش فيا راح ديراكت ليه قالو امشي معايا يحتاجوك، و صراع يقولو قولهم ما نجيش راني مشغول و حكمني من يدي فطنت مخلوعة صبت روحي راقدة في وسط الخزانة سمعت الأذان خزرت فالتاقة صبت الليل طاح، رقدت حتى لدوك و ما فقتش لروحي؟!! لبست خماري و حبطت لتحت صبتهم كامل فالصالو، كانت إخلاص تقولهم أنا سمعتها تهدر مع علي سور يكون داها و هربو كيف كيف، و نائل يقول لنور حوسي عليها مليح مستحيل تهرب عيطت لعلي يحلف بلي ماراهي معاه، و نور تقول نائل و الله ما تسعى في شومبرتها دخلت و ما صبتهاش، قالها عاودي اطلعي شوفي حوايجها و دوزانها إدا راهم لتم بالاك صح هربت، دخلت قلتلهم عليمن راكم تهدرو؟ دارو ليا كامل مخلوعين قالي نائل وين كنتي؟ قتلو كنت راقدة في شومبرتي، قالتلي نور دخلت و ما صبتكش قلتلها كنت راقدة فالخزانة، قالي نائل راكي من نيتك ليليان؟ علاش هبلتي؟ قتلو و لي تحضن حوايج راجلها المفقود و تقعد تشكيلهم باش يسمعها كاش ما قعدلها عقل؟
قالتلي إخلاص شوف داك التمسكين و هي النار تحت التبن، قلتلها أنا ما دنيت لحتى واحد الناس لي راهي جايبتها عڨابي، جات تهدر عيط عليها نائل قالها خلاااااص اخرجو برااا خليوني غير مع ليليان عندي هدرة معاها، هوما خرجو و هو قالي اقعدي تشوفي قتلو وش راهي الحاجة؟ قالي خلينا من الحاجة دوك فهميني وش حكايتك مع علي؟ قتلو مع علي و لا مع محمد؟! قالي و الصورة ليليان نكدب عينيا؟! قتلو هديك كي جيت نغلق الباب موراه، قالي و الفجر؟ قتلو الحاجة ما قدرتش تصلي راسها وجعها عيطت لهيام تلفونها طافي وليت عيطت لعلي جوزهالي و بعثتلي معاه دواها لخطر كانت نساتو عندها، قالي صح وش حكايتك مع محمد؟  قتلو جبدني و زيرني هنا مع الحيط قالي لوكان جا علي ما تقوليش لالا..... حنا نهدرو دخل سعد قالي اااااا حتى نائل اختليتي بيه؟ ماراكيش لاحقة و حبيتي ترميها على راس وليدي؟ عيط عليه نائل سعدددددددددد شد لسانك ولا و الله العظيم غير نقلب الدنيا، قالو أنت شد بلاصتك بجيه ما دخلش روحك حاسب روحك أنت الكبير و تجاهلتني و جاي تحل المشاكل راسك نقطعو، قالو تقطع راس شكووووون؟! قالو و نكرازيه تحت صباطي كي ترفع صوتك، قالو سعددددددد... و وقف مقابلو، قالو واش معول ترفع يدك على خوك الكبير على جال هاد القح.... قالو أنت ماشي بنادم المرأ عرض خوك مرت صرااااااع افهم.. تطعن فيها بلاما تسمعها؟! قالو و صراع جابها من الزنقة و لحق الوقت باش ترجع منين جات، قالو ليليان ما تخرجش من هنا صراع وصى عليها و وصيتو تتنفذ، ضحك سعد ههههه قالو واقيل عينك على ورثو و جاي تلعبها حنين.. قالو هدا تخمامك انت.. لي رانا فاقدينو أخ و حاجة ما تعوضو، بركاونا من المشاكل يرحم والديكم خليو الطفلة طرونكيل و وليدك ممنوع يدخل لهنا، قالو راك جاي دير علينا راس و تتحكم فالدار ولا وشنو؟ قالو ما نتحكم لا فالدار لا في والو ارواح أنت دير علينا راس و سكتنا برك حبسو علينا المشاكل يرحم والديكم عيييينااااا..
قالو يمال اوقف معايا باش نوقفو على رزق خونا عندو شهور ملي راح خليهم يديرولنا وكالة، قالو علاش كيما نحب انا و لا برضايتهم، قالو و نستناو حتى يجي البراوي يسرق تعب خونا يديه غير خالها دريد، قتلو حرام عليك انا ما نحوس لا على ورث لا على دراهم، تطعنو في شرفي غير على جال وسخ الدنيا؟ قالي انت تخرجي براااا راني نهدر مع خويا، قالي نائل ليليان روحي دوك منبعد نكملو الهدرة، جيت خارجة صبت نور و إخلاص يتصنتو خليتهم و جيت جايزة منبعد درت لنور قلتلها حقا وين راهي نوال و ضرتها ماشي جاو؟ قالتلي و يقعدو يستناو فيك؟ قعدو 4 سوايع و راحو لدارهم، قلتلها و الحاجة؟ قالتلي فالسبيطار و أم سعد و الحاج و هيام راهم معاها، جا سعد باش يروح يجيب يماه، قلتلها و أنا وش دخلني في أم .... ما تخلينيش نبدا نهدر، قالتلي إخلاص راكي تهدري على خالتي؟! قلتلها انت ماشي جيتي باش تدي حلا و تروحي؟ وش راكي ديري هنا؟ قالتلي واقيل بالصح آمنتي بلي الدار دارك و الله ما صرات باش نخليلك دار ختي و نروح..
دخلت لشومبرة الحاجة صبت جنات و سارة بنات هيام سقسيتهم على علي قالولي جا دا تلفون هيام ملباب و راح.
كي جا الحاج و أم سعد عيطلي قالي اقعدي ليليان شوفي بنتي خدمة صراع راهي حابسة و ما نقدروش نمشيو الحالة بلا وكالة، قتلو و نتوما علاش تكملو و ليمن و هو راح؟ قالي يمال الشقق لي فالعاصمة و فالأردن شكون لي يحكمها نخليوها هكداك؟ عندها شهور و هي حابسة، قتلو إيه و المطلوب؟ قالي انا راجل كبير ما نقدرش نوقف على الخدمة، ديري وكالة لسعد يحكم رزق خوه و إن شاء الله حقكم محفوظ ما رايحين ناكلو حق حتى واحد، قتلو عمي انا عمري و إدا همتني الدراهم لي راح ما تعوضوش كنوز الدنيا بصح أنا ما عندي حتى واحد نروح ليه و سعد و وليدو طعنو في عرضي و واحد فيكم ما دافع عليا، قالي سعد انت جايا ترمي في بلاك على وليدييييي؟ درت للحاج قتلو هدا ما عنديش ثقة فيه إدا حبيتني ندير وكالة لنائل ما عنديش مشكل علبالي عندو كلمة و يحب صراع و ما رايحش يبهدلني، قالي سعد راكي تتجاهلي فياااااااا.. قتلو وعلاش حتى نتجاهلك؟ صراع ما خلاش دراهمو عندك و جايا ندي الورث من عندك، قالت إخلاص الدراهم هادو كامل تع المرحومة لي باع دارها و ذهبها باش كبر و دوك جاية انت على آخر الزمان تتسلكي على رزقها و الله لا حلوة بالصح هادي لي قالك جا لخر طبع لول قالو بلاصتي من عام لول، قلتلها دارها دار صراع و ذهبها هو لي شراه و كل حاجة ديالو ما جبت حتى حاجة من عند ختك و سرقتها، قالتلي أم سعد واقيل نهار جيتي جبتي ذهب و كنوز و حنا ما علبالناش و لا جيتي العصر و حبيتي تدي القصر، قلتلها ما ديت ما نحوس ندي حايبا نعيش بلاما يذلني حتى واحد ما يذلني و زيد هو بنفسو وصى عليا بصح واحد ما عجبو الحال باش ينفذ وصيتو، قالي سعد شوفي لهنا و اسمعيني مليح دقيقة ما تزيديهاش هنا رجليك نكسرهم فهمتيييي يلااااااا.. قتلو ما عندك حتى حق باش تحاوزنيييي، قالي نحاوزك و نحاوز لي جابك يلاااااا برااااا و ناض يطبع فيا و الحاج يقولو استهدي بالرحمن يا وليدي هادي مرت خوك، وقفني فالڨاراج و علي كان جا قاعد يستنى في خياتو عند الباب باش يرجعهم لدارهم، كي سمع الدواس دخل جبدني من يدي و مشي ناض الحاج يعيط لسارة باش جيبلي حجاب و أم سعد و إخلاص قالولو خليك منها، حكم سعد علي قالو انت تحوس تدي كلشيييييي، قالو علي ما نعييش روحي معاك ياك حاوزتها خلاص بصحتك الدار، دارنا مفتوحة لمرت خالي و انا علبالي كيفاش نرجعو..
هوما يهدرو بالعياط و علي يطبع فيا لبرا و نور تجبد فيا لداخل قالتلي ما تروحيش ليليان استناي حتى يجي نائل يدبر راسو ما طيحيش فالغلطة، و انا نبكي ما عرفتش وش ندير شكون نتبع، جبدني علي أنا و خياتو و دانا لدار هيام
غير دخلنا قالي و الله و ترجعي ليهم غير نكسرلك راسك من ليوم هادي دارك تقعدي هنا كيما انت كيما خياتي حاجة ما تخصك، قالتلو سارة لوكان شفتهم كيفاش كانو يساعفو فيها و بنتي و حبيبتي باش تتنازل غير قالت لالا حاوزها خالو الكلب، قالها عرفتها و وصيتها قالتلو هي حبت تتنازل لنائل، شاف فيا قالي حتى لنائل لالا خليهم يطيبو في نارهم، و الله لوكان ديريلهم وكالة غير يديولك كلشي و يحاوزوك، قتلو بصح ماشي غير أنا الوريثة مام يماك و حلا و الحاجة، قالي ما قدرولهمش كي شافوك براوية ما بلعوهاش باش تدي دارولك هداك الكومبلو باش يردوك لأهلك على أساس خنتي راجلك و يدخلو الجماعة تع العشيرة يديو حقك من عند خالك و يهددو أي محامي بالقتل باش ما يوقفش على قضيتك، بصح إدا قعدتي هنا ما يقدروش يخالفو أمر العشيرة و ما يقدرو يهدو حتى واحد..
كي قال هكدا تفكرت نهار قالي صراع إدا مت ما تروحيش لأهلك اقعدي هنا مع يما و عندك حق في كل حاجة نملكها لهاد الدرجة كان عندو نظرة مستقبلية؟!!!  فرشت أنا و البنات لداخل فالشومبرة و علي فالصالو، كي طلع النهار سمعت هيام عيطت لعلي فالتلفون تداوس معاه قالتلو وش بيك علي هبلت كيفاش تدي ليليان للدار و أنا ماكاش لتم و هوما تاهمينك بيها و هو يعيط قالها حاوزوها من الداااااار وش راكي تهدري انت؟!! كوبات في وجهو، سمعنا الدقديق فالباب كانوا البنات لداخل راقدين غير أنا و علي لي نايضين، فتح الباب صاب جدو و عمو بندر شافوني واقفة و يجبد عليه بكف قالو قاعد غير انت و ياها فالدار و حبيتهم يصدقو بلي ما كان والو ما بيناااااااتكم.. و جدو قالو راك حايب تباصينا أنت دوك ما يخلاصوش مشاكلك العشيرة كامل عرفت بلي ديت مرت خالك لداركم و يماك غايبة وش عندك في مخك أنت حاااااابس... قالهم علي حاوزها خالو سعد من دارها، شويا و زاد جا الحاج و سعد قالو رانا عيطنا لخالها يجي يدي هادي لي ما عندهاش شرف
خرجت ليهم قتلو عمو حرام عليكم علبالكم بلي ما كاين والو ما بيناتنا وش درتلكم باش راكم حايبين تفضحوني، قالي سعد امشي الله لا تربحك يا وحد الق.... يما ما غلطتش كي قالت عليك بلي ما عندكش الأصل، قتلو أصلي يشرفك ويشرف عشيرتك فهمت لوكان ماجيتش ناقص شرف ما تفضحنيش، تلاح جا يضربني وقف على في وجهو قالو و الله ما تمد يدك عليها و هي في دارنا، عيط عليه جدو صالح قالو عليييييي بعدددد، و عمو بندر قالو ليوم نربييييك و تحاكمو أنا دخلت نجري قعدت مع البنات و نبكي حتى سمعتو حاوزهم و غلق الباب و دخل يعيط و يسب و يكسر فالدوزان، عيطت لهيام فالتلفون حكيتلها ناضت تعيط عليا قالتلي ليلياااان و أنت علاش ما قعدتيش في دااااااارك علاش رحتي معاااااه.. قلتلها أم علي سعد حاوزني من الدار وش حبيتيني ندير، قالتلي أنت حاااااابسة دوك ترجعي لدااااارك خفي و كوبات، لبست و انا نبكي قتلو علي اديني للدار قالي ماكاش خرجة منا ما تبوجيش، قتلو بصح يماك لي قالتلي، قالي ماعلبالك بحتى واحد خليك منهم، قتلو علي خليني نرجع دوك يجي خالي نروح معاه، قالي لوكان تروحي يديولك كلشي، قتلو ما نحتاج حتى حاجة خليني نروح غلق راسو وليت قعدت و نبكي حتى سمعنا الدقديق فالباب فتح صابو نائل دخل قالي نوضي ليليان تروحي معايا و دخلت موراه هيام تلاحت في علي حبت تضربو قالتلو كيفاش جيبهااااا حابس انت وش عندك في مخك، قالها نائل خلاص أم علي دوك أنا نديها، قالو علي و أنت خالي ماشي وصاك عليها و قالك راهي أمانة عندك، قالو بصح انت علاش دخل روحك؟ قالو و حبيتني نشوفها تتحاوز و نقعد نتفرج، قالو يا بنادم هديك دار راجلها ما كاش لي يقدر يحاوزها جبتلي المشاكل بتخمامك و وسخت سمعتنا حابس أنت و فوق تزيد تحاوز جدودك؟!! قالو الله ينعل الراسة تاعهم منين كانت قالو قادر روحك خير ما نكسرلك راسك، قالو يمال وين كنت انت كي حاوزوها.. لوكان جيت خايف عليها ما تحاوزني لبارح.. غير روح لخطر منا ما نخليهاش تخرج، تحاكم نائل و علي و هيام تسلك ما بيناتهم و قالت لوليدها حبيت جيب الهدرة لروحك؟ علاش خصك هم؟ هنا خلاص ما احملت طرطقت قلتلها حتى أنت تبريتي مني و تخافي على وليدك من مشاكلي زعما وصاك عليا بصح خسارة تعبو و مع لخر وصيتو ما تتنفذش قالتلي افهمييي... بلاصتك في دار راجلك ماشي هنا، قالها علي انت من واش راكي خايفة علاش هكدا قلبك حجر رميتيها ما بيناتكم، قالتلو ما دخلش رووووحك، قالي نائل امشي ليليااااان قلبي راح يخرج، قالو علي خليها هنا و دار ليماه قالها طعنو في شرفها و تهموها بيا راني مستعد نعقد عليها و نسترها، قالتلو وجهك صحيح أنت، و نائل قالو يتسمى أنت صح راك حاط عينك على مرت خالك، قالو ان شاء الله تتعمى عيني ادا نحطها على عرض خالي بصح انا ما رانيش حايبها ترجع لدار جدي لخطر ما رايحينش يسكتولها، قالتلو يا وليدي ما تقدرش تتزوج بيها راجلها مفقود ماشي ميت تفهم انت و لا لالا خلينا حنا نتصرفو علبالنا وش رانا نديرو، قالها بصح فهميني من واش راكي خايفة قالتلو يا وليدي وسخت سمعتي و سمعة خياتك و تهموك بلي جايبها للدار، قالها بصح خياتي راهم معانا جبتهم، قالتلو واحد ما يقول بلي خياتو راهم لتم مادام ما كنتش أنا هنا راك عميتها، قالها ماعلبالكش بالناس خليهم يندبو ريسانهم، قالتلو انت ما تفهمش واقيل و دارت ليا قالتلي روحي مع نائل.
طلعت مع نائل فالطونوبيل و دموعي تجري قالي ليليان علاش خرجتي مع علي؟ قتلو ما رانيش قيس أفلامكم خوك لي حاوزني و تهمني، راني متمنية يرجع صراع و يشوف وضعية أهلو وش صرالها، قالي ديري وكالة لسعد و تهناي قتلو وعلاش ماشي ليك؟ قالي انا مانيش قادر للمشاكل عييت، قتلو يمال نتنازل لعلي، قالي شفتي كيفاش راكي ديري فالتيكيات لروحك بلاما نفيق، قتلو لخطر علي هو الراجل الوحيد لي شفتو بعد صراع الباقي كامل يتخباو مور الحيوط و يخافو، قالي وش راكي تقصدي قادري روووووحك، ليليان ما توصلينيش نبدل الأسلوب معاك،  علابيها سعد ما حملكش لسانك طويل تقول ما راكي مرا مكسورة على راجلها لسانك قدك فالطول و تزيدي تتضاربي و صوتك ينسمع من طرف الدنيا، قتلو من ظلمكم تهمتوني و واحد ما دافع عليا و حبيتني نسكت، قالي خالك راهو جاي فالطريق يديك و تهناي، قتلو إيه نروح معاه خير ما نعيش في ذلكم..
وصلنا للدار صبنا سعد جاب نساه في زوج و بناتو، غير شافني بدا يتعنكر و مزير على سنانو قال ماشي مربية، ثقلتو و دخلت لشومبرة الحاجة صبت نوال قاعدة فوق البونك سلمت واحد ما رجعلي، طلعت لشومبرتي صبت الباب مغلوقة عيط لنور قلتلها نووور وين راهو مفتاح الشومبرة ديالي؟
قالت أم سعد يا يماااااااا وجهها شحال صحيح بعد كامل وش صرا و مازالها تسمعنا صوتها، قالها سعد وش يجيك من وحدة كيما هي، قتلهم ربي ياخذلي حقي منكم و خنقوني الدموع مسحت عينيا و عاودت عيطت نووور وين راهو المفتاح، قالي الحاج ما عندك حتى شومبرة و منا لفوق نوريلك كيفاش تتجاوزي حدودك يا قليلة الحي، قتلو شكون لي تجاوز على لوخر انا و لا نتونا، حرام عليكم الشي لي راكم ديروه فيا كيفاش تصلي و تصوم و تطعن في شرف عروستك، قالي و مازالكي تزيدي تهدري خرجتي مع علي ورقدتي في دارو و يماه مكاشها، قتلو وشنوووو؟ خرجت؟ ماشي نتوما لي حاوزتوني؟! عيب عليكم، قالي جايا دوك تعلميني وشنو العيب و جا طالع ليا قتلو إيه عيب علاش كي كنا فالأردن نبات غير أنا و ياه و حلا و البنات ما تهمتوناش.. حكمني من شعري و ضربني و سعد و يماه يقولولو هاي ليك ربيها، حتى دخل نائل يجري سمع الصوت داوس مع باباه قالو هكدا يا بابا على شيبك تمد يدك على طفلة لاحول و لا قوة أهلها ميتين و راجلها مفقود؟! قالو يتسما انا ماشي راجل ياااااك، رمى وحد الفاز كسرو و ناض يعيط الله يغضب عليكمممم عيييينااااا ما كرهتوش من الزڨا  في هاد الداااااار كل دقيقة .. هدا وين حسيت بصراع كي كان يقولكم راني عياااااان كامل في راسو و هو ما صاب وش يرقع وش يخلي، و دوك كبير الدار لي راهو متحزم للمشاكل، هدا كامل على جال الدراهم و الله ما معيشة هادي، افهموووووو صرااااااااع وصى و املاكو لبنتو و لمرتو و الباقي بااااااطل...
الحاج سكت و سعد يبلبل لتحت و أنا عيط عليا نائل قالي ادخلي و دخل لشومبرتو و خبط الباب موراه طلع سعد يدقدق عليه و يسب و يعاير دارو فالثقيل خلاه يهدر وحدو و ما فتحلوش ولا حبط..
و أنا صبت شومبرة حلا فارغة لخطر راحت لدار جدها قعدت فيها حتى للظهر جا خالي حبطت نجري ليه حضنتو و نبكي مسح على راسي و عزاني أنا و الحاج في غياب صراع.
قعدنا فالصالو أنا و ياه و الحاج و سعد و أم سعد، قال الحاج لخالي شوف أبو حنا أنا عيطتلك على جال بنت اختك ليليان، علبالي بلي صغيرة و طايشة بصح ما احترمتش غياب راجلها تصرفاتها عيانة، حنا ولاد عشيرة و ما نرضاوش بالعوج، قالو علاش وش دارت؟ قالو هربت من الدار و راحت مع وليد لوستها باتت في دارو و يماه غايبة، قتلو ماعنداك خالو يكدب هوما لي حاوزوني كي ما درتلهش وكالة، قالي شكون الكدااااب يا المربية، قالو خالي دقيقة خليني نفهم منها وش من وكالة؟ قتلو خالو حبوني ندير وكالة لسعد و كي ما قبلتش حاوزني فالليل و جا علي داني تهمونا بلي كاينة حاجة ما بيناتنا و علي هادا هو نفسو لي عشت معاه في دار وحدة مدة عام و نص و خلاونا وحدنا انا و ياه و حلا و خياتو كيما ضربت لاطونسيو الحاجة و جاتها افيسي و طلعوها للبنان و مام لبارح كانو خياتو فالدار، دار خالي للحاج قالو ماشي هكدا أبو صراع الشرف ماشي غير ارواح و أهدر فيه، تهمها من قبل وليدكم فضحها و انضلمت بسبتو و مع لخر ثبتلكم أبو حرب بلي طاهرة و واحد ما توشاها من غيرو، قالتلو أم سعد شكون أنت باش تقول على وليدي عابد كداب، واحد ما كدب عليها هادي خرابة البيوت لي بلا أصل، قالو خالي الحاج المفروض تسكت مرتك و أصل ليليان معروف و عمومها ناس معروفين برك الدنيا دارت و تبراو من باباها كي بدل دينو، أنا ما نقدرش ندي بنت اختي، بوشمن صفة نديها و هي عندها حق هنا؟ نديها منبعد تزدمو على داري؟ عندي عايلتي ما خصنيش مشاكل، قتلو بصح خالو مانيش حايبا نقعد هنا حتى شومبرتي و غلقوها عليا، قالي اعذريني يا بنتي يماك استقبلتها عندي منبعد وليت فالمشاكل مع يحي و رجعت لدارها عاشت معاه على جال الورث، و دوك انت تزيدي تخلي خير راجلك و جي ليا بمشاكلك اعذروني ما نستقبلهاش، قالو سعد يتسمى أنت راك حاط عينك على الورث، قالو هدا حقها و ما نديهاش غير بعدما تعطيوها كامل حقوقها و بلا مشاكل و دوك اسمحولي أنا نروح.
خرج و خلاني ما بيناتهم قد ما حللت ما سمعنيش و راح، دخلت لشومبرة الحاجة و بكيت مخ راسي..
قعدت عندهم و سعد كرا دارو لخطر خسر المولدة الكهربائية ديالو فالحرب و ما صابش باش يصرف، جاب نساه في زوج و ولادو و سكن معانا، دا شومبرتو القديمة و شومبرة عابد و بنتو حنين مع حلا.
نسوان سعد في زوج ما يرحموش نخدم الشغل و ما نهدر حتى حرف، و سعد في كل دورة يرمي الكلام و إدا رجعتلو ما نسلكش.
هيام قعدت مع الحاجة فالسبيطار 17 يوم باش خرجت، كي رجعت الحاجة للدار وليت نرقد معاها و تهنيت شويا من عينين محمد لي في كل دورة نصيبو يخزر، و هيام كانت جي كل يوم تتفاقد يماها عيات بزاااف مرات دافع عليا مرات تقولي اصبري حتى يفرج ربي، علي ما عيطتلو ما عيطلي لخطر يماه منعاتو عليا و رجع يخدم هو على يماه و خياتو.
هوما كرهولي حياتي على الوكالة جيت نتنازل قالتلي هيام لالا زيدي اصبري تحملي 3 سنين و تستلمي حقوقك بصح لوكان تتنازليلهم يحاوزوك.
وحد النهار كنت نغسل فالماعن جات اميمة بنت سعد تجري، طاحو من يدي الماعن تكسرو ما علاباليش كيفاش زرقت و طاحت بجبهتها على الزجاج انجرحت، جاو يتجاراو نوال بدات تعيط وشبيهااا رفدها سعد و نائل للسبيطار و انا بداو يعيطو عليا النسا و أم سعد حكمت الموس سخناتو و كواتني في يدي صغت لربي لي خلقني، سمعتني الحاجة ملداخل قاعدة تعيط و ما قدرتش توقف، لبست حجابي و خماري و أنا نبكي و جيت خارجة حكمني محمد طبعتو و خرجت للزنقة شفت علي جا يجري ليا شاف يدي محروقة و بالدم حبس طاكسي و داني للديسبونسار داووني و جيت خارجة نرمي روحي على كاش طونوبيل تدحسني حكمني علي قالي وشبيك هبلتي؟ حرام تقتلي روحك ادعي لربي يفرج عليك، قتلو علي اطلقني خلينييي.. قالي نقولك حاجة دوك انا علبالي وين نديك ارواحي تشوفي، حكم طاكسي و وصلني لمضافة الشيخ ريكان ..كي حبطنا قالي روحي لهاديك الدار ادخلي للشيخ قوليلو راني براوية سلكني و احكيلو كلشي هو يجيبلك حقك، قعدت غايسة قتلو وش راك تهدر علي نخاف، قالي صدقيني غير هو لي يبهدلهم و يجيبلك حقك أفي خمارك على وجهك خلي غير عينيك يبانو و احكيلو من نهار جيتي لهنا حتى لدوك هو يعرف كيفاش يتصرف.. ما تخافيش هدا هو حلك الوحيد..
جاتني صعيبة لخطر هوما ولاد عشيرة و عندهم عيب تدخل المرأ لديوان الشيخ بصح ما عنديش حل آخر تحتمت، درت الكوراج و مشيت خطوة للقدام و خطوة للور وصلت للباب صبت راجل طويل واقف قالي غير لخير قتلو نحتاج الشيخ ريكان قالي وش عندك معاه؟ قتلو برك نهدر معاه و بكيت، شاف يدي بالبونداج قالي ارواحي و داني لدار قريبة للمضافة دخلني للصالو و عيط للنسا يجيبولي الما نشرب، منبعد قعد قالي أنا خو الشيخ ريكان شكون أنت؟ قتلو أنا ليليان، قالي انت ماشي منا لا في شكلك و لا في لاكسو ديالك قتلو إيه أنا براوية عليكم، قالتلي وحدة من هادوك النسا أنت لاجئة؟ قلتلها لالا متزوجة هنا، نطق الراجل قالي مرت شكون أنت؟ قبل ما نواجبو دخل وحد الشيخ قال السلام عليكم رجعنالو و عليكم السلام، نطق الراجل قالو هاد المرا براوية و متزوجة هنا جات تحوس عليك قالو مرحبا بيها ضيفوها قتلو عمو أنا ما عندي حتى واحد هنا و راجلي مفقود و أهلي ذبحوهم الارهاب و جيت لعندك نشكيلك لي ظلموني، قالي اعتبري حاجتك مقضية ريحي و تهدني و اشربي حاجة و ما يكون غير لخير،كي جيت نشرب العصير انتبه بلي يدي ترجف من الخوف قالي مرت من أنت؟ قتلو مرت واحد اسمو أبو حرب، تخلع قالي مرت أبو حرب؟!! قتلو إيه قال لا حول و لا قوة إلا بالله هذا واحد من أبطال عشيرتنا لي ضحينا بدمو قعدو يخزرو في بعضاهم و هو يحكيلهم عليه، منبعد دار ليا قالي شحال في عمرك قتلو 19 سنة، قالي أنت لي جابوك في حكاية عابد الله يرحمو؟ قتلو إيه و حكيتلهم كلشي كيما قالي علي و هوما يسمعو كي كملت قالي ماشي غريبة نستناوها منهم صراع نعرفوه ملي كان صغير و علبالنا وش دارت فيه مرت باباه، يماه ناس ملاح و الله ما يستاهل يصرا هكدا في نساه موراه، اعتبري حاجتك مقضية دوك نعيط لأبو صراع و عمهم أبو سليمان و ما يكون غير لخير إن شاء الله..
كرموني آخر كرم مام ما كنتش قادرة ناكل حطو من كل خير، و هو عيط لعمهم عزام قالو مرت أبو حرب راهي عندنا تفضلو لعندنا للمضافة باش نحكيو في أمرها ..
جا الحاج و 4 عمومهم و سعد و نائل دخلو للمضافة، داتني وحد المرا وقفتني قدام الباب باش نسمع.
هدر معاهم بهدلهم و هوما غير يرقعو قالو الحاج هي بنتنا و عايشة معززة مكرمة واحد ما دنا ليها هي لي حبت خالها و خالها ما قبلهاش و طالبنا بالورث ضاربنا معاه، و أنا في عوض باباها و نخاف عليها هي خرجت من الدار و حنا ما عندناش مرا تخرج و تعرفنا خاطينا المشاكل، قالو بصح المرا راهي محروقة من يدها، قالو تجاوزت حدها و غلطت مع أم سعد و دواس تع نسا ما كناش حنا فالدار، قالهم نخليها دوك ترجع معاكم تقعد سمانة عندكم نجي أنا برجلي و نشوف بعيني لوكان نصيب واحد دنا ليها ناخذ حقها مربع من عينيكم.
رحت معاهم و الشيخ ريكان يوصي و يعاود قالهم مرت بطل و يتيمة خافو ربي فيها الدراهم تروح و تجي ..
داوني و لوكان صابو يشربو من دمي، طريق كاملة و هوما يسبو على علي عرفوه بلي هو لي جابني، و عمهم قالهم هادي يلزم تنحط رصاصة في راسها طيحت بينا قدام شيخ العشيرة، و الحاج قالهم و تلوموني كي نقولكم وجهها صحيح و واحد ما يقدر عليها.. مرا تدخل لديوان الشيخ ريكان؟!! بصح هدو خدايم علي ياك نحكمو.
وصلنا للدار عطاني مفتاح شومبرتي و قالي فيقورتك ما نسحقش نشوفها يا وحد المصفارة، دخلت رحت ديراكت لخزانة صراع قعدت نجبد في حوايجو نرمي و نبكي و نقولو شوف وين وصلتني شوف وش درت فيا شوف وين خليتني علااااااش...
سمعت الحاج يقولهم وش نديرلها هادي دوك على آخر عمري تهيني قدام العشيرة، قالتلو أم سعد أنا نطلع نضربها و نربيها و قولهم دواس تع نسا، نضت نجري غلقت الباب على روحي بالمفتاح، قالها خليها قالتلو أنا علبالي كيفاش نربيها بلاما تهدر اصبر عليا تشوف و طلعت تخبط فالباب عليا ما فتحتلهاش ولات حبطت تعاير و تسب قالهم سعد اعطيوهالي نقتلها و نرميها و نقول هربت و انذبحت ياك راكم تشوفو الوضع.
سمعتهم كي داوسو مع هيام كي داني علي لديوان الشيخ بهدلوها مسكينة.
قعدت في شومبرتي مدة 6 أيام حابسة روحي، علبالي بلي كي وصى الشيخ مام لوكان خرجت ما يديرولي والو بصح خفت يغدروني يقتلوني و يقولو هربت كيما شار عليهم سعد، خممت باش نقعد سمانة حابسة روحي و كي يجي الشيخ ريكان نقولو راهم ملاح معايا بالاك ينحيوني من ريسانهم.
كنت  ما نخرجش نستناهم حتى يرقدو و نروح ليتوالات و الحاجة تبعثلي لي سوندويش مع حلا و تقولها هادي أمانة باباك..
موراها بنهار كنت راقدة حتى نسمع واحد يطبطب فالباب بالزور قفزت خفت إدا كاش واحد فيهم جا يقتلني حتى نسمع في هيام تعيطلي ليلياااااااان افتحي ليلياااااااان أبو حرب، سمعت و ما سمعتش ما فرزتش الكلام نضت نجري فتحت الباب صبت الدموع في عينيها و تضحك حضنتني قلتلها وش بيه صراع؟ قالتلي أبو حرب عاااايش ليليااان عاااايش راحو يجيبوووه....
قلتلها لالا راكي تكدبي عليا قالتلي و الله العلي العظيم غير عيط للحاج و عطالو البلاصة لراهو فيها و رايحين دوك يجيبوه، صغت حضنتها و نبكي لالا مانيش مأمنة بلي عايش الحمد لله يااااااارب... نهدر و نبكي و نضحك مشاعر ما علاباليش كيفاش تجمعت في نفس اللحظة لدرجة وين قلبي حسيتو رايح يطرطق من الفرحة...