مراهقة والاربعيني بلهجة جزائرية

43

#المراهقة و الأربعيني:

#الجزء43:

حبطت لتحت نجري صبت الحاج و نائل يجريو باش يلبسو قلتلهم واجبوني برك وقتاش تجيبوه؟ قالي الحاج ليلياااان... قتلو انعم عمو قالي اسمعي بنتي لي فات مات صراع راهو مريض و ما علبالناش وش دارو فيه الإرهاب رايحين نجيبوه ما كالاه نزيدو عليه بالمشاكل مفهوم؟ قتلو علاش وشبيه؟ قالي اسمعي الكلام ما تفتحيش قدامو حتى سيرة هكدا؟ درتلو براسي لالا تع ما نهدر والو مانيش حايبا نخسرو المهم يرجع..
هوما راحو و أنا عاودت طلعت بدلت الديكور تع الشومبرة و خملتها عاونتني هيام رجعناها تشعل، كي كملنا قلتلها وش رايك؟ قالتلي رجعت top بصح قعدت مولاتها، قلتلها مولاتها؟ قالتلي هادي فيڨورة تقابلي بيها راجلك؟ ضحكت قلتلها صح وليت نتشبه للأمير تع الإرهاب تقول أنا لي طلعت الجبل 🤭
دارتلي لاسيغ و نقاتلي وجهي دخلت دوشت جبدت شعري و ماكييت.. كنت نوجد في روحي و خايفة ما يكونش صح ما عرفت روحي في علم و لا حلم..
لحقت ال3 و نص تع لعشية حبطت لشومبرة الحاجة بست راسها قلتلها يما صراع رايح يرجعلي، قالتلي ربي يحفظهولك يا بنتي بصح نوصيك انا راني مريضة ما تجبديلوش سيرة الشي لي صرا، قلتلها يمال نسكتلهم على وش دارو فيا؟ قالتلي يابنتي راهو مريض و ربي العالم وش دارو فيه ما نكثروش عليه الحمل خليها للأيام راهو يعرف وحدو المهم ما تخرجش من فمك أنت ترفدي عليه الثقل و تكبري في عينيه، قلتلها و لوكان يسمع من وحدوخر و يصدق؟ قالتلي ما تعرفيش وليدي كثر ملي نعرفو ما تخافيش ياك راني في كتافك سورتو حكاية محمد ردي بالك تغلطي بيها قدامو، قلتلها هدا بالدات نشرب من دمو على الشي لي دارو، قالتلي لالا يا بنتي محمد طايش و الشي لي دارو غيرة من علي و هوما ملي كانو صغار كاين هاد الشحنة ما بيناتهم بصح صراع كي تلحق للشرف يولي ما يفهمش يروح ديراكت للشلاح، ياك شفتي بعينك كي عرف بلي عادل راجل أسماء عندو علاقة غير ملبعيد مع حلا راح ديراكت حط رصاصة في رجلو عوقو، تعيشي بنتي ماناش حايبين تكبر المشاكل ما بين العايلة، قلتلها و إدا خرجت من غيري و تهمني؟ قالتلي ما تخافيش واحد ما راح يهدر علبالهم بعقليتو كيفاش دايرة، و فرضا إدا كاش واحد هدر انا نقولو انا لي وصيتها باش ما تقولكش و نبريك بصح المهم تنساي هاد الحكاية بالدات بالاكي يزلق لسانك بيها رايحا توصل للدم، قلتلها خلاص كوني هانية المهم يرجع ما نحتاج حتى حاجة أخرى، قالتلي يرجع إن شاء الله و تعمري عينيك بشوفتو، قلتلها ماشي طولو؟ قالتلي يجيو ان شاء الله
نطقت هيام قالت ساعة الانتظار شحال واعرة من الصباح و عيني على الساعة ما حبش كامل يجوز الوقت، قلتلها صح و الله شحال راهي ثقيلة تقول حابسة في بلاصتها، قالتلي وش رايك نطلعو نسيقو السطح راهو غير تراب و صراع لوكان يشوفو هكداك يبهدلنا.
طلعنا سيقناه و قعدنا نريحو شويا حتى سمعنا الحس برا طليت قلتلها هيام اجري تشوفي... شفنا الرجال واقفين عند باب الڨاراج يذبحو فالكبش و الزرناجية [ تفكرت بوعلام تيتيش 😁 لي تضحك نبلوكيها 😤] و يضربو البارود فالسما [ و مشعلين الغنية تع نضرب الموس و المكحلة و الكابوس.. ياك آمنتوني مانيش نكدب 🥺 عجل شنو؟ كيما يقولو العراقيين 😒]
قالتلي هيام جا صراع و الله غير جا، حبطت نجري فالدروج و هي تقولي بعقلك ليليااان بالاكي طيحي...
حبطت للهول معمر بالغاشي بصح مازال ما دخل، خرجت للڨاراج صبتهم يذبحو خروف عند رجليه غير شفتو جراو دموعي ما آمانتش بلي راهو مقابلني عطاولو الزويجة تيرا فالسما و أنا نتبع فيه بعينيا هداك لي كان طول و عرض بسلامتو نصو راح شيان و لحيتو غطات وجهو و حالتو حالة تقول جا من زمن آخر...
عطى الزويجة لنائل و دخل ديراكت ليماه حضنها و يبكي بالصوت يبوس في راسها و يديها و هي تبكي و الناس ما كاش واحد ما طاحوش دموعو.. زاد حضن هيام و هي تقولو هدا وين طلعت الشمس و ضوات الدنيا عليا يا خويا باس راسها مع لي دور راسو طاحت عينو في عيني شافني حاطة يدي على فمي و دموعي تسيل.. راحت حلا تجري ترمات في حضنو تبوس فيه و تبكي مسح دموعها و باس راسها، دار ليا فتحلي يديه رحت نجري ليه عنقتو حوطني بيديه زيرني لحضنو وليت نبكي بالشهقة.. حسيت اليوم حياو والديا و رجعولي معاه.. اليوم لي نقدر نوقف بلا ما نخاف من حتى واحد.. ليوم لي نقدر نتفس بلاما نتخنق...
كان راسو في رقبتي حسيت بيه يبكي بعدت حكمت راسو ما بين يديا و مسحت دموعو من خدو قتلو أنت بابا و يما هدا وين رجعتلي الروح ما تيماجينيش شحال توحشتك.. مسح دموعي و قالي ما نحبش نشوف دموعك حبسيهم و الله غير توحشتك... رجعت لحضنو و نبكي بالصوت حبيت نتننفسو حبيت نحس بيه باش نتأكد بلي صح رجعلي، نسيت كامل الناس لي كانت حاضرة ما فقتش حتى حطت خالة حلا أخت إخلاص يدها على ظهري و تقولي الحمد لله لي رجعلك راجلك بخير، بعدت عليه همسلي في ودني قالي وجديلي الدوش بلخف..
راح سلم على عماتو و نسا خاوتو و ولاد خاوتو من صغيرهم لكبيرهم و أنا نخزر في طولو و فرحانة كي راهو ما بيناتنا، واحد يقولو اقعد هنا واحد يقولو اخرج ريح مع الرجال واحد يقولو اطلع لشومبرتك ترتاح.. هو جبد روحو و طلع فالدروج يكركر في رجليه بالسيف و أنا هايمة نتبع فيه بعينيا حتى نغزتني هيام قالتلي و انت علاش راكي واقفة هنا اطلعي معاه فقت لعمري صبتهم كامل يشوفو فيا حشمت طلعت نجري للشومبرة صبتو متكسل فوق البونك بصباطو و حاط يدو على وجهو، قعدت قدامو قفز و بدا يشوف من و من قتلو وشبيك؟ قالي واقيل وسخت الفراش، قتلو لالا عمري خود راحتك و مديت يدي باش نحيلو القمجة نحالي يدي بلخف قالي ماكالاه و عاود تكسل بقيت غايسة فيه توحشت نحط راسي على صدرو نحى يدي على وجهو قالي ياك سلكت منهم مانيش نحلم؟ قتلو إيه سلكت الله ياخدهم راني هنا معاك ما تعمر راسك بوالو بستو في رقبتو و تكسلت قدامو تقعد قالي لالا نوض ندوش راني موسخ قتلو ندوشلك؟ قالي لالا ماكالاه برك وجديلي قتلو كلشي راهو واجد، خرج عند الباب و عيط نااااائل.. واجبو قالو راني جاي ليك.. شويا جاب الطوندوز و قالي ليليان بلخف جيبيلي كرسي و ليزار.. رحت جبتلو بدا يحففلو شعرو و سقملو لحيتو و هو عينيه فلرض راسو ما رفدوش يغيس منبعد يقفز يخزر وين راهو يستغفر و يغمض عينيه حتى حسيت بلي هادا ماشي صراع يتشبهلو برك باين بلي راهو مريض بصح ما عرفتش وشنوهو مرضو..
جات حلا قعدت تبوس في يديه فتح عينيه مليح مسح وجهو منبعد تبسملها حكم يدها باسها و قالها وش راكي بنتي؟ قالتلو دوك كي شفتك رجعت مليحة تبسم معاها و باس خدها، رفع عينيه شافني واقفة تبسم قتلو ما تيماجينيش شحال توحشتك.. ما قال والو بصح قعد يشوف فيا ما نحاش عينيه حتى حبطلو نائل راسو باش يطراسيلو شعرو..
كمل دخل يدوش و أنا طميت هداك الشعر و مسحت القاعة، جبدت نويزات بيضة لبستها لتم باش فقت لروحي شحال شينت مع القماش حرير لصق على لحمي الكور ديالي تقول محدد ماكاش كامل منحنيات الأنوثة [على حساب الوصف تع ليليان ماكان لا ملور لا ملقدام رجع الكور ديالها كيما تع جارنا بوجمعة البيسري خطان متوازيان لا يلتقيان 😮‍💨 ]
طلقت شعري درت بارفاو و قعدت نستنى فيه طول جازت ساعة و ما خرجش.. شويا هكدا و تفتحت الباب درت دخل هو و تبسملي كي شافني موجدتلو روحي رحت حضنتو حوطني بيديه، داني للبونك قعدني على رجلو و يدو على خصري قالي علاش شينتي هكدا كامل آخر مرة خليتك مليحة، قتلو علاش فراقك ساهل؟ قالي لهاد الدرجة أثر فراقي فيك، تنهدت جيت نهدر.. قالي اشششت ما تشكيليش و الله ما قعدلي قلب و يتحمل قلبي مات.. قتلو احكيلي وش دارولك هدوك الكلاب، قالي ما تفكرينيش بهاد الحكاية ما تجبديهاش كامل قدامي.. تبسمتلو قتلو معليه و بستو من خدو و هو يمشي يدو على شعري و يلعب بخصلاتو منبعد جبدني ليه
في لحظة حسيتو ماكانش طبيعي هدا ماشي صراع متوحشني و متوحشاتو بصح كان يعبر على حبو بالزعاف عاقد حواجبو مقلق و عنيف حتى توجعت تحت يدو فجأة حبس كلشي جبد الغطا و قعد ماكانش في حوالو حط وجهو ما بين يديه و يجبد فالنفس.. يبكي!!! حبيت نبدل السوجي و ما نحسوش بضعفو حطيت يدي على كتفو قتلو حبيبي نوجدلك تاكل.... قالي اخرجي برا، قتلو صراع.. قالي ليليان احبطي لتحت خليني وحدي اخرجي برا شويا و نلحقك.. سكت غطيت روحي حبطت رجليا من البونك باش نروح للخزانة ما حسيتش كامل كيفاش حتى بدا يعيط قتلك اخرجي برااااااااااا و رمى الفيوزة فالقاعة تكسرت يبست في بلاصتي تشوكيت وشنو الحاجة لي قلقاتو؟! دار يشوف فيا عينيه حمورا و يتعنكر.. فتحت الخزانة لبست بالخف و خرجت نجري بلا خمار دخلت لشومبرة حلا صبت بنات هيام و حنين لتم ديت من عندهم خمار لبستو و قعدت في كوانة في الصالة لي لفوق ماشي مستوعبة وش صرا ما فهمتش علاش راهو مقلق هكداك، مسحت دموعي دخلت للصالدوبا غسلت خزرت فالمرايا جبدت النفس و كوراجيت روحي منبعد عاودت فشلت علاش رجع هكدا نظراتو ماشي نورمال و تخوف..
حبطت لتحت الدار معمرة بالغاشي ناس داخلة و ناس خارجة
كان وقت المغرب دخلت للكوزينة ما عرفتش وش ندير و عاودت خرجت شفتو حابط جاز عليا و ما خزرش منبا فيا، دخل للصالو تنهدت قلت معليه المهم راهو فالدار معانا، عاودت طلعت للشومبرة رفدت الزجاج لي كسرو فتحت التواقي و سڨمت الفراش ريحة الدخان كانت دايرا حالة.. عاودت حبطت شافتني هيام قالتلي وشبيك ليليان ماراكيش في حوالك، قلتلها ما علاباليش ما كانش طبيعي ما عرفتش وشبيه.. قالتلي ربي العالم وش دارو فيه تحملي شويا المهم رجعلنا سالم.. درتلها براسي إيه..
قعدت نلهي في روحي معاهم بصح تخمامي كامل عندو علاش تبدل هكدا وش صرالو؟
بدينا نعشيو فالناس و هو معاهم شايد المغرفة يحرك فيها داخل الطبسي و غايس انتبهلو الحاج قالو أبو حرب تعشى وليدي ما كليت والو.. رفع راسو بقى غايس في باباه و يمسح في وجهو كامل فاقو بلي ماكانش نورمال بصح جوزوها بالضحك باش ما يحسوهش..
ديباراصينا الطوابل و هيام دات الحاجة للهول، جا ينوض صراع باش يعاون يماه قالو نائل لالا ريح أنا نرفدها.. جرحك، انخلعت قلت في قلبي جرحو؟! علاش مجروح؟! ما شفتوش.. منبعد تفكرت بلي ما خلانيش نحيلو القمجة و مام هو ما نحهاش مام كي اندمجنا فالفراش.. أوووو زعما حشم مني ما حبنيش نشوف جرجو؟!
قعد قدام الحاجة محبطلها راسو يسمعلها و يحكي معاها و كل شويا يبوس راسها و يديها، طاحت عيني في عينو تبسملي... أوووو حسيت الروح رجعتلي، دار شاف بنت سعد من نوال عمرها وحد العام هكداك قالها يما هادي بنت من؟ قالتلو هادي رؤى بنت سعد، قالها صح سعد زادت عندو طفلة؟ فتحلها يديه يضحك قالها بيبيا ارواحي لعمك و هي راحت ددش لعندو
قالها يما ماشي تشبه حرب؟ تبسمت قالتلو إيه يا وليدي صح تشبهلو الله يرحمو.. شفت فالطفلة صح تشبهلو بصح جامي روماركيت هاد الشي..
قعدها على رجلو يلعب معاها يشم و يبوس فيها و يشرب فيها لاتاي بالمغيرفة و هي تضحك و تصفق في حضنو.. منبعد قالها روحي لعند ماما تغسلك باسها و ناض مشاها قال أنا اسمحولي راني عيان نطلع نرقد قالولو خود راحتك... هو طلع الدروج و الحاجة تعنكرت فيا قالتلي نوضي اطلعي معاه درتلها بكتافي تع خليني ما نروحش..
بداو ينقصو الضياف انتبهت لسعد عينو ما رفعهاش فيا و وليدو محمد ريحتو ما تسعاش، رفدت ماعن لاتاي ديتهم للكوزينة صبت هيام حاطة يدها على فمها و واقفة مع نائل قربت ليهم سمعت نائل يقولها راهو مليح كي ما قتلوهش نص لي كانو معاه فالحبس ماتو.. ربي العالم شحال عذبوه و وش دارو فيه ماشي بالساهل باش ينسى، كي رحنا باش نجيبوه صبنا الدولة تستجوب فيهم، في الوحدة تع الجيش لي كان فيها صراع كانو في سبعة، خمسة من صحابو شيعيين قطعولهم الإرهاب ريسانهم قدام عينيه و كاين لي طرقولهم ريساهم بالرصاص و خلاو الدم يجري على ريسانهم، و الباقي لي كانو آسرينهم و يتفاوضو بيهم خلاوهم كي شافوهم من العشائر المعروفة حبو يضغطو بيهم.. راهو مليح كي ما تعڨنش و راهو يقدر يهدر معانا.. نفسيتو راهي منهارة و رايح يعاني من حالتو حتى يبرا و يستعفى .. دارت ليا هيام تبكي قالتلي أنت وش راكي ديري هنا راجلك جا و راهو لفوق و انت قاعدتلي هنا، قلتلها أم علي خفت منو، قالي نائل علاش وش دار؟ قتلو ما كانش نورمال حسيتو وحش خفت نقرب ليه، قالي تحملي ليليان يحتاج وقفتنا معاه فهاد الفترة ما يلزمش نحسوه بلي راهو مريض تصرفي معاه عادي اطلعي دوك و اقعدي معاه..
طلعت خايفة قلبي يرجف فتحت الباب صبتو مطفي الضو و راقد قربت للبونك بلعقل و تكسلت حس بيا تنهد مد يدو جبدني لحضنو و عينيه مغمضين منبعد حط يدو على كرشي قالي شحال كان في عمرو البيبي كي طاحلك قتلو شهر و نص، فتح عينيه نعسان و قالي ربي يعوضنا إن شاء الله ما تتقلقيش، قتلو المهم أنت رجعت حسك عندي يسوى الدنيا و ما فيها، باس خدي .. تقعدت تكيت على البونك و حطيتلو راسو على صدري جبد النفس و حضني حسيتو ارتاح، قعدت نمسدلو في جبهتو و نمسحلو راسو حتى رقد، قعد نشوف فالشومبرة و نقول سبحان الله مغير الأحوال غير لبارح و أنا راقدة هنا و نبكي ما علاباليش كيفاش رايح يكون مصيري، و الليلة صراع في حضني ملكت الدنيا بيه كلشي كالم منظم و نقي و يخليك ترقد مرتاح.. مام جا مريض بصح كنت مطمنة لخطر علبالي بلي مادامو هنا هو لي يرفد عليا الهم ما نرفدهم بنفسي ما نخاف.. بستو في راسو وهو راقد و دعيت ربي يحفظو و يطول في عمرو وما يفرقنيش عليه.. قعد راقد على صدري و يدي على راسو حتى خفيت.. أذن الفجر حسيت بيه كي ناض باش يصلي.. حسيت ظهري تكسر كي رقدت معوجة، درت تغطيت كملت رقادي ما فطنتش حتى ال 10 و نص تع الصباح، درت مورايا صبتو راقد على كرشو و مغطي راسو بالمخدة غير جيت نحبط رجليا قالي ويييين؟ قتلو صباح الخير، قالي ريحي هنا ما تبعديش عليا قتلو راني معاك، رفع راسو و جبدني ليه قالي راكي زعفانة مني؟ قتلو علاش؟ قالي كي لبارح ما قدرتش.... قبل ما يكمل قاطعتو و بستو من فمو كي بعدت وجهي قالي اقعدي معايا ما تخلينيش و الله غير راني عيان، قتلو علاش انا نقدر نخليك؟ ما صدقت رجعتلي حضنتو و قعدت معاه..
فاتت ال11 و هو مخلي راسو على صدري غايس و ساكت.. كي شفتو ما هدر والو بديت أنا الكلام قتلو راك جيعان؟ دارلي براسو لالا، قتلو قال نائل بلي راك مجروح وريلي جرحك.. جبد النفس و ناض من عندي و تكسل في مخدتو .. قتلو نوجدلك دوش؟ دارلي براسو لالا.. شعل التلفيزيون على قنوات الأخبار يقلب يقلب قناة ما عجباتو رمى التلكومند و دور وجهو، حكمت تلفوني و نشوف حتى نطق قالي نقصي للتلفيزيون، شفتو كان مخليه على الأخبار و منحيلو الصوت أصلا، درت ليه قتلو وش نقص؟! رفد التلكومند خبطني بيه قالي قتلك نقصي للتلفزيووووون... قفزت من بلاصتي نضت طفيتو كامل، شفتو يحك في وجهو و يمسح راسو و رقبتو مخنوق ما عرفش وش يدير رايح جاي فالشومبرة انا كنت واقفة مخشبة في بلاصتي نشوف لحالتو، دار ليا تعنكر فيا قالي راكي تشوفي فيا و تقولي هدا مهبول ياك؟ قتلو لالا ماشي هكدا، قالي راكي تشوفيني دافع كوارطي و ماشي جايب لخبر لروحي ياك؟ قتلو لالا بصح تهدن.. قالي نتهدن يتسمى مهبول، قتلو حاشا و الله ما هكدا، قالي راكي تتمسخري بيااااااااا و طبعني طحت فالقاعة رفعت يديا قتلو و الله ما قصدت نشوف فيك، طابس رايح يخنقني بديت نتسحب للور و أنا قاعدة قتلو و الله ما قصدت باش نقلقك و بديت نبكي
حكمني من دراعي وقفني يتعنكر و صوت النفس ديالو عالي كي شاف دموعي بلخف طلقني و قعد فالقاعة تكى على البونك و يحك في وجهو قتلو صراع، قالي ما نآذيكش قتلو علبالي بصح ما تقلقش روحك، قالي اخرجي خليني وحدي، قتلو معليش آذيني بس ارتاح الله يخليك، قالي اخرجي ليليان ما تخلينيش نآذيك و نآذي روحي اخرجي منا خليني.. خرجت نجري دخلت للصالدوبا نرمي الما على وجهي و نبكي منبعد قابلت المرايا و كوراجيت روحي مسحت دموعي و حبطت للكوزينة صبت نور و أم سعد يطيبو فالغدا، وجدتلو الفطور و عصير بارد باش يهدي أعصتبو، دخل الحاج قالي ليليان ما تكونيش كاش ما جبتيلو؟ قتلو وش نجبدلو؟ حالتو ما تسمح و لا حالتي خليني فحالي الله يخليك، قالتلي أم سعد جا راجلك درتي علينا راس.. حطي رجليك فلرض و ما تفرحيش بعمرك بزاف، قلتلها انا نفرح و انت هنا؟!! رفدت السنيوة و جيت خارجة قالي الحاجة انت وجهك صحيح و لسانك طويل يا وحد للمصفارة..
خليتهم و طلعت للشومبرة صبتو قاعد كيما خليتو حطيت السنيوة قدامو و فتحت دراعو حطيت راسي على صدرو قتلو الله يخليك كول معايا شويا، شاف فيا قالي وش راكي تقولي عليا في داخلك؟ قتلو راني نقول الحمد لله كي رجعتلي و فرحتي ماشي سايعتها الدنيا، قالي و انا فسدت عليك فرحتك ياك؟ قتلو لالا جامي غير وجودك هنا يكفيني كي دير وش دير.. راك شافي كيما مرضت كي ماتت يما و قتلك عييتك؟ فهداك الوقت قتلي الزواج ماشي فندق شوكت كي تسوء الخدمة نتقلقو و نروحو.. الزواج دارنا كي تتخسر فيه حاجة نصلحو و نعيشو بسعادة ماشي صح؟ تبسم حوطني بيديه و جبدني لحضنو قالي حب يقول راكي ترديلي فالدين؟ قتلو ما كاش دين مابين المتزوجين بصح أنت لي علمتني هكدا و أنا تربية يدك، قالي وجودك معايا جنة، قتلو يمال مادام أنا جنتك تقدر تاكل معايا لخطر و الله غير جعت.. ضحك هههه قالي اوكي..
كلا شويا و حتمت عليه مرة ياكل وحدو مرة نوكلو أنا بضحكة و لعبة قعدت نساعف فيه و نحاول ما نغلط بحتى كلمة و لا جاست قدامو باش ما يتقلقش..
كان ياكل حتى دار ليا و قالي يما سقسات عليا؟ قتلو ما جزتش عليها نسيت، ناض على الماكلة قالي نحبط نشوفها بالاك راهي مقلقة عليا و ما تقدرش تتحرك و ما عنديش تلفون باش تعيطلي.
هو راح يشوف الحاجة و أنا رفدت السنيوة و حبطت، قعد وحد السويعة و هو يحكي معاها و صلى معاها الظهر منبعد دخل للصالو قعد مع الحاج كانو يحكيو على السياسة، قال الحاج لوكان ماشي غيرة العشائر على الأرض و العرض ما تتحررش منطقتنا، قالو صراع الفضل الأول لأهل الجنوب و أبطال الحشد الشعبي هوما لي انتفضوا و حاربوا بدمهم و ناصرونا حنا الجيش أما الدولة باعتنا، بداو يجبدو فيه بالهدرة باش يحكيلهم، قالو الحاج نتوما كنتو مسجونين جماعة و لا كل واحد واحدو، قالو جماعة كل 40 واحد هكداك في بلاصة، في اليوم يعطيولنا مورصو خبز يابس و كاس ما موسخ هدا إدا صحلك، أيام و شهور و حنا ساكتين لي يهدر بينا مجبورين نبيعو عليه باش ما يديوناش للتعذيب، المزهور فينا يزور التعذيب مرة فالسمانة، جبد النفس و قال سناسل و كرافاش و كلاب و..و..و... وسكت حك وجهو و قال ما ننساش هداك النهار لي حاصرونا فيه واحد ما سلكنا ... عامر صاحبي عفس على مينا طرطق قدام عيني حتى صبعو طاح عند رجلي .. اوس كان قاعد معايا جبد ڨارو يتكيف ما فقتش كيفاش حتى قنصوه في راسو و دمو سخون طرش وجهي.. و الحاجة لي تقتلك كي تخلي صاحبك مرمي في بلاصتو راسو طاير و تهرب بروحك.. يهدر و النفس تضيق فيه، قال يحكمونا كيما
المجرمين يكتفونا و يوقف عليك واحد ما يسواش يتأمر و يضرب فيك و أنت حاط راسك و ساكت، يذبح في صحابك واحد مور خوك و تقعد تستنى في دالتك.. ريحة الدم ما ننساهاش طول حياتي.. منبعد يجي قدامك يقولك أنت سني من العشيرة الفلانية نحتاجوك و يسحبك و أنت تتمنى يقتلك و تتهنى من ذلو.. كثر من 25 سنة خدمة فالجيش بايع روحك لبلادك منبعد يجي واحد فوايو يذلك و واحد ما سامع بيك لا الوطن لي عطيتو دمك لا الدولة لي ضحيت على جالها لا العشيرة لي تنتسب ليها و لا حتى إنسان.. و بدا يحك في وجهو و راسو عرفوه تقلق بدلو السوجي باش ينسى..
كنا الظهر و كانو راحو الضياف قعدو غير مالين دار بصح في بزاف دار سعد زوج عوايل و دار نائل وهيام وبناتها و الدراري الصغار و الحس و نوال تعيط نووور و الحاج يعيط يا ناااايل ارواح و روح
صراع ما حملش بدا يزير في يدو على الفراش و يجبد في حوايجو رايح يقطعهم على جلدو انتبهلو جيت نايضة باش نقول أيا تطلع لفراشك حتى سبقني وقف و ناض يعيط اسكتوووووووووو.... حبسو الحححححححس...و بدا يسب و يعيط هربت كل وحدة لشومبرتها، و هو قعد فالهول و قالي ديجا راني نحوس على السبة باش نذبح كاش واحد، لوكان نسمع صوت من شومبرة واحد فيكم نفرغ فراسو كارتوش..
أنا تخبيت فالكوزينة باش يبقى على عيني و كل واحد دخل لشومبرتو حتى هيام حكمت بلاصتها في شومبرة الحاجة مع يماها..
قال قلت الحمد لله سعد خرج بدارو، نرجع نصيبو راجلي بزوج عوايل و فاتحلي ملجا فالدار.. ما تقولو الواحد عيان ما تقولو الواحد مريض من مقبيل و نتوما زن زن زن عند راسي ما تشبعوش تبلبيل، منبعد ناض كسر كل حاجة فالهول و يعيط، جا طالع فالدروج عيطلي ليلياااااااان قفزت من بلاصتي و رحت نجري طلعت موراه، جا داخل للشومبرة شاف نور خرجت ولادها من الصالدوبا و التويو و البسكوت في يدها و تقولهم ادخلوووو ينعل باباكم و بابات لي جابكم و ضربت الطفل بالتيو لظهرو ناض يبكي و يصوغ، حبس صراع قالها ارواحي ارواحي.. تسبي المرحوم في قبرو و تزيدي تضربي الطفل بالتويو وش يسلكك من يدي ليوم، ارواحي نسرفڨك بيه للظهر كيما درتيلو و نشوفك ادا تقدري تحملي السطر، دخلت تجري للشومبرة و خلات الطفل يعيط، أنا نجبد في صراع و هو يعيط لربي لي خلقو و يقول ليوم ما نرحمهاش و نائل لداخل يعيط عليها قالتلو مانيش مجبورة باش نتحمل هبال خوك، هو سمعها قالت هاد الكلمة و يخبط الباب برجلو فتحو قالها أنا مهبووووووول.. و نائل يضرب في نور طلقت صراع و دخلت نجري نسلك نور من يدين راجلها بصح ما قدرتش هوما كامل قاويين بسلامتهم من الراجل للمرا و أنا كي الفتاتة في وسطهم، طلع الحاج و أم سعد يجريو و صراع يقول لنائل خليها ما تضربهاش بصح و الله ما تزيد تشوف ولادها، رفدها نائل و رماها برا الشومبرا قالها دقيقة ما تزيديهاش هنا و ورقة طلاقك توصلك..
صراع دخل للشومبرة جرحاتو الكلمة بزاف و هي تبكي و تحلل ما تديوش ولادي و الله غير غلطت، تبوس في يدي و تقولي تعيشي اهدري مع راجلك ما يحاوزنيش و الله غير غلطت معليه يضربني بصح ما ينحيليش ولادي، قطعتلي قلبي و ما عرفتش وش ندير ما قدرت نخليها هكدا ما قدرت نهدر مع صراع و هو فهاد الحالة حتى عيطلي ليلياااان ...
خليتها و رحت نجري ليه قالي ادخلي و اغلقي الباب، جيت نهدر معاه على نور قتلو صراع.. عيط عليا ليليااااااااااان... بقيت واقفه في بلاصتي وهي دقدق فالباب و تبكي دخلت تبوس يدو عيط ناااااااائل تديها لدارهم كي تتربى مليح و تعرف غلطتها رجعها  يلاااا.. دخل الحاج جا يهدر معاه خلاه و حبط لتحت يسب و يعيط..
حلا وحنين داو الدراري للشومبرة و نوال وضحى مرت سعد داو نور لتحت و هي تبكي، و نائل نوض الطونوبيل و داها لدارهم.. هيام قعدت مع الحاجة ما دخلتش روحها بصح فتحت الباب هزت راسها ما عجبهاش وش صرا، خرج صراع من الصالو شافنا واففين فالهول قالنا و نتوما علاش راكم مستفين هنا كي شمع المولود؟  ما نشووووووووف حتى واحد هنااااا يلاااااا.. أنا مهبووووول و الله غير نهبلكم معايا يمااااال..
وقفت فالكوزينة باش يبقى على عيني و الباقي كل واحد حكم بلاصتو قعد غير وحدو فالهول يزعزع في رجلو و يتكيف و لي صابها في طريقو يكسرها مرة يوقف مرة يقعد مرة يحك راسو و وجهو رايح يخرج من حوايجو، درت كوراج و رحت ليه صبتو قاعد و يديه على راسو غير شافني و عيط ااا هدا أنت.. يادرا وش من مصيبة جيتي ترميها فوووووووق راسي.. قتلو لالا و الله والو وشبيك برك تهدن.. قالي مازالكي تزيدي تقوليلي تهدن.. علاش راكي تشوفي فيا مهبوووووول باش تقوليلي تهدننننن.. قتلو حاشا ما قصدتش هكدا بصح خفت تطلعلك لاطونسيو، قالي بعد من وجهي خفيييييي.. رجعت للكوزينة قعدت لتم، نص ساعة منبعد جبدت كانيطة بيبسي و حطيت الڨلاصو في الكاس و رحت ليه صبتو قاعد و مغطي وجهو بيديه، حبط يديه و خزر فيا فتحت الكنيطة تع البيبي و سربيتلو فالكاس فوق لي ڨلاصو قتلو تشرب؟ مد يدو و شد عليا الكاس قالي خملي الحالة هنا، قتلو معليه، انا نخمل و نرفد وش كسر و هو يشرب و يشوف فيا منبعد قالي منين جبتي هاد الجبة ماشي شابة نحيها تزيدي تلبسيها نقطعها على لحمك، شفت فيها قلت في قلبي علاش وشبيها أنا أصلا لبستها ليه كي عادت شابة، منبعد ضربت في راسي فهمتو اللبسة لي تاتيريه يحب نلبسها غير فالشومبرة لخطر يغير، تبسمت قالي علواش راكي تضحكي راكي تشوفي فيا ڨاراڨوز هنا؟! هو قال هكدا و أنا ما قدرتش نشد روحي من الضحك دار ليا و رفع حواجبو، قربت ليه بستو في خدو و همستلو في ودنو قتلو دوك نحيها انت تأمر أمر، تنهد و دور وجهو، قعدت قدامو حكمت يدو بستها و قاعدة نمس فيها شحال دافية كيما حنانة قلبو قاعد يشوف منبعد قالي ليليان راني عيان، قتلو أيا نطلعو لشومبرتنا، قالي كرهت منها، قتلو يمال نخرجو قالي عيان ماشي قادر، دخل علي قال أهلاااااا بالخاااااال.. قالو أهلا يا الفاهم هدا وين جي تشوفني لوكان زدت سنيت سمانة خير راك جيت بكري، قالو أنا جيت باش تزوجتي شوفلي مرا ولا لاتي غير بهاد المصفارة، قالو ناضتلك اللحية و الموسطاش و رجعت تخمم فالزواج كبرت يااااه ، قالو يمال رانا نصغارو، ضحكو وقف سلم عليه قالو وش راك خالو الحمد لله على سلامتك نورتنا برجعتك، قالو الله يسلمك وليدي وش راك؟ قالو الحمد لله رانا ملاح..
أنا رحت نجيب البقلاوة حطيتها قدام علي و قتلو وشبيها المصفارة كامل راهي محرحرتكم؟ ضحك علي و قال هههههه
هاد اليومين صح راكي محرحرتهم..
صراع كان حاط رجل على رجل متكي و يتبسم قال وعلاش؟ قتلو بصفوريتي، قالو علي خليك منها خالو هادي ربي خالقها كي الكوكوطا ظل غير تصفر و ما تعرف وقتاش تكلاطي .. و أنت كيفاش قولي صحتك لاباس؟ قالو الحمد لله، قالو و الله يا خالو فرحنا كي رجعت محتاجينك بزاف، قالو خير وش صرا؟ قالو دوك لي صرا صرا تريح و تبرالنا منبعد نستفهملك كامل قدامك وحدة وحدة، قالو بركا ما تخربط و احكيلي وش كاين؟ قالو ماشي دوك حكاية طويلة توجعلك راسك برك و زيد أنا هدا وين جيت من الخدمة مازال مانبا ما تغديتش، قالو وشمن خدمة ملوقتاش وليت تخدم؟ قالو وش حبيتني ندير لي كتبو عليك ربي كتبو عليا عندي يما و زوج خياتي في رقبتي و البونسيو تع بابا الله يرحمو ما يكفيش حبيتني نقعد، قالو و المصروف لي دايرهولكم كل شهر ما راهوش يوصلكم؟
عيطت عليه هيام من الشومبرة عليييييييييي اروااااح... قالها ما تخااااااافيش يما أنا ماشي ليليان نهدر كلشي.. [ لالا خص..فات ليليان فالتغنديف بشويا 😑] تقلق صراع قالو عليييي أهدر مليح احكيلي وش صرا، قالو خالو و الله غير عندك الوقت و تسمع دوك راني هنا ما عندي وين نروح بعدما انفك عليا الحصار كي رجعتلنا بالسلامة، و دار ليا قالي ليلياااان سقيلي نتغدا الله يسترك و حط رجل على رجل و يضحك مع صراع و يغمزلو، قالو شكون لي حاوزك من الدار؟ قالو خالي أنا ملبكري بشيشتي مرة و واحد ما يحملني هنا و مشاكلي بزاف ما تعمرش راسك ياك تعرف الديڨات لي نديرهم [ البنات احكموني على هاد الحمااااااااار 😤 هدا بريكو كثر من ليليان 😵‍💫 زعما راهو لاعبها يخبي علاش كاش ما خلا لوكان غير عطالو التفاصيل ملخر و هنا روحو]
أنا رحت نسقي الغدا لعلي و الحاج دخل للهول، قالو صراع بابا مصروف هيام ما راهوش يوصلها؟ قالو و الله ما علبالي يا وليدي، قالو علي خالي لوكان جات على الدراهم ساهلة ما نحتاجو لحتى واحد بصح الكلمة الطيبة رانا قريب نطلبوها، قالو الحاج اغلق فمك علي خالك راهو عيان و مريض، قالو صراع شوف علي ما تبقاش تقطرلي فالسيروم دوك و ترميلي بالكلمة مخي راهو عيان و ماشي قادر نجمع احكيلي وش صرا، قالو هدا و هو عيان فهمتها طايرة..
حطيت الماكلة قدام علي و تعنكرت فيه تع اسكت هز راسو و بدا ياكل، درت قالي صراع علاش تعنكرتي فيه؟ خرجت هيام قالتلو ماشي قتلك ما جيش لهنا معول تقتلني أنت، قالها يما جيت نسلم على خالي و نشوفو، قالها صراع أم علييي ملوقتاش تمنعيه باش يدخل لداري احكولي وش صراااا راسي وجعنيييي.. قالتلو هيام مشكل صغير هو و محمد ياك تعرف الشحنة لي ما بيناتهم و سعد حاوزو من الدار و أنا منعتو يجي على جال المشاكل، قالها لالا صرا كثر من هاد الشي.. جبد النفس و حط يدو على رجلو و وقف قال معليش تكبر و تبان لوكان كاش ما نصيبكم مخبيين عليا و نتفاهمو، و دار لعلي قالو كمل ماكلتك و اطلع لعندي و راح لشومبرتو..
دار الحاج لعلي ماراكش تشوف فالراجل عيان و مريض؟ وقت هاد الهدرة دوك؟ قالو جدي يرحم والديك سكتنا، قالو أنت صح ما تحشمش لوقتاش باش تستعقل؟ قالو نتوما ملايكة و حنا شياطين روح برك، و ناض غسل يديه..
الحاج قال لهيام اهدري مع وليدك صراع ماهوش مليح حب يقتل الراجل و ما صدنا بلي رجع، قالتلو هادي لوكان خممتلها من قبل ماشي دوك جاي تلوم وليدي خدايمكم لي رايحة تقتلو، انا ح
خلاص ما قدرتلوش خليه يهدر و إدا كان غالط صراع يعرف كيفاش يعاقبو ما عندي ما ندير..
رحت لعلي قتلو الله يخليك ما تحكيلوش و الله غير راهو بزاف عيان و مريض و ماشي كامل في حوالو.. قالي ما تخافيش علبالي كيفاش نهدر معاه..
طلع لحقتو تلاقينا بسعد فالدروج شاف فينا حط يديه في جيابو و حبط..
دخلنا قالو اغلق الباب موراك، جيت نغلق دخلت اميمة بنت سعد قالتلو عمو صراع جا الشيخ ريگان راهو لتحت، أنا يبست في بلاصتي، علي خرج و صراع بدل حوايجو و حبط للصالو لحقتو و وقفت قريبة باش باش نسمع جاو بزاف رجال مع الشيخ، خرج نائل شافني واقفة قالي وجدولنا لاتاي، رحت للكوزينة صبت اخلاص و هيام يوجدو، قلتلها أم علي خايفة يخبرو الشيخ كي رحت لعندو، قالتلي وعلاش تخافي ما شفتيش وش دار فيهم مور الظهر انا وحدة نكحل عينيا بالمرود حتى لوذنيا، تبسمت بصح قعدت خايفة..
دخلت أم سعد تشوف فينا بصح ما هدرت والو، و أنا وقفت قدام باب الهول نستنى غير وقتاش يخرج صراع من الصالو، نص ساعة منبعد خرجو قلت ما طولوش يمال ما حكالوش الحمد لله هكدا احسن، طلعت لشومبرتي جيت نجبد حوايجي باش ندوش حتى نسمع في صراع يعيطلي ليليااااااااااااااااااان... حطيت يدي على صدري و حبطت نجري ليه، صبتو واقفلي في وسط الهول يتعنكر.. غير شافني قالي ارواحي لهنااااااااا.. سااااااااااقطه .. و حكمني من ودني قالي أنا مرتي تدخل للديوان؟! عرضي تدخل للمضافة؟!
جرات دموعي و لساني تعقد من الخوف قتلو اسمعني... خليني نحكيلك الله يخليك.. جات هيام وقفت ما بيناتنا قالتلو اقعد خويا دوك أنا نحكيلك ا تآذيهاش والله غير مظلومة.. قالها أم علييييييي بعدي عليها خير ما نساميك ليها، قتلو و الله ما أنا هوما لي حاوزوني و ما صبت وين نروح و الله ما درت والو صراع، قالي الحاج خافي ربي يا المسمومة حنا حاوزناك؟ و دار لصراع قالو هي لي هربت من الدار و راحت للشيخ طيحت بيا قدامو  على أمور تافهة و دواس تع نسا، قتلو و الله ما درت والو صراع افهمني.. قالي تدخلييييي للمضافة تع الرجااااااال ليليااااان حطيتي راسي فالطييييين.. ام عليييي بعدي عليهاااا  ما تقلقينييييش، قالتلو هيام و الله ياخويا غير مظلومة، قالو الحاج اطلقها وليدي خليك منها حافظ على صحتك..
هو يعيط و هيام تجبد فيا تبكي و تحلل فيه و الحاج يهدن فيه و الحاجة تعيط ملداخل صراااااع.. و هو انقلب رجع يخوف ما يسمع ما يفهم
حطتني هيام موراها و قالتلو اسمع و احكم ما تضربهاش و تشفي فيها العديان تعيش خويا تهدن.. قالها كيفاش نتهدننننن و عرضي راااااح للديواااان هيااااام.. جيت نهدر تعقد لساني قاعدة نبكي برك مور هيام، نوال و ضرتها و إخلاص واقفين يتفرجو، دخل نائل حكم صراع و سعد قعدو و هو يغلي..
نطق الحاج قالو مرتك طايشة و طيحت القدر مع سعد تزايدو فالكلام قالها اخرجي برا و علي جبدها من يدها داها لدارهم و يماه كانت غايبة وسخ سمعتنا، قالتلو هيام الحاج خاف الله كانو بناتي فالدار، قالو صراع وش حب يقول انت راك تطعنننننننن في شرفهاااااا.. !!! قالو لالا ياوليدي ماشي حنا الناس هدرت، قتلو صراع راهو يكدب هوما لي طعنو فيا و حاوزوني، قالي بلعييييي ما تحشميش تقولي لبابا تكدب، قالو الحاج على جال لسانها هدا لي وصلت للشيطان الرجيم، قالت لخوك أنا أشرف منكم ومن عشايركم و خوك ردلها و هي طرطڨتها و راحت مع علي، قتلو و الله ما هكدا، قالتلو هيام بابا خاف الله كنتو قاتلين رواحتيكم على الورث و حبيتو تحرموها.. قالها سعد شكون لي طالب بالورث من غير خالها؟ قالتلو ياااا.. صااااار.. دوك مسحتها في راس خالها ماشي حاوزتها على جال الوكالة نسيت وش دار وليدك سععععععد... نائل ناض يعيط عليهم قالهم الراجاااااال راح يمووووووت اسكتوووووو..
حبطت حلا قالتلو علاش تسكتها عمو خليه يعرف وش دار فينا هو و وليدو أنا و ليليان و عمتي هيام..
صراع يسمع و حاكم راسو بزوج يدين،  منبعد ناض يعيط خلااااااااااااص.. و ناض كسر البلازما فالنص و يعيط رااااااااسيييي.. راح نموووووت.. سكتو ضربة وحدة و سعد و نائل ناضو باش يحكموه و يهدنوه.. ما عرفناش كامل كيفاش طاح مصروع فالقاعة صغت صرااااع... ما تخلينييييش..صرااااع
رفدوه خاوتو و الحاج و جراو بيه للسبيطار.. و أنا قعدت مع الحاجة نبكي و نندب في حناكي و نقولها راح مابين يديا قوليلي وش ندير دوك ما رايحش يصدقني.. و الحاجة النار شعلت في قلبها تفتح في صدرها و تدعي يااااارب.. قالتنا قلتلكم ما يتحملش ماشي وقتها، و هيام قالتلها شفتي كيفاش سعد و الحاج بلخف دورو الهدرة و رجعو اللوم كامل عليها قوليلي دوك وش ندير؟
قالتلها الحاجة ما تخافيش دوك يتهدن و يوازن عقلو يخمم مليح و يسمع دوك راهي أعصابو تعبانة خليوه ما تهدروش معاه خليو الحالة تمشي وحدها.
صراع كي داه الحاج و سعد و نائل للسبيطار علقولو السيروم و عطاوه دي كالمو كي جاو مرجعينو للدار حكاولو كامل وش صرا فالطونوبيل.. ملي عيط عليا عمهم كي صابني واقفة فالجنازة مع علي حتى وين حبست روحي فالشومبرة مور ما جيت من عند الشيخ ريكان..
فالليل جابوه فشلان ميت بصح عاقد حواجبو و باين عليه الزعاف في وجهو.. من لهفتي عليه جيت نعاونو رفد يدو تع ما تقربيش مني، مشاه نائل جا يطلعو للشومبرة ماحبش و راح لشومبرة الحاجة و قال ما نحتاج نشوف حتى واحد..
قعدت فالجنان نشوف فيهم من التاقة باش نسمعو وش يهدر مع يماه، تكسل على رجلها و هي حطت يدها على راسو قراتلو القرآن جات تهدر قالها يما اغلقي السوجي دوك عقلي ماراهوش يميز، قالتلو  أنا ما رايحة نهدر ما نعييلك مخك علبالي راك عيان و مريض، بصح نقولك حاجة و ديرها مليح في راسك، الناس لي ظلمو يماك و كلاوها هو نفسهم لي ظلمو مرتك و كلاوها، ناض حضنها و شافت فيها قالها تقصدي بلي راهم يكدبو؟ قالتلو أنا ما علاباليش وش هدرو معاك  بصح نقولك بلي مرتك مظلومة، ناض و طلع لفوق، دخلت لعندها قلتلها يما... قالتلي خليه يقعد مع روحو يخمم فراشي هنا و ارقدي..
قعدت معاها و خايفة، حلا و إخلاص يقصرو فالهول، هيام كي طمنت على صراع راحت لدارها..
لحقت الوحدة تع الليل كامل رقدو، طلعت للشومبرة فتحت الباب بلعقل صبتو مطفي الضو و راقد فالقاعة متوسد يد و يد فوق راسو و ضام رجليه، كي شفتو هكداك طاح مني النص غاضني، قربت ليه كعدت تكسلت قدامو و حطيت راسي قدام صدرو حس بشعري كي توشا وجهو ناض و قالي اخرجي عليا قتلو صراع.. قالي ما تخلينيش كاش ما نديرلك اخرجييي.. قتلو دير وش حبيت بصح ما تبعدنيش عليك، قالي خليني في حالي ليليان، قتلو ما نخليكش.. تعيش ما تصدقهمش، قالي يمال شكون نصدق، قتلو هاك شوف تخنقت بالدموع و وريتلو يدي لي محروقة، ماشافش مليح فالظلمة قاعد يتوشي فيها قالي شكون لي حرقك؟ قتلو أم سعد.. صراع أنت ما علابالكش شحال ظلموني كي كنت غايب و الله و راس ماما لي ما دفنتوش ما خنتك و لو بخزرة، هوما كانوا يضربوني و يحاوزوني و الحاجة و هيام ما كانوش هنا باش يدافعو عليا.. لي يجي يضرب و لي يشوفوني وقفت معاه يتهموني بيه.. سعد ضربني و حاوزني كي ما حبيتش نتنازلو على الوكالة و قلت نتنازل لنائل، ما كاش لي دافع عليا من غير علي.. و الله يا صراع ما راني نكدب عليك و خزانتك هادي شاهدة عليا شحال حضنت حوايجك و شميت ريحتك فيهم لدرجة وين آمنت روحي بلي    رايح تسمعني بيهم، بكيتلهم شكيتلهم... كي قلت هكدا ما حملش و جبدني بلخف لحضنو قالي ما تبكيش.. و الله غير نخرجها من عينيهم.. مسح دموعي وقف و نوضني قالي تقدري ترقديني على صدرك كيما لبارح؟ محتاجلك
تبسمتلو و درتلو براسي إيه.. تكسلت فالبونك فتحتلو حضني حطيتو على صدري و نمسدلو راسو و هو كل شويا يبوسني ما فارقتنيش الفرحة حتى غفيت ما فقتش حتى بدا يتحرك و يعيط لاااا لاااا لااااااا .. اااااااه .. كيما حاولت نوضو والو.. بديت نضرب في خدو صراع نوض.. صراع.. قفز و ناض وقف و يمشي فالشومبرة كي شغل واحد يحوس على حاجة و يقول وين راهم؟ قتلو شكون؟ قالي راحو؟ خلاص؟ قتلو صراع تهدن ما كان حتى واحد غير أنا لي راني معاك.. قالي وين راني؟ قتلو راك فالدار معاك قول يااارب.. بدا يحك في وجهو رحت ليه نحيتلو يديه باش نحكم راسو طبعني قد ما عندو حتى طحت فالقاعة و قاسني البونك في خصري وجعتني اخخخخ قالي اخرجي عليا.. حكمت خصري و نصوغ ااااه.. قالي اخرجي علياااااا و طبعني للقاعة، بديت نعيط و نبكي من السطر و هو يحك في راسو و يعيط يااااااااااااااااااا الله ااااااااأاا..
دقدق نائل فتح الباب و دخل شعل الضو قالو راني هنا أبو حرب و هو يعيط من راسو اااااااا... و يرمي فالدوزان دخل سعد قالي وش درتيلوووو..
جاو كامل نوال تخزر و خايفة انا في بلاصتي و نبكي، دخل الحاج قاس الزجاج المكسر زلق فلرض جات الزجاجة في ظهرو ناض يعيط ااااااخخخخ و الدم يشرشر من ظهرو، جا سعد يحكم الحاج باش يخرجو حكمو صراع طيحو فلرض و طاح عليه بالدبازي و نائل و نوال يحاولو يجبدو صراع على سعد طاحو، ناض نائل يجري جاب التشكة دارها لصراع و شربلو دواه و هو يحك في راسو من السطر قعد معاه حتى خدم فيه الدوا و رجعو لفراشو رقد، و أنا تكسلت في بلاصتي رقدت و السطر في جنبي، فطنت الصباح على صوت الباب كي خرج و غلقو موراه حبطت لحقتو، الحاج كان قاعد فالهول قالو وشبيك البارح ياوليدي ندبتلنا سكت و قعد دار ليا قالي جيبيلي كاس لاتاي راسي قتلني.. دخلت للكوزينة صبت لاتاي سخون جبدتلو كاس جديد سربيتلو فيه و ديتهولو كي حكمو عليا شاف في يدي لي محروقة، أم سعد كانت قاعدة قريبة ليه و تعيط على نوال كي بطات بالفطور، رمى عليها كاس لاتاي سخون و قفز و يقولي اخخخ حرقتيني الله لاتربحك .. لاتاي جا على وجهها و صدرها بدات تصوغ يا يما تحرقت يا يما و هو يقولها دفق عليك؟ وين علبالي أنا تحرقت يدي الكاس سخون، و هي ناضت تجري للكوزينة تغسل و تصوغ و الحاج يجري موراها قاعدة غير نشوف فيهم و هوما يصوطيو وحدهم وحدهم كي موڨرڨر.. قالي صراع و هاني حرقتهالك كيما حرقاتك.. أنا نروح نشوف يما و أنت روحي جيبيلي لاتاي وحدوخر و الفطور نفطر مع يما.. ضحكت عليه يخي مريض ههههه..
رحت للكوزينة صبت أم سعد دارت كامل الدواوات في صدرها و وجهها ها البيافين هاد لاميبو ها السيكاتال ها خلا دار الشر... و الحاج يتبع فيها كي البورورو و يقولها نديك للسبيطار؟ قالتلو وليدك خلاص دفع كوارطو ما ينعاشش معاه، قالها أسكتي خير ما يسمعك و نوليو في حل و تربط انا ظهري راهو مذبوح و راني ساكت قلتلهم في قلبي روحو لاه لا تردكم وجوه الشر..
وجدت السنيوة و دخلت لشومبرة الحاجة صبتو يهدر مع يماه قالها اليوم نعيط لعمومي نقولهم غدوا رايح ندير الصدقة على وليدي حرب الله يرحمو، قالتلو و حكاية ليليان؟ قالها راني مخططلها و علبالي كيفاش نطيحهم فالشبكة و نبريها قدام لي يسوى و لي ما يسواش، قالتلو كيفاش؟ قالها يلحقك الصافي غير ما تخافيش الخبر يجيبوه التوالا...